ភ្នំពេញៈ ក្រុមប្រជាពលរដ្ឋមកពីខេត្តកោះកុងប្រមាណ ២៩០ នាក់ដែលបានមកតវ៉ានៅក្រសួងរៀបចំដែនដី នគរូបនីយកម្ម និងសំណង់កាលពីព្រឹកម្សិលមិញបានសម្រេចត្រឡប់ទៅផ្ទះវិញនាពេលរសៀល បន្ទាប់ពីលោករដ្ឋមន្ត្រីបានសន្យាថារកដំណោះស្រាយចំពោះជម្លោះដីធ្លីរបស់ពួកគេដែលកំពុងបន្តមានជាមួយក្រុមហ៊ុន Sugar Industry Co Ltd. កោះកុង និងចម្ការកោះកុង។
អ្នកភូមិទាំងនោះបាននាំគ្នាជម្នះដើម្បីបានទៅដល់ក្រសួងនេះ បើទោះបីជាអាជ្ញាធរខេត្តព្យាយាមរារាំងពួកគេនៅតាមផ្លូវក៏ដោយ។
អ្នកស្រី ជឹម ស្រីធួន មកពីស្រុកស្រែអំបិល ខេត្តកោះកុង ដែលមានដី ៥ ហិកតាក្នុងខេត្តបានថ្លែងថារដ្ឋមន្ត្រីក្រសួងដែនដី លោក ជា សុផារ៉ា បានសន្យាបញ្ចប់ជម្លោះដីធ្លីមិនឲ្យលើសពី ២០ ថ្ងៃមុនការបោះឆ្នោតថ្ងៃទី ២៩ ខែកក្កដា។
អ្នកស្រី បានថ្លែងថាលោក សុផារ៉ា ថានឹងបញ្ជូនក្រុមការងារទៅខេត្តនៅថ្ងៃព្រហស្បតិ៍ដើម្បីវាស់ដីពួកគេ និងផ្តល់សំណង។
អ្នកស្រី ស្រីធួន បន្តថា៖ «អ្វីដែលលោកបាននិយាយធ្វើឲ្យខ្ញុំពេញចិត្ត» ហើយ «ផ្អែកតាមការសន្យារបស់លោកខ្ញុំមានជំនឿ ៩០ ភាគរយ។ ប្រសិនបើលោកមិនបានធ្វើដូចលោកនិយាយយើងនឹងត្រឡប់មកវិញហើយបន្តតវ៉ានៅមុខក្រសួង»។
បើតាមអ្នកស្រី ស៊ីធួន យានយន្តរបស់ក្រុមអ្នកស្រីត្រូវបាននគរបាលរារាំងមុនពេលមកដល់រាជធានីភ្នំពេញហើយបានបង្ខំចិត្តដើរជាច្រើនម៉ោងដោយបានសម្រាកក្នុងវត្តមួយនៅភ្នំពេញមុនទៅដល់ក្រសួង។
អ្នកស្រី ស្រីធួន បានថ្លែងថា៖ «យើងបានដើរប្រហែល ៦០ គីឡូម៉ែត្រ។ ពួកគេមិនអនុញ្ញាតឲ្យយើងបន្តធ្វើដំណើរជាមួយយានយន្តរបស់យើង ពួកគេរក្សាទុកយានយន្តទាំងនោះនៅកន្លែងដែលពួកគេបានបញ្ឈប់យើង។
អ្នកស្រី អ៊ិត សុខ អាយុ ៣៣ ឆ្នាំបានថ្លែង ខណៈកំពុងបីកូនប្រុសអាយុ ១ ឆ្នាំពេលកំពុងតវ៉ាថា អ្នកស្រីមានដី ២ ហិកតាដែលបានកាន់កាប់តាំងពីឆ្នាំ ១៩៩៥ ប៉ុន្តែត្រូវបានក្រុមហ៊ុនរំលោភយកនៅឆ្នាំ ២០០៦។
អ្នកស្រី សុខ បានថ្លែងថាអ្នកស្រីត្រូវតែយកកូនប្រុសមកជាមួយដោយសារអ្នកស្រីមិនអាចរកអ្នកមើលកូនរបស់អ្នកស្រីបាននៅពេលអ្នកស្រីមិននៅផ្ទះ។
អ្នកស្រីបានបញ្ជាក់ថា៖ «នេះជាការមកតវ៉ាលើកទី ៤ របស់ខ្ញុំនៅរាជធានីភ្នំពេញ។ នេះជាលើកទី ១ ហើយដែលពួកគេរារាំងយានយន្តរបស់យើងមិនឲ្យទៅដល់រាជធានីភ្នំពេញ»។
អ្នកស្រី អ៊ិត សុខ បានអះអាងមូលហេតុដែលគេរារាំងនៅតាមផ្លូវដោយសារចង់ឱ្យដោះស្រាយនៅខេត្ត តែពួកគាត់មិនអាចរង់ចាំបានក៏សម្រេចចិត្តនាំគ្នាដើរ។
អ្នកស្រី សុខ បានថ្លែងទៀតថា៖ «ពួកគេប្រាប់យើងឲ្យរង់ចាំដំណោះស្រាយនៅខេត្ត និងប្រាប់យើងឲ្យត្រឡប់ទៅវិញ ប៉ុន្តែយើងជម្នះហើយបានចាប់ផ្តើមដើរ។ ខ្ញុំបានធ្វើបែបនេះដោយសារខ្ញុំចង់បានដីរបស់ខ្ញុំត្រឡប់មកវិញ។ ខ្ញុំមានការភ័យខ្លាចណាស់ នៅពេលពួកគេមករារាំងរថយន្តរបស់យើង»។
អ្នកតវ៉ាម្នាក់ទៀតឈ្មោះ ម៉ច សំ អាយុ ៤៥ ឆ្នាំមកពីស្រុកបទុមសាគរ ខេត្តកោះកុងបានថ្លែងថាលោកបានកាន់កាប់ដីលោកតាំងពីឆ្នាំ ១៩៩៧ ដោយដាំចេក និងស្វាយ ប៉ុន្តែក្រុមហ៊ុនបានរំលោភយកដីនេះពីលោកក្នុងឆ្នាំ ២០០៦ ។
លោកថា៖ «យើងបានដើរជាក្រុមអស់ពេលជាច្រើនម៉ោង។ កាលពីមុនប្រពន្ធខ្ញុំបានទៅតវ៉ា ប៉ុន្តែឥឡូវនេះខ្ញុំមកដោយសារខ្ញុំឃើញស្ថានភាពនេះតានតឹងណាស់។ វាមិនគួរខ្មែរធ្វើឲ្យខ្មែរឈឺចាប់ទេ មិនអនុញ្ញាតឲ្យយើងបើកយានយន្តរបស់យើង និងបង្ខំយើងឲ្យដើរទៅភ្នំពេញ»។
អភិបាលរងខេត្តកោះកុងលោក អន ភារៈ ដែលបង្ហាញខ្លួននៅកន្លែងតវ៉ា ដោយបានជំរុញឲ្យអ្នកភូមិត្រឡប់ទៅផ្ទះរបស់ខ្លួនវិញ។
លោកបានបញ្ជាក់ថា៖ «ខ្ញុំបានអង្វរ សូមឲ្យត្រឡប់ទៅវិញ។ ខ្ញុំជឿថា ដំណោះស្រាយនឹងកើតមាននាពេលខាងមុខឆាប់ៗ»។
លោកបានបន្តថាអាជ្ញាធរខេត្តកំពុងបង្កើនកិច្ចខិតខំប្រឹងប្រែង និងបង្កើនសកម្មភាពវាស់វែងដើម្បីបែងចែកដីសម្រាប់ប្រជាពលរដ្ឋដោយសហការជាមួយក្រសួង។
លោក ភារៈ ក៏បានអះអាងផងដែរថា ពួកគេមិនបានបិទផ្លូវយានយន្តរបស់អ្នកភូមិនៅតាមផ្លូវមករាជធានីភ្នំពេញទេ ប៉ុន្តែអាជ្ញាធរគ្រាន់តែប្រាប់ពួកគេឲ្យត្រឡប់ទៅខេត្តវិញ។
លោកបានសួរថា៖ «ប្រសិនបើពួកគេចង់ដើរ តើយើងអាចបញ្ឈប់ពួកគេយ៉ាងម៉េចទៅ? យើងមិនចង់ឲ្យពួកគេទៅភ្នំពេញដោយសារវាអាចប៉ះពាល់សណ្តាប់ធ្នាប់សាធារណៈ ដូចជាអង្គុយនៅតាមចិញ្ចើមផ្លូវ ឬឡានបុក និងបាត់បង់ជីវិត តើនរណានឹងត្រូវទទួលខុសត្រូវ?»។
លោក សឹង សែនករុណា អ្នកនាំពាក្យអង្គការសិទ្ធិមនុស្សអាដហុកបានថ្លែងថា ពេលនេះអ្នកតវ៉ាកំពុងទុកចិត្តការសន្យារបស់រដ្ឋមន្ត្រីដើម្បីរកដំណោះស្រាយសម្រាប់ពួកគេ។ ទោះយ៉ាងណាក្តីវាត្រូវតែដោះស្រាយឆាប់ៗ។
លោកបានបន្ថែមថា៖ «ដំណោះស្រាយបែបនេះមិនគួរស៊ីពេលយូរទេ។ នៅពេលពួកគេស៊ីពេលយូរ វាពិតជាប៉ះពាល់ដល់ស្ថានភាពសេដ្ឋកិច្ចរបស់ប្រជាពលរដ្ឋ»។ លោកបន្តថាការរារាំងអ្នកតវ៉ាបែបនេះមិនមែនជាដំណោះស្រាយទេ គួរតែអនុញ្ញាតឲ្យអ្នកភូមិដាក់ញត្តិជាជាងរារាំងពួកគេ៕ PS