The Phnom Penh Post Search

Search form




Logo of Phnom Penh Post newspaper Phnom Penh Post - អូស្រ្តាលី​ចំណាយ​ជាង​ $៤៣ ​លាន​សម្រាប់​ការ​តាំង​លំនៅ​ជនភៀស​ខ្លួន

អូស្រ្តាលី​ចំណាយ​ជាង​ $៤៣ ​លាន​សម្រាប់​ការ​តាំង​លំនៅ​ជនភៀស​ខ្លួន

ជនភៀស​ខ្លួន​រស់នៅ​លើ​កោះ​ណូរុ ធ្វើការ​តវ៉ា​កាលពី​ចុង​ឆ្នាំ​មុន​។
ជនភៀស​ខ្លួន​រស់នៅ​លើ​កោះ​ណូរុ ធ្វើការ​តវ៉ា​កាលពី​ចុង​ឆ្នាំ​មុន​។ រូបថត សហការី

អូស្រ្តាលី​ចំណាយ​ជាង​ $៤៣ ​លាន​សម្រាប់​ការ​តាំង​លំនៅ​ជនភៀស​ខ្លួន

ភ្នំពេញៈ ប្រទេស​​អូស្រ្តាលី​​នឹង​ចំណាយ​យ៉ាង​ហោច​ណាស់​​ ៤៣,៣ លាន​ដុល្លារ ដើម្បី​ផ្តល់​ការ​តាំង​លំនៅ​ថ្មី សម្រាប់​​ជនភៀសខ្លួន​មួយ​ចំនួន​តូច ក្នុង​ប្រទេស​កម្ពុជា ក្រោម​កិច្ចព្រមព្រៀង​ដ៏ចម្រូងចម្រាស​ដែល​ចុះ​ហត្ថលេខា​នៅ​រាជធានី​ភ្នំពេញ កាលពី​ឆ្នាំ​មុន។ នេះ​បើ​យោង​តាម​មន្ដ្រី​ម្នាក់​ដែល​បាន​​ថ្លែង​ប្រាប់​កាសែត​ពី​ម្សិលមិញ​។

គណៈកម្មាធិការ​ព្រឹទ្ធសភា​មួយ​នៅ​ទីក្រុង​ កង់បេរ៉ា ​ត្រូវ​បាន​ប្រាប់ កាលពី​ថ្ងៃ​អង្គារ​ថា ប្រទេស​អូស្រ្តាលី​នឹង​ត្រូវ​បន្ថែម​ថវិកា​ចំនួន​ ១៥,៥ លាន​ដុល្លារ​អូស្រ្តាលី​​ទៀត ពី​លើ​ការ​សន្យា​​ដំបូង​ចំនួន ៤០ លាន​​ដុល្លារ​អូស្រ្តាលី​ជា​ជំនួយ​មក​កម្ពុជា។

អ្នក​នាំពាក្យ​នាយកដ្ឋាន​អន្តោប្រវេសន៍​ អូស្រ្តាលី​ បាន​ថ្លែង​កាលពី​ថ្ងៃ​អង្គារ​ថា ទឹកប្រាក់​ចំនួន​ ១៥,៥ លាន​ដុល្លារ​អូស្រ្តាលី​​នឹង​សម្រាប់​​សេវា​គាំទ្រ​ការ​តាំង​លំនៅ​​របស់​ជនភៀស​ខ្លួន​ក្នុង​ប្រទេស​កម្ពុជា រួមមាន សេវា​សុខភាព សេវា​ការ​អប់រំ និង​ការ​បណ្តុះបណ្តាល​​។ វា​គឺ​បន្ថែម​លើ​​ ៤០ ​លាន​ដុល្លារ​ដែល​ប្រកាស​កាលពី​ពេល​កន្លងមក​។ ​លុយ​នេះ​នឹង​ត្រូវ​ផ្តល់​ផ្ទាល់​ទៅលើ​ការ​ចំណាយ​សេវា​សម្រាប់​ជនភៀស​ខ្លួន ខណៈ​លុយ​ជំនួយ​បន្ថែម​ទៀត​​នឹង​ត្រូវ​ផ្ទេរ​ជា​លក្ខណៈ​បណ្តាក់ នៅពេល​ជនភៀស​ខ្លួន​ទៅ​ដល់​នា​ឆ្នាំ​ខាង​មុខ​​»។

ជនភៀស​ខ្លួន​តែ​បួន​នាក់​ប៉ុណ្ណោះ​ដែល​ធ្លាប់​ត្រូវ​បាន​ឃុំ​ខ្លួន​លើ​កោះ​ណូរុ ដែល​អូស្រ្តាលី​​ជួល​ក្រុមហ៊ុន​ឯកជន​មួយ​គ្រប់គ្រង​មណ្ឌល​ឃុំ​ខ្លួន​នេះ​បាន​ទទួល​យក​គម្រោង​តាំង​លំនៅ​ដំបូង​មក​កម្ពុជា​។ ជនភៀស​ខ្លួន​ទាំង​បួន​នាក់​នោះ ដែល​បី​នាក់​ជា​ជនជាតិ​អឺរ៉ង់​ និង​ម្នាក់​ជនជាតិ​ភាគតិច​មីយ៉ាន់ម៉ា ត្រូវ​បាន​ឲ្យ​នៅ​​មន្ទីរ​អន្តោប្រវេសន៍​អូស្រ្តាលី​​នៅ​ជិត​ព្រលាន​យន្តហោះ Darwin បន្ទាប់ពី​ត្រូវ​បាន​បញ្ជូន​ដោយ​ស្ងាត់ៗ​ទៅ​ទីនោះ​កាលពី​ដើម​ខែ​នេះ​។

អ្នកនាំពាក្យ​របស់​សម្ព័ន្ធ​អ្នក​បង់​ពន្ធ​អូស្រ្តាលី​បាន​បដិសេធ​​ធ្វើ​អត្ថាធិប្បាយ​លើ​ការ​ប្រើប្រាស់​ថវិកា​សាធារណៈ​​ សម្រាប់​ការ​តាំង​ទីលំនៅ​នេះ ខណៈ​គាត់​កាលពី​មុន មិន​បាន​ដឹង​អំពី​តួលេខ​​​ដែល​ផ្តល់​ឲ្យ​កាលពី ថ្ងៃ​អង្គារ​ទៅ​គណៈកម្មាធិការ​ព្រឹទ្ធសភា។ នៅក្នុង​ថវិកា​ប្រចាំ​ឆ្នាំ​របស់​ខ្លួន​អូស្រ្តាលី​​បាន​ប្រកាស​ថា ខ្លួន​នឹង​កាត់​ជំនួយ​ចំពោះ​ប្រទេស​ជិត​ខាង​ជាច្រើន​របស់​កម្ពុជា​ប៉ុន្តែ​ថវិកា​សម្រាប់​កម្ពុជា​គឺ​មួយ​ភាគ​ធំ​​នៅ​រក្សា​ដដែល។

កាលពី​ថ្ងៃ​អង្គារ មន្រ្តី​អន្តោប្រវេសន៍​អូស្រ្តាលី​​បាន​បដិសេធ​ឆ្លើយតប​នឹង​សំណួរ​អំពី​កាលបរិច្ឆេទ​មក​​ដល់​នៃ​ជនភៀសខ្លួន​ទាំង​​បួន​នាក់​នោះ​។

លោក ខៀវ សុភ័គ អ្នក​នាំពាក្យ​ក្រសួង​​មហាផ្ទៃ និង លោក កែម សារិន ប្រធាន​នាយកដ្ឋាន​ជនភៀសខ្លួន​នៃ​ក្រសួង​មហាផ្ទៃ បាន​ថ្លែង​ថា ពួកគាត់​​មិន​បាន​​ដឹង​អំពី​ផែនការ​នា​ពេល​ខាង​​មុខ​ណា​មួយ​ចំពោះ​ការ​ផ្ទេរ​ក្រុម​ជនភៀសខ្លួន​នោះ​ទេ។

ជនភៀស​ខ្លួន​ម្នាក់​ដែល​កំពុង​នៅលើ​កោះ​ណូរុ​​នៅ​ឡើយ​បាន​ថ្លែង​ថា​ការ​វាយប្រហារ​នា​ពេល​ថ្មីៗ​នេះ នៅក្នុង​សហគមន៍​​​របស់​នាង​ជាពិសេស​​ការ​វាយប្រហារ​ផ្លូវភេទ​យ៉ាង​ព្រៃផ្សៃ​លើ​ស្រ្តី​វ័យក្មេង​កាលពី​សប្តាហ៍​មុន កំពុង​ជា​ករណី​បន្ថែម​ទៅលើ​ភាព​លំបាក ខណៈ​មនុស្ស​ជាច្រើន មិន​មាន​ឆន្ទៈ​មក​រស់នៅ​​កម្ពុជា​ ដែល​ជា​ប្រទេស​មួយ​ដែល​ពួកគេ​គិត​ថា ពុករលួយ​ និង​ក្រីក្រ​។

នាង​​ថ្លែង​ថា​៖ «​​ជា​ស្រ្តី​វ័យ​ជំទង់​ម្នាក់ ខ្ញុំ​មិន​ចង់​បាន​អ្វី​ទេ ប៉ុន្តែ​ចង់​បាន​​សេរីភាព​។ ​ខ្ញុំ​ចង់​ដើរ​​នៅ​តាម​ផ្លូវ និង​​ដើរ​ផ្សារ មើល​អគារ​ និង​​មនុស្សម្នា​ផ្សេងៗ​។ ​ខ្ញុំ​ចង់​ឃើញ​​បងប្អូន​ស្រី​​ និង​ក្មួយ​របស់​ខ្ញុំ​។ ​នេះ​គឺជា​អ្វី​ដែល​ខ្ញុំ​ចង់​បាន​ខ្លាំង​ណាស់​។ ខ្ញុំ​ឈឺចាប់​ណាស់​នៅក្នុង​បេះដូង​របស់​ខ្ញុំ ហើយ​ខ្ញុំ​មិន​អាច​ទ្រាំ​វា​បាន​ទៀត​ទេ​»៕ PS

អត្ថបទគួរចាប់អារម្មណ៍