ភ្នំពេញៈ ក្រសួងបរិស្ថាន និងអង្គការ World Wide Fund(WWF) ប្រចាំតំបន់អាស៊ីប៉ាស៊ីហ្វិកបន្តអំពាវនាវ និងធ្វើយុទ្ធនាការឱ្យពលរដ្ឋចូលរួមថែរក្សាអភិរក្សសត្វព្រៃ និងធនធានធម្មជាតិ បញ្ឈប់ការបរិភោគសាច់សត្វព្រៃ ខណៈពិភពលោកប្រារព្ធទិវាសត្វព្រៃពិភពលោកថ្ងៃទី ៣ មីនាក្រោមប្រធានបទ «ធ្វើឱ្យមាននិរន្តរភាពជីវិតលើភពផែនដី» ដើម្បីបង្ហាញពីគុណតម្លៃជីវចម្រុះលើភពផែនដីដែលបានផ្តល់ផលប្រយោជន៍ច្រើនដល់មនុស្ស។
លោក នេត្រ ភក្ត្រា អ្នកនាំពាក្យក្រសួងបរិស្ថានថ្លែងថា ទិវាសត្វព្រៃពិភពលោកត្រូវបានប្រារព្ធឡើងដើម្បីបង្ហាញពីជីវិតសត្វ និងរុក្ខជាតិដ៏សម្បូរបែបដែលមាននៅលើភពផែនដី និងផ្សព្វផ្សាយពីគុណតម្លៃនៃជីវចម្រុះទាំងនេះដែលបានផ្តល់ផលប្រយោជន៍យ៉ាងច្រើនដល់ប្រជាពលរដ្ឋ។ ទិវានេះក៏ជាការរំឭកដល់មនុស្សគ្រប់រូបអំពីភាពចាំបាច់នៃការចាត់វិធានការប្រឆាំងឧក្រិដ្ឋកម្មលើសត្វព្រៃ និងការធ្លាក់ចុះនូវប្រភេទសត្វព្រៃខ្លះ ដោយសកម្មភាពមនុស្សដែលអាចធ្វើឱ្យប៉ះពាល់សេដ្ឋកិច្ច បរិស្ថាន និងសង្គម។
លោកប្រាប់ភ្នំពេញប៉ុស្តិ៍កាលពីថ្ងៃទី ៣ មីនា ថា រាជរដ្ឋាភិបាលកម្ពុជាបានយកចិត្តទុកដាក់ខ្ពស់ក្នុងការថែរក្សា និងអភិរក្សជីវចម្រុះជីវិតសត្វ និងរុក្ខជាតិតូចធំនៅក្នុងតំបន់ការពារធម្មជាតិ ដើម្បីរក្សាឱ្យបានគង់វង្សសម្រាប់មនុស្សរាប់ជំនាន់ទៅមុខទៀត។
លោកថា៖ «ក្នុងការសង្គ្រោះសត្វព្រៃ និងអភិរក្សសត្វព្រៃ មន្ត្រីឧទ្យានុរក្សដែលបានឈរជើងការពារតំបន់ការពារធម្មជាតិនានាបានដោះអន្ទាក់ចេញពីក្នុងព្រៃបាន ១៧ ១៧៥ អន្ទាក់ កាលពីឆ្នាំ ២០១៩ គឺមានការកើនឡើងជាងឆ្នាំ ២០១៨ ចំនួន ៥ ០០០ អន្ទាក់។ ខេត្តដែលដោះអន្ទាក់បានច្រើនជាងគេគឺខេត្តកោះកុងដែលដោះបានចំនួន ៧ ០៧៤ អន្ទាក់នៅឆ្នាំ ២០១៩»។
តាមលោកបង្ហាញរបាយការណ៍ជាតិលើកទី ៤ ស្តីពីជីវចម្រុះគឺថាកម្ពុជាជាប្រទេសសម្បូរទៅដោយជីវៈចម្រុះដែលបង្ហាញវត្តមានប្រភេទថនិកសត្វ ១២៣ ប្រភេទ សត្វស្លាប ៥៤៥ ប្រភេទ ឧរង្គសត្វ ៨៨ ប្រភេទ រុក្ខជាតិតូចៗ (vascular plants) ២ ៣០៨ ប្រភេទ ត្រី ៨៧៤ ប្រភេទ ផ្កាថ្មរឹង ២៤ ប្រភេទ ផ្កាថ្មទន់ ១៤ ប្រភេទ ស្មៅសមុទ្រ ១០ ប្រភេទ និងថលជលិក ៦៣ ប្រភេទ។
លើសពីនេះលោកបញ្ជាក់ថា នៅមានវត្តមានប្រភេទរុក្ខជាតិ និងសត្វមួយចំនួនទៀតដែលមិនទាន់សិក្សាស្រាវជ្រាវ និងកំណត់អត្តសញ្ញាណនៅទ្បើយ។ មានប្រភេទរុក្ខជាតិ និងសត្វដែលបានកំណត់ក្នុងបញ្ជីក្រហមរបស់អង្គការសហភាពអន្តរជាតិ ដើម្បីការអភិរក្សធម្មជាតិ (IUCN) ដូចជា ថនិកសត្វ ៣៩ ប្រភេទ។ ក្នុងនោះប្រភេទសត្វដែលជិតផុតពូជ និងងាយរងគ្រោះរួមមាន ដំរីអាស៊ី ខ្លាដំបង ខ្លាឃ្មុំធំ ខ្លាពពក ខ្លាត្រី ខ្លាលឿងមាស រមាំង កែះ ប្រើសស្បូវ ខ្ទីង ទន្សោង ពង្រូល ទោចមកុដ ទោចថ្ពាល់លឿង រញីប្រផេះ ស្វាត្រោស ឆ្កែព្រៃ។
រីឯសត្វស្លាប ៣៦ ប្រភេទដែលជិតផុតពូជ និងងាយរងគ្រោះរួមមាន ត្រយងយក្ស ត្រដក់ធំ កេងកងធំ ត្មាតប្រផេះ ត្មាតត្នោត ត្មាតភ្លើង ក្រផលក្បាលក្រហម អង្កត់ខ្មៅជាដើម ឧរង្គសត្វ ១៣ ប្រភេទ រុក្ខជាតិតូចៗ (vascular plants) ៣៨ ប្រភេទ និងថលជលិក ១២ ប្រភេទ។
លោក ភក្ត្រា ថ្លែងថា៖ «សត្វព្រៃ និងរុក្ខជាតិដែលមាននៅលើភពផែនដីនេះគឺពិតជាមានសារៈប្រយោជន៍មិនអាចកាត់ថ្លៃបានផ្នែកប្រព័ន្ធអេកូឡូស៊ី ហ្សេនេទិក សង្គម សេដ្ឋកិច្ច វិទ្យាសាស្ត្រ ការអប់រំ វប្បធម៌ ផ្សារភ្ជាប់នឹងជីវិតរស់នៅរបស់មនុស្ស និងការអភិវឌ្ឍដោយចីរភាព។ សត្វព្រៃ និងសត្វស្លាបមួយចំនួនដែលពិភពលោកជិតផុតពូជគឺមានវត្តមាននៅក្នុងប្រទេសកម្ពុជា។ តាងនាមក្រសួងបរិស្ថាន ខ្ញុំសូមជំរុញឱ្យប្រជាពលរដ្ឋចូលរួមការពារ និងអភិរក្សសត្វព្រៃនៅកម្ពុជា និងបញ្ឈប់ការបរបាញ់សត្វ ចាប់សត្វព្រៃខុសច្បាប់ដែលត្រូវប្រឈមនឹងច្បាប់»។
លោកអំពាវនាវប្រជាពលរដ្ឋកុំបរិភោគសាច់សត្វព្រៃ ព្រោះមានមេរោគ និងគ្មានការត្រួតពិនិត្យត្រឹមត្រូវដែលធ្វើឱ្យមានការប៉ះពាល់ដល់សុខភាព។ ក្នុងនោះក្រោយពីការផ្ទុះជំងឺកូវីដ ១៩ ប្រទេសចិនបានអំពាវនាវដល់ប្រជាពលរដ្ឋកុំបរិភោគសាច់សត្វព្រៃ និងកុំជួញដូរសត្វព្រៃ។
បើតាមលោក ភក្ត្រា គឺមន្ត្រីឧទ្យានុរក្ស និងអាជ្ញាធរពាក់ព័ន្ធនៅតាមបណ្តាខេត្តនានាបានចុះពិនិត្យជាប្រចាំនៅតាមទីផ្សារនានា និងនៅតាមភោជនីយដ្ឋានមិនអនុញ្ញាតឱ្យលក់សាច់សត្វព្រៃឡើយ។ លោកបញ្ជាក់ថា៖ «ខ្ញុំសូមអំពាវនាវដល់បងប្អូនប្រជាពលរដ្ឋ ប្រសិនបើឃើញមានការលក់សាច់សត្វព្រៃ សូមទាក់ទងមកមន្ត្រីជំនាញដើម្បីចាត់វិធានការតាមច្បាប់»។
នៅទិវាសត្វព្រៃពិភពលោកនេះដែរ អង្គការ WWF ចេញសេចក្តីថ្លែងការណ៍ស្តីពីភាពចាំបាច់ក្នុងការបញ្ឈប់ជាបន្ទាន់រាល់ការជួញដូរ និងបរិភោគសាច់សត្វព្រៃនៅទូទាំងតំបន់អាស៊ីប៉ាស៊ីហ្វិក។
សេចក្ដីថ្លែងការណ៍បញ្ជាក់ថា៖ «អង្គការ WWF ទាំងអស់ដែលមានទីស្នាក់ការនៅក្នុងតំបន់អាស៊ីប៉ាស៊ីហ្វិកសូមអបអរសាទរចំពោះសេចក្តីសម្រេចរបស់គណៈកម្មាធិការអចិន្រៃ្តយ៍សភាប្រជាជាតិចិនដែលជាអង្គនីតិប្បញ្ញត្តិកំពូលរបស់ចិនក្នុងការហាមឃាត់ការបរិភោគសាច់សត្វព្រៃ និងការជួញដូរសត្វព្រៃគ្មានការអនុញ្ញាត។ អង្គការ WWF ទាំងអស់ដែលមានទីស្នាក់ការនៅក្នុងតំបន់សូមអំពាវនាវដល់ប្រទេសទាំងអស់នៅក្នុងតំបន់អាស៊ីបូព៌ា និងនៅក្នុងតំបន់អាស៊ីអាគ្នេយ៍ឲ្យយកគំរូតាមប្រទេសចិនដើម្បីគាំពារសុខភាព និងអាយុជីវិតរបស់ប្រជាពលរដ្ឋខ្លួន»។
ដោយឡែកអង្គការសម្ព័ន្ធមិត្តសត្វព្រៃក៏បានចាប់ផ្តើមធ្វើយុទ្ធនាការលើប្រព័ន្ធផ្សព្វផ្សាយលើបណ្តាញសង្គមស្តីពី «បញ្ឈប់ការបរិភោគសត្វព្រៃ Stop Eating Wildlife» ផងដែរ។ អង្គការនេះបញ្ជាក់ថា៖ «គោលបំណងនៃយុទ្ធនាការនេះគឺដើម្បីប្រឆាំងទៅនឹងការផ្គត់ផ្គង់តម្រូវការ និងការបរិភោគសាច់សត្វព្រៃដោយឱ្យអ្នកបរិភោគសាច់សត្វព្រៃទាំងអស់យល់ឱ្យបានកាន់តែច្រើនពីហានិភ័យ ចំពោះសុខភាពដែលបណ្តាលមកពីការហូបសត្វព្រៃ និងរបៀបនៃការធ្វើពាណិជ្ជកម្មសាច់សត្វព្រៃ»។
លោក ទេព អស្នារិទ្ធ ប្រធានកិច្ចការសាធារណៈនៃអង្គការ WWF កម្ពុជា បញ្ជាក់ថា៖ «អត្ថន័យរួមនៃសេចក្ដីថ្លែងការណ៍នេះ គឺអំពាវនាវឲ្យរដ្ឋាភិបាលនៅក្នុងប្រទេសក្នុងតំបន់អាស៊ីអាគ្នេយ៍ចូលរួមក្នុងការជួយទប់ស្កាត់ហាមឃាត់ជាអចិន្រៃ្តយ៍ចំពោះការបរិភោគ និងការជួញដូរសត្វព្រៃ។ អ្វីដែលជាភាពចាំបាច់នោះគឺការយកគំរូតាមការសម្រេចរបស់អង្គនីតិប្បញ្ញត្តិកំពូលរបស់ចិនដែលការសម្រេចនោះមាន ២ គឺបិទទីផ្សារជួញដូរសត្វព្រៃ និងហាមមិនឲ្យប្រជាជនចិនបរិភោគសាច់សត្វព្រៃតទៅទៀតទេ»៕