.jpg)
វេជ្ជបណ្ឌិតជាថ្នាក់ដឹកនាំស្ថាប័នពាក់ព័ន្ធសុខាភិបាលដែលទទួលជំនួយ។ រូប ស្ថានទូតអូស្ត្រាលី
ភ្នំពេញៈ រដ្ឋាភិបាលអូស្ត្រាលីផ្តល់ជំនួយចំនួន ១ លានដុល្លារអូស្ត្រាលីដល់កម្ពុជា និងសាធារណរដ្ឋប្រជាធិបតេយ្យប្រជាមានិតឡាវ ដើម្បីពង្រឹងមន្ទីរពិសោធន៍ជាតិ ត្រួតពិនិត្យឱសថ និងដើម្បីប្រយុទ្ធប្រឆាំងនឹងឱសថក្លែងក្លាយនៃប្រទេសទាំង ២។ នេះបើយោងតាមសេចក្ដីប្រកាសព័ត៌មានរបស់ស្ថានទូតអូស្ត្រាលីនៅភ្នំពេញកាលពីម្សិលមិញ។
សេចក្ដីប្រកាសព័ត៌មានស្ដីពីការជួយកម្ពុជាប្រយុទ្ធប្រឆាំងឱសថក្លែងក្លាយបានប្រកាសថា ជំនួយនេះនឹងត្រូវផ្តល់ជូនតាមរយៈ អង្គការក្រៅរដ្ឋាភិបាលជំនាញដែលមានឈ្មោះថា United States Pharmacopeia សម្រាប់រយៈពេល ២ ឆ្នាំគឺឆ្នាំ ២០២០-២០២២។
សេចក្ដីប្រកាសព័ត៌មានបានឱ្យដឹងថា ជំនួយរបស់ប្រទេសអូស្ត្រាលីនឹងជួយមន្ទីរពិសោធន៍ជាតិគ្រប់គ្រងគុណភាពនៃផលិតផលវេជ្ជសាស្ត្ររបស់កម្ពុជា លើកកម្ពស់ប្រព័ន្ធគ្រប់គ្រងគុណភាពរបស់កម្ពុជា យុទ្ធសាស្ត្រ និងផែនការ ប្រតិបត្តិការមន្ទីរពិសោធន៍ជាតិព្រមទាំងបង្កើនការធ្វើតេស្ត និងរាយការណ៍ អំពីផលិតផលវេជ្ជសាស្ត្រក្លែងក្លាយ និងអន់គុណភាព។
លោក Pablo Kang ឯកអគ្គរាជទូតអូស្ត្រាលីប្រចាំកម្ពុជាបានថ្លែងថា៖ «មន្ទីរពិសោធន៍ជាតិ គ្រប់គ្រងគុណភាពមានសារៈសំខាន់ក្នុងការការពារប្រឆាំងនឹងផលិតផលវេជ្ជសាស្ត្រក្លែងក្លាយ និងអន់គុណភាព។ ហេតុនេះហើយអូស្ត្រាលីមានមោទនភាពក្នុងការជួយឧបត្ថម្ភមន្ទីរពិសោធន៍ជាតិ គ្រប់គ្រងគុណភាពផលិតផលវេជ្ជសាស្ត្ររបស់កម្ពុជាដើម្បីត្រៀមលក្ខណៈ ទទួលបានការទទួលស្គាល់គុណភាពពីអង្គការសុខភាពពិភពលោក»។
បើតាមសេចក្ដីប្រកាសព័ត៌មានដដែលឱ្យដឹងថា អូស្ត្រាលីគឺជាអ្នកគាំទ្រដ៏ធំមួយចំពោះប្រព័ន្ធតាមដាន និងត្រួតពិនិត្យជាសកលរបស់អង្គការសុខភាពពិភពលោក។ ប្រព័ន្ធតាមដាននេះធ្វើការដើម្បីលើកកម្ពស់បរិមាណ គុណភាពនិងការវិភាគទិន្នន័យត្រឹមត្រូវទាក់ទងនឹងផលិតផលវេជ្ជសាស្ត្រក្លែងក្លាយ និងអន់គុណភាព និងដើម្បីប្រើប្រាស់ទិន្នន័យទាំងនេះក្នុងការធ្វើឱ្យប្រសើរឡើងនៃការបង្ការ ការរកឃើញ និងការឆ្លើយតប ដើម្បីការពារសុខភាពសាធារណៈ។
ប្រព័ន្ធតាមដាន និងត្រួតពិនិត្យជាសកលរបស់អង្គការសុខភាពពិភពលោក កំពុងតែជួយបង្កើតការមើលឃើញឱ្យកាន់តែច្បាស់នូវប្រភេទ និងកម្រិតនៃផលិតផលវេជ្ជសាស្ត្រក្លែងក្លាយ និងអន់គុណភាព ខណៈដែលករណីខ្លះកើនឡើងដល់ចំនួនលានករណី។ នេះបើយោងតាមសេចក្ដីប្រកាសព័ត៌មានដដែលនោះ។
របាយការណ៍ឆ្នាំ ២០១៧ នៃប្រព័ន្ធតាមដាន និងត្រួតពិនិត្យជាសកលរបស់អង្គការសុខភាពពិភពលោកបានដកស្រង់ការសិក្សាស្រាវជ្រាវដោយបង្ហាញនូវអត្រាបរាជ័យនៃផលិតផលវេជ្ជសាស្ត្រក្លែងក្លាយ និងអន់គុណភាពដែលត្រូវគេអង្កេតឃើញនៅក្នុងប្រទេសមានចំណូលទាប និងមធ្យមមានចំនួនប្រហែល ១០ ភាគរយ។ នោះមានន័យថា ក្នុងចំណោមអ្នកប្រើប្រាស់ ១០ នាក់អាចមាន ១ នាក់ដែលជួបប្រទះឱសថប្រឆាំងមេរោគ ឱសថគ្រុនចាញ់ មហារីក និងឱសថផ្សេងៗដែលក្លែងក្លាយ។ ការធ្វើឱ្យបទប្បញ្ញត្តិកាន់តែមានប្រសិទ្ធភាពនោះគឺមានសារៈសំខាន់ក្នុងការធានានូវការទទួលបានឱសថ និងវ៉ាក់សាំងដែលមានសុវត្ថិភាព ប្រសិទ្ធភាព និងគុណភាព។
បើតាមស្ថានទូតអូស្ដ្រាលីប្រចាំកម្ពុជាជំនួយថ្មីៗចុងក្រោយរបស់អូស្ត្រាលីចំពោះកម្ពុជា គឺបន្ថែមទៅលើជំនួយ ៥០ លានដុល្លារអូស្ត្រាលីដែលរដ្ឋាភិបាលអូស្ដ្រាលីកំពុងគាំទ្រដល់គម្រោង លើកកម្ពស់សមធម៌ និងគុណភាពសុខាភិបាល (H-EQIP)។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលពីម្សិលមិញមិនអាចទាក់ទងសុំអត្ថាធិប្បាយជុំវិញជំនួយនេះបានទេ៕
