.jpg)
ភ្នំពេញៈ សមត្ថកិច្ចកងរាជអាវុធហត្ថខណ្ឌពោធិ៍សែនជ័យ កំពុងចាត់ការទៅតាមបណ្ដឹងរបស់ម្ចាស់ផ្ទះសំណាក់ KIS ដែលប្ដឹងចោទមន្ដ្រីយោធា ថ្នាក់វរសេនីយ៍ទោម្នាក់ ពាក់ព័ន្ធករណីជេរប្រមាថ និង គំរាមកំហែង ដោយប្រើអាវុធនៅពេលរាត្រី ខណៈគូទំនាស់គឺជាអ្នកជិតខាងនឹងគ្នា។
លោក ជឹម ឫទ្ធី មេបញ្ជាការកងរាជអាវុធហត្ថខណ្ឌនេះបានប្រាប់ភ្នំពេញប៉ុស្តិ៍ កាលពីថ្ងៃអាទិត្យថា មន្ត្រីយោធាដែលរងការប្ដឹងមានឈ្មោះ ជា សុខហេង មានលំនៅក្នុងសង្កាត់ចោមចៅ ៣ ខណ្ឌពោធិ៍សែនជ័យ រាជធានីភ្នំពេញ ជាប់នឹងផ្ទះសំណាក់ KIS ផ្នែកខាងក្រោយ។
លោកបានបន្តថា តាមពាក្យបណ្ដឹងដែលមានភ្ជាប់ខ្សែវីដេអូគ្លីប ជនសង្ស័យបានកាន់កាំភ្លើងដើរចូលទៅអង្រួនទ្វាររបងផ្ទះសំណាក់ KIS ហើយបានស្រែកជេរប្រមាថ កាលពីម៉ោងជាង ១ រំលងអធ្រាត្រ ឈានចូល ថ្ងៃទី ១ ខែ ឧសភា ឆ្នាំ ២០២០។
លោក ឫទ្ធី បានថ្លែងថា ម្ចាស់ផ្ទះបញ្ជាក់ប្រាប់សមត្ថកិច្ចថា៖ «ខ្ញុំ និង លោក ជា សុខហេង គឺជាអ្នកជិតខាងនឹងគ្នា ហើយពួកយើងពុំធ្លាប់មានបញ្ហាឈ្លោះប្រកែក ឬ ទំនាស់អ្វីនឹងគ្នានោះទេកាលពីមុនមក។ ប៉ុន្តែនៅយប់ថ្ងៃកើតហេតុ ខ្ញុំមិនដឹងថា គាត់មានកំហឹងពីណាមកទេហើយមានគោលបំណងអ្វីមកលើខ្ញុំនោះដែរ ដោយគាត់បានកាន់កាំភ្លើងស្រែកឡូឡា និង ចូលមកគំរាមដល់មុខផ្ទះសំណាក់របស់ខ្ញុំផ្អើលអស់គេឯង»។
លោកបានបន្តថា ដោយបារម្ភពីសុវត្ថិភាពក្រុមគ្រួសារ និង បុគ្គលិក ម្ចាស់ផ្ទះសំណាក់នេះ ក៏បានដាក់ពាក្យប្ដឹងមកសមត្ថកិច្ចកងរាជអាវុធហត្ថខណ្ឌ ដើម្បីជួយអន្តរាគមន៍កោះហៅមន្ត្រីយោធាខាងលើនេះមកសួរនាំនិងចាត់វិធានអប់រំតាមវិន័យកងទ័ព។
លោកបានបញ្ជាក់ថា៖ «ក្រោយកើតហេតុជនសង្ស័យបានគេចខ្លួន។ តែទោះជាបែបណាពេលនេះមន្ត្រីជំនាញយើងកំពុងចាត់ការលើសំណុំរឿងនេះទៅតាមនីតិវិធីច្បាប់»៕
