ភ្នំពេញៈ រដ្ឋមន្ត្រីក្រសួងកិច្ចការនារី ថា អំពើហិង្សានៅក្នុងគ្រួសារ និងការរំលោភបំពានលើស្ត្រី នៅតែជាបញ្ហាប្រឈមរបស់កម្ពុជា ដែលត្រូវរួមគ្នាដោះស្រាយ ខណៈរបាយការណ៍របស់អង្គការ care បានរកឃើញថា កម្មការិនី ប្រមាណ ៥៧ % នៅតាមរោងចក្រទទួលរងនូវការបៀតបៀនផ្លូវភេទក្នុងរយៈពេល ១២ ខែចុងក្រោយ។
កាលពីម្សិលមិញក្នុងពិធីសម្ពោធដាក់ឲ្យប្រើប្រាស់ដំណើរការកម្មវិធីសហប្រតិបត្តិការអូស្ត្រាលី កម្ពុជាដើម្បីការផ្តល់សេវាប្រកបដោយនិរន្តរភាព និងសមធម៌ ហៅកាត់ថា (Access) ក្នុងទឹកប្រាក់ប្រមាណ ១៥ លានដុល្លារអូស្ត្រាលី រយៈពេល ៣ ឆ្នាំពីឆ្នាំ ២០១៨ ដល់ឆ្នាំ ២០២១។ ដោយកម្មវិធីនេះ នឹងអនុវត្តរួមគ្នារវាងរដ្ឋាភិបាល សង្គមស៊ីវិល វិស័យឯកជន ក្នុងការធ្វើឲ្យប្រសើរឡើងដល់ការផ្តល់សេវាដល់ជនពិការភាព និងស្ត្រីរងគ្រោះដោយអំពើហិង្សា និងការរំលោភបំពាននានា។
លោកស្រី អឹុង កន្ថាផាវី រដ្ឋមន្ត្រីក្រសួងកិច្ចការនារី បានថ្លែងថា ស្ត្រីជិត ១ ភាគ ៣ ដែលជាកម្មការិនីនៅតាមរោងចក្រ ធ្លាប់ទទួលរងឥរិយាបថនៃការបៀតបៀនផ្លូវភេទ បើប្រៀបធៀបទៅនឹងស្ត្រីពិការ ដែលធ្លាប់ទទួលរងអំពើហិង្សាបៀតបៀនផ្លូវភេទក្នុងរង្វង់គ្រួសារ។ លោកស្រីទទួលស្គាល់ និងមានក្ដីបារម្ភចំពោះអំពើហិង្សាផ្លូវភេទលើស្ត្រី ដែលពុំមានការថយចុះសោះក្នុងរយៈពេលចុងក្រោយ ខណៈអំពើហិង្សាក្នុងរង្វង់គ្រួសារបានធ្លាក់ចុះខ្លះ។
លោកស្រីបញ្ជាក់ថា៖ «បើទោះបីជាមានយន្តការជាច្រើនក៏ដោយ ក៏ស្ត្រីនៅតែប្រឈមអំពើហិង្សាក្នុងគ្រួសារ និងអំពើរំលោភបំពានផ្លូវភេទ ដែលក្នុងនោះ គឺមានស្ត្រី ១ ក្នុងចំណោម ៥ នាក់ ត្រូវបានគេរកឃើញថា ធ្លាប់ទទួលរងនូវអំពើហិង្សាក្នុងជីវិតរបស់ពួកគេ»។
លោកស្រីបញ្ជាក់បន្តថា៖ «កម្មការិនីដែលធ្វើការនៅតាមរោងចក្រប្រឈមនឹងការបៀតបៀនលើផ្លូវភេទដល់ទៅជិត ១ ភាគ ៣ នៃស្ត្រីដែលបានផ្តល់បទសម្ភាស ក្នុងអំឡុងពេល ១២ ខែចុងក្រោយនេះ។ យើងដឹងថា មានក្រុមស្ត្រីជាច្រើនដែលកំពុងប្រឈមនឹងហានិភ័យនេះ ដូចជាអ្នកស្រឡាញ់ភេទដូចគ្នា ស្ត្រីរស់នៅតាមតំបន់ជនបទ និងស្ត្រីជនជាតិដើមភាគតិច។ នេះជាកង្វល់មួយក្នុងប្រទេសកម្ពុជាយើងដែលយើងត្រូវបង្ការ និងគិតគូរទៅលើរូបភាពថ្មីដែលអាចកើតឡើងនៅក្នុងប្រទេសកម្ពុជា»។
របាយការណ៍របស់អង្គការ care បានបង្ហាញថា ក្នុងរយៈពេល ១២ ខែចុងក្រោយនេះ មានស្ត្រីប្រមាណ ៥៧% ដែលជាកម្មការិនីកាត់ដេរនៅតាមរោងចក្រត្រូវបានទទួលរងនូវអំពើបៀតបៀនផ្លូវភេទ។
យ៉ាងណា រដ្ឋមន្ត្រីក្រសួង កិច្ចការនារីអះអាងថា បញ្ហាប្រឈមទាំងនេះ ក្រសួងកំពុងសិក្សារៀបចំយុទ្ធសាស្ត្រទប់ស្កាត់។ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករថ្លែងថា នេះគឺជារឿងអាក្រក់ដែលកើតមាននៅក្នុងប្រទេស កម្ពុជា ហើយនៅតែបន្តកើតមាន។
បើស្ថាប័នពាក់ព័ន្ធពិតជាមានគោលការណ៍ច្បាស់លាស់មែននោះ អំពើទាំងនោះនឹងត្រូវបានកាត់បន្ថយ មិនមែនដូចរបាយការណ៍ ដែលបង្ហាញថាវាមិនកើនឡើងនោះទេ។
លោកថា៖ «បញ្ហារំលោភបំពានលើកម្មករនេះ គឺជាការប្រមាថទៅលើប្រពៃណី វប្បធម៌របស់ខ្មែរយើង ព្រោះថា ស្ត្រីខ្មែរជាស្ត្រីដែលថ្លៃថ្នូរ ជាស្ត្រីដែលត្រូវបានគេគោរពតាមរយៈវប្បធម៌ និងប្រពៃណីខ្មែរ។ នេះគឺជារឿងមួយដែលស្ថាប័នពាក់ព័ន្ធត្រូវតែដោះស្រាយជាបន្ទាន់»៕