The Phnom Penh Post Search

Search form




Logo of Phnom Penh Post newspaper Phnom Penh Post - អា​ជ្ញា​ធរ​បង្កើន​ការ​កម្ចាត់​វីរុសH5N1

អា​ជ្ញា​ធរ​បង្កើន​ការ​កម្ចាត់​វីរុសH5N1

អា​ជ្ញា​ធរ​បង្កើន​ការ​កម្ចាត់​វីរុសH5N1

130208 10
មាន់ត្រូវបានគេដឹកជាមួយអ្នកដំណើរ ពីខេត្តកំពង់ចាម ចូលមករាជធានីភ្នំពេញកាលពីខែមុន ហេង ជីវ័ន

ភ្នំពេញៈ បន្ទាប់​ពី​មាន​ករណី​ស្លាប់​ដោយសារ​គ្រុន​ផ្តាសាយ​បក្សី ចំនួន​បួន​ករណី​កាល​ពី​ខែ​មុន ​អាជ្ញាធរ​មាន​សមត្ថកិច្ច​នៅ​ទូទាំង​ប្រទេស កំពុង​បង្កើន​កិច្ច​ខិត​ខំ​ប្រឹង​ប្រែង​កម្ចាត់​វីរុស​នេះ​នៅ មុន​ពិធី​បុណ្យ​ចូល​ឆ្នាំ​ចិន​ដែល​នឹង​មក​ដល់​នៅ​ថ្ងៃ​ស្អែក ហើយ​ដែល​ក្នុង​អំឡុង​ពេល​នោះ ការ​ដឹក​ជញ្ជូន​មាន់ ទា នឹង​មាន​ចំនួន​ច្រើន។ នេះ​បើ​យោង​តាម​មន្ត្រី​សុខា​ភិបាល បាន​ឲ្យ​ដឹង​កាល​ពី​ថ្ងៃ​ពុធ។ លោក ងាន ណានី ប្រធានមន្ទីរ​កសិកម្ម ខេត្ត​កំពង់ឆ្នាំង បាន​ថ្លែង​ថា ក្រុម​មន្រ្តី​បាន​ធ្វើ​ការ​​បាញ់​ថ្នាំ​សម្លាប់​វីរុស​នេះ​ នៅ​តំបន់​នានា ដែល​មាន​សត្វ​បក្សី មាន់ ទា និង​ធ្វើការ​អប់រំ​ប្រជាជន អំពី​របៀប​ទុក​ដាក់​បក្សី និង​ការ​ពារ​មិន​ឲ្យ​ឆ្លង​ជំងឺ​នេះ។ លោកបន្តថា៖ «ក្រុម​មន្រ្តី​នឹង​ធ្វើ​ការ​ពិនិត្យ​មាន់​ទាដែល​ដឹក​មក​ពី ក្រៅ​ខេត្ត​ហើយ​នឹង​ធ្វើ​ការ​បាញ់​ថ្នាំ​សម្លាប់​វីរុស​នោះ នៅ​មុន​ពេល​អនុញ្ញាត​ឲ្យ​សត្វ​បក្សី​នោះ ចូល​មក ហើយ​សត្វ​បក្សី​នោះ​នឹង​ត្រូវ​ដាក់​នៅ​ដោយ​ឡែក​ពី​សត្វ​បក្សី​ដែល​មាន រួច​ហើយ»។ លោក​បន្ត​ថា ប្រជាជន​ក្នុង​ភូមិ បាន​ទទួល​ការ​ណែ​នាំ ឲ្យ​ធ្វើ​ការ​រាយ​ការណ៍​ភ្លាមៗ ចំពោះ​ករណី​សង្ស័យ​ណា​មួយ​ថា មាន​ជំងឺ​គ្រុន​ផ្តាសាយ​បក្សី ទៅ​អាជ្ញាធរ​មូលដ្ឋាន និង​មន្រ្តី​សុខាភិបាល។ លោក ឈុំ វណ្ណារិទ្ធិ អភិបាល​រង​​ខេត្ត​បន្ទាយ​មាន​ជ័យ បាន​ថ្លែង​ថា បន្ទាប់​ពី​មាន​ការ​អំពាវ​នាវ ឲ្យមាន​ចំណាត់​ការ​ប្រយុទ្ធ​ប្រឆាំង​នឹង​វីរុសH5N1 ពី​ក្រសួង​សុខាភិបាល និង​ក្រសួង​កសិកម្ម ក្រុម​មន្រ្តី​ក្នុង​ខេត្ត​របស់​លោក បាន​ចុះ​ទៅ​តាម​ភូមិ​ធ្វើ​ការ​បាញ់​ថ្នាំ​សម្លាប់​វីរុស​នេះ និង​ធ្វើ​ការ​បិទ​បដា​ផ្សព្វផ្សាយ​ព័ត៌មាន និង​សូម​ឲ្យ​ប្រជាជន​នៅ​ក្នុង​ភូមិ ធ្វើ​ការ​រាយការណ៍​ចំពោះ​ករណី​សង្ស័យ​ណា​មួយ។ ស៊ុន ដានី អ្នក​គ្រប់​គ្រង​នៅ​ផ្សារ​កណ្តាល ក្រុង​ភ្នំពេញ បាន​ថ្លែង​កាល​ពី​ថ្ងៃ​ពុធ​ថា ផ្សារ​កណ្តាល​គឺ​មាន​ការ​បោស​សម្អាត​ជា​រៀង​រាល់​ថ្ងៃ ហើយ​ជា​ពិសេស យក​ចិត្ត​ទុក​ដាក់​លើ​កន្លែង​ដែល​មាន​មាន់ទា។ លោក សូនី គ្រីសនាន មន្រ្តី​ផ្នែក​ទំនាក់​ទំនង​នៅ​អង្គការ​សុខភាព​ពិភព​លោក​ប្រចាំ​កម្ពុជា បាន មាន​ប្រសាសន៍​ថា ការ​បាញ់​ថ្នាំ​សម្លាប់​វីរុស​នេះ​«មិន​ប្រាកដ​ថា នឹង​សម្លាប់​វីរុស​បាន​ទាំងអស់​នោះ​ទេ។ វា​គ្រាន់​តែ​ជា​ការ​ធ្វើ​ឲ្យ​ប្រជាជន​ស្ងប់​ចិត្ត​ប៉ុណ្ណោះ»។ លោកបន្ត​ថា វិធានការណ៍​ការពារ ដែល​មាន​ប្រសិទ្ធ​ភាព​រួម​មាន​ការ​ចម្អិន​មាន់​ទា និង​ស៊ុត ឲ្យ​បាន​ត្រឹម​ត្រូវ ការ​លាង​ដៃ​ឲ្យស្អាត និង​ការ​ហាម​មិន​ឲ្យ​កូនៗ​លេង​ជាមួយ​សត្វ​បក្សី​មាន់​ទា។ ក្នុង​ខណៈនេះដែរ រដ្ឋា​ភិបាល​វៀតណាម បាន​ប្រកាស​​កាល​ពី​ថ្ងៃ​អង្គារ​ថា មន្ទីរ​ថ្នាំ​បង្ការ​របស់​ខ្លួន «បាន​ធ្វើ​ការ​ព្រមាន ទៅ​ដល់​ខេត្ត​ចំនួន ៨ នៅ​ជិត​ព្រំដែន​កម្ពុជា ឲ្យ​ធ្វើ​ការ​ពង្រឹង​វិធាន​ការណ៍​ការពារ និង​ការ​គ្រប់​គ្រង ប្រឆាំង​នឹង​ជំងឺ​គ្រុន​ផ្តាសាយ​បក្សី H5N1»។ វិធានការណ៍​ទាំងនេះ រួម​មាន​ដូច​ជា​ការ​បង្កើន​ការ​តាម​ដាន​សត្វ​បក្សី មាន់​ទា ​ការ​រាយការណ៍​អំពី​ករណី​សង្ស័យ និង​ការ​ត្រៀម​ខ្លួន​ទុក​ជា​មុន នៅ​តាម​មណ្ឌល​សុខភាព។ នេះ​បើ​យោង​តាម​គេហទំព័រ​មួយ​របស់​វៀតណាម៕ PS រាយការណ៍​បន្ថែម​ដោយ ​​Justine Drennan

អត្ថបទគួរចាប់អារម្មណ៍