The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​កាសែត​សរសេរ​សៀវភៅ​ពី​មូលហេតុ​បាត់​ដី​កម្ពុជា​ក្រោម

អ្នក​កាសែត​សរសេរ​សៀវភៅ​ពី​មូលហេតុ​បាត់​ដី​កម្ពុជា​ក្រោម

លោក ឆាយ សុផល អ្នក​កាសែត​ជើង​ចាស់​។
លោក ឆាយ សុផល អ្នក​កាសែត​ជើង​ចាស់​។ រូបថត សហការី

អ្នក​កាសែត​សរសេរ​សៀវភៅ​ពី​មូលហេតុ​បាត់​ដី​កម្ពុជា​ក្រោម

ភ្នំពេញៈ ប្រវត្តិ និង​មូលហេតុ​នៃ​ការ​បាត់បង់​ទឹកដី​កម្ពុជា​ក្រោម ឬ​ដែនដី​កូសាំងស៊ីន​ទៅ​វៀតណាម​នឹង​ត្រូវ​លាត​ត្រដាង​ក្នុង​សៀវភៅ «សត្រូវ​មិត្តភក្តិ​ឯងៈ ផែនដី និង​ផែនទី​កម្ពុជា-វៀតណាម (១៦២៣-២០១៥)» ដែល​ចង​ក្រង​ឡើង​ដោយ​លោក ឆាយ សុផល អ្នក​កាសែត​ខ្មែរ​ជើង​ចាស់​ក្នុង​គោលបំណង​ឲ្យ​អ្នក​អាន​បាន​យល់​ពី​ប្រវត្តិសាស្ត្រ​នៃ​ជម្លោះ​កម្ពុជា វៀតណាម ចាកផុត​ពី​ការ​បោកប្រាស់​របស់​អ្នក​នយោបាយ​ខ្មែរ។

ទន្ទឹម​នឹង​ការ​ផ្តើម​ដាក់​លក់​សៀវភៅ​នៅ​តាម​បណ្ណាគារ និង​តូប​សៀវភៅ​មួយ​ចំនួន​ក្នុង​រាជធានី​ភ្នំពេញ​កាលពី​ថ្ងៃ​សៅរ៍​លោក ឆាយ សុផល អ្នក​និពន្ធ​សៀវភៅ​ដែល​ជា​អ្នក​សារព័ត៌មាន​មាន​បទពិសោធ​ជាង ២០ ​ឆ្នាំ​បាន​ប្រាប់​ភ្នំពេញ​ប៉ុស្តិ៍​ថា​ ក្រៅ​ពី​ដំណើរ​រឿង​ប្រវត្តិសាស្ត្រ​សៀវភៅ «សត្រូវ​មិត្តភក្តិ​ឯងៈ ផែនដី និង​ផែនទី​ កម្ពុជា-វៀតណាម (១៦២៣-២០១៥​)​» ដែល​មាន​កម្រាស់ ៤០០ ទំព័រ​នេះ​ក៏​នឹង​បង្ហាញ​ពី​ជម្លោះ​ផ្ទៃ​ក្នុង​កម្ពុជា​ស្តីពី​ព្រំដែន និង​ផែនទី​ដែល​បាន​កើត​មាន​មិន​ចេះ​ចប់​ពិសេស​គឺ​ជម្លោះ​ដ៏​ស្រួល​ស្រាល់​ចុង​ក្រោយ​របស់​គណបក្ស​គណបក្ស​សង្គ្រោះ​ជាតិ និង​គណបក្ស​ប្រជាជន​ដែល​នាំឲ្យ​ផ្អើល​ដល់​ឆាក​អន្តរជាតិ។

បើ​តាម​លោក ឆាយ សុផល ក្រប​មុខ​នៃ​សៀវភៅ​ដែល​លោក​ទើប​និពន្ធ​ថ្មី​នេះ​គឺ​បាន​រំលេច​នូវ​តួ​អង្គ​សំខាន់​ពីរ​រូប​គឺ​លោក​នាយក​រដ្ឋមន្ត្រី ហ៊ុន សែន និង​ប្រធាន​គណបក្ស​សង្គ្រោះ​ជាតិ​លោក សម រង្ស៊ី ដែល​ជា​កំពូល​អ្នក​នយោបាយ​មាន​ឥទ្ធិពល​ក្នុង​កម្ពុជា។ «ខ្ញុំ​គិត​ថា​តួ​អង្គ​ទាំង​ពីរ​កន្លង​មក​គឺ​សុទ្ធតែ​មាន​ទឡ្ហីករណ៍ និង​អំណះអំណាង​រៀង​ខ្លួន​ចំពោះ​រឿង​ព្រំដែន​កម្ពុជា វៀតណាម ប៉ុន្តែ​បក្ស​កាន់​អំណាច​បាន​លាក់លៀម​បន្តិច​នូវ​អ្វី​ដែល​ពួកគេ​ថា ​ជា​ឯកសារ​សម្ងាត់​របស់​ជាតិ​មិន​អាច​បង្ហាញ​បាន​ហើយ​ធ្វើឲ្យ​មាន​ការ​ឈ្លោះ​ទាស់​ទែង​គ្នា​ប៉ុន្តែ​ក្រោយ​មក​ឯកសារ​ទាំង​នោះ​បាន​បញ្ចេញ​ខ្ញុំ​គិត​ថា​បើ​បញ្ចេញ​ពី​ដំបូង​គឺ​មិន​មាន​រឿង​អី​នោះ​ទេ»។

លោក សុផល បន្ត​ថា​សៀវភៅ​នេះ​បាន​បរិយាយ​ពី​ជម្លោះ​ប្រទាក់​ក្រឡា​គ្នា​ទាំង​ក្នុង​ចំណោម​ជនជាតិ​កម្ពុជា និង​ក្នុង​ចំណោម​បរទេស​ដូចជា​អាមេរិក អង់គ្លេស ចិន រុស្ស៊ី និង​ពួក​សម្ព័ន្ធ​មិត្ត​ផង​ដែរ ដែល​ដំបូង​គឺជា​មិត្ត​តែ​ក្រោយ​មក​ក្លាយ​ជា​សត្រូវ និង​សត្រូវ​ក្លាយ​ជា​មិត្ត​ដោយសារ​តែ​បញ្ហា​ផែនដី និង​ផែនទី​កម្ពុជា ​ជាមួយ​វៀតណាម​ចាប់ពី​ឆ្នាំ​ ១៦២៣ រហូត​មក​ដល់​ឆ្នាំ​ ២០១៥ នេះ​ហើយ​បញ្ហា​ទាំង​នេះ​គឺ​មិន​ត្រូវ​បាន​ដាក់​បញ្ចូល​ក្នុង​កម្មវិធី​សិក្សា​នោះ​ទេ​ដែល​នាំ​ឲ្យ​ប្រជាពលរដ្ឋ​ខ្មែរ​មិន​បាន​យល់​ដឹង។

លោក​ថា៖ «បើ​គិត​ពី​ប្រវត្តិសាស្ត្រ​គឺ​ខ្មែរ​បាត់​មែន​តាមរយៈ​ការ​ស្រាវជ្រាវ​របស់​ខ្ញុំ​នៅ​ឆ្នាំ ១៩២៣ វៀតណាម​បាន​ខ្ចី​ទឹកដី​ពី​ខ្មែរ​រយៈពេល ៥ ឆ្នាំ​ហើយ​សុំ​ពន្យារ ៥ ឆ្នាំ​ទៀត​ក្រោយ​មក​ស្តេច​ខ្មែរ​គឺ​ព្រះបាទ​ជ័យជេដ្ឋា​ទី ២ បាន​សុគត​ខ្មែរ​ព្យាយាម​សុំ​មក​វិញ​តែ​វៀតណាម​មិន​ឲ្យ​ខ្មែរ​ក៏​ពឹង​សៀម​ហើយ​សៀម​ក៏​ឈ្លោះ​ជាមួយ​វៀតណាម​ក្រោយ​មក​អាណា​និគម​បារាំង​ក៏​កាត់​ទឹកដី​នោះ​ឲ្យ​វៀតណាម​ព្រោះ​គេ​មាន​រដ្ឋបាល​គ្រប់គ្រង និង​មាន​ពលរដ្ឋ​រស់នៅ​ពេញ​លើ​ដី​នោះ​ឆ្នាំ​ ១៩៤៩ បញ្ចប់​អាណានិគម​បារាំង​ទឹកដី​កម្ពុជា​ក្រោម​ក៏​នៅ​តែ​វៀតណាម​គ្រប់គ្រង»​។

តាម​រយៈ​កិច្ច​ខិតខំ​ចងក្រង​ឯកសារ​ពាក់ព័ន្ធ​ជាង ៣ ឆ្នាំ​មក​នេះ​អ្នក​កាសែត​ជើង​ចាស់​រូប​នេះ​បាន​អះអាង​ថា​វា​ជា​ការ​លំបាក​មួយ។

លោក​បន្ត​ថា៖ «ប្រទេស​វៀតណាម​ត្រូវ​បាន​ទទួល​ស្គាល់​លើ​ពិភពលោក​អ៊ីចឹង​វា​ពិបាក​ក្នុង​ការ​តស៊ូ​មតិ​ទាមទារ​ទឹកដី​កម្ពុជា​ក្រោម​ត្រឡប់​មក​វិញ​អ៊ីចឹង​ហើយ​មូលហេតុ​នៃ​ការ​ចងក្រង​សៀវភៅ​នេះ​គឺ​ខ្ញុំ​សង្ឃឹម​ថា​អ្នក​នយោបាយ​ខ្មែរ​នឹង​ឈប់​បោកប្រាស់​ប្រជាពលរដ្ឋ​ដើម្បី​កេងចំណេញ​នយោបាយ​ហើយ​ងាក​មុខ​អង្គុយ​ទល់​មុខ​គ្នា​ជាមួយ​អ្នក​ជំនាញ​រក​នូវ​ដំណោះស្រាយ​ទាមទារ​ទឹកដី​កម្ពុជា​មក​វិញ»។

ក្រៅពី​សាវតារ​រឿង​នៃ​ការ​បាត់បង់​ទឹកដី​កម្ពុជា​ក្រោម​សៀវភៅ​របស់​លោក​ សុផល ក៏​បាន​រំឭក​ឡើង​នូវ​ព្រឹត្តិការណ៍​សង្គម​ជាច្រើន​ពាក់ព័ន្ធ​​ការ​កាត់ទោស​មន្ត្រី​ខ្មែរ​រឿង​ដក​បង្គោល​ព្រំដែន​ករណី​មន្ត្រី​ទូត​វៀតណាម​បង្ក​ឲ្យ​​ខ្មែរ​ធ្វើ​បាតុកម្ម​ជម្លោះ​ផ្កា​ភ្លើង​បន្ទាប់ពី​គណបក្ស​ប្រឆាំង​ទៅ​ពិនិត្យ​ព្រំដែន​ចលាចល​ដោយសារ​ផែន​ទី​ការ​ចាប់​ខ្លួន​សមាជិក​ព្រឹទ្ធសភា​បក្ស​ប្រឆាំង​រឿង​ព្រំដែន​ការ​ដែល​លោក​ ហ៊ុន សែន ហៅ​លោក សម រង្ស៊ី ថា​ជា​មេចោរ និង​ការ​ផ្ទៀងផ្ទាត់​ផែនទី​ខ្មែរ​ជាមួយ​បរទេស​ជាដើម៕

អត្ថបទគួរចាប់អារម្មណ៍