.jpg)
លោក ប៉ាប្លូ កាំង (Pablo Kang) (ឆ្វេង) ឯកអគ្គរាជទូតអូស្ត្រាលីប្រចាំកម្ពុជា ក្នុងជំនួបជាមួយលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី ២៣ ធ្នូ។ រូបថត ស្ថានទូតអូស្រ្តាលីប្រចាំនៅកម្ពុជា
ភ្នំពេញៈ ប្រទេសអូស្ត្រាលី ស្វាគមន៍ជំហររបស់កម្ពុជាក្នុងការទិញតែវ៉ាក់សាំងណាដែលទទួលស្គាល់ដោយគំនិតផ្ដួចផ្ដើមរបស់កូវ៉ាក់ (COVAC) ហើយអូស្ត្រាលីនឹងជួយដល់កម្ពុជាលើការធ្វើលទ្ធកម្ម ការដឹកជញ្ជូន និងការប្រឹក្សាផ្នែកសុខភាព។
អ្នកនាំពាក្យស្ថានទូតអូស្ត្រាលីប្រចាំកម្ពុជាបានថ្លែងប្រាប់តាមអ៊ីមែលកាលពីថ្ងៃទី ២៤ ខែធ្នូ ដូច្នេះថា៖ «ប្រទេសអូស្ត្រាលីស្វាគមន៍ការប្ដេជ្ញាចិត្តរបស់កម្ពុជាក្នុងការទិញតែវ៉ាក់សាំងណាដែលបានធ្វើតេស្តឃើញថាមានគុណភាពជាមុនដោយអង្គការសុខភាពពិភពលោក។ នេះជាជំហរដែលអូស្ត្រាលីគាំទ្រយ៉ាងពេញទំហឹង ពីព្រោះវាមានសារៈសំខាន់ដើម្បីធានាបានថា វ៉ាក់សាំងនេះមានសុវត្ថិភាព និងភាពស័ក្ដិសិទ្ធិ»។
លោក ប៉ាប្លូ កាំង (Pablo Kang) ឯកអគ្គរាជទូតអូស្ត្រាលីប្រចាំកម្ពុជាបានជួបជាមួយលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី ២៣ ធ្នូ ដើម្បីពិភាក្សាអំពីកិច្ចសហប្រតិបត្តិការអភិវឌ្ឍន៍របស់អូស្ត្រាលីជាមួយកម្ពុជាដោយក្នុងនោះក៏មានការទទួលបានវ៉ាក់សាំងប្រឆាំងកូវីដ ១៩ ដោយស្មើភាពគ្នា និងមានសុវត្ថិភាព។
អ្នកនាំពាក្យស្ថានទូតអូស្ត្រាលីបានថ្លែងថា អូស្ត្រាលីបានពិភាក្សារួចហើយជាមួយក្រសួងសុខាភិបាលកម្ពុជា និងដៃគូអភិវឌ្ឍន៍សំខាន់ៗផ្សេងទៀតដើម្បីរកមើលលទ្ធភាពថា តើពួកគេអាចចូលរួមជាមួយកម្ពុជាអ្វីខ្លះក្នុងការទិញវ៉ាក់សាំងកូវីដ ១៩?
អ្នកនាំពាក្យដដែលបានឱ្យដឹងថា ការគាំទ្ររបស់អូស្ត្រាលីលើបញ្ហានេះឈរលើការគាំទ្ររបស់អូស្ត្រាលីអស់រយៈពេលជាយូរមកហើយលើវិស័យសុខាភិបាលកម្ពុជា។ ទំនាក់ទំនងរបស់អូស្ត្រាលីតាមរយៈគម្រោងលើកកម្ពស់គុណភាព និងសមធម៌សុខាភិបាល និងជំនួយឥតសំណងមានទឹកប្រាក់ ៥០០ លានដុល្លារអូស្ត្រាលី សម្រាប់ទិញវ៉ាក់សាំងដែលផ្ដល់ឱ្យទៅប្រទេសនៅតំបន់អាស៊ីប៉ាស៊ីហ្វិក រួមទាំងកម្ពុជាផង។
អ្នកនាំពាក្យរូបនេះថ្លែងថា៖ «ការគាំទ្ររបស់យើងដែលបានគ្រោងទុកសម្រាប់បញ្ហាវ៉ាក់សាំងកូវីដ ១៩ នៅកម្ពុជានឹងរួមមានការដឹកនាំយកវ៉ាក់សាំង ការចែកចាយវ៉ាក់សាំង និងការប្រឹក្សាផ្នែកសុខភាព»។
នៅប្រទេសអូស្ត្រាលី រដ្ឋាភិបាលអូស្ត្រាលីបានឈានដល់ដំណាក់កាលចុះកិច្ចព្រមព្រៀងជាច្រើនក្នុងការទិញវ៉ាក់សាំងនេះ។ ការដាក់ប្រើប្រាស់វ៉ាក់សាំងនៅអូស្ត្រាលីវាអាស្រ័យលើលទ្ធផលនៃការធ្វើតេស្តសាកល្បងនៅមន្ទីរពិសោធន៍ និងទទួលស្គាល់ដោយនិយតករឱសថអូស្ត្រាលី ដែលមានឈ្មោះថា «រដ្ឋបាលទំនិញពេទ្យ»។ នេះបើតាមអ្នកនាំពាក្យស្ថានទូតដដែល។
ក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី ២៤ ធ្នូ បានចេញសេចក្ដីប្រកាសព័ត៌មានអំពីជំនួបរវាងលោក ប៉ាប្លូ និងលោក អូន ព័ន្ធមុនីរ័ត្ន ដោយបញ្ជាក់ថា លោក អូន ព័ន្ធមុនីរ័ត្ន សម្ដែងក្ដីសោមនស្សរីករាយចំពោះការគាំទ្ររបស់អូស្ត្រាលីក្នុងការអភិវឌ្ឍនៅកម្ពុជា បូករួមទាំងរឿងវ៉ាក់សាំងនេះផង។
លោក អូន ព័ន្ធមុនីរ័ត្ន បានថ្លែងប្រាប់ទៅលោក ប៉ាប្លូ ដូច្នេះថា៖ «បច្ចុប្បន្ន រាជរដ្ឋាភិបាលកម្ពុជាបាននិងកំពុងរៀបចំកិច្ចប្រជុំជាមួយដៃគូអភិវឌ្ឍន៍ពាក់ព័ន្ធនានាទាំងពហុភាគី និងទាំងទ្វេភាគី ជាពិសេសអង្គការសុខភាពពិភពលោក ដើម្បីពិភាក្សាអំពីគម្រោងលទ្ធកម្មទិញវ៉ាក់សាំងបង្ការជំងឺកូវីដ១៩ និងកម្មវិធីចាក់វ៉ាក់សាំងបង្ការជំងឺកូវីដ១៩ ក្នុងគោលបំណងទទួលបាននូវព័ត៌មានគ្រប់ជ្រុងជ្រោយ, ស័ក្តិសិទ្ធិភាពនៃផែនការ និងសកម្មភាពជាយុទ្ធសាស្ត្រក្នុងការចាត់ចែងបញ្ជាទិញ»។
លោកបានបន្តថា៖ «[ទាំងនេះគឺ] ដើម្បីធានាបាននូវការគ្រប់គ្រងសុវត្ថិភាព គុណភាព និងប្រសិទ្ធភាពនៃការប្រើប្រាស់ វ៉ាក់សាំងបង្ការជំងឺកូវីដ១៩ សម្រាប់ផ្តល់ជូនប្រជាជនកម្ពុជាឱ្យបានឆាប់រហ័ស និងទាន់ពេលវេលា។ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រីក៏បានគូសបញ្ជាក់បន្ថែមផងដែរថា រាជរដ្ឋាភិបាលកម្ពុជានឹងបញ្ជាទិញវ៉ាក់សាំងបង្ការជំងឺកូវីដ១៩ ទាំងឡាយណាដែលមានការទទួលស្គាល់ពីអង្គការសុខភាពពិភពលោកតែប៉ុណ្ណោះ»។
កាលពីថ្ងៃទី ១៥ ធ្នូ លោកនាយករដ្ឋមន្ត្រី ហ៊ុន សែន បានថ្លែងថា ព្រះរាជាណាចក្រកម្ពុជាត្រៀមថវិការហូតដល់ទៅ ២០០ លានដុល្លារ សម្រាប់ទិញវ៉ាក់សាំងប្រឆាំងកូវីដ ១៩ ដែលទទួលស្គាល់ដោយគំនិតផ្ដួចផ្ដើមកូវ៉ាក់របស់អង្គការសុខភាពពិភពលោក។ ពលរដ្ឋកម្ពុជាប្រមាណ ១៣ លាននាក់ ក្នុងចំណោម ១៦ លាននាក់ នឹងទទួលបានវ៉ាក់សាំងនេះ។
ពលរដ្ឋកម្ពុជាគ្រប់ស្រទាប់វណ្ណៈបានបរិច្ចាគថវិកាផ្ទាល់ខ្លួនដើម្បីចូលរួមក្នុងការទិញវ៉ាក់សាំងនេះ។ ភ្នំពេញប៉ុស្តិ៍មិនអាចសុំការបញ្ជាក់ពីចំនួនទឹកប្រាក់បរិច្ចាគពីសប្បុរសជនពីសំណាក់លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងលោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានទេ។ ប៉ុន្តែសារព័ត៌មានប្រេសញូវសរសេរថា គិតត្រឹមថ្ងៃទី ២៣ ខែធ្នូ ទឹកប្រាក់បរិច្ចាគពីសប្បុរសជនមានសរុបជាង ៥៤ លានដុល្លារ។
ពាក់ព័ន្ធនឹងការទិញវ៉ាក់សាំងកូវីដ ១៩ នេះ សារព័ត៌មានបរទេសមួយចំនួនតែងភ្ជាប់ការប្ដេជ្ញាចិត្តរបស់កម្ពុជាក្នុងការទិញវ៉ាក់សាំងពីគំនិតផ្ដួចផ្ដើមទៅនឹងវ៉ាក់សាំងរបស់ប្រទេសចិន។
កាលពីថ្ងៃទី ១៧ ធ្នូ កាសែត The New Strait Times បានចុះផ្សាយដាក់ចំណងជើងថា «កម្ពុជាបដិសេធធ្វើជាសត្វជ្រូករបស់ចិនសម្រាប់វ៉ាក់សាំងកូវីដ»។ ស្រដៀងគ្នានេះដែរ កាសែត South China Morning Post បានរាយការណ៍នៅថ្ងៃទី ២០ ធ្នូដោយដាក់ចំណងជើងថា «អ្នកវិភាគនិយាយថាការប្រុងប្រយ័ត្នរបស់កម្ពុជាលើវ៉ាក់សាំងកូវីដ ១៩ របស់ចិន បង្ហាញសញ្ញាថា [កម្ពុជា] ទៅអាមេរិក»។
ក៏ប៉ុន្តែលោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាបានថ្លែងយ៉ាងដូច្នេះថា៖ «កាសែតបរទេសមួយចំនួន រួមទាំងកាសែតក្នុងស្រុកខ្លះ ហាក់ដូចជាជាប់សោទៅនឹងទំនាក់ទំនងកម្ពុជា-ចិន។ ប្រសិនបើសម្ដេចនាយករដ្ឋមន្ត្រីនិយាយថា កម្ពុជានឹងទិញវ៉ាក់សាំងចិន ពួកគេនឹងនិយាយថាកម្ពុជាស្ថិតក្រោមឥទ្ធិពលចិន។ ប៉ុន្តែនៅពេលដែលសម្ដេចនាយករដ្ឋមន្ត្រីមិនបាននិយាយសូម្បី ១ ម៉ាត់អំពីប្រទេសចិនរឿងវ៉ាក់សាំងនេះ ពួកគេបកប្រែថា ទៅជារឿងផ្សេង»។
លោកបន្តថា៖ «សម្ដេចនាយករដ្ឋមន្ត្រីបានបញ្ជាក់ច្បាស់ហើយថា កម្ពុជាមិនបដិសេធវ៉ាក់សាំងចិន ឬវ៉ាក់សាំងប្រទេសណាទេ ប៉ុន្តែយើងទិញតែវ៉ាក់សាំងណាដែលទទួលស្គាល់ដោយអង្គការសុខភាពពិភពលោកប៉ុណ្ណោះ ព្រោះដើម្បីធានាពីសុវត្ថិភាពសម្រាប់ប្រជាពលរដ្ឋកម្ពុជា។ ជំហរសម្ដេច ហ៊ុន សែន មិនប្រែប្រួលទៅលើប្រទេសណាមួយទេ ប៉ុន្តែដើម្បីធានាសុវត្ថិភាពរបស់ប្រជាជន»៕
