ភ្នំពេញៈ បញ្ហាប្រឈមជាច្រើនរបស់កុមារនៅទីជនបទនៅតែបន្ដកើតមាន ដោយសារឪពុកម្ដាយធ្វើចំណាកស្រុកទៅធ្វើការនៅទីក្រុង និងក្រៅប្រទេសដែលកត្ដានេះ សហភាពអឺរ៉ុបបានបន្ដជួយកុមារកម្ពុជា ដោយធ្វើការងារជាមួយអង្គការសង្គ្រោះកុមារអន្ដរជាតិ និងអង្គការផ្នែកសិទ្ធិកុមារជាច្រើនទៀតលើគម្រោង «លើកកម្ពស់ការចូលរួមរបស់កុមារក្នុងអភិបាលកិច្ចមូលដ្ឋាន»។
លោក George Edgar ឯកអគ្គរដ្ឋទូតសហភាពអឺរ៉ុបប្រចាំប្រទេសកម្ពុជា ថ្លែងថា «សហភាពអឺរ៉ុបផ្ដល់ការគាំទ្រដល់អាជ្ញាធរមូលដ្ឋាន និងអាជ្ញាធរនៅថ្នាក់ក្រោមជាតិ ដើម្បីបញ្ចូលកុមារនៅក្នុងដំណើរការនៃការធ្វើសេចក្ដីសម្រេចចិត្ដ និងផ្ដល់ភាពអង់អាចដល់កុមារដែលអាចឲ្យពួកគេលើកឡើងពីសំឡេងរបស់ពួកគេដើម្បីទាមទារនូវអ្វីដែលពួកគេត្រូវការពីរាជរដ្ឋាភិបាល សហគមន៍ និងគ្រួសារ»។
លោកបន្ដថា៖ «គោលដៅចុងក្រោយយើងចង់ឃើញការអភិវឌ្ឍនៅក្នុងប្រទេសកម្ពុជា យើងចង់ឃើញប្រជាពលរដ្ឋនៅក្នុងប្រទេសកម្ពុជាមានសេដ្ឋកិច្ច មានជីវភាពធូរធារជាងមុន ជាពិសេសប្រជាពលរដ្ឋក្រីក្រ»។
លោកស្រី Elizabeth Pearce នាយិកា អង្គការ Save The Children ប្រចាំកម្ពុជាថ្លែងថាបញ្ហាការធ្វើចំណាកស្រុកជាបញ្ហាមួយដែលអង្គការលោកស្រីតែងតែលើកឡើងគ្រប់កម្មវិធីទាំងអស់ទាំងពេលកន្លងមក។
លោកស្រីឲ្យដឹងថា៖ «ពេលនេះយើងមិនទាន់មានភ័ស្ដុតាងឲ្យច្បាស់ ដើម្បីបង្ហាញពីផលប៉ះពាល់នៃការធ្វើចំណាកស្រុករបស់ឪពុកម្ដាយទាំងនោះមកលើកុមារនៅឡើយទេ»។
តាមរយៈកម្មវិធីមួយដែលអង្គការ Save The Children បានអនុវត្ដគឺគម្រោងថែទាំកុមារបានល្អ ដំបូងបំផុតគឺគ្រួសារ (Family Care First) ដែលលោកស្រីបញ្ជាក់ថា អង្គការនេះកំពុងធ្វើការស្រាវជ្រាវ និងសិក្សាស្វែងយល់ទៅលើថា តើការធ្វើចំណាកស្រុករបស់ឪពុកម្ដាយនឹងមានផលប៉ះពាល់អ្វីខ្លះដល់សិទ្ធិកុមារ និងការអភិវឌ្ឍរបស់កុមារ។ ការស្រាវជ្រាវនេះនឹងមានការវាយតម្លៃលម្អិតទៅលើការអនុវត្ដរបស់កុមារដែលនឹងបែងចែកទៅតាមផ្នែកមានដូចជាការអភិវឌ្ឍផ្លូវកាយ ផ្លូវចិត្ដជាដើមដើម្បីឲ្យកាន់តែដឹងច្បាស់។
លោកស្រីបន្ថែមថា៖ «ដូចយើងបានដឹងហើយ កុមារភាគច្រើននៅតាមទីជនបទត្រូវបានឪពុកម្ដាយទុកឲ្យរស់នៅជាមួយជីដូនជីតា ជាអ្នកមើលថែពួកគាត់ ហើយឪពុកម្ដាយទាំងនេះបានធ្វើចំណាកស្រុកទៅធ្វើការងារនៅទីក្រុងភ្នំពេញ និងនៅក្រៅប្រទេសក៏មាន»។
ពាក់ព័ន្ធនឹងផលប៉ះពាល់លោកស្រីឲ្យដឹងថា កន្លងមកមានការពិភាក្សាច្រើនណាស់ចំពោះផលប៉ះពាល់ដល់កុមារ នៅពេលឪពុកម្ដាយបានធ្វើចំណាកស្រុក ប៉ុន្ដែមានអ្នកខ្លះលើកឡើងថា ការធ្វើចំណាកស្រុករបស់ឪពុកម្ដាយនេះ គឺជាការល្អទៅវិញដែលពួកគាត់អាចផ្ញើលុយមកវិញដើម្បីផ្គត់ផ្គង់គ្រួសារ និងអាចមានលុយឲ្យកូនទៅរៀនបាន។ ឯអ្នកខ្លះទៀតថាការធ្វើចំណាកស្រុកបែបនេះមិនមែនជាការល្អសម្រាប់កុមារទេ ពីព្រោះជីដូន ជីតា គាត់មិនសូវបានមើលថែកុមារឲ្យបានដិតដល់។
លោកស្រីថា៖ «ដូច្នេះយើងសង្ឃឹមថានៅឆ្នាំក្រោយយើងនឹងទទួលបានលទ្ធផលអំពីការស្រាវជ្រាវនេះ។ បច្ចុប្បន្នការស្រាវជ្រាវនេះគឺកំពុងធ្វើហើយ បន្ទាប់ពីស្រាវជ្រាវចប់យើងនឹងរៀបចំសិក្ខាសាលាផ្សព្វផ្សាយទៅសហគមន៍អន្ដរជាតិ និងរាជរដ្ឋាភិបាលអំពីរឿងនេះ»។
ជាមួយគ្នានេះលោកស្រី នង យ៉ារីដា ប្រធានគម្រោងនៃអង្គការ Save the Children បន្ថែមថា៖ «តាមរយៈគម្រោង [ខាងលើ] ក្រុមកុមារបានរកឃើញថា គឺកុមារខ្វះការថែទាំពីឪពុកម្តាយ ដោយសារតែឪពុកម្ដាយធ្វើចំណាកស្រុក អ៊ីចឹងនេះក៏ជាបញ្ហាចម្បងមួយដែរ»៕