.jpg)
អ្នកតវ៉ាពេលចេញពីវត្តត្រឡប់ទៅខេត្តវិញកាលពីម្សិលមិញ។ ផា លីណា
ក្រចេះ: អ្នកភូមិមានជម្លោះដីធ្លីជាង ៣០០ នាក់មកពីស្រុកស្នួល ខេត្តក្រចេះ តំណាងឱ្យជាង ១៦០០ គ្រួសារបាននាំគ្នាឡើងមករាជធានីភ្នំពេញកាលពីម្សិលមិញដើម្បីជំរុញឲ្យក្រសួងរៀបចំដែនដី នគរូបនីយកម្ម និងសំណង់ និងស្ថាប័នពាក់ព័ន្ធជួយពន្លឿនការដោះស្រាយវិវាទដីធ្លីជាមួយក្រុមហ៊ុនមេមត់ ប៉ុន្ដែមន្ត្រីប្រាប់ឲ្យទៅដោះស្រាយនៅខេត្តផ្ទាល់វិញ។
លោក តូច ដុល តំណាងពលរដ្ឋជាង ៣០០ នាក់ដែលបានឡើងមកភ្នំពេញ និងតំណាងឲ្យ ១ ៦២៥ គ្រួសារដែលរស់នៅក្នុងឃុំ ២ ធ្នូ និងឃុំជើងឃ្លូ ស្រុកស្នួលបានលើកឡើងថា ពលរដ្ឋអស់ជំនឿលើអាជ្ញាធរខេត្តក្រចេះទើបសម្រេចចិត្តនាំគ្នាឡើងមកក្រសួងរៀបចំដែនដីផ្ទាល់ បន្ទាប់ពីពួកគាត់រាប់ពាន់គ្រួសារដែលមានជម្លោះដីធ្លីជាមួយក្រុមហ៊ុនចម្ការកៅស៊ូមេមត់តាំងពីដើមឆ្នាំ ២០១៨ ត្រូវបានក្រុមហ៊ុនប្រើកម្លាំងទាហានបាញ់ប្រហារឲ្យរងរបួសជាច្រើននាក់ និងបានឈូសឆាយផ្ទះរួមទាំងដំណាំពួកគាត់ចោល ប៉ុន្ដែគ្មានអាជ្ញាធរចេញមុខដោះស្រាយឱ្យទេ។
លោកបន្តថាពេលនេះអ្នកភូមិមិនមានដីសម្រាប់បង្កបង្កើនផលទេ ខណៈក្រុមហ៊ុនកាយប្រឡាយព័ទ្ធយកដីពួកគាត់អស់ទៅហើយនោះ។
លោកថា៖ «ពួកខ្ញុំបានតវ៉ាសុំឲ្យជួយរកដំណោះស្រាយនៅថ្នាក់ខេត្តហ្នឹងជាច្រើនលើកមកហើយ ប៉ុន្ដែគ្មានអើពើអ្វីជាមួយពួកខ្ញុំទេ ហើយពេលពួកខ្ញុំឡើងមកដល់នេះហើយ បែរជាលោកអភិបាលរងខេត្តមកសុំអង្វរឲ្យទៅដោះស្រាយនៅខេត្តវិញ។
ពួកខ្ញុំថាឲ្យទៅខេត្តធ្វើអ្វី បើនិយាយភូតកុហករាប់មិនអស់ហើយហ្នឹង»។
លោក ភិន ធា ពលរដ្ឋម្នាក់ក្នុងចំណោមនោះក៏បានលើកឡើងដែរថាការមកដល់ភ្នំពេញនាពេលនេះគឺដើម្បីស្នើសុំឲ្យក្រុមហ៊ុនផ្អាកការឈូសឆាយដោយរង់ចាំការដោះស្រាយស្នើសុំកាត់ចែកដីក្នុង ១ គ្រួសារទំហំ ២ ហិកតាកន្លះ និងសំណូមពរឲ្យជួយដោះស្រាយឲ្យបានលឿនបំផុត ប៉ុន្ដែអាជ្ញាធរគ្រាន់តែប្រាប់ឲ្យទៅដោះស្រាយនៅខេត្ត។
លោកបន្តថា៖ «ចៅហ្វាយខេត្តគាត់បានសន្យាថា បោះឆ្នោតរួចនឹងវាស់ចែកឲ្យពួកខ្ញុំដោយបានកំណត់អត្តសញ្ញាណកម្មឈ្មោះអស់ហើយ ប៉ុន្តែឥឡូវអត់ឃើញដោះស្រាយអីសោះ ហើយគាត់និយាយទៀតថា ដោះស្រាយឲ្យតែអ្នកនៅស្រុកហ្នឹងទេ។ អ៊ីចឹងអ្នកមកពីឆ្ងាយហើយបានកាន់កាប់ដីហ្នឹងយូរឆ្នាំហើយ អត់បានអីផងហ្នឹង? អ៊ីចឹងសុំឲ្យដោះស្រាយបានដូចគ្នាទៅ»។
លោក ហឿ ស៊ីយ៉ែម អភិបាលរងខេត្តក្រចេះដែលចុះជួបពលរដ្ឋផ្ទាល់មិនអាចទាក់ទងសុំការអត្ថាធិប្បាយបានទេកាលពីម្សិលមិញ។
យ៉ាងណាក្ដីលោក កៅ ម៉ាឌីឡែន ប្រធានមន្ទីររៀបចំដែនដីនគរូបនីយកម្មខេត្តក្រចេះបានលើកឡើងថា អាជ្ញាធរកំពុងប្រមូលអត្តសញ្ញាណដី និងព័ត៌មានអំពីប្រវត្តិពួកគាត់ ព្រោះចំនួនពីដំបូងមានតែជាង ២០០ នាក់ ប៉ុន្ដែរហូតមកទល់ពេលនេះកើនឡើងដល់ជាង ១ ពាន់គ្រួសារទៅហើយ។
លោកបញ្ជាក់ថា៖ «ការពិតយើងបានធ្វើអត្តសញ្ញាណដីពួកគាត់ជាបន្តបន្ទាប់ ប៉ុន្ដែចំនួនកើនឡើងរហូតដល់ជាង ១ ពាន់គ្រួសារ អ៊ីចឹងយើងនៅកំពុងពិនិត្យបន្ថែម តើនរណាជាម្ចាស់ដីពិតប្រាកដ ហើយករណីយឺតយ៉ាវគឺដោយសារមន្ត្រីយើងចុះទៅជួយអន្តរាគមន៍រឿងទឹកជំនន់ អ៊ីចឹងយើងដោះស្រាយមួយរឿងសិន ទើបបន្តមួយរឿងទៀតព្រោះសុទ្ធតែសំខាន់ៗដូចគ្នា»។
លោក អំ សំអាត ប្រធានគ្រប់គ្រងផ្នែកអង្កេតអង្គការលីកាដូបានលើកឡើងថា ករណីនេះមិនមែនថ្មីទេ វាគឺជាការសន្យាដដែលៗចំពោះពលរដ្ឋដែលមានទំនាស់ដីធ្លី។ ដូច្នេះអាជ្ញាធរគួរស្វះស្វែងរកដំណោះស្រាយជូនពួកគាត់ឲ្យបានឆាប់ដើម្បីកុំឲ្យប៉ះពាល់ដល់ជីវភាពរបស់ពួកគាត់កាន់តែធ្ងន់ធ្ងរ។
លោកបញ្ជាក់ថា៖ «បើមិនប្រញាប់ដោះស្រាយបញ្ចប់ទេ ខ្ញុំនៅតែយល់ថា ពួកគាត់នៅតែមិនអស់ចិត្ត ហើយនៅតែបន្តនាំគ្នាតវ៉ារហូត និងអាចក្លាយជាបញ្ហារ៉ាំរ៉ៃក្នុងសង្គមយើង»។
កាលពីឆ្នាំមុនលោកនាយករដ្ឋមន្ត្រី ហ៊ុន សែន ធ្លាប់បានស្តីបន្ទោសខ្លាំងៗទៅមន្ត្រីក្រោមឱវាទរបស់លោកដែលមិនព្រមដោះស្រាយបញ្ចប់វិវាទដីធ្លីជូនពលរដ្ឋ។
លោកធ្លាប់បញ្ជាក់ថា៖ «គាត់ដាំដុះនៅកន្លែងហ្នឹង គាត់នៅកន្លែងហ្នឹងប្រគល់ឲ្យគាត់ទៅខ្ញុំបាននិយាយរហូតដល់ប៉ុណ្ណេះនោះ បើក្នុងគណបក្សខ្ញុំបាននិយាយថាដីហ្នឹង ដីម៉ែលោកឯងហី? បានប្រកាច់ខំទុកធ្វើអី?
មិនចែកឲ្យប្រជាជនទៅ! អាហ្នឹងនិយាយឲ្យពិត វាដូចជាហួស ស្រឡាញ់ដីហួស ដីម៉ែលោកឯងហី? ម៉េចមិនចែកឲ្យប្រជាជនទៅ»។
កាលពីថ្ងៃទី ៨ ខែមីនា ឆ្នាំ ២០១៨ អ្នកភូមិជាច្រើននាក់បានរងរបួសដោយសារប៉ះទង្គិចគ្នាជាមួយក្រុមសមត្ថកិច្ចចម្រុះប្រដាប់ដោយកាំភ្លើងដែលចុះការពារគ្រឿងចក្រក្រុមហ៊ុន ខណៈពលរដ្ឋបានតវ៉ាបិទផ្លូវជាតិលេខ ៧៦ A។ កាលនោះក្រុមអ្នកភូមិចោទក្រុមហ៊ុនចម្ការកៅស៊ូមេមត់ថាបានរំលោភយកដីធ្លីទំហំពី ៣ ទៅ ៤ ហិកតាក្នុងមួយគ្រួសារ និងបំផ្លាញដំណាំផ្ទះសំបែងព្រមទាំងប្រើអំពើហិង្សាលើពលរដ្ឋទៀតផង។
តំណាងក្រុមហ៊ុនចម្ការកៅស៊ូមេមត់កាលពីម្សិលមិញមិនអាចទាក់ទងសុំការបញ្ជាក់ជុំវិញករណីនេះបានទេ៕
