.jpg)
សមត្ថកិច្ចឃាត់ខ្លួនជនសង្ស័យ ៣ នាក់ ករណីបំពានបម្រាមបិទខ្ទប់ កាលពីថ្ងៃទី ២៣ មេសា។ រូបថត ប៉ូលិស
កណ្តាល៖ អ្នកកាសែតម្នាក់ និងបក្ខពួក ២ នាក់ ត្រូវបានសមត្ថកិច្ចនគរបាលចាប់បញ្ជូនទៅតុលាការខេត្តកណ្តាល នៅថ្ងៃទី ២៥ មេសា ករណីបំពានបម្រាមបិទខ្ទប់ នៅភូមិក្រងស្វាយ ឃុំស្វាយអំពារ ស្រុកមុខកំពូល ខេត្តកណ្តាល កាលពីថ្ងៃទី ២៣ មេសា។
លោក ឡាក់ ម៉េងធី ប្រធានការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកណ្តាល ប្រាប់នៅថ្ងៃទី ២៥ មេសាថា ជនសង្ស័យទាំង ៣ នាក់ ទី១-ឈ្មោះ វឿន សុភណ្ណរ៉ា ភេទប្រុស អាយុ ៣៦ ឆ្នាំ ជាជាងជួសជុលរថយន្ត និងជាអ្នកសារព័ត៌មានអនឡាញ ឈ្មោះ យ៉ូម៉ាធីវី ទី២-ឈ្មោះ ស្រ៊ាង ម៉េងលី ភេទប្រុស អាយុ ១៩ ឆ្នាំ និងម្នាក់ទៀតឈ្មោះ អ៊ុយ ភារម្យ ភេទប្រុស អាយុ ២៤ ឆ្នាំ។
ពួកគេមានស្រុកកំណើតនៅខេត្តក្រចេះ និងបច្ចុប្បន្នស្នាក់នៅភូមិ-សង្កាត់អូរបែកក្អម ខណ្ឌសែនសុខ រាជធានីភ្នំពេញ។
លោកថ្លែងថា៖ «ជនទាំង ៣ នាក់នេះ គឺសមត្ថកិច្ចរបស់ខ្ញុំបញ្ជូនបន្តទៅតុលាការ ដើម្បីអនុវត្តតាមនីតិវិធីច្បាប់ដោយសារតែពួកគាត់ល្មើសនឹងបម្រាមបិទខ្ទប់»។
លោក ឯក លន់ អធិការនគរបាលស្រុកមុខកំពូល ប្រាប់ ភ្នំពេញ ប៉ុស្តិ៍ នៅថ្ងៃទី ២៥ មេសាថា ជនសង្ស័យទាំង ៣ នាក់ បានបើករថយន្ត ១ គ្រឿងម៉ាក KiA ពណ៌ស ពាក់ស្លាកលេខភ្នំពេញ 2R.2854 បើកបរពីទិសរាជធានីភ្នំពេញឆ្ពោះទៅខេត្តក្រចេះ។
ប៉ុន្តែពេលពួកគេធ្វើដំណើរមកដល់ចំណុចគោលដៅត្រួតពិនិត្យត្រង់ព្រំប្រទល់ខេត្តកណ្តាល និងខេត្តកំពង់ចាម ក្នុងភូមិសាស្រ្តភូមិក្រងស្វាយ ឃុំស្វាយអំពារ ស្រុកមុខកំពូល ក៏ត្រូវសមត្ថកិច្ចយាមគោលដៅរបស់លោកឃាត់ខ្លួនតែម្តង។
លោកប្រាប់ថា បន្ទាប់ពីឃាត់ខ្លួនសួរនាំឃើញ ឈ្មោះ វឿន សុភណ្ណរ៉ា ជាអ្នកកាសែតដែលមានកាន់បណ្ណសារព័ត៌មានអង្គភាពសារព័ត៌មានឈ្មោះ យូម៉ា ធីវី អនឡាញ។ រីឯបក្ខពួកគាត់ ២ នាក់ទៀតមិនមែនជាអ្នកកាសែតទេ។
បើតាមលោក ឯក លន់ ថា៖ «ពួកគេបានដឹងឮហើយអំពីបម្រាមបិទខ្ទប់នេះ ប៉ុន្តែពួកគេនៅតែបំពាន។ អ៊ីចឹងអ្នកបំពាននឹងបម្រាមរបស់រាជរដ្ឋាភិបាលមានតែប្រឈមនឹងច្បាប់ទេ»។
ដោយឡែក លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មានប្រាប់ ភ្នំពេញ ប៉ុស្តិ៍ នៅថ្ងៃទី ២៥ មេសាថា សារព័ត៌មានឈ្មោះ យូម៉ា ធីវី អនឡាញ នេះពិតជាមានចុះបញ្ជីការនៅក្រសួងព័ត៌មានពិតមែន។
ចំពោះអ្នកសារព័ត៌មានទាំងអស់ដែលកំពុងធ្វើសកម្មភាពទាំងតាមប្រព័ន្ធអនឡាញក្តី គឺអស់លោកទាំងនោះគួរតែមើលច្បាប់បទដ្ឋានដែលកំពុងចេញផងថា ស្ថិតនៅក្នុងបរិបទអ្វី។
លោកបន្តថា ក្នុងបរិបទនេះ ឃើញមានការដាក់ប្រទេសក្នុងគ្រាអាសន្ន ហើយក្នុងមាត្រាច្បាប់ទាំងអស់មានចែង។ សេចក្តីសម្រេចមួយទៀតលេខ ៤៩ និងសេចក្តីសម្រេចលេខ ៥០ ស្តីពីវិធានក្នុងការរាំងខ្ទប់។ ហេតុដូច្នេះ អស់លោកជាអ្នកសារព័ត៌មានគួរមើលក្នុងច្បាប់នោះ។
លោក សុវណ្ណ ថ្លែងថា៖ «កន្លែងណាដែលច្បាប់អនុញ្ញាតឱ្យធ្វើ និងកន្លែងណាដែលច្បាប់មិនអនុញ្ញាត។ អ៊ីចឹង បើពេលមានកើតបញ្ហាបែបនេះ ច្បាប់មានចែងហើយ។ អ៊ីចឹងមិនមែនគាត់ជាអ្នកសារព័ត៌មាន មានកាតកាសែតសារព័ត៌មានហើយចេះតែធ្វើស្រេចចិត្តទេគេមានវិធានរបស់គេ»។
លោកថ្លែងថា៖ «ខ្ញុំឱ្យគាត់គោរពតាមវិធានហ្នឹងហើយ បើគាត់មិនគោរពសមត្ថកិច្ចលោកអនុវត្តតាមវិធានរបស់លោកហើយ»។
លោកបន្តថា អ្នកសារព័ត៌មានអាចធ្វើដំណើរបាននៅក្នុងមូលដ្ឋានខណ្ឌរបស់គាត់ គឺគាត់ធ្វើការក្នុងខណ្ឌរបស់គាត់ កុំរំលោភវិធានផ្សេងៗទៀតរបស់ក្រសួងអាជ្ញាធរមានសមត្ថកិច្ច។
ពាក់ព័ន្ធនឹងបទល្មើសបំពានបម្រាមបិទខ្ទប់នេះដែរ តុលាការខេត្តកណ្តាលកាលពីថ្ងៃទី ២៤ ខែមេសា បានសម្រេចធ្វើការចោទប្រកាន់ និងបញ្ជូនបុរសម្នាក់ទៅឃុំខ្លួននៅពន្ធនាគារ។
លោក ឡាក់ ម៉េងធី ប្រាប់ថា តុលាការខេត្តកណ្តាលបានឃុំខ្លួនបុរសម្នាក់ឈ្មោះ ស៊ូ ម៉េងសែ អាយុ ៣០ ឆ្នាំ ក្នុងពន្ធនាគារខេត្តកណ្តាល ដោយសារជនម្នាក់នោះគំរាមវាយមេភូមិ និងប្រជាការពារក្រុងតាខ្មៅ ខណៈជននោះល្មើសនឹងបម្រាមបិទខ្ទប់ ហើយបានឆ្លងកាត់គោលដៅទាំងស្រវឹង។
លោកបន្តថា ជនសង្ស័យនៅក្រោយពេលឃាត់ខ្លួនសមត្ថកិច្ចពិនិត្យមានជាតិអាល់កុលក្នុងឈាម និងមានផ្ទុកសារធាតុញៀនក្នុងទឹកនោមផង។
លោកប្រាប់ថា៖ «លោកចៅក្រម វ៉ាន់ សុបញ្ញា ចោទបទរារាំដល់ការអនុវត្តវិធានការ និងបើកបរក្រោមឥទ្ធិពលគ្រឿងញៀនតាមបញ្ញត្តិមាត្រា ៤ និងមាត្រា ១១ ច្បាប់ស្តីពីវិធានការទប់ស្កាត់ជំងឺកូវីដ»៕
