ភ្នំពេញៈ ក្រុមប្រឹក្សាវិន័យ កងរាជអាវុធហត្ថលើផ្ទៃប្រទេសនឹងបើកកិច្ចប្រជុំនៅថ្ងៃអង្គារនេះ បន្ទាប់ពីក្រុមអធិការកិច្ចបានបញ្ចប់ការស៊ើបអង្កេតទៅលើមេបញ្ជាការកងរាជអាវុធហត្ថ ខេត្តកំពង់ឆ្នាំង កំពង់ស្ពឺ និងខេត្តព្រះវិហារដែលត្រូវបានគេចោទថា មានជាប់ពាក់ព័ន្ធនឹងករណីប្រព្រឹត្តអំពើពុករលួយ។ នេះបើតាមលោកនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស។
ការកោះប្រជុំក្រុមប្រឹក្សាវិន័យរបស់កងរាជអាវុធហត្ថនេះធ្វើឡើងបន្ទាប់ពីក្រុមអធិការកិច្ចកងរាជអាវុធហត្ថបានបញ្ចប់ការស៊ើបអង្កេតទៅលើលោក កង សៅគុណ មេបញ្ជាការកងរាជអាវុធហត្ថខេត្តព្រះវិហារដែលត្រូវបានសារព័ត៌មានក្នុងស្រុកចុះផ្សាយថា បានស៊ីដាច់ លុយលោក ហ៊ីង ប៊ុនហៀង មេបញ្ជាការកងអង្គរក្សលោកនាយករដ្ឋមន្ត្រី ហ៊ុន សែន ប្រមាណ ៨០ លានរៀលកាលពីអំឡុងយុទ្ធនាការបោះឆ្នោតជាតិកាលពីខែកក្កដា និងបានប្រព្រឹត្តអំពើពុករលួយផ្សេងទៀត។
លោក ជូ សារុន មេបញ្ជាការ កងរាជអាវុធហត្ថខេត្តកំពង់ស្ពឺបានយកអង្ករឧបត្ថម្ភរបស់លោក ហ៊ុន ម៉ានី កូនប្រុសលោក ហ៊ុន សែន និងស៊ីដាច់លុយការពារបោះឆ្នោតជ្រើសរើសសមាជិកព្រឹទ្ធសភា និងការបោះឆ្នោតជ្រើសរើសតំណាងរាស្ត្រកាលពីខែកក្កដា និងអំពើពុករលួយផ្សេងទៀត ខណៈលោក សាក់ សារ៉ាង មេបញ្ជាការអាវុធហត្ថខេត្តកំពង់ឆ្នាំងក៏សង្ស័យពាក់ព័ន្ធប្រព្រឹត្តអំពើពុករលួយ និងការយកលុយពីឈ្មួញរកស៊ីឈើផងដែរ។
លោក សៅ សុខា បានប្រាប់ភ្នំពេញប៉ុស្តិ៍ថា ក្រុមប្រឹក្សាវិន័យរបស់កងរាជអាវុធហត្ថនឹងបើកកិច្ចប្រជុំនៅថ្ងៃអង្គារនេះហើយ ដើម្បីពិភាក្សាទៅលើករណីការស៊ើបអង្កេតលើមេបញ្ជាការកងរាជអាវុធហត្ថ ខេត្តកំពង់ឆ្នាំង កំពង់ស្ពឺ និងខេត្តព្រះវិហារដែលសង្ស័យថាបានជាប់ពាក់ព័ន្ធនឹងករណីអំពើពុករលួយ។
លោកបានបញ្ជាក់ថា៖ «ស្អែកបានគេប្រជុំស្តាប់របាយការណ៍ ហើយក្រុមប្រឹក្សាវិន័យគេវាយតម្លៃ។ យើងពិនិត្យវាយតម្លៃ។ យើងពិនិត្យ មើលថាតើដំណើររឿងនៃការប្រព្រឹត្តហ្នឹងមានកំហុសផ្នែកខាងវិន័យវាមានអ្វីខ្លះហើយផ្នែកខាងក្របខ័ណ្ឌច្បាប់មានអ្វីខ្លះដែរ (បើគាត់បានប្រព្រឹត្ត) យើងនឹងអនុវត្តពិន័យទៅតាមច្បាប់លក្ខន្តិកៈនៃកងយោធពលខេមរភូមិន្ទ ហើយបើគាត់រំលោភបំពានច្បាប់ យើងធ្វើទៅតាមផ្លូវច្បាប់»។
កាលពីថ្ងៃទី ២៥ ខែតុលាលោក សាក់ សារ៉ាង មេបញ្ជាការកងរាជអាវុធហត្ថខេត្តកំពង់ឆ្នាំងបានបដិសេធការចោទប្រកាន់ដែលថាលោកពាក់ព័ន្ធការប្រព្រឹត្តអំពើពុករលួយ និងយកលុយពីឈ្មួញរកស៊ីឈើដោយបានថ្លែងថា លោកបាននិងកំពុងស្វែងរកមនុស្សដែលបានចោទប្រកាន់រូបលោក។
លោកចោទសួរថា៖ «តើខ្ញុំទៅពុករលួយជាមួយពីណា? ខ្ញុំយកលុយពីផ្ទះខ្ញុំធ្វើបន្ទាយផងទៅពុករលួយមកពីណា? ខ្ញុំកំពុងរកអ្នកដែលចោទខ្ញុំ ប្តឹងដាក់ចូលតុលាការដើម្បីធ្វើការកោះហៅវាយកមកសួរ»។
លោក កង សៅគុណ មេបញ្ជាការកងរាជអាវុធហត្ថខេត្តព្រះវិហារក៏បានបដិសេធដែរថា លោកបានស៊ីដាច់លុយរបស់លោក ហ៊ីង ប៊ុនហៀង ប្រមាណ ៨០ លានរៀលកាលពីអំឡុងយុទ្ធនាការបោះឆ្នោតជាតិកាលពីខែកក្កដា និងបានប្រព្រឹត្តអំពើពុករលួយផ្សេងទៀត។ «ខ្ញុំមិនបានប្រព្រឹត្ត។ យើងទុកឲ្យថ្នាក់លើគាត់ធ្វើការងារថា តើនរណាខុសនរណាត្រូវ?»។
លោ សន ជ័យ នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជាថ្លែងថា ការស៊ើបអង្កេតរបស់អាវុធហត្ថលើផ្ទៃប្រទេសទៅលើមន្ត្រីរបស់ខ្លួន អាចនឹងមានការលំបាកដើម្បីបង្ហាញថា មន្ត្រីទាំងនោះជាប់ពាក់ព័ន្ធនឹងអំពើពុករលួយដោយសារមិនមានអង្គភាពប្រឆាំងអំពើពុករលួយចូលរួម។ «គេមិនអាចយកកាំបិតទៅចិតដងឯងកើតទេ។ មន្ត្រីក្នុងតំណែងដូចកងរាជអាវុធហត្ថ ឬកងកម្លាំងប្រដាប់អាវុធកម្រនឹងមានការស៊ើបអង្កេតល្អិតល្អន់ណាស់ លុះត្រាតែមានការសហការគ្នា»៕