ភ្នំពេញៈ អ្នកកាសែតមួយចំនួនកាលពីម្សិលមិញមានការខកចិត្ត ចំពោះក្លិបអ្នកកាសែតកម្ពុជា និងសហភាពសហព័ន្ធអ្នកសារព័ត៌មានកម្ពុជាចំពោះជំហរនៅស្ងៀមស្ងាត់ ខណៈអតីតអ្នកយកព័ត៌មានវិទ្យុអាស៊ីសេរី ២ រូបត្រូវបានចាប់ឃុំខ្លួនក្រោមការចោទប្រកាន់ពីបទចារកម្ម។
លោក អ៊ួន ឈិន និងលោក យាង សុជាមេត្តា អតីតបុគ្គលិកវិទ្យុអាស៊ីសេរី ត្រូវបានកម្លាំងនគរបាលចាប់ខ្លួនកាលពីល្ងាចថ្ងៃទី ១៤ ខែវិច្ឆិកាពីបទសង្ស័យថា លួចផលិតព័ត៌មានបញ្ជូនទៅវិទ្យុអាស៊ីសេរីនៅទីក្រុងវ៉ាស៊ីនតោន សហរដ្ឋអាមេរិក។
ក្រសួងមហាផ្ទៃក្រោយមកបានបញ្ជាក់ថា ពួកគេត្រូវបានស៊ើបអង្កេតចំពោះការសង្ស័យថា បើកស្ទូឌីយោវិទ្យុអាស៊ីសេរីដែលអ្នកទាំង ២ បានបដិសេធ។ វិទ្យុអាស៊ីសេរីដែលត្រូវបានផ្តល់ថវិកាដោយសហរដ្ឋអាមេរិក បានបិទប្រតិបត្តិការក្នុងប្រទេសកម្ពុជាកាលពីខែកញ្ញា ខណៈមានការបង្ក្រាបរបស់រដ្ឋាភិបាលទៅលើប្រព័ន្ធផ្សព្វផ្សាយឯករាជ្យ។
លោក ឈិន និងលោក សុជាមេត្តា ត្រូវបានតំណាងអយ្យការចោទប្រកាន់កាលពីថ្ងៃសៅរ៍ពីបទ «ប្រគល់ឲ្យរដ្ឋបរទេសនូវព័ត៌មានជាអាទិ៍ដែលបង្កឲ្យមានការអន្តរាយដល់ការការពារជាតិ» ដែលបទចោទនេះអាចប្រឈមមុខនឹងទោសជាប់ពន្ធនាគារពី ៧ ដល់ ១៥ ឆ្នាំ។
លោក ស៊ុន ណារិន អ្នកកាសែតនៅវិទ្យុសំឡេងសហរដ្ឋអាមេរិក វីអូអេ បានថ្លែងថា លោកមិនមែនជាសមាជិកក្លិបអ្នកកាសែតណាមួយទេ ប៉ុន្តែលោកជឿថា សមាជិករបស់ក្លិបអ្នកកាសែតកម្ពុជា និងក្លិបផ្សេងទៀតចង់ឲ្យក្លិបរបស់ខ្លួន ក្រោកឈរ និងថ្កោលទោសចំពោះករណីនេះ។ ប៉ុន្តែខណៈមានទំនុកចិត្តតិចតួចថាក្លិបអ្នកកាសែតកម្ពុជា និងក្លិបអ្នកកាសែតផ្សេងទៀតបញ្ចេញសំឡេងរបស់ខ្លួនសមាជិក ២-៣ នាក់ក្នុងចំណោមសមាជិកនៃក្លិបអ្នកកាសែតកម្ពុជាបាននាំគ្នាចុះហត្ថលេខាលើលិខិតចំហមួយកាលពីថ្ងៃអាទិត្យដើម្បីជំរុញឲ្យតុលាការពិចារណាទម្លាក់បទចោទប្រកាន់។
លោក ណារិន ថ្លែងថា៖ «ក្លិបអ្នកកាសែតកម្ពុជានៅខ្សោយនៅឡើយ»។ «ប្រសិនបើវាជាករណីនយោបាយ ពួកគេមិនអាចនិយាយអ្វីក្រៅពីគ្រាន់តែរក្សាភាពស្ងៀមស្ងាត់នោះទេ»។
អ្នកកាសែតម្នាក់ និងជាសមាជិកក្លិបអ្នកកាសែតកម្ពុជាដែលសុំមិនបញ្ចេញឈ្មោះ និងបានចុះហត្ថលេខាលើលិខិតចំហកាលពីថ្ងៃអាទិត្យថ្លែងថា «ភាពនៅស្ងៀម» របស់ក្លិបអ្នកកាសែតកម្ពុជាគឺជារឿងធម្មតាទៅហើយ ហើយសមាជិក «មិនរីករាយទេ»។
លោក លី ម៉េងហួរ ជាសមាជិកម្នាក់នៃក្លិបអ្នកកាសែតកម្ពុជាផងដែរនោះ ថ្លែងថា «ក្លិប និងសមាគមអ្នកកាសែត ក្នុងស្រុកយើង ហាក់មិនទាន់មានឥទ្ធិពលពេញលេញ និងមិនទាន់ធ្វើការដោយឯករាជ្យពេញលេញនៅឡើយដែលទាមទារឲ្យមានកំណែទម្រង់ ពិសេសលើហិរញ្ញវត្ថុ ដើម្បីឲ្យកិ្លប និងសមាគមអ្នកកាសែត មានឯករាជ្យខាងហិរញ្ញវត្ថុ ក្នុងការបណ្តុះបណ្តាល ក៏ដូចជា ការពារអ្នកកាសែតនៅកម្ពុជាយើង»។
លោក ប៉ែន បូណា ប្រធានក្លិបអ្នកកាសែតកម្ពុជាថ្លែងថា ទាំងលោក ឈិន និងលោក សុជាមេត្តា មិនបានធ្វើការឲ្យវិទ្យុអាស៊ីសេរីទៀតទេ ហើយវិទ្យុអាស៊ីសេរីក៏បានថ្លែងផងដែរថា អ្នកទាំង ២ មិនបានធ្វើការងារឲ្យវិទ្យុនេះទេ។ «ពួកគេមិនមែនជាអ្នកកាសែតទៀតទេ»។ «សម្រាប់សេចក្តីសន្និដ្ឋាន យើងគិតថា កិច្ចការនេះគឺមិនស្ថិតនៅក្រោមការងាររបស់ក្លិបអ្នកកាសែតកម្ពុជាឡើយ»។
ប៉ុន្តែទោះយ៉ាងណា លោក ណារិន ថ្លែងថា ការចោទប្រកាន់ទៅលើអ្នកទាំង ២ គឺកំពុងពាក់ព័ន្ធទៅនឹង «ការងារសារព័ត៌មាន» ហើយក្លិបអ្នកកាសែតគួរតែ «និយាយអ្វីមួយ» ដោយមិនត្រូវនៅស្ងៀមឈឹងនោះទេ។
លោក ហ៊ុយ វណ្ណៈ ប្រធានសហភាពសហព័ន្ធអ្នកកាសែតកម្ពុជា និងជាមន្ត្រីជាន់ខ្ពស់ក្រសួងមហាផ្ទៃបានថ្លែងថា សហភាពរបស់លោកមិនចង់ធ្វើឲ្យមានលក្ខណៈនយោបាយ និងដាក់បន្ទុកបន្ថែមទៅលើរឿងក្តីនេះទេ។
នៅពេលសួរថា តើគាត់មិនគិតថារឿងក្តីនេះមានលក្ខណៈនយោបាយរួចហើយទេឬ? លោកឆ្លើយថា៖ «ខ្ញុំមិនអាចវិនិច្ឆ័យរឿងនេះបានទេ លើកលែងតែអ្នកមានមេធាវីដើម្បីសិក្សាលើរឿងក្តីនេះ»។
ប៉ុន្តែលោក វណ្ណៈ អះអាងថា សហភាពរបស់លោកបានធ្វើការជាមួយក្រុមគ្រួសារជនជាប់ចោទចាប់តាំងពីដំបូងមកម្ល៉េះដើម្បីផ្តល់មេធាវីឲ្យជួយការពារក្តី៕ PS/NS
