កំពង់ស្ពឺ: ក្រុមមនុស្ស ៤ នាក់ ដែលកាន់កាតកាសែតហួសសុពលភាពមកពីអង្គភាពសារព័ត៌មានផ្សេងៗគ្នាត្រូវបានឃាត់ខ្លួនសាកសួរប្រមាណជា ២ ម៉ោង នៅក្នុងសាលានាយទាហានសកម្មត្មានពង ក្នុងស្រុកឧដុង្គ ខេត្តកំពង់ស្ពឺ កាលពីថ្ងៃអាទិត្យកន្លងមកនេះ ហើយមន្ត្រីនៅក្នុងសាលានោះបានគំរាមពួកគេមិនឲ្យចុះផ្សាយព័ត៌មានអំពីការធ្វើអាជីវកម្មនៃការជីកកាយរណ្ដៅដីនៅក្បែរនោះជាថ្នូរនឹងការដោះលែងឲ្យមានសេរីភាពឡើងវិញ។
ក្រុមអ្នកកាសែតទាំង ៤ នាក់នោះ គឺលោក កែម ស្រស់ អ្នកយកព័ត៌មានកាសែតអំណាចខ្មែរ។ លោក តូច សំបូរ អ្នកយកព័ត៌មានកាសែតរំដោះជាតិ។ លោក តូច សម្បត្តិ និពន្ធនាយកគេហទំព័រ akktv online.net និងអ្នកស្រី ស្រេង សុង អ្នកយកព័ត៌មានកាសែតជួយខ្មែរ។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានបង្ហោះខ្លឹមសារអត្ថាធិប្បាយរបស់អ្នកសារព័ត៌មានទាំងនោះកាលពីថ្ងៃ ២១ មេសា ដោយបានអះអាងថា៖ «យើងខ្ញុំទាំង ៤ អង្គភាពចុះទៅយកព័ត៌មានជូនអង្គភាព (នៅរណ្ដៅដី) និងផ្ដិតយករូបភាពនៅទីនោះ ដើម្បីសុំការបំភ្លឺពីម្ចាស់អាជីវកម្ម តែមិនបានជួបម្ចាស់អាជីវកម្មនោះទេ យើងខ្ញុំក៏បានបើកឡានចេញមកវិញដល់លើផ្លូវជាតិស្រាប់តែមានទាហាន ២ នាក់ ដៃកាន់អាយកូមជិះម៉ូតូមកឃាត់ស្ទាក់ផ្លូវហើយបង្ខំឲ្យយើងខ្ញុំបើកឡានចូលបន្ទាយពីច្រកចំហៀងដោយនិយាយថា មេឲ្យទៅជួប ពេលទៅដល់គាត់គំរាមដាក់ខ្នោះពួកយើងខ្ញុំ (ឮតាមវិទ្យុទាក់ទង) នឹងបញ្ជូនទៅកងរាជអាវុធហត្ថ បើយើងខ្ញុំហ៊ានចុះផ្សាយពីការកាយដីនេះ និងបង្ខំឲ្យយើងខ្ញុំលុបរូបភាពដែលក្រុមការងារអ្នកសារព័ត៌មានថតបាន (រូបនៅរណ្ដៅដី) មួយសន្ទុះក្រោយមកលោកនាយកសាលានាយទាហានបានចេញមកសួរយើងខ្ញុំថា ហេតុអ្វីប្អូនៗជាអ្នកសារព័ត៌មានចូលមកកន្លែងខ្ញុំដោយគ្មានការអនុញ្ញាត? នៅពេលនោះពួកខ្ញុំឆ្លើយថា ខ្ញុំមិនបានចូលមកទេ គឺកូនចៅរបស់បងជាអ្នកឃាត់ឡានបញ្ជាឲ្យពួកខ្ញុំចូលមកជួបបង ដើម្បីពិភាក្សាគ្នា»។
ក្រុមអ្នកកាសែតទាំងនោះបានអះអាងបន្ថែមទៀតថា៖ «បន្ទាប់មក លោក សុខ ទូច (កូនចៅ) បានឲ្យយើងខ្ញុំផ្ដិតមេដៃលើកិច្ចសន្យា ដែលសរសេរដោយខ្លួនគាត់ផ្ទាល់ថា មិនឲ្យពួកយើងខ្ញុំចុះផ្សាយពីបញ្ហាកាយដីនេះទេ។ ក្រោយពីផ្តិតមេដៃថា មិនចុះផ្សាយរួចមក គាត់ក៏បានទិញទឹកសុទ្ធ ៦ ដបឲ្យពួកយើងខ្ញុំហូប និងសំណេះសំណាលគ្នាលេង បន្ទាប់ពីសំណេះសំណាលគ្នារួចពួកយើងក៏គោរពលាគាត់ត្រឡប់មកផ្ទះរៀងៗខ្លួនវិញ»។
ប្រធានមន្ទីរព័ត៌មានខេត្តកំពង់ស្ពឺលោកស្រី ម៉ែន ស៊ីនួន កាលពីម្សិលមិញបានអះអាងថា ក្រុមភ្នាក់ងារសារព័ត៌មានទាំង ៤ នាក់នេះ ពិតជាមិនមានឈ្មោះក្នុងបញ្ជីស្ថិតិអ្នកសារព័ត៌មានប្រចាំខេត្តកំពង់ស្ពឺមែន ហើយបណ្ណព័ត៌មានដែលពួកគាត់ប្រើប្រាស់នោះ ក៏ហួសសុពលភាពដែរ។
លោកស្រី ស៊ីនួន ថ្លែងថា៖ «សកម្មភាពចូលសាលានាយទាហានសកម្មត្មាតពង និងក្រុមហ៊ុនដឹកដី ដោយគ្មានការអនុញ្ញាត ដើម្បីសុំលុយនោះ មិនត្រូវបានសមត្ថកិច្ចឃាត់ខ្លួនទេ ដោយគ្រាន់តែហៅទៅសាកសួរ»។
លោកស្រី ម៉ែន ស៊ីនួន បានអះអាងផងដែរថា៖ «អ្នកកាសែតហ្នឹង ទៅមើលរណ្ដៅដីមួយហ្នឹង ហើយគាត់ទៅទារលុយគេ ហើយគ្រួសារខ្ញុំ គាត់ធ្វើនាយករងនៅហ្នឹងគាត់ថា យី! មានអ្នកកាសែតចុះមកទារលុយ ទារហ្នឹងមិនច្រើនទេ គឺអ្នកកាសែតតូចតាចអ៊ីចឹង? គ្រាន់តែថា ឲ្យគាត់ធ្វើឲ្យមានច្បាប់ទម្លាប់អ៊ីចឹងទៅ? ប៉ុន្ដែខ្ញុំចង់ដឹងទេ តើកាសែតខាងណា? ហើយខ្ញុំចង់ដឹងថា ពួកគាត់នៅអង្គភាពណា ហើយក៏ឲ្យគេថតកាតពួកគាត់បញ្ជូនមកខ្ញុំ ពេលខ្ញុំមើលទៅឃើញថា ពួកគាត់កាន់កាតកាសែតសុទ្ធតែហួសសុពលភាព»។
ក្រុមហ៊ុនដឹកដី និងសាលានាយទាហានសកម្មត្មាតពង ស្រុកឧដុង្គ កាលពីម្សិលមិញមិនអាចរកប្រភពទាក់ទងសុំការបញ្ជាក់បានទេ។
លោក ផុស សុវណ្ណ អ្នកនាំពាក្យក្រសួងព័ត៌មាន កាលពីម្សិលមិញបានទទួលស្គាល់ថា ក្រុមភ្នាក់ងារអ្នកសារព័ត៌មាននៅតាមបណ្ដាខេត្តមួយចំនួនមិនសូវមានជំនាញ និងវិជ្ជាជីវ:ត្រឹមត្រូវទេ ខណៈអ្នកសារព័ត៌មានមួយចំនួនទៀតមានមុខរបរផ្សេងៗបន្ថែមទៀត។
លោក សុវណ្ណ បានថ្លែងថា៖ «យើងប្រកាន់ជំហរអប់រំណែនាំច្រើនជាង ប្រសិនមានអ្នកសារ ព័ត៌មានយើងគាត់ធ្វើបែបនេះ ព្រោះមិនចង់ចាត់វិធានការក្ដៅអ្វីទៅលើគាត់ទេ គឺជំរុញឲ្យគាត់គោរពតាមគោលការណ៍ វិជ្ជាជីវៈ ក្រមសីលធម៌»។
លោក តូច ណូរ៉ា ចាងហ្វាងសារព័ត៌មានជួយខ្មែរ កាលពីម្សិលមិញបានថ្លែងថា៖ «ក្រុមការងារកាសែតរបស់ខ្ញុំបានទៅយកព័ត៌មានកន្លែងរណ្ដៅដីដែលជីកដល់ក្បាលប្រេតនោះ ហើយក្រុមអ្នកកាសែតបានថត ថតហើយក៏បើកឡានមកវិញ ឡើងដល់ផ្លូវជាតិ ក៏មានកូនទាហាន២ ឬ៣នាក់បានមកឃាត់ឲ្យចូលក្នុងបន្ទាយពួកគេ។ ក្រោយមក ទាហានបានគំរាមឲ្យលុបរូបថតទាំងអស់ចេញ ហើយហាមមិនឲ្យផ្សាយព័ត៌មាននេះទេ ហើយបែរជាមកចោទប្រកាន់ថា ក្រុមអ្នកកាសែតជំរិតទារប្រាក់ទៅវិញ រឿងនេះអយុត្តិធម៌ណាស់»។
ទោះជាយ៉ាងណា លោក យស មន្នីរ៉ាត់ អគ្គនាយកនៃអគ្គនាយកដ្ឋានធនធានរ៉ែ និងជាអ្នកនាំពាក្យក្រសួងរ៉ែ និងថាមពល បានអះអាងថា មិនទទួលបានដំណឹងនេះទេ។
លោក មន្នីរ៉ាត់ ថ្លែងថា៖ «ខ្ញុំអត់ទាន់ដឹងទេ ចាំមើលខ្ញុំសួរគេសិនថា តើអាជីវកម្មខាងនេះបានសុំច្បាប់ ហើយឬនៅ ហើយគេបានគោរពតាមការណែនាំរបស់ក្រសួងរ៉ែ និងថាមពលដែរ ឬអត់? អ៊ីចឹង? ខ្ញុំឆែកមើលសិន»។
លោក តូច សម្បត្តិ និពន្ធនាយកគេហទំព័រដែលបាននៅក្នុងហេតុការណ៍នោះបានអះអាងថាទីតាំងដីដែលគេកំពុងជីកកកាយនោះមានទំហំប្រមាណកន្លះហិកតា ហើយបានជីកជម្រៅប្រមាណ ១០ ម៉ែត្រ៕