.jpg)
ពលរដ្ឋ ២ រូបក្នុងចំណោម ១០ រូបដែលត្រូវបានឃាត់ខ្លួន និងឈើដែលត្រូវបានរឹបអូស។ រូបថត សហគមន៍
ព្រះវិហារៈ ក្រុមល្បាតសហគមន៍បានឃាត់សួរនាំអ្នកកាប់ឈើ ១០ នាក់ និងដកហូតម៉ាស៊ីនអារឈើ ១២ គ្រឿង ហើយបានលើកឡើងថាបទល្មើសព្រៃឈើ និងសត្វព្រៃក្នុងដែនជម្រកសត្វព្រៃ ព្រៃឡង់កំពុងតែកើតមានឡើងដោយគ្មានស្រាកស្រាន្ត។
ក្រុមល្បាតសហគមន៍ចំនួន ១៧ រូប និងមន្ត្រីនគរបាលម្នាក់បានរួមគ្នាចុះល្បាតព្រៃរយៈពេល ៣ ថ្ងៃនៅក្នុងដែនជម្រកសត្វព្រៃ ព្រៃឡង់ស្ថិតនៅឃុំធ្មា ស្រុកជ័យសែនដោយចាប់ពីថ្ងៃព្រហស្បតិ៍សប្តាហ៍មុនមក។ អ្នកស្រី ថី ជា អ្នកល្បាតម្នាក់បានឲ្យដឹងថាលទ្ធផលនៃការចុះល្បាតនោះពួកគាត់បានប្រទះឃើញបទល្មើសព្រៃឈើជាច្រើនកន្លែងនៅក្នុងចំណុចអូរគោ ចំបឹង ចំឫស្សី និងចំណុចចំអណ្តូងជាដើម។ ក្នុងនោះបានធ្វើការឃាត់សួរនាំអ្នកកាប់ឈើចំនួន ១០ នាក់ដកហូតម៉ាស៊ីនអារឈើចំនួន ១២ គ្រឿង និងប្រេងចាក់ម៉ាស៊ីនអារឈើចំនួន ៣ កានពីជនល្មើសផងដែរ។
អ្នកស្រីបញ្ជាក់ថា៖ «ពួកគេកំពុងតែអារច្រៀកដើមជ័រច្បោះ និងឈើទាលរបស់សហគមន៍។ អារមួយកន្លែងៗមាន ៣ ទៅ ៤ ម៉ាស៊ីន។ គេអារជាឈើគ្រឿងផ្ទះ ដែលសរុបទៅមានប្រមាណជា ៥០ ម៉ែត្រគុប តែទុកចោលនៅក្នុងព្រៃព្រោះគ្មានមធ្យោបាយដឹកពីព្រៃបាន»។
អ្នកស្រី ថី បានបន្តថាអ្នកអារឈើបានបោះជំរំស្នាក់នៅក្នុងព្រៃជាក្រុមៗ ដើម្បីប្រព្រឹត្តបទល្មើស។ អ្នកប្រព្រឹត្តបទល្មើសអះអាងថាពួកគេមកពីខេត្តផ្សេងៗពីគ្នាដូចជាកំពង់ធំ ក្រចេះ និងកំពតជាដើម ហើយត្រូវថៅកែឈ្មោះ ឌី និងម៉ៅជួលឲ្យអារឈើនេះដោយក្នុង ១ ម៉ែត្រគុបទទួលបាន ១៥ ម៉ឺនរៀល។
អ្នកស្រីថ្លែងដូច្នេះថា៖ «ពិបាកណាស់។ គេអារហើយដឹកកាត់ស្នាក់ការមន្ត្រី តែអត់មានឃើញអ្នកណាធ្វើអីផង។ ខ្ញុំសួរថា មិនខ្លាចមន្ត្រីទេអី? គេឆ្លើយថាមិនពិបាកទេ ព្រោះមេ [ថៅកែ] ខ្ញុំបង់លុយឲ្យមន្ត្រីជំនាញរួចអស់ហើយមានអីពិបាក។ មានតែក្រុមសហគមន៍មួយទេដែលមិនយកលុយ»។ អ្នកកាប់ឈើទាំង ១០ នាក់នោះត្រូវបានដោះលែងវិញ ដោយមិនចាប់ប្រគល់ជូនមន្ត្រីបរិស្ថាននោះទេ។ អ្នកស្រីថាបើប្រគល់ឲ្យមន្ត្រីជំនាញ ក៏គង់តែគេដោះលែងដដែល។ ចំពោះវត្ថុតាងដែលរឹបអូសបាននោះសហគមន៍កំពុងតែរៀបចំប្រគល់ឲ្យមន្ត្រីជំនាញហើយ។
អ្នកស្រី ថី បានសង្កេតឃើញថាបទល្មើសមិនមានការថមថយនោះទេ កើតឡើងទាំងថ្ងៃទាំងយប់។ អ្នកស្រីថាពេលខ្លះក្នុង ១ យប់មានរថយន្តធំៗចូលដឹកឈើ ៥ គ្រឿងក៏មានដែរ និងដឹកចេញតាមឃុំធ្មា, រៀបរយ និងឃុំពុទ្រាជាដើម។ ក្រៅពីនោះបទល្មើសសត្វព្រៃក៏កំពុងតែសម្បូរដែរដោយអ្នកភូមិខ្លះប្រើប្រាស់កាំភ្លើងកែច្នៃ និងមាន ១ ករណីនោះឃើញមានអ្នកភូមិមានកាំភ្លើងម៉ាក AK យកទៅបរបាញ់សត្វផងដែរ។
លោក ឡី ទួន នាយប៉ុស្តិ៍ធ្មាបានឲ្យដឹងថា លោកបានបញ្ជូនកម្លាំងនគរបាលប៉ុស្តិ៍ម្នាក់ឲ្យទៅចូលរួមទប់ស្កាត់បទល្មើស និងការពារសុវត្ថិភាពសហគមន៍ក្នុងពេលចុះទៅល្បាតនោះ ហើយឃើញមានការរឹបអូសបានវត្ថុតាងនោះមែន។
លោកថា បទល្មើសដែលកំពុងកើតមាននោះគឺជាបទល្មើសតូចតាចដែលប្រព្រឹត្តដោយប្រជាពលរដ្ឋ ដើម្បីយកឈើទៅលក់ដោះស្រាយជីវភាពគ្រួសារ។
លោកបញ្ជាក់ថា៖ «វាកើតមានតិចតួចៗហ្នឹង។ ពលរដ្ឋមិនដឹងរកស៊ីអីផង។ គ្នារកដើម្បីដោះស្រាយជីវភាពគ្រួសារ។ ពេលចុះល្បាតផ្អាកទៅ»។
លោក ជិន មនោរិទ្ធ អនុប្រធានដែនជម្រកសត្វព្រៃឡង់ក៏បានថ្លែងផងដែរថា បទល្មើសនៅមានតិចតួចមែន តែវាមិនមានការកើនឡើងនោះទេ។ លោកថា អ្នកកាប់ឈើជាពលរដ្ឋមូលដ្ឋានដែលពេលខ្លះមានការសុំការអនុញ្ញាតពីអាជ្ញាធរដើម្បីអារឈើយកទៅធ្វើផ្ទះតែពួកគាត់ឆ្លៀតកាប់លើសដើម្បីយកទៅលក់ខ្លះក៏មាន។
លោកអះអាងថា៖ «ពេលខ្លះបទល្មើសលួចធ្វើពេលយប់ តែយើងធ្វើតែពេលថ្ងៃទេ ព្រោះកម្លាំងយើងតិច និងគ្មានអាវុធគ្មានអី»។
លោកបន្ថែមថាកម្លាំងបរិស្ថានតែងតែចុះបង្ក្រាបបទល្មើសជាប្រចាំជាមួយសហគមន៍ តែលើកចុងក្រោយនេះមិនបានចូលរួមទេ ដោយសារតែកម្លាំងជាប់រវល់ប្រជុំ។ លោកបន្តថាក្នុងខែនេះ កម្លាំងបរិស្ថានបានរឹបអូសម៉ាស៊ីនអារឈើប្រមាណ ៥ គ្រឿង និងអាវុធកែច្នៃ ៦ ដើមផងដែរ៕
