.jpg)
លោក ប្រាក់ សុខុន និងមន្ត្រីកម្ពុជាក្នុងកិច្ចប្រជុំរដ្ឋមន្ត្រីការបរទេសអាស៊ាន-ចិន។ រូបថត ក្រសួងការបរទេស
ភ្នំពេញៈ រដ្ឋមន្ត្រីការបរទេសអាស៊ាន និងចិន នឹងបង្កើនកិច្ចសហប្រតិបត្តិការរួមគ្នាដើម្បីប្រឆាំងនឹងជំងឺឆ្លង COVID-19 តាមរយៈការចែករំលែកព័ត៌មាន និងឧត្តម្មានុវត្តឱ្យបានទាន់ពេលវេលា និងបានប្តេជ្ញាធ្វើការរួមគ្នា ដើម្បីលើកកម្ពស់សមត្ថភាពក្នុងការទប់ស្កាត់ និងគ្រប់គ្រងជំងឺឆ្លងនៅក្នុងតំបន់ និងពិភពលោក។
កិច្ចប្រជុំពិសេសនៃក្រុមប្រឹក្សាសម្របសម្រួលអាស៊ាន កិច្ចប្រជុំពិសេសនៃរដ្ឋមន្ត្រីការបរទេសអាស៊ាន-ចិនស្តីពីជំងឺឆ្លងផ្លូវដង្ហើមកូរ៉ូណា (COVID-19) និងកិច្ចប្រជុំរដ្ឋមន្ត្រីការបរទេសមេគង្គ-ឡានឆាងលើកទី ៥ បានធ្វើឡើងរយៈពេល ២ ថ្ងៃចាប់ពីថ្ងៃទី ១៩ ដល់ថ្ងៃទី ២០ ខែ កុម្ភៈ ឆ្នាំ ២០២០ នៅទីក្រុងវៀងចន្ទន៍ប្រទេស ឡាវ។
យោងតាមសេចក្ដីប្រកាសព័ត៌មានរបស់ក្រសួងការបរទេសកម្ពុជាដែលចេញនៅថ្ងៃទី ២៣ ខែកុម្ភៈបានឲ្យដឹងថា ក្នុងអំឡុងពេលនៃកិច្ចប្រជុំពិសេសនៃរដ្ឋមន្ត្រីការបរទេសអាស៊ាន-ចិនស្តីពីករណីជំងឺឆ្លង COVID-19 ក្រោមការដឹកនាំដោយសហប្រធានដែលមានរដ្ឋមន្ត្រីការបរទេសហ្វីលីពីនជាប្រទេសសម្របសម្រួល ដៃគូសន្ទនាអាស៊ាន-ចិន និងរដ្ឋមន្ត្រីការបរទេសចិន រដ្ឋមន្ត្រីការបរទេស អាស៊ានបានសម្តែងនូវទំនុកចិត្តយ៉ាងពេញទំហឹងចំពោះរដ្ឋាភិបាល និងប្រជាជនចិនដែលនឹងអាចជម្នះលើជំងឺឆ្លង COVID-19។
ជាកិច្ចឆ្លើយតបលោកសហប្រធានលោក វ៉ាង យី ដែលជារដ្ឋមន្ត្រីការបរទេសចិន បានថ្លែងអំណរគុណដល់ប្រទេសសមាជិកអាស៊ានចំពោះសមានចិត្តគាំទ្រ និងជំនួយរបស់អាស៊ាន។ រដ្ឋមន្ត្រីការបរទេសអាស៊ាន និងចិនបានកត់សម្គាល់ដោយការពេញចិត្តចំពោះការឆ្លើយតបរួមជាបន្ទាន់ និងសាមគ្គីភាពជាប្រពៃណីក៏ដូចជាការជួយជ្រោមជ្រែងគ្នាទៅវិញទៅមកក្នុងគ្រាលំបាក ជាពិសេសការចាត់វិធានការដ៏ម៉ឺងម៉ាត់ដើម្បីដោះស្រាយជំងឺឆ្លង COVID-19 តាមរយៈការចែករំលែកព័ត៌មានយ៉ាងឆាប់រហ័ស និងកិច្ចខិតខំប្រឹងប្រែងចាំបាច់នានាក្នុងការទប់ស្កាត់នូវការរីករាលដាលជំងឺ និងការការពារសន្តិសុខសុខភាពសាធារណៈក្នុងតំបន់ និងពិភពលោក។
សេចក្ដីប្រកាសបញ្ជាក់ថា៖ «រដ្ឋមន្ត្រីការបរទេសអាស៊ាន និងចិនក៏បានពិភាក្សាអំពីការពង្រឹង និងពង្រីកកិច្ចសហប្រតិបត្តិការ និងវិធានការសម្របសម្រួលរវាងអាស៊ាន និងចិនមានជាអាទិ៍៖- បង្កើនកិច្ចសហប្រតិបត្តិការរួមគ្នាប្រឆាំងនឹងជំងឺឆ្លង COVID-19 តាមរយៈការចែករំលែកព័ត៌មាន និងឧត្តម្មានុវត្តឱ្យបានទាន់ពេលវេលា។ ជំរុញឱ្យមានកិច្ចសន្ទនាគោលនយោបាយ និងការផ្លាស់ប្តូរព័ត៌មានវិវត្តចុងក្រោយអំពីជំងឺឆ្លង COVID-19 ដែលរួមមាន ការត្រួតពិនិត្យ និងការព្យាបាល។ ធ្វើការរួមគ្នាដើម្បីលើកកម្ពស់សមត្ថភាពក្នុងការទប់ស្កាត់ និងគ្រប់គ្រងជំងឺឆ្លងនឹងជាការរើបឡើងវិញនូវជំងឺឆ្លង រួមមានករណី COVID-19 ជាដើម»។
ក្នុងអំឡុងពេលនៃកិច្ចប្រជុំខាងលើនេះលោករដ្ឋមន្ត្រី ប្រាក់ សុខុន ថ្លែងថា ប្រទេសកម្ពុជាប្តេជ្ញាចិត្តបន្តជួយ និងសហការយ៉ាងក្លៀវក្លាជាមួយរដ្ឋាភិបាល និងប្រជាជនចិនដើម្បីប្រយុទ្ធប្រឆាំងនឹង COVID-19 និងដោយមានកិច្ចសហប្រតិបត្តិការជាមួយអាស៊ាន និងបន្តជំរុញការសម្របសម្រួល និងសហការជាមួយចិនក្នុងការទប់ស្កាត់ និងលុបបំបាត់ទាំងស្រុងជំងឺឆ្លង COVID-19។
រដ្ឋមន្ត្រីការបរទេសអាស៊ានបានគូសបញ្ជាក់អំពីសារៈសំខាន់នៃការរួបរួមគ្នាជាធ្លុងមួយ និងមានការឆ្លើយតបខ្ពស់របស់អាស៊ានក្នុងការដោះស្រាយបញ្ហា ជំងឺឆ្លង COVID-19 និងបានសង្កត់ធ្ងន់ពីការប្តេជ្ញាចិត្តរបស់ប្រទេសសមាជិកអាស៊ានក្នុងការទប់ស្កាត់នូវផលប៉ះពាល់ដែលបណ្តាលមកពីជំងឺឆ្លងនេះ ទៅលើដំណើរការកសាង សហគមន៍ អាស៊ាន ក៏ដូចជាដំណើរការជាប្រក្រតីរបស់អាស៊ាន។
ទន្ទឹមជាមួយគ្នានេះដែរនៅកិច្ចប្រជុំរដ្ឋមន្ត្រីការបរទេស មេគង្គ-ឡានឆាងលើកទី ៥ ដែលមានលោក សាលើមសៃ គុំម៉ាស៊ីតរដ្ឋមន្ត្រីការបរទេសឡាវ និងលោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសចិនជាសហប្រធាន និងមានការចូលរួមពីរដ្ឋមន្ត្រីការបរទេសកម្ពុជា មីយ៉ាន់ម៉ា ថៃ និងវៀតណាមបានសម្តែងការកោតសរសើរចំពោះវឌ្ឍនភាពនៃការអនុវត្តលទ្ធផលនៃកិច្ចប្រជុំកំពូលមេគង្គឡានឆាងលើកទី ២ និងកិច្ចប្រជុំរដ្ឋមន្ត្រីការបរទេសមេគង្គ-ឡានឆាងលើកទី ៤ ព្រមទាំងការអនុវត្តផែនការសកម្មភាព ៥ ឆ្នាំ មេគង្គ-ឡានឆាង (២០១៨-២០២២)។
សេចក្តីប្រកាសព័ត៌មានបន្តថា៖ «រដ្ឋមន្ត្រីបានឯកភាពគ្នាក្នុងការជំរុញកិច្ចសន្ទនាក្នុងចំណោមគណបក្សនយោបាយ ពង្រឹងទំនាក់ទំនងសេដ្ឋកិច្ចវប្បធម៌ និងប្រជាជនព្រមទាំងបង្កើនកិច្ចខិតខំប្រឹងប្រែងដើម្បីដោះស្រាយបញ្ហាសន្តិសុខមិនមែនប្រពៃណីដែលរួមមានភេរវកម្ម បទឧក្រិដ្ឋតាមប្រព័ន្ធអ៊ីនធឺណិតគ្រោះធម្មជាតិ ជំងឺឆ្លង ការជួញដូរមនុស្ស និងគ្រឿងញៀនខុសច្បាប់ និងការរត់ពន្ធ និងការជួញដូរសព្វាវុធ»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាថ្លែងថា កិច្ចប្រជុំរវាងរដ្ឋមន្ត្រីការបរទេស អាស៊ាន និងចិនបានទទួលផ្លែផ្កាល្អ ដោយសារតែភាគីទាំងអស់បានប្តេជ្ញារួមគ្នាក្នុងការទប់ស្កាត់ និងដោះស្រាយការរីករាលដាលនៃ COVID-19 ហើយថា តាមរយៈយន្តការថ្មីនេះ នឹងធ្វើឲ្យប្រសើឡើងនូវវិស័យសេដ្ឋកិច្ច និងទេសចរណ៍ ខណៈដែលខ្សែចង្វាក់ផលិតកម្មបានទទួលរងនូវផលប៉ះពាល់នៃការរីករាលដាលនៃជំងឺនេះ។
លោកបញ្ជាក់ថា៖ «ប្រទេសទាំងអស់នឹងមានវិធានការជាក់លាក់បន្ថែមទៀត ហើយនិងការផ្លាស់ប្តូរព័ត៌មានគ្នាក្នុងការជួយគ្នាទៅវិញទៅមកក្នុងការទប់ស្កាត់ការរីករាលដាលជំងឺដែលជាកង្វល់រួមកម្រិតតំបន់ និងពិភពលោក។ ចំណុចនេះគឺជាអាទិភាពដែលត្រូវការដោះស្រាយបន្ទាន់ពីព្រោះវាមានការគំរាមកំហែងពិភពលោក ហើយទំហំនៃការប៉ះពាល់របស់វាមានទាំងវិស័យសេដ្ឋកិច្ច និងទេសចរណ៍ហើយខ្សែ ចង្វាក់ ផលិតកម្មមួយចំនួនក៏ត្រូវបានរំខានដោយបញ្ហានេះ»៕
