The Phnom Penh Post Search

Search form




Logo of Phnom Penh Post newspaper Phnom Penh Post - អឺរ៉ុប​ចាត់​វិធានការ​ក្រុមហ៊ុន​ស្ករស​រំលោភ​សិទ្ធិ​មនុស្ស

អឺរ៉ុប​ចាត់​វិធានការ​ក្រុមហ៊ុន​ស្ករស​រំលោភ​សិទ្ធិ​មនុស្ស

អឺរ៉ុប​ចាត់​វិធានការ​ក្រុមហ៊ុន​ស្ករស​រំលោភ​សិទ្ធិ​មនុស្ស

140123_08a
ក្មេងប្រុសអាយុ ១៣ ឆ្នាំស៊ីឈ្នួលកាប់អំពៅដាំលើដីជម្លោះក្នុងឃុំអមលាំងកាលពីឆ្នាំមុន ម៉ៃ វីរៈ

ភ្នំពេញៈ សភា​អឺរ៉ុប បាន​អនុម័ត​សេចក្តី​សម្រេច​មួយ​ដោយ​សុំ​ឲ្យ​ស្ថាប័ន​ប្រតិបត្តិ​របស់​សហភាព​អឺរ៉ុប​ចាត់​វិធានការ​ជា​បន្ទាន់​ទៅ​លើ​គម្រោង​អនុគ្រោះ​ពាណិជ្ជកម្ម​របស់​សហជីព​អឺរ៉ុប​ដែល​ត្រូវ​បាន​រក​ឃើញ​ថា កំពុង​អនុវត្ត​ក្នុង​លក្ខណៈ​មាន​ហានិភ័យ​ខ្ពស់​ដោយ​ការ​រំលោភ​បំពាន​សិទ្ធិ​មនុស្ស​ក្នុង​ប្រទេស កម្ពុជា តាម​រយៈ​ការ​បណ្តេញ​ប្រជាជន​ចេញ​ពី​ដីធ្លី​ដើម្បី​ការ​អភិវឌ្ឍ​ឧស្សាហកម្ម​ស្ករស។

នៅ​ក្នុង​សេចក្តី​សម្រេច​ថ្ងៃ ទី១៦ ខែ មករា សមាជិក​សភា​អឺរ៉ុប​បាន​អំពាវនាវ​ឲ្យ​គណៈកម្មការ​សហភាព​អឺរ៉ុប «ចាត់​ការ​ជា​បន្ទាន់​ដោយ​ផ្អែក​ទៅ​លើ​លទ្ធផល​រក​ឃើញ​នៃ​ការ​វាយតម្លៃ​ផល​ប៉ះពាល់​សិទ្ធិ​មនុស្ស​ថ្មីៗ ចំពោះ​ការ​អនុវត្ត​គម្រោង​អនុញ្ញាត​ឲ្យ​នាំ​ចេញ​ផលិតផល​គ្រប់​ប្រភេទ​លើក​លែង​តែ​អាវុធ (EBA) នៅ​ប្រទេស កម្ពុជា។ សេចក្តី​សម្រេច​នេះ​ក៏​សុំ​ឲ្យ​គណៈកម្មការ​ពិចារណា​ដាក់​កាតព្វកិច្ច​ទៅ​លើ​ក្រុមហ៊ុន​នាំ​ចេញ​ដែល​ចង់​ទទួល​បាន​សិទ្ធិ EBA «ឲ្យ​ធ្វើការ​បង្ហាញ​ថា ពួក​គេ​មិន​បាន​បណ្តេញ​ប្រជាជន​ពី​ដីធ្លី​និង​ផ្ទះ​សម្បែង​ដោយ​មិន​មាន​សំណង​គ្រប់​គ្រាន់​នោះ​ទេ»។

សេចក្តី​សម្រេច​នេះ គឺជា​សេចក្តី​សម្រេច​ថ្មី​បំផុត​ធំ​មួយ​ពី​សភា​អឺរ៉ុប​ស្តី​ពី​បញ្ហា​ដែល​អូស​បន្លាយ​ជា​យូរ​មក​ហើយ​នេះ​បន្ទាប់​ពី​មាន​សេចក្តី​សម្រេច​ស្រដៀង​គ្នា​មួយ ​កាល​ពី​ខែ តុលា ២០១២ ដែល​បាន​អំពាវនាវ​ឲ្យ​គណៈកម្មការ​នេះ​ធ្វើ​ការ​ស៊ើប​អង្កេត​ការ​រំលោភ​បំពាន​សិទ្ធិ​មនុស្ស​ដោយ​ក្រុមហ៊ុន​នាំ​ចេញ​ស្ករ​ស​ទៅ​សហភាព​អឺរ៉ុប និង​ដក​ភាព​អនុគ្រោះ​ពាណិជ្ជកម្ម ប្រសិន​បើ​រក​ឃើញ​ថា​មាន​ការ​រំលោភ​បំពាន​នោះ​មែន។

កាល​ពី​ខែ ឧសភា ឆ្នាំ​មុន មន្រ្តី​កំពូល​របស់​សហភាព​អឺរ៉ុប បាន​ថ្លែង​ថា ស្ថានភាព​នេះ «កំពុង​ស្ថិត​នៅ​ក្នុង​ការ​ពិនិត្យ​យ៉ាង​យក​ចិត្ត​ទុក​ដាក់» ប៉ុន្តែ​មិន​បាន​ព្រម​ព្រៀង​ចំពោះ​ការ​ស៊ើប​អង្កេត ឬ​ដក​ភាព​អនុគ្រោះ​ឡើយ​រហូត​ទាល់​តែ​ក្រុមហ៊ុន​ទាំង​នោះ​បំពេញ​ត្រឹម​ត្រូវ​ទៅ​តាម​លក្ខខណ្ឌ​តម្រូវ​ដោយ​ច្បាប់​នោះ​ទេ។

ជា​ការ​ឆ្លើយ​តប អង្គការ​សមធម៌​កម្ពុជា និង​អង្គការ​អន្តរជាតិ​សម្រាប់​ការ​អភិវឌ្ឍ​ដោយ​មាន​ការ​រួម​បញ្ចូល (IDI) ដែល​អង្គការ​ទាំង​ពីរ​បាន​ធ្វើ​ការងារ​បញ្ចុះ​បញ្ចូល​សហភាព​អឺរ៉ុប ឲ្យ​ចាត់​វិធានការ​លើ​បញ្ហា​នេះ​ជា​យូរ​មក​ហើយ​នោះ បាន​ធ្វើ​ការ​វាយតម្លៃ​ផល​ប៉ះពាល់​សិទ្ធិ​មនុស្ស​របស់​ខ្លួន​ដោយ​រក​ឃើញ​ថា គម្រោង EBA ដែល​អនុវត្ត​ក្នុង​ប្រទេស កម្ពុជា «មាន​ហានិភ័យ​ខ្ពស់​នៃ​ការ​រំលោភ​បំពាន​សិទ្ធិ​មនុស្ស»។

លោក David Pred ជា​អ្នក​គ្រប់​គ្រង​នៅ​អង្គការ IDI បាន​ថ្លែង​កាល​ពី​ថ្ងៃ​ចន្ទ​ថា សេចក្តី​សម្រេច​នេះ​គឺជា «ការ​អំពាវនាវ​យ៉ាង​ច្បាស់​មួយ​ឲ្យ​មាន​ការ​ចាត់​ការ» ដោយ​ស្ថាប័ន​សហភាព​អឺរ៉ុប។ លោក​បន្ត​ថា៖ «យើង​សង្ឃឹម​ថា សេចក្តី​សម្រេច​នេះ នឹង​មិន​ត្រូវ​បាន​ច្រាន​ចោល​ជា​ថ្មី​ម្តង​ទៀត​ដោយ​ពួក​ការិយាល័យធិបតេយ្យ​នៅ​ទីក្រុង ប្រ៊ុចសែល នោះ​ទេ»។

ឯក​អគ្គ​រដ្ឋទូត​សហភាព​អឺរ៉ុប លោក Jean-Francois Cautain បាន​ថ្លែង​កាល​ពី​ថ្ងៃ​ចន្ទ​ថា សេចក្តី​សម្រេច​របស់​សភា​អឺរ៉ុប​គឺ «ជា​សញ្ញា​ខ្លាំង​ថ្មី​មួយ​ទៀត​ដែល​ប្រធានបទ​នេះ​មាន​លក្ខណៈ​រសើប​នៅ​ក្នុង​ស្ថាប័ន​សហភាព​អឺរ៉ុប»។

លោក​បន្ថែម​ថា សហភាព​អឺរ៉ុប​បាន​កត់​សម្គាល់​ចំពោះ​ការ​វាយតម្លៃ​ផល​ប៉ះពាល់​សិទ្ធិ​មនុស្ស​ដែល​ឥឡូវ​នេះ​ការ​ឆ្លើយ​តប​កំពុង​ត្រូវ​បាន​ពិចារណា។

លោក​និយាយ​ឲ្យ​ដឹង​ទៀត​ថា បើ​ទោះ​បី​ជា​គម្រោង EBA ផ្តល់​អត្ថ​ប្រយោជន៍​ខ្លាំង​ចំពោះ​ការ​អភិវឌ្ឍ​នា​ពេល​អនាគត​របស់​កម្ពុជា​ក៏​ដោយ ក៏​វា​មិន​អាច​ទៅ​រួច​ទេ​ប្រសិន​បើ​គម្រោង​នេះ មិន​ត្រូវ​បាន​អនុវត្ត​ស្រប​ទៅ​តាម​គោល​បំណង​របស់​វា​និង​គោរព​អត្ថ​ប្រយោជន៍​របស់​ប្រជាជន​កម្ពុជា»៕ PS

អត្ថបទគួរចាប់អារម្មណ៍