.jpg)
អាជីវករលក់ទំនិញក្នុងតូប ១ នៅផ្សារអូឡាំពិកពីម្សិលមិញ។ ហេង ជីវ័ន
ភ្នំពេញៈ ក្រសួងពាណិជ្ជកម្ម អំពាវនាវដល់ម្ចាស់ហាងលក់ទំនិញ អាជីវករ និងអ្នកលក់ដូរទំនិញតាមប្រព័ន្ធ Online មួយចំនួនចូលរួមរក្សាតម្លៃទំនិញលើទីផ្សារ ហើយក៏ព្រមានចាត់វិធានការផ្លូវច្បាប់ផងដែរលើជនខិលខូចដែលឆ្លៀតឱកាសលក់ទំនិញឡើងថ្លៃ ខណៈដែលប្រទេសជាតិកំពុងប្រយុទ្ធប្រឆាំងនឹងជំងឺកូវីដ ១៩។
សេចក្តីអំពាវនាវរបស់ក្រសួងពាណិជ្ជកម្មចុះថ្ងៃទី ២៧ មីនា បានឲ្យដឹងថាក្នុងកាលៈទេសៈដែលប្រទេសជាតិកំពុងប្រយុទ្ធប្រឆាំងនឹងជំងឺរាតត្បាតកូវីដ១៩ ក៏បានសង្កេតឃើញមានម្ចាស់ហាងលក់ទំនិញ អាជីវករ និងអ្នកលក់ដូរទំនិញតាមប្រព័ន្ធអ៊ីនធឺណិតមួយចំនួនបានឆ្លៀតឱកាសលក់ដំឡើងថ្លៃទំនិញ ដូចជា ម៉ាស់ការពារមុខ អាល់កុលលាងដៃ ចាហួយជាតិអាល់កុលលាងដៃ ឧបករណ៍ស្ទង់កម្តៅ និងគ្រឿងឧបភោគបរិភោគចាំបាច់សម្រាប់ប្រើប្រាស់ប្រចាំថ្ងៃលើទីផ្សារទូទាំងប្រទេស។
ក្រសួងពាណិជ្ជកម្មចាត់ទុកសកម្មភាពទាំងនេះអាចបង្កឲ្យមានផលប៉ះពាល់ដល់សន្តិសុខសង្គមធ្ងន់ធ្ងរ។ ក្រសួងទាមទារឲ្យមានការដាក់ចេញនូវវិធានការចំនួន ៣ ចំណុចដែលមានដូចជា សូមសាធារណជនមេត្តារក្សានូវភាពនឹងនរ កុំជ្រួលច្របល់ហួសហេតុនាំឲ្យជនឱកាសនិយមអាចឆ្លៀតយកចំណេញ តាមរយៈការលក់ដំឡើងថ្លៃទំនិញដោយមិនសមហេតុផល។
ក្រសួងបន្តអំពាវនាវដល់ម្ចាស់ហាងទំនិញ និងអាជីវកម្មទាំងអស់ត្រូវបិទស្លាកតម្លៃជាប្រាក់រៀលលើមុខទំនិញ ដែលចរាចរលើទីផ្សារសំដៅធានាបាននូវយន្តការសេដ្ឋកិច្ចទីផ្សារសេរី ការប្រកួតប្រជែងដោយសមធម៌ និងលើកស្ទួយដល់ចរាចរណ៍រូបិយវត្ថុក្នុងស្រុក។
ក្រសួងបញ្ជាក់ថា៖ «ចំពោះមុខទំនិញជា ម៉ាស់ការពារមុខ អាល់កុលលាងដៃ ចាហួយជាតិអាល់កុលលាងដៃ និងឧបករណ៍ស្ទង់កម្តៅ អ្នកលក់ត្រូវលើកស្លាកថ្លៃជាប្រាក់រៀលដែលមានទំហំធំអាចឲ្យសាធារណជនមើលឃើញច្បាស់ពីចម្ងាយ»។
ក្រសួងពាណិជ្ជកម្មក៏បានបង្ហាញការជឿជាក់ថា សាធារណជនម្ចាស់ហាងទំនិញ អាជីវករទាំងអស់ទាំងតាមប្រព័ន្ធអ៊ីនធឺណិតចូលរួមអនុវត្តតាមការណែនាំនេះ ដើម្បីអនុវត្តច្បាប់ជាធរមាន និងបង្ហាញពីស្មារតីសាមគ្គីជាតិខ្មែរក្រោមដំបូលសន្តិភាពទាំងអស់គ្នា។
ក្នុងករណីបំពាន ក្រសួងពាណិជ្ជកម្មនឹងចាត់មន្ត្រីជំនាញចូលរួមសហការជាមួយស្ថាប័នមានសមត្ថកិច្ចពាក់ព័ន្ធចុះស្រាវជ្រាវត្រួតពិនិត្យគុណភាព សុវត្ថិភាព និងតម្លៃទំនិញ ព្រមទាំងអនុវត្តនូវវិធានការតាមផ្លូវច្បាប់ក្នុងករណីរកឃើញជនខិលខូចដែលឆ្លៀតឱកាសលក់ទំនិញឡើងថ្លៃកេងចំណេញហួសហេតុ។
អ្នកលក់ម៉ាស់តាមអនឡាញម្នាក់ដែលសុំមិនបញ្ចេញឈ្មោះ ប្រាប់ភ្នំពេញប៉ុស្តិ៍ពីម្សិលមិញថា ដំបូងឡើយការលក់ម៉ាស់ក្នុងប្រទេសគឺមានតម្លៃធូរថ្លៃ។ ប៉ុន្តែក្រោយពីជំងឺនេះផ្ទុះឡើងបានធ្វើឲ្យប្រទេសដែលផ្គត់ផ្គង់ម៉ាស់ឡើងថ្លៃ។ លោកបន្តថា ការដែលផលិតផលលក់ចេញដូចជាម៉ាស់ការពារមុខជាដើមមានតម្លៃថ្លៃ ព្រោះការនាំចូលផលិតផលទាំងនោះមានតម្លៃហក់ឡើងដូចគ្នា។
លោកបញ្ជាក់ថា៖ «យើងក៏មិនចង់លក់ថ្លៃដែរ ប៉ុន្តែនាំចូលថ្លៃដូចគ្នា ហើយខ្ញុំបានឈប់លក់ម៉ាស់នេះហើយ ព្រោះតែថ្លៃពេក។ ពលរដ្ឋខ្មែរមួយចំនួនគាត់មិនមានលទ្ធភាពទិញនោះទេ ព្រោះតម្លៃម៉ាស់អាស្រ័យទៅលើផលិតផល។ ពេលខ្លះយើងកុម្ម៉ង់ចូលមានតម្លៃចាប់ពី ១៦ ដុល្លារ ដល់ ២០ ដុល្លារអីជាដើម ដែលយើងយកចំណេញតែប៉ុន្មានកាក់ប៉ុណ្ណោះ ព្រោះខ្ញុំទិញមកពីគេលក់បន្តដែរ»។
ជាមួយនឹងការទទួលស្គាល់ពីតម្លៃលក់មានការឡើងថ្លៃនេះ អ្នកលក់ម៉ាស់តាមអនឡាញរូបនេះចង់ឲ្យប្រទេស កម្ពុជា មានរោងចក្រផលិតម៉ាស់ដោយខ្លួនឯង ដើម្បីចូលរួមជួយរក្សាតម្លៃម៉ាស់ដែលនាំចូលមានតម្លៃថ្លៃ។ ទោះយ៉ាងណាលោកគាំទ្រចំពោះការចាត់វិធានការក្នុងការរក្សាតម្លៃទំនិញលើទីផ្សារផងដែរ។
អ្នកស្រីមួយ គាង ពលរដ្ឋម្នាក់រស់នៅក្នុងរាជធានីភ្នំពេញលើកឡើងថា ទំនិញនៅលើទីផ្សារ ជាពិសេសផលិតផលដែលចាំបាច់ប្រើប្រាស់ ដើម្បីការពារពីជំងឺកូវីដនេះឡើងថ្លៃខ្ពស់ខ្លាំងធ្វើឲ្យប៉ះពាល់ដល់ជីវភាពរបស់អ្នកស្រី និងប្រជាពលរដ្ឋដែលមានជីវភាពក្រីក្រ។ ពួកគេគ្មានលទ្ធភាពទិញប្រើប្រាស់ ខណៈចំណូលរកបានប្រចាំថ្ងៃបានធ្លាក់ចុះ និងរកមិនសូវបានជាដើម។
អ្នកស្រីបន្តថា៖ «វិធានការចេះតែមាន តែការអនុវត្តបានអត់នោះត្រូវតែតាមដាន ព្រោះជនឱកាសនិយមនៅតែមានអ៊ីចឹង។ បើសិនជាអាចឲ្យប៉ូលិសចុះទៅបង្ក្រាប [អ្នកលក់ឆ្លៀតឱកាសដំឡើងតម្លៃ] ជាក់ស្តែងដោយយើងបង្ក្រាប ១ ព្រមាន ១០ អ៊ីចឹង។ ព្រោះយើងមិនបង្ក្រាបទេ គេចេះតែបានដៃ គ្មានការចុះសោះ»៕
វីដេអូ៖
