The Phnom Penh Post Search

Search form

Logo of Phnom Penh Post newspaper Phnom Penh Post - អ្នក​គាំទ្រ​គណបក្ស​ប្រជាជន​នាំ​គ្នា​ស្បថ​ដើម្បី​បង្ហាញ​ភាព​ស្អាតស្អំ




អ្នក​គាំទ្រ​គណបក្ស​ប្រជាជន​នាំ​គ្នា​ស្បថ​ដើម្បី​បង្ហាញ​ភាព​ស្អាតស្អំ

ក្រុម​គាំទ្រ​គណបក្ស​ប្រជាជន​កម្ពុជា​បាន​ស្បថ​នៅ​មុខ​ព្រះអង្គ​ដងកើ​​។
ក្រុម​គាំទ្រ​គណបក្ស​ប្រជាជន​កម្ពុជា​បាន​ស្បថ​នៅ​មុខ​ព្រះអង្គ​ដងកើ​​។ រូបថត ក្រុម​យុវជន​សម្ព័ន្ធ​សេនានាគ

អ្នក​គាំទ្រ​គណបក្ស​ប្រជាជន​នាំ​គ្នា​ស្បថ​ដើម្បី​បង្ហាញ​ភាព​ស្អាតស្អំ

ភ្នំពេញៈ ក្រុម​យុវជន​រាប់រយ​នាក់​ដែល​គាំទ្រ​គណបក្ស​ប្រជាជន​កម្ពុជា​បាន​ទៅ​ធ្វើ​ពិធី​ស្បថ​ស្បែ​នៅ​មុខ​ព្រះអង្គ​ដងកើ​ក្នុង​រាជធានី​ភ្នំពេញ ដើម្បី​បង្ហាញពី​ភាព​ស្អាតស្អំ​ពី​ការ​ចោទប្រកាន់​ថា​បក្ស​នេះ​បាន​លួច​សន្លឹក​ឆ្នោត​ក្នុង​ឆ្នាំ​ ២០១៣ កន្លង​ទៅ។

ការ​ស្បថស្បែ​ដែល​សុទ្ធតែ​មាន​ពាក្យ​ «ឲ្យ​ស្លាប់​ដោយសារ​រន្ទះបាញ់ ឲ្យ​ឡាន​បុក និង​គ្រោះថ្នាក់​ចរាចរណ៍» ជាដើម សុទ្ធតែ​ជា​ពាក្យ​សម្បថ​ដែល​លោក ប៉ាន់ខែម ប៊ុនថន ប្រធាន​ក្រុម​យុវជន​សម្ព័ន្ធ​សេនានាគ និង​យុវជន​ពីរ​ក្រុម​ទៀត​មាន​គ្នា​រាប់រយ​នាក់​បាន​លុត​ជង្គង់​ស្បថ​នៅ​កន្លែង​ព្រះអង្គ​ដងកើ។

លោក ប៊ុនថន ឲ្យ​ដឹង​ថា​ការ​មក​ស្បថ​ក្រោយ​ពេល​ លោក ម៉ៅ ពិសេស ប្រធាន​សហព័ន្ធ​និស្សិត​បញ្ញវន្ត​កម្ពុជា ដែល​តែង​ប្រឆាំង​ការ​ដឹកនាំ​របស់​រដ្ឋាភិបាល​បាន​ចេញ​លិខិត​អញ្ជើញ​លោក​នាយករដ្ឋមន្ត្រី​ ហ៊ុន សែន មក​ស្បថ​ជាមួយ​គ្នា ដែល​លោក​យល់​ថា​កម្រិត​ត្រឹម​លោក ម៉ៅ ពិសេស មិន​គួរ​ណា​ហៅ​នាយករដ្ឋមន្ត្រី​ស្បថ​ឡើយ​ទាក់ទង​នឹង​ការ​ចោទ​ប្រកាន់​ថា គណបក្ស​ប្រជាជន​លួច​បន្លំ​សន្លឹក​ឆ្នោត ហើយ​កាកបាទ​ក្រហម​កម្ពុជា​បាន​ចែក​អំណោយ​រើសអើង។

លោក ប៊ុនថន និយាយ​ថា ៖ «យើង​ស្បថ​នៅ​ទី​នេះ​ដើម្បី​ការពារ​ភាព​ស្អាតស្អំ​របស់​គណបក្ស​ប្រជាជន​កម្ពុជា​។ ទោះ ម៉ៅ ពិសេស មិន​មក​ប៉ុន្តែ​យើង​បាន​ស្បថ​ដើម្បី​បង្ហាញ​ពី​ការ​ការពារ​គណបក្ស និង​គោរព​ចំពោះ​សម្តេច​នាយករដ្ឋមន្ត្រី​»​។ «យើង​នឹង​នៅ​តែ​បន្ត​ការងារ​មនុស្សធម៌​របស់​យើង​»។

ទាក់ទិន​នឹង​ការ​បបួល​ស្បថ លោក ម៉ៅ ពិសេស ប្រធាន​សហព័ន្ធ​និស្សិត​បញ្ញវន្ត​កម្ពុជា​ថ្លែង​ថា​ លោក​មិន​បាន​ចាប់​អារម្មណ៍​នឹង​ការ​ស្បថ​ស្បែ​របស់​យុវជន​បក្ស​ប្រជាជន​នោះ​ឡើយ ព្រោះ​ជា​សិទ្ធិ​របស់​ពួកគេ។ ចំណែក​ការ​ផ្ញើ​លិខិត​ទៅ​នាយក​រដ្ឋមន្ត្រី​ក៏​ជា​សិទ្ធិ​របស់​លោក​ជា​ពលរដ្ឋ​ម្នាក់​ដែរ ហើយ​លុះត្រា​តែ​មាន​នាយករដ្ឋមន្ត្រី​ទើប​លោក​ទៅ​ស្បថ​ជាមួយ​។

លោក​ថា ៖ «សម្តេច​មិន​អញ្ជើញ​ទៅ​ជា​សិទ្ធិ​របស់​សម្តេច។ ប៉ុន្តែ​ការ​ស្បថ​របស់​គេ​ធ្វើ​ដូច​ក្មេង​លេង​តាម​ការ​នឹក​ឃើញ​ដើម្បី​យក​ពិន្ទុ។ កូន​នាយករដ្ឋមន្ត្រី​គ្រប់គ្រង​យុវជន​ដែរ​គេ​មិន​ខ្វល់​ពី​រឿង​ហ្នឹង​ផង»។

គួរ​បញ្ជាក់​ថា​លោក​នាយករដ្ឋមន្រ្តី ហ៊ុន សែន នៅ​វិមាន​រដ្ឋសភា ថ្ងៃ​ទី​ ៨ ខែ​មិថុនា​បាន​បញ្ចេញ​​ប្រតិកម្ម​ខ្លាំងៗ​ទៅលើ​តំណាងរាស្រ្ត​គណបក្ស​ប្រឆាំង​ដែល​បាន​ចោទប្រកាន់​ថា គណបក្ស​ប្រជាជន​លួច​បន្លំ​សន្លឹក​ឆ្នោត និង​ថា​កាកបាទ​ក្រហម​កម្ពុជា​ដែល​ដឹកនាំ​ដោយ​ភរិយា​របស់​លោក​មាន​ភាព​លម្អៀង​ក្នុង​ការ​ចែក​អំណោយ​ដោយ​ស្នើ​ឲ្យ​តំណាងរាស្ត្រ​ទាំង​នេះ​ស្បថ​​ឲ្យ​ស្លាប់​ដោយ​រន្ទះ​បាញ់។

ប៉ុន្តែ លោក​ សម រង្ស៊ី ប្រធាន​គណបក្ស​សង្គ្រោះ​ជាតិ នៅ​ថ្ងៃ​ទី​ ១០ មិថុនា អះអាង​ថា លោក​ហ៊ាន​ទទួល​យក​ការ​ស្បថ​គ្រប់​ពេល​ទាក់ទង​ទៅ​នឹង​ការ​លើក​ឡើង​ពី​ភាព​មិន​ប្រក្រតី​ក្នុង​ការ​បោះឆ្នោត​កន្លង​មក តែ​លោក​ថា​ការ​ពិត​នឹង​ត្រូវ​បក​បង្ហាញ​លុះ​ណា​តែ​មាន​ការ​រាប់​សន្លឹក​ឆ្នោត​ឡើង​វិញ​តាម​បច្ចេកទេស​ត្រឹមត្រូវ៕

អត្ថបទគួរចាប់អារម្មណ៍