បាងកកៈ មេដឹកនាំប្រព័ន្ធផ្សព្វផ្សាយនិងអ្នកសរសេរប្លុកប្រមាណ ៣០ នាក់ មកពី ១០ ប្រទេសរួមទាំងកម្ពុជាផងនោះ បាននិងកំពុងជួបពិភាក្សាជាមួយមេដឹកនាំអាស៊ានសំខាន់ៗ នៅទីក្រុងបាងកកប្រទេស ថៃ ស្តីពីការទទួលខុសត្រូវរបស់អាស៊ានក្នុងការឆ្លើយតបនឹងការប្រឈមរបស់ពិភពលោក ក្នុងវេទិកាសារព័ត៌មានអាស៊ាន (AMF) លើកទី៣។
វេទិកាសារព័ត៌មានអាស៊ាន គឺជាគម្រោងមួយរបស់អាស៊ាន ក្នុងការបញ្ជូនសារបស់ខ្លួនទៅកាន់ថ្នាក់ដឹកនាំកំពូលៗ នៃប្រព័ន្ធផ្សព្វផ្សាយ ដើម្បីរួមគ្នាពិភាក្សា វែកញែកជាលក្ខណៈអន្តរជាតិ និងក្នុងតំបន់ ដើម្បីឆ្លើយតបនឹងគោលបំណង បញ្ហាប្រឈម និងសមិទ្ធផលដែលអាស៊ានសម្រេចបាន។ កិច្ចពិភាក្សានេះ បានផ្តោតសំខាន់ទៅលើការទទួលខុសត្រូវរបស់អាស៊ាន ដើម្បីឆ្លើយតបទៅនឹងការប្រឈមរបស់ពិភពលោក។ ជាពិសេសបញ្ហាសង្រ្គាមពាណិជ្ជកម្ម រវាងចិន និងអាមេរិក ខណៈបញ្ហាទាំងនេះ ត្រូវបានមើលឃើញថា កំពុងជះឥទ្ធិពលទៅកាន់ប្រទេសនៅក្នុងតំបន់។
លោក Dato Lim Jock Hoi អគ្គលេខាធិការអាស៊ាន (ASEAN SecretaryGeneral) ថ្លែងថា ប្រព័ន្ធផ្សព្វផ្សាយបានដើរតួយ៉ាងសំខាន់ក្នុងដំណើរការសមាហរណកម្មតំបន់របស់អាស៊ាន។ លោកបន្តថា ថ្នាក់ដឹកនាំនៃប្រព័ន្ធផ្សព្វផ្សាយ ដែលបានចូលរួម នឹងចែករំលែកនូវសារល្អៗរបស់អាស៊ាន ទៅកាន់ពិភពលោក និងតំបន់។
វេទិកាសារព័ត៌មានអាស៊ាន លើកទី៣ គឺជាកិច្ចខិតខំប្រឹងប្រែងមួយរបស់អាស៊ាន ដើម្បីបង្កើនភាពជាដៃគូជាមួយមេដឹកនាំប្រព័ន្ធផ្សព្វផ្សាយនៅក្នុងតំបន់។
លោក Lee Yoong Yoong នាយកកិច្ចការទំនាក់ទំនងនៃលេខាធិការដ្ឋានអាស៊ាននិយាយថា៖ «ប្រព័ន្ធផ្សព្វផ្សាយដើរតួនាទីសំខាន់នៅក្នុងដំណើរការសមាហរណកម្មតំបន់អាស៊ាន។ យើងសង្ឃឹមថា តាមរយៈ AMF នេះថ្នាក់ដឹកនាំប្រព័ន្ធផ្សព្វផ្សាយទាំងនេះ នឹងមានឱកាសកាន់តែច្រើន ដើម្បីពាំនាំរឿងរ៉ាវរបស់អាស៊ាន ប្រាប់ទៅកាន់ពលរដ្ឋនៅមូលដ្ឋាន ខណៈពេលដែលយើងកំពុងតែធ្វើឲ្យអាស៊ានកាន់តែខិតជិតពលរដ្ឋរបស់ខ្លួនថែមទៀត»។
លោក ហាស់ សុភ័ក្ត្រ អគ្គនាយករង អគ្គនាយកដ្ឋានរដ្ឋបាល និងហិរញ្ញវត្ថុនៃក្រសួងព័ត៌មាន និយាយថា វេទិកានេះ ពិតជាមានសារៈសំខាន់ដល់ភាគីពាក់ព័ន្ធ ជាពិសេសអាស៊ាន និងមេដឹកនាំប្រព័ន្ធផ្សព្វផ្សាយ ដែលបានចូលរួមកាន់តែមានទំនាក់ទំនងល្អជាមួយគ្នា។ បន្ថែមពីនេះ ក៏អាចលើកឡើងពីបញ្ហានានាដែលប្រទេសក្នុងតំបន់កំពុងជួបប្រទេះ ជាពិសេស បញ្ហាប្រឈមធំរបស់ពិភពលោក ដែលតែងតែជះឥទ្ធិពលមកលើប្រទេសតូចៗក្នុងតំបន់។
លោកបញ្ជាក់ថា៖ «ព្រោះជាទូទៅប្រទេសនៅក្នុងតំបន់របស់អាស៊ានយើងទេ រួមទាំងកម្ពុជាផងដែរមិនមែនជាប្រទេសធំ ប៉ុន្តែយើងគឺជាសំឡេងមួយដែរ។ មានគំនិតជាច្រើននៅក្នុងអង្គប្រជុំនេះ ដែលអាចផ្សព្វផ្សាយពីកម្ពុជា ហើយយើងនឹង [ឈ្វេង] យល់អំពីបញ្ហានេះ ព្រោះបញ្ហាអាស៊ាន គឺជាបញ្ហារបស់កម្ពុជា ហើយបញ្ហារបស់សកលលោក ក៏ជាបញ្ហាដែលកម្ពុជា កំពុងប្រឈមមុខក្នុងពេលបច្ចុប្បន្នផងដែរ»។
អគ្គលេខាធិការអាស៊ាន បានរៀបចំវេទិកានេះឡើង បន្ទាប់ពីសមាជិកនៃប្រទេស ១០ បានបង្កើតវេទិកានេះ តាំងពីឆ្នាំ ២០១៧ ហើយនៅឆ្នាំ ២០២០ ខាងមុខ វេទិកាសារព័ត៌មានអាស៊ាននេះនឹងប្រារព្ធធ្វើឡើងនៅប្រទេស វៀតណាម៕