ភ្នំពេញៈ បណ្ដាញផ្លូវសត្វស្លាបអាស៊ាន (ASEAN Flyway Network) បានបើកកិច្ចប្រជុំលើកទី២ ស្ដីពីការអភិរក្សដីសើម និងការផ្លាស់ទីរបស់សត្វស្លាបលើទឹក ដើម្បីចែកអំពីព័ត៌មាន និងសកម្មភាពដ៏ល្អប្រសើរ ដែលអាចមានសារៈសំខាន់សម្រាប់ដាក់បញ្ចូលឱ្យអនុវត្តដំណាក់កាលទី២ របស់គម្រោងស្ដីពីការលើកកម្ពស់ការអភិរក្សជីវចម្រុះនៅតំបន់ដីសើម និងការផ្លាស់ទីរបស់សត្វស្លាបនៅលើទឹក។ យោងតាមសេចក្ដីប្រកាសព័ត៌មានរបស់បណ្ដាញផ្លូវសត្វស្លាបអាស៊ាន ដែលភ្នំពេញប៉ុស្តិ៍ទទួលបានថ្មីៗនេះ។
សេចក្ដីប្រកាសព័ត៌មាននេះបានឲ្យដឹងថា កិច្ចប្រជុំលើកទី២ នេះ ដែលមានអ្នកតំណាងមកពីប្រទេស កម្ពុជា ឥណ្ឌូនេស៊ី ឡាវ ម៉ាឡេស៊ី មីយ៉ាន់ម៉ា ហ្វីលីពីន វៀតណាម និងប្រទេស ថៃ គឺបានធ្វើឡើងនៅថ្ងៃទី ១៣ ដល់ថ្ងៃទី ១៥ ឧសភាកន្លងទៅនេះ នៅក្នុងទីក្រុង Kuching រដ្ឋ Sarawak ប្រទេស ម៉ាឡេស៊ី បានពិភាក្សាគ្នាអំពីការចុះសិក្សា និងការធ្វើសកម្មភាពផ្សេងៗ ដែលបានធ្វើឡើងនៅក្នុងដំណាក់កាលទី១ នៃគម្រោង និងបានពិភាក្សាគ្នាស្វែងរកអនុសាសន៍បន្ថែម ស្ដីពីការពង្រឹងសមត្ថភាពក្នុងការគ្រប់គ្រងដីសើម និងការផ្លាស់ទីរបស់សត្វស្លាបនៅលើទឹក និងស្ដីពីការលើកកម្ពស់ ការទំនាក់ទំនង ការអប់រំ ការយល់ដឹងរបស់មហាជន ពាក់ព័ន្ធគុណតម្លៃនៃការផ្លាស់ទី និងជម្រករបស់សត្វស្លាបលើទឹក សម្រាប់ការអនុវត្តក្នុងដំណាក់កាលទី២។
សេចក្ដីប្រកាសព័ត៌មានដដែលនេះបានឲ្យដឹងទៀតថា គម្រោងលើកកម្ពស់ការអភិរក្សការផ្លាស់ទីសត្វស្លាបលើទឹកនិងដីសើមនៅក្នុងតំបន់អាស៊ាន គឺជាគំនិតផ្ដួចផ្ដើមមួយគាំទ្រដោយមូលនិធិរួមគ្នាជប៉ុន-អាស៊ាន (JAIF) និងមជ្ឈមណ្ឌលអាស៊ានសម្រាប់ជីវចម្រុះដែលដឹកនាំដោយប្រទេស សិង្ហបុរី។
កម្ពុជាមានដីសើមប្រមាណ ៥ លានហិកតា ដែលស្មើនឹង ២៨ ទៅ ៣៣% នៃផ្ទៃដីសរុប ហើយដល់ពេលនេះ រដ្ឋាភិបាលបានបង្កើតឱ្យមានតំបន់រ៉ាមសារបានចំនួន ៥ កន្លែង ដែលមានផ្ទៃក្រឡាសរុបចំនួន ៨៥.២៣៥ ហិកតា ស្ថិតនៅតំបន់ទន្លេមេគង្គខេត្តស្ទឹងត្រែង កោះកាពិ ខេត្តកោះកុង បឹងទន្លេសាបក្នុងខេត្តបាត់ដំបង និងបឹងទន្លេឆ្មារ និងស្ទឹងសែននៅក្នុងខេត្តកំពង់ធំ។ នេះបើតាមរបាយការណ៍រស់ក្រសួងបរិស្ថាន។
លោក នេត ភក្ដ្រា មន្ត្រីនាំពាក្យក្រសួងបរិស្ថានបានបញ្ជាក់ថា ក្រសួងបានរៀបចំផែនការជាបន្តបន្តាប់ដើម្បីការពារដីសើមទាំងនេះ។
លោកថា៖ «ក្រសួងបរិស្ថានបាននិងកំពុងរៀបចំ និងអនុវត្តផែនការគ្រប់គ្រង រួមទាំងផែនការប្រចាំឆ្នាំសម្រាប់គ្រប់គ្រងតំបន់ដីសើមទាំងនោះ ដែលផ្ដោតសំខាន់លើការបោះបង្គោលព្រំប្រទល់ ការចូលរួមគ្រប់គ្រងរបស់សហគមន៍ និងលើកស្ទួយជីវភាពរស់នៅ ការអភិវឌ្ឍអេកូទេសចរណ៍ ការអប់រំផ្សព្វផ្សាយ សិក្សាស្រាវជ្រាវ និងការពង្រឹងការអនុវត្តច្បាប់»។
លោក ប៊ូ វរសក្ស នាយកកម្មវិធីនៃអង្គការជីវិតសត្វស្លាបអន្តរជាតិ (Birdlife) ប្រចាំប្រទេសកម្ពុជាបានលើកឡើងដែរថា តំបន់រ៉ាមសារ គឺជាតំបន់ដីសើមដែលអន្តរជាតិទទួលស្គាល់ថាមានសារៈសំខាន់ជាលក្ខណៈអន្តរជាតិ ដោយសារតំបន់ទាំងនេះកំពុងមានសត្វស្លាបដែលរងការផុតពូជកំពុងរស់នៅ និងតម្រូវឱ្យមានការអភិរក្ស។
ប៉ុន្តែលោកថា តំបន់អភិរក្សទាំងនេះ កំពុងត្រូវរងការគំរាមកំហែងជាបន្តបន្ទាប់ ដោយសារការទន្ទ្រានយកដី ការប្រើប្រាស់ជីក្នុងវិស័យកសិកម្មធ្វើឱ្យប៉ះពាល់ប្រព័ន្ធអេកូឡូស៊ី ការបរបាញ់និងនេសាទខុសច្បាប់ និងការប្រែប្រួលអាកាសធាតុ។
លោកថា៖ «ពាក់ព័ន្ធនឹងការកាត់បន្ថយការទន្ទ្រានយកដីហ្នឹង យើង (អង្គការសង្គមស៊ីវិល និងក្រសួងបរិស្ថាន) កំពុងសហការគ្នា ដើម្បីធ្វើតំបន់គ្រប់គ្រង តំបន់ណាត្រូវទុកឱ្យប្រជាជនប្រើប្រាស់ តំបន់ណាដែលគួរតែទុកដើម្បីអភិរក្ស ហើយយើងមានសកម្មភាព អប់រំផ្សព្វផ្សាយ និងសំខាន់បំផុត គឺយើងមានសកម្មភាពលើកកម្ពស់ជីវភាពសហគមន៍តាមរយៈជួយលើវិស័យកសិកម្មរបស់ពួកគាត់ ក៏ដូចជាជួយគាត់បង្កើតជាសហគមន៍នេសាទជាដើម»។
លោក ប៊ូ វរសក្ស ថ្លែងថារដ្ឋាភិបាលកំពុងសិក្សាដើម្បីបង្កើតតំបន់រ៉ាមសារថែមទៀត ព្រោះការការពារដីសើម គឺជាសារ:សំខាន់សម្រាប់ប្រើប្រាស់ធ្វើជាតំបន់ទេសចរណ៍ និងជាពិសេសគឺជួយការពារធនធានត្រីឱ្យមាននិរន្តរភាពអាចប្រើប្រាស់បានយូរអង្វែង។
សេចក្ដីប្រកាសព័ត៌មាននេះបានឲ្យដឹងដែរថា តំបន់ដីសើម ត្រូវបានគេចាត់ទុកថា គឺជាផ្នែកដ៏សំខាន់សម្រាប់បរិស្ថានធម្មជាតិ ដោយសារវាជួយការពារការបាក់ច្រាំង ទប់ស្កាត់ទឹកជំនន់ ស្រូបជាតិពុល លើកកម្ពស់គុណភាពទឹក ហើយបានផ្ដល់ជាទីតាំងសម្រាប់ធ្វើជម្រករបស់សត្វស្លាប សត្វគ្រប់ប្រភេទ ព្រៃឈើ និងជាទីតាំងសម្បូរជីវចម្រុះរស់នៅ។
សម្រាប់សត្វស្លាប ដីសើមគឺជាប្រភពទឹកសម្រាប់ផឹក ហើយត្រូវបានប្រើប្រាស់ទីតាំងធ្វើជម្រក បង្កាត់ពូជ ធ្វើសម្បុក ការប្រាស្រ័យទាក់ទងរវាងបក្សីឈ្មោលញី និងទីតាំងសម្រាប់សត្វបក្សីចិញ្ចឹមកូន៕