.jpg)
លោក ផាប្លូកាង ឯកអគ្គរាជទូតអូស្ត្រាលីប្រចាំកម្ពុជា និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន ក្នុងជំនួបកាលពីម្សិលមិញ។ រូបថត ស្ថានទូតអូស្រ្តាលីប្រចាំនៅកម្ពុជា
ភ្នំពេញៈ រដ្ឋាភិបាលអូស្ត្រាលីកាលពីម្សិលមិញបានប្រកាសផ្ដល់ជំនួយឥតសំណងជាទឹកប្រាក់ចំនួនប្រមាណ ២៨ លានដុល្លារសហរដ្ឋអាមេរិក សម្រាប់កម្មវិធីចាក់វ៉ាក់សាំងបង្ការជំងឺកូវីដ ១៩ ដែលទទួលស្គាល់ដោយអង្គការសុខភាពពិភពលោកនៅកម្ពុជាចាក់ដល់ពលរដ្ឋខ្មែរប្រមាណ ១ លាន ៥ សែននាក់។
យោងតាមសេចក្ដីប្រកាសព័ត៌មានរួមរវាងលោក ផាប្លូកាង ឯកអគ្គរាជទូតអូស្ត្រាលីប្រចាំកម្ពុជា និងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានឱ្យដឹងថា៖ «ហិរញ្ញប្បទានឥតសំណងរបស់អូស្ត្រាលីនេះ អាចនឹងរួមចំណែកក្នុងការចាក់វ៉ាក់សាំងបង្ការជំងឺកូវីដ១៩ ដល់ប្រជាជនកម្ពុជាប្រមាណ ១,៥ លាននាក់។ ការរួមចំណែកនេះនឹងជួយជំរុញឱ្យរាជរដ្ឋាភិបាលកម្ពុជាសម្រេចបានកាន់តែឆាប់រហ័សនូវគោលដៅចាក់វ៉ាក់សាំងបង្ការជំងឺកូវីដ១៩ ដល់ប្រជាជនកម្ពុជាឱ្យបាន ៨០ ភាគរយនៃចំនួនប្រជាជនសរុប»។
សេចក្ដីប្រកាសព័ត៌មានដដែលនេះបានបញ្ជាក់ថា ហិរញ្ញប្បទានឥតសំណងនេះ នឹងត្រូវបានប្រើប្រាស់ភាគច្រើនសម្រាប់ទិញវ៉ាក់សាំងបង្ការជំងឺកូវីដ-១៩ និងមួយចំនួនតូចនឹងត្រូវប្រើប្រាស់សម្រាប់ជួយគាំទ្រដល់រាជរដ្ឋាភិបាលកម្ពុជាក្នុងការបែងចែក និងគ្រប់គ្រងវ៉ាក់សាំង ធានាសុវត្ថិភាព និងប្រសិទ្ធភាពនៃវ៉ាក់សាំង និងដើម្បីធានាថា ប្រជាជនកម្ពុជាអាចទទួលបានព័ត៌មានច្បាស់លាស់អំពីដំណើរការនៃការចាក់វ៉ាក់សាំងបង្ការនេះ។
លោក ផាប្លូ កាង បានថ្លែងនៅក្នុងសេចក្ដីប្រកាសព័ត៌មានរួមថា៖ «ក្នុងនាមជាអ្នកជិតខាង និងជាមិត្តដ៏យូរអង្វែងរបស់កម្ពុជា អូស្ត្រាលីមានសេចក្ដីសោមនស្សរីករាយក្នុងការគាំទ្រកម្ពុជាក្នុងគ្រាលំបាកនេះ។ អូស្ត្រាលីទទួលស្គាល់ថា គ្មាននរណាម្នាក់មានសុវត្ថិភាពទេ ប្រសិនបើគ្រប់គ្នាមិនទាន់មានសុវត្ថិភាព ហើយការគាំទ្ររបស់អូស្ត្រាលីនឹងការជួយដល់កម្មវិធីចាក់វ៉ាក់សាំងបង្ការកូវីដ-១៩ជូនប្រជាជនកម្ពុជាយ៉ាងហោចណាស់ចំនួន ១,៥ លាននាក់ និងការចាក់វ៉ាក់សាំងដែលទទួលស្គាល់ដោយអង្គការសុខភាពពិភពលោកនៅកម្ពុជា»។
សេចក្ដីប្រកាសព័ត៌មាននេះបានឱ្យដឹងថា ត្បិតកម្ពុជាបានចៀសផុតនូវផលប៉ះពាល់សុខភាពធ្ងន់ធ្ងរពីជំងឺកូវីដ ១៩ ក៏ដោយ ការផ្តល់វ៉ាក់សាំងបង្ការកូវីដ១៩ ជូនប្រជាពលរដ្ឋខ្លួននៅទូទាំងប្រទេសនៅតែជាកត្តាដ៏សំខាន់ក្នុងការទប់ស្កាត់ និងបង្ការការរាលដាលនៃជំងឺកូវីដ ១៩ នាពេលអនាគត និងការស្តារឡើងវិញនូវសេដ្ឋកិច្ចរបស់កម្ពុជា។
លោក អូន ព័ន្ធមុនីរ័ត្ន ក៏បានថ្លែងនៅក្នុងសេចក្ដីប្រកាសព័ត៌មានរួមនេះដែរថា ការផ្តល់ជំនួយជាវ៉ាក់សាំងបង្ការជំងឺកូវីដ១៩ របស់អូស្ត្រាលីសម្រាប់កម្ពុជានេះគឺជាការបង្ហាញជាថ្មី អំពីការប្តេជ្ញាចិត្តដ៏យូរអង្វែង និងការគាំទ្រប្រកបដោយនិរន្តរភាពរបស់រដ្ឋាភិបាលអូស្ត្រាលីដល់ការអភិវឌ្ឍសង្គមសេដ្ឋកិច្ច និងអនាគតដ៏រុងរឿងរបស់កម្ពុជា។
ការផ្តល់ជំនួយជាវ៉ាក់សាំងបង្ការជំងឺកូវីដ ១៩ របស់អូស្ត្រាលីសម្រាប់កម្ពុជានេះ គឺជាជំនួយដែលបន្ថែមលើជំនួយអភិវឌ្ឍន៍ប្រមាណ ៥០ លានដុល្លារអាមេរិកដែលរដ្ឋាភិបាលអូស្ត្រាលីនឹងផ្តល់ជូនកម្ពុជាក្នុងឆ្នាំ ២០២១ ស្ថិតក្រោមផែនការអភិវឌ្ឍន៍សម្រាប់ឆ្លើយតបនឹងជំងឺកូវីដ ១៩ កម្ពុជា-អូស្ត្រាលីដែលបានប្រកាសដាក់ឱ្យអនុវត្តជាផ្លូវការកាលពីខែធ្នូ ឆ្នាំ ២០២០ កន្លងទៅ។
លោក អូន ព័ន្ធមុនីរ័ត្ន ថ្លែងថា៖ «ការផ្ដល់ជំនួយវ៉ាក់សាំងបង្ការជំងឺកូវីដ ១៩ របស់អូស្ត្រាលីនេះជាការបំពេញបន្ថែមលើជំនួយជាវ៉ាក់សាំងបង្ការកូវីដ ១៩ ដែលកម្ពុជានឹងទទួលបានពី COVAX ដែលគ្រោងសម្រាប់ ២០ ភាគរយនៃប្រជាជនកម្ពុជាដោយឥតគិតថ្លៃ។ រដ្ឋាភិបាលអូស្ត្រាលីក៏បានរួមចំណែកផ្ដល់មូលនិធិដល់ COVAX ដែរ»។
លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានថ្លែងផងដែរក្នុងពិធីបើកការដ្ឋានសាងសង់រោងចក្រប្រព្រឹតិ្តកម្មទឹកស្អាតបាក់ខែង និងពិធីសម្ពោធដាក់ឱ្យដំណើរការជាផ្លូវការរោងចក្រប្រព្រឹត្តិកម្មទឹកស្អាតចំការមននៅថ្ងៃម្សិលមិញនេះថា ជំនួយថវិការបស់អូស្ត្រាលីចំនួន ២៨ លានដុល្លារនេះ កម្ពុជានឹងទទួលបានវ៉ាក់សាំងកូវីដ ១៩ ចំនួន ៣ លានដូសសម្រាប់ឆ្នាំ ២០២០-២០២៣ តាមរយៈ «គំនិតផ្តួចផ្តើមទទួលបានវ៉ាក់សាំងកូវីដ ១៩ តំបន់» ដែលកញ្ចប់ដំបូងនឹងត្រូវបានផ្តល់ជូននៅពាក់កណ្តាលឆ្នាំ ២០២១។
លោក ហ៊ុន សែន បានបញ្ជាក់ផងដែរថា កម្ពុជាត្រូវត្រៀមបម្រុងវ៉ាក់សាំងចំនួន ២០ លានដូសសម្រាប់ចាក់ជូនប្រជាពលរដ្ឋ ១០ លាននាក់ដោយមិនគិតថ្លៃ ដែលមកដល់ពេលនេះកម្ពុជាទទួលបានជំនួយវ៉ាក់សាំងចំនួន ១១ លានដូសហើយពីប្រទេសជាមិត្ត និងដៃគូអភិវឌ្ឍន៍នានា ទោះបីជាមិនទាន់ទទួលបានដល់ដៃក៏ដោយ។
លោកបានបញ្ជាក់ទៀតថា៖ «យើងនៅខ្វះ ៩ លានដូសទៀត តើយើងអាចបានមកពីណា? ខ្ញុំបានសរសេរលិខិតទៅនាយករដ្ឋមន្ត្រីចិនដើម្បីសុំបន្ថែម ខ្ញុំបានសរសេរលិខិតទៅនាយករដ្ឋមន្ត្រីឥណ្ឌា ប៉ុន្តែយើងបានគិតគូររួចហើយនូវការទិញវ៉ាក់សាំង AstraZeneca របស់ប្រទេសអង់គ្លេសផងដែរ»។
លោក ហ៊ុន សែន បានថ្លែងដោយបញ្ជាក់ថា រាជរដ្ឋាភិបាលនៅតែមានវិធានសុខាភិបាលដោយតម្រូវឱ្យប្រជាពលរដ្ឋទាំងអស់ ពិសេសពលករខ្មែរ និងអ្នកដំណើរមកពីក្រៅប្រទេស ដែលត្រូវតែធ្វើចត្តាឡីស័កចំនួន ១៤ ថ្ងៃជាកំហិត ដើម្បីចៀសវាងនូវការនាំចូលជំងឺនេះទៅក្នុងសហគមន៍សាជាថ្មីទៀត។
លោកបានថ្លែងថា៖ «បទពិសោធរបស់យើងគ្រប់គ្រាន់ដើម្បីឱ្យយើងដឹងថា ការគ្រប់គ្រងកូវីដ ១៩ គឺតម្រូវឱ្យធ្វើចត្តាឡីស័កក្នុងរយៈពេល ១៤ ថ្ងៃ ដោយខានមិនបាន ដោយមិនអាចបន្ថយមកនៅ ១០ ថ្ងៃ ឬ ៧ ថ្ងៃបានទេ។ ការធ្វើបែបនេះគឺដើម្បីប្រាកដថា ជំងឺកូវីដ ១៩ មិនត្រូវបាននាំចូលទៅក្នុងសហគមន៍សាជាថ្មីទេ»។
បើតាមលោកនាយករដ្ឋមន្ត្រី ពលករខ្មែរចំនួនជាង ៧ ០០០ នាក់ កំពុងធ្វើចត្តាឡីស័កនៅតាមខេត្តជាប់ព្រំដែនចំនួន ៧ ដោយក្នុងនោះខេត្តដែលមានមនុស្សធ្វើចត្តាឡីស័កច្រើនជាងគេគឺខេត្តបន្ទាយមានជ័យចំនួនជាង ៣៦០០ នាក់ ឧត្តរមានជ័យជាង ២ ០០០ នាក់ ខេត្តបាត់ដំបងជាង ១ ០០០ នាក់ និងបណ្តាខេត្តផ្សេងៗទៀត។
លោក ហ៊ុន សែន ថ្លែងថា៖ «ខ្ញុំធ្លាប់ជាទាហានដែលចូលសមរភូមិជាមួយគ្រាប់ប្រសេចប្រសាច ខ្ញុំចូលចរចាជាមួយនឹងប្រមុខរដ្ឋលើពិភពលោកច្រើនណាស់ ខ្ញុំមិនដែលញ័រដៃញ័រជើងទេ មិនដែលតក់ស្លុតទេ ប៉ុន្តែការធ្វើមេបញ្ជាការប្រឆាំងជាមួយនឹងកូវីដនេះគឺជារឿងដ៏លំបាកភ័យញ័រដៃជើង»។
នៅថ្ងៃម្សិលមិញនេះដែរ លោកនាយករដ្ឋមន្ត្រី ហ៊ុន សែន បានសម្រេចបន្តផ្តល់ជំនួយថវិកាចំនួន ២៥០ លានរៀលទៀតដល់ខេត្តចំនួន ២ គឺខេត្តបន្ទាយមានជ័យចំនួន ២០០ លានរៀល និងខេត្តកោះកុងចំនួន ៥០ លានរៀល ដើម្បីសម្រួលដល់ការធ្វើចត្តាឡីស័ករបស់ពលករខ្មែរដែលត្រឡប់មកពីប្រទេសថៃ។
ជំនួយវ៉ាក់សាំងកូវីដ១៩របស់ចិន ១ លានដូសនឹងមកដល់កម្ពុជាដំបូង ៦០ ម៉ឺនដូសនៅក្នុងខែកុម្ភៈ។ ខណៈកាលពីម្សិលមិញលោក ទៀ បាញ់ រដ្ឋមន្ត្រីក្រសួងការពារជាតិ ថ្លែងប្រាប់អ្នកសារព័ត៌មានកាលពីម្សិលមិញនៅវិទ្យាស្ថានទ័ពជើងគោក ខេត្តកំពង់ស្ពឺ ថា អ្នកជំនាញវ៉ាក់សាំងចិនបានមកដល់កម្ពុជាហើយ។
លោក ទៀ បាញ់ ថ្លែងថា៖ «ខ្ញុំសូមបញ្ជាក់ជូនថា ខាងកងទ័ពរបស់ប្រជាជនចិននោះ គឺបានបញ្ជូនមកជាបន្តបន្ទាប់រហូតមកដល់ពេលនេះគឺមានអ្នកជំនាញផ្ទាល់អំពីការថែរក្សា ទុកដាក់ និងប្រើប្រាស់នូវវ៉ាក់សាំងកូវីដ១៩ គឺស្ថិតនៅក្នុងព្រះរាជាណាចក្រកម្ពុជាយើងហើយ។ ក្រសួងការពារជាតិបានកំណត់ថាថ្ងៃទី ៣ នេះ (កុម្ភៈនេះ) នឹងឱ្យក្រុមកងយោធាចិន ជាអ្នកជំនាញខាងផ្នែកវ៉ាក់សាំង ឧទ្ទេសនាមទៅក្រុមគ្រូពេទ្យទាំងអស់ឱ្យដឹងពីរបៀបរបបថែរក្សា ទុកដាក់ និងឈានដល់ប្រើប្រាស់ ពិសេសការដឹកជញ្ជូនវ៉ាក់សាំងកូវីដ១៩»។
លោកបញ្ជាក់ថា៖ «និយាយរួមខាងក្រសួងការពារជាតិបានត្រៀមអ្វីៗគ្រប់បែបយ៉ាងទាំងអស់គ្រប់ជ្រុងជ្រោយអស់ហើយ។ ក្រសួងសុខាភិបាល ក៏បានឯកភាពបញ្ជូនក្រុមវេជ្ជបណ្ឌិតដើម្បីមករួមគ្នាស្ដាប់ការឧទ្ទេសនាមលើការថែរក្សា ទុកដាក់ និងឈានទៅដល់ការចាក់វ៉ាក់សាំងកូវីដ១៩»៕
