ព្រះសីហនុៈ កងរាជអាវុធហត្ថខេត្តព្រះសីហនុ បានបញ្ជូនមនុស្សប្រុសស្រី ៣ នាក់ទៅសាលាដំបូងខេត្តព្រះសីហនុ កាលពីម្សិលមិញ ពាក់ព័ន្ធបទបង្ខាំងមនុស្សខុសច្បាប់ ក្នុងរឿងទំនាស់ដីធ្លីមួយ ស្ថិតនៅភូមិស្ទឹងឆាយខាងជើង ឃុំស្ទឹងឆាយ ស្រុកកំពង់សិលា ដែលបានកើតឡើងកាលពីថ្ងៃទី ៤ ខែកុម្ភៈ ឆ្នាំ ២០១៩។
លោក កែវ សុផល មេបញ្ជាការរង នៃទីបញ្ជាការដ្ឋានកងរាជអាវុធហត្ថខេត្តព្រះសីហនុ បានប្រាប់ភ្នំពេញប៉ុស្តិ៍ពីម្សិលមិញថា ជន ៣ នាក់ ដែលពាក់ព័ន្ធបទបង្ខាំងមនុស្សនោះ លោកមិនបានចាំឈ្មោះពួកគេទេ ព្រោះលោកជាប់បំពេញបេសកកម្មនៅក្រៅការិយាល័យ ប៉ុន្តែពួកគេ ត្រូវបានបញ្ជូនទៅសាលាដំបូងខេត្តព្រះសីហនុកាលពី ម្សិលមិញ។
លោកថ្លែងថា៖ «ជន ៣ នាក់នោះ សមត្ថកិច្ចខ្ញុំត្រូវតែបញ្ជូនទៅតុលាការហើយបើទោះជាមានការស្នើសុំសម្រុះសម្រួលពីភាគីបង្កក្តី ព្រោះខាងដើមបណ្តឹងឲ្យធ្វើតាមច្បាប់។ រឿងនេះតាមគោលការណ៍ គឺព្រះរាជអាជ្ញាអមសាលាដំបូងខេត្តព្រះសីហនុ បង្គាប់ឲ្យខាងខ្ញុំបញ្ជូនទៅតុលាការទាំងអស់នៅថ្ងៃនេះ (ថ្ងៃទី ៦ កុម្ភៈ)»។
លោកបញ្ជាក់ថា រឿងហេតុនេះកើតឡើង ជាប់ពាក់ព័ន្ធទៅនឹងរឿងទំនាស់ដីធ្លី រវាងភាគីទាំង ២ ហើយដើមហេតុដែលបណ្តាលឲ្យកើតមានបទល្មើសនេះ គឺដោយសារតែភាគីជនរងគ្រោះ គាត់ជិះម៉ូតូតាមផ្លូវ ហើយភាគីបង្កមានការសង្ស័យថា ជនរងគ្រោះ បានជិះម៉ូតូចូលទៅក្នុងដីទំនាស់នោះ ក៏ពួកគេបានឃាត់ជនរងគ្រោះ និងដកយកសោម៉ូតូរបស់ជនរងគ្រោះទៀត ទើបជនរងគ្រោះបានប្តឹងទៅកងរាជអាវុធហត្ថស្រុកកំពង់សិលា។
លោកបន្តថា៖ «ពួកគាត់ (ក្រុមជនសង្ស័យ) មិនត្រូវធ្វើអ៊ីចឹងទេ តើពួកគាត់អាងអី បានជាទៅឃាត់ និងដកសោម៉ូតូគេ ព្រោះជាប្រជាពលរដ្ឋធម្មតាហ្នឹង។ អាហ្នឹងគឺវាខុសច្បាប់មួយហើយ»។
បើតាមមន្រ្តីអាវុធហត្ថស្រុកកំពង់សិលាដែលបដិសេធប្រាប់ឈ្មោះថា ជនសង្ស័យទាំង ៣ នាក់ ១.ឈ្មោះ សំ សុខុន ភេទស្រី អាយុ ៥៨ ឆ្នាំ (ម្តាយ) ទី២.ឈ្មោះ រ៉ាន ដាលុច ភេទប្រុស អាយុ ៣៦ ឆ្នាំ (កូន) ទី៣.ឈ្មោះ ពុធ នូ ភេទប្រុស អាយុ ២៧ ឆ្នាំ (ក្មួយ) ពួកគេមានទីលំនៅក្នុងភូមិឃុំកើតហេតុខាងលើ។ រីឯជនរងគ្រោះឈ្មោះ ប៊ុន យុទ្ធា អាយុ ៦៤ ឆ្នាំ មានទីលំនៅភូមិឆាយខាងត្បូង ឃុំស្ទឹងឆាយ ស្រុកកំពង់សីលា។
មិនអាចទាក់ទងប្រភពគូជម្លោះទាំង ២ ដើម្បីសុំអធិប្បាយបន្ថែមលើបញ្ហានេះបានទេកាលពីម្សិលមិញ៕