បាត់ដំបងៈ កងរាជអាវុធហត្ថខេត្តបាត់ដំបងកាលពីម្សិលមិញនៅកំពុងបន្តសាកសួរបុរសម្នាក់ ដែលស្លៀកពាក់ឯកសណ្ឋានយោធាពាក់ផ្កាយ៤ ថតបង្ហោះតាមហ្វេសប៊ុក បន្ទាប់ពីត្រូវបានចាប់ឃាត់ខ្លួនកាលពីថ្ងៃទី ៨ ខែមេសាឆ្នាំ ២០២០ នៅភូមិល្វាទេរ ឃុំត្រាង ស្រុកកំរៀង។
លោក ឡាច ប្រុសប្រធានការិយាល័យស្រាវជ្រាវបទល្មើសនៃកងរាជអាវុធហត្ថខេត្តបាត់ដំបងបានប្រាប់ពីម្សិលមិញថា ជនសង្ស័យឈ្មោះ ណាំ កប ភេទប្រុសអាយុ ៣៦ ឆ្នាំគឺសមត្ថកិច្ចកំពុងបន្តនីតិវិធីសាកសួរដោយសារគាត់ស្លៀកពាក់ឯកសណ្ឋានយោធា ហើយបង្ហោះលើបណ្តាញសង្គមហ្វេសប៊ុករបស់គាត់។
ដោយសារតែមានការសង្ស័យ កងរាជអាវុធហត្ថខេត្តបាត់ដំបងបានធ្វើការឆែករកមើលក្នុងបញ្ជីអគ្គបញ្ជាការនៃកងយោធពលខេមរភូមិន្ទមិនឃើញមានឈ្មោះនេះក៏សមត្ថកិច្ចចាប់ផ្តើមបើកការស្រាវជ្រាវដើម្បីរកអត្តសញ្ញាណជនសង្ស័យតាមរយៈប្រព័ន្ធទំនាក់ទំនងសង្គមរបស់គាត់ ដើម្បីឃាត់ខ្លួនជនម្នាក់នេះយកមកសួរនាំ។ ជនសង្ស័យមិនទាន់បោកប្រាស់នរណាទេ តែគាត់ស្លៀកពាក់ ដើម្បីដើរបង្អួតគេឯងក្នុងភូមិគាត់។
លោកប្រុសនិយាយទៀតថា ដោយសារតែអ្នកភូមិឃើញជនសង្ស័យស្លៀកពាក់ឯកសណ្ឋានពាក់ផ្កាយថ្នាក់ឧត្តមសេនីយ៍បែបនេះម្នាក់ៗនាំគ្នានិយាយពេញភូមិថា «អានេះឮថា ចូលធ្វើទាហានម្ង៉ៃនោះសោះឥឡូវពាក់ផ្កាយ៤»។
កាលពីថ្ងៃម្សិលមិញ ភ្នំពេញប៉ុស្តិ៍បានព្យាយាមទូរស័ព្ទទាក់ទងលោក អ៊ន ជ្រីសៅមណ្ឌល ជាមេបញ្ជាការរងកងរាជអាវុធហត្ថខេត្តបាត់ដំបងទទួលផែនព្រហ្មទណ្ឌដែលជាអ្នកទទួលបន្ទុកសួរចម្លើយជនសង្ស័យដែរ ប៉ុន្តែត្រូវបានលោកបដិសេធធ្វើអត្ថាធិប្បាយ។ ប៉ុន្តែបើតាមមន្ត្រីមួយរូបនៃបញ្ជាការដ្ឋានកងរាជអាវុធហត្ថខេត្តបាត់ដំបងបានថ្លែងដោយសុំមិនឲ្យបញ្ចេញឈ្មោះថា ករណីខាងលើនេះកម្លាំងអាវុធហត្ថបានចុះទៅឃាត់ខ្លួនជនសង្ស័យក្នុងភូមិ-ឃុំខាងលើ និងនាំយកមកសាកសួរនៅបញ្ជាការដ្ឋានកងរាជអាវុធហត្ថខេត្ត។
ជនសង្ស័យបានសារភាពប្រាប់សមត្ថកិច្ចថា នៅក្នុងអាខោនហ្វេសប៊ុករបស់គាត់ដាក់ឈ្មោះ ណាំ កប ដែលជាឈ្មោះរបស់គាត់ហើយចំពោះរូបភាពកីឡាករដែលថានៅក្នុងកងពលតូចថ្មើរជើងលេខ ៤១ នៃយោធភូមិភាគទី ៤ នៅក្នុងស្រុកអង្លង់វែងនោះគាត់មិនមែនបម្រើការនៅក្នុងអង្គភាពកងពលតូចនោះទេ។
មន្ត្រីរូបនោះបន្តថា ជនសង្ស័យបានប្រាប់សមត្ថកិច្ចថា ប្រការដែលគាត់ស្លៀកឯកសណ្ឋានយោធា និងមានពាក់ផ្កាយ ៤ ផងនោះ គឺគាត់បានទិញគេយកមកពាក់ ដើម្បីសម្ញែងបង្អួតដល់អ្នកភូមិតែប៉ុណ្ណោះ។ ប៉ុន្តែត្រង់ថាតម្លៃប៉ុន្មាននោះ គាត់ភ្លេចហើយ ហើយក៏គាត់មិនបានទៅបោកប្រាស់នរណាដែរ។ គាត់បានយករូបពាក់ផ្កាយ ៤ នោះដាក់ជាឡូហ្គោនៅក្នុងអាខោនហ្វេសប៊ុកគាត់។
មន្ត្រីអាវុធហត្ថរូបនោះបន្តទៀតថា តាមរយៈការឃាត់ខ្លួនជនសង្ស័យខាងលើ និងតាមរយៈការដកហូតបានវត្ថុតាងមួយចំនួនក្នុងនោះសមត្ថកិច្ចបានរកឃើញមានស្លាកឈ្មោះ ហង់ សំណាង មួយទៀតដែលឈ្មោះនេះ សមត្ថកិច្ចកំពុងតែស្រាវជ្រាវថា តើមានម្ចាស់ពិតប្រាកដឬយ៉ាងណា?
បើតាមមន្ត្រីអាវុធហត្ថរូបនេះក្រោយឃាត់ខ្លួន សមត្ថកិច្ចដកហូតបានវត្ថុតាងមានស័ក្ដិស្មា ផ្កាយ ៤ ចំនួន ១ គូរ ស័ក្ដិអាវប្រយុទ្ធ ១ គូ ស្លាកឈ្មោះ នាយឧត្តមសេនីយ៍ ១ មេដាយ ១ កំប្លេ ឯកសណ្ឋានប្រយុទ្ធ ១ កំប្លេ សញ្ញាសម្គាល់ នាយឧត្តមសេនីយ៍ ១ គូ និងស្លាកឈ្មោះ ហង់ សំណាង ចំនួន ១ ផងដែរ៕