ត្បូងឃ្មុំ: អ្នកកាប់ជ្រូកលក់ចំនួន ៧៤ គ្រួសារនៅផ្សារសួង ខេត្តត្បូងឃ្មុំបានកំពុងទាមទារដល់អាជ្ញាធរខេត្តបញ្ឈប់ការយកពន្ធលើអាជីវកម្មរបស់ពួកគេច្រើនហួសហេតុ និងផ្ទុយពីសេចក្ដីណែនាំរបស់ក្រសួងសេដ្ឋកិច្ច និងហិរញ្ញវត្ថុ ប៉ុន្តែអាជ្ញាធរបានអះអាងលើហេតុផលផ្សេងក្នុងការប្រមូលពន្ធនេះ។
លោក ហេង ហុងសេង តំណាងឲ្យអ្នកកាប់ជ្រូកលក់ ៧៤ គ្រួសារ នៅក្នុងផ្សារក្រុងសួង ខេត្តត្បូងឃ្មុំបានឲ្យដឹងថា មន្ត្រីពន្ធដារខេត្តត្បូងឃ្មុំបានតម្រូវឲ្យអ្នកកាប់ជ្រូកលក់ចំនួន ៧៤ គ្រួសារបង់ពន្ធលើតម្លៃជ្រូក ១ ក្បាលចំនួន ៤ ០០០-៤ ៥០០ រៀលជារៀងរាល់ថ្ងៃ ប្រសិនមានអ្នកខកខានក្នុងការបង់ពន្ធនឹងត្រូវពិន័យថែមលើសពីនេះទៀត។
លោក ហុងសេង បានឲ្យដឹងថា អ្នកកាប់ជ្រូកលក់ទាំង ៧៤ គ្រួសារ បានប្រកបមុខរបរនេះចាប់តាំងពីឆ្នាំ ១៩៩៧ ដោយបានបង់ពន្ធជាហូរហែ និងជារៀងរាល់ឆ្នាំរហូតដល់ឆ្នាំ ២០១៧ ក្រសួងសេដ្ឋកិច្ច និងហិរញ្ញវត្ថុបានដាក់សំណើសុំទៅរដ្ឋាភិបាល ដើម្បីសុំលើកលែងការបង់ពន្ធចំពោះអាជីវករកាប់ជ្រូក ឬគោទាំងអស់ លើកលែងតែអាជីវកម្មជាលក្ខណៈក្រុមហ៊ុនធំៗត្រូវគោរពតាមច្បាប់ដដែល។
លោក ហុងសេង ថ្លែងថា៖ «ចាប់តាំងពីឆ្នាំ ២០១៧ គឺក្រោយពីពួកខ្ញុំបានឃើញលិខិតរបស់ក្រសួងសេដ្ឋកិច្ច និងហិរញ្ញវត្ថុស្នើទៅសម្ដេចតេជោ ហ៊ុន សែន សុំលើកលែងពន្ធដល់អ្នកកាប់ជ្រូកតូចតាចដូចពួកខ្ញុំនេះ ពួកខ្ញុំមិនបានទៅបង់ពន្ធជូនរដ្ឋទៀតទេ ប៉ុន្ដែថ្មីៗនេះស្រាប់តែខាងមន្ត្រីពន្ធដារខេត្តត្បូងឃ្មុំ មកទារលុយពីពលរដ្ឋថា ជំពាក់ថ្លៃបង់ពន្ធ ព្រោះពួកខ្ញុំមិនបានបង់ជាច្រើនខែហើយ ប៉ុន្ដែពួកខ្ញុំក៏បានតវ៉ាទៅមន្ត្រីវិញ តែគាត់មិនស្ដាប់ទេ គឺនៅតែតម្រូវឲ្យយើងបង់ពន្ធដារដដែល បើមិនបង់ពន្ធទេ គឺគេនឹងកាត់លុយតាមរយៈការលក់ដី ឬលក់ផ្ទះ»។
ពលរដ្ឋជាអ្នកកាប់ជ្រូកម្នាក់ទៀតថ្លែងដោយសុំមិនបញ្ចេញឈ្មោះថា មន្ត្រីខាងពន្ធដារនៅតែមកទារពន្ធពីអាជីវករកាប់ជ្រូកលក់ដដែល។
លោកបញ្ជាក់ថា៖ «ខ្ញុំសូមអំពាវនាវឲ្យសម្ដេចតេជោ និងអាជ្ញាធរខេត្តត្បូងឃ្មុំ កុំយកពន្ធពីអ្នកកាប់ជ្រូកតូចតាចដូចពួកខ្ញុំទៀត ព្រោះជ្រូកឡើងថ្លៃ លក់ក៏មិនសូវដាច់ទៀត អ៊ីចឹងពួកខ្ញុំគ្មានលុយបង់ពន្ធជូនរដ្ឋទេ»។
លោក ពេជ្រ ស្រស់ ប្រធានគណបក្សយុវជនកម្ពុជា និងជាសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ដែលបានចុះសិក្សាស្រាវជ្រាវបញ្ហានេះបានឲ្យដឹងថា ក្រោយពីការស្រាវជ្រាវ និងស៊ើបអង្កេតគឺពលរដ្ឋនៅតែមិនទាន់អាចទទួលយកដំណោះស្រាយពីអាជ្ញាធរ ដូច្នេះទើបលោកគ្រោងនឹងជួបពិភាក្សាជាមួយលោក គង់ វិបុល អគ្គនាយកនៃអគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុនៅសប្ដាហ៍ក្រោយ ដើម្បីពិភាក្សាពីករណីនេះ។
លោក ស្រស់ បានឲ្យដឹងថា៖ «រឿងនេះ ខ្ញុំនៅបន្តសិក្សាទៀត ព្រោះដោះស្រាយមិនទាន់ចប់ទេ ដោយសារនៅពេលខ្ញុំបានជួបជាមួយមន្ត្រីពន្ធដារនៅខេត្តត្បូងឃ្មុំ គឺខាងពន្ធដារ គេសង្កត់ធ្ងន់ថា គេមិនយកពន្ធពីការកាប់ជ្រូកទេ ប៉ុន្ដែគេយកពន្ធពីការលក់សាច់ជ្រូកហ្នឹង។ ឧទាហរណ៍ថា ពលរដ្ឋកាប់ជ្រូក ១ ក្បាល គឺខាងពន្ធដារគេអត់យកពន្ធទេ តែបើពលរដ្ឋយកសាច់ជ្រូកនេះទៅលក់នៅផ្សារគឺគេយកពន្ធពីការលក់សាច់ជ្រូកហ្នឹង»។
លោក ពេជ្រ ស្រស់ បានឲ្យដឹងទៀតថា ពលរដ្ឋ និងមន្ត្រីពន្ធដារនៅបន្តចម្រូងចម្រាសគ្នា ដោយភាគីពលរដ្ឋមានអំណះអំណាងលើលិខិតដែលប្រកាសដោយក្រសួងសេដ្ឋកិច្ច និងហិរញ្ញវត្ថុកាលពីឆ្នាំ ២០១៧ ដែលលើកលែងពន្ធដារការកាប់ជ្រូក ឬគោជាលក្ខណៈតូចតាច រីឯមន្ត្រីពន្ធដារ គេមានហេតុផលផ្សេងពីនេះទៀត។
មន្ត្រីពន្ធដារខេត្តត្បូងឃ្មុំ ដែលសុំមិនបញ្ចេញឈ្មោះបានឲ្យដឹងតាមរយៈហ្វេសប៊ុកផេចកាលពីម្សិលមិញថា ចំពោះករណីនេះគឺពុំពិតតាមការតវ៉ារបស់ពួកគាត់ទេ។ ដោយពួកគាត់មានការភ័ន្ដច្រឡំ និងពុំបានយល់ច្បាស់ពីច្បាប់សារពើពន្ធ អំពីការប្រកបអាជីវកម្មនេះ។
ចំពោះការប្រកបអាជីវកម្មលក់សាច់ជ្រូក-គោនេះពីមុនមក ច្បាប់តម្រូវឲ្យពួកគាត់ត្រូវបំពេញកាតព្វកិច្ចបង់ពន្ធសត្តឃាត គឺពន្ធទៅលើការពិឃាតសត្វ និងពន្ធផ្សេងៗពាក់ព័ន្ធទៅនឹងអាជីវកម្មរបស់ពួកគាត់។ ប៉ុន្តែក្រោយមកអនុវត្តតាមចំណាររបស់សម្ដេចតេជោ ហ៊ុន សែន ចុះថ្ងៃទី ២៤ ខែកក្កដា ឆ្នាំ ២០១៧ រាជរដ្ឋាភិបាលបានរៀបចំនិរាករណ៍ពន្ធសត្តឃាតតាមរយៈច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៨ រួចហើយ។ ចំពោះការនិរាករណ៍ពន្ធសត្តឃាតនេះ ពុំមែនមានន័យថា ត្រូវនិរាករណ៍គ្រប់ប្រភេទពន្ធនោះទេ។
អាជីវករត្រូវបំពេញកាតព្វកិច្ចសារពើពន្ធផ្សេងទៀតដែលនៅជាធរមាន ដូចជា ពន្ធប៉ាតង់, ប្រាក់រំដោះពន្ធលើប្រាក់ចំណូល (ប្រចាំខែ) អាករលើតម្លៃបន្ថែម (បច្ចុប្បន្នត្រូវបានព្យួរ ចាត់ជាបន្ទុករបស់រដ្ឋ) ការប្រកាសពន្ធលើប្រាក់ចំណូលប្រចាំឆ្នាំរួមនឹងពន្ធតែមប្រិ៍លើស្លាកយីហោ និងពន្ធកាត់ទុកលើឈ្នួលផ្ទះ ករណីដែលមានលើកស្លាកអាជីវកម្ម និងជួលផ្ទះធ្វើជាទីស្នាក់ការសហគ្រាស បើពុំមានការលើកស្លាកយីហោ ឬជួលផ្ទះទេ ក៏ពុំត្រូវបង់ពន្ធតែមប្រិ៍ ឬពន្ធកាត់ទុកលើឈ្នួលផ្ទះនេះដែរ។
មន្ត្រីរូបនេះថ្លែងថា៖ «សរុបមក អាជីវកម្មលក់សាច់ជ្រូក-គោគឺត្រូវបានបញ្ឈប់ការប្រមូលតែពន្ធលើសត្តឃាតតែ ១ មុខប៉ុណ្ណោះ ដែលត្រូវបាននិរាករណ៍រួចហើយ ចំណែកប្រភេទពន្ធដទៃទៀតដែលនៅជាធរមានត្រូវបានអនុវត្តការប្រមូលបន្ត»៕