ភ្នំពេញៈ តំណាងក្រុមសម្ព័ន្ធយុវជនគាំទ្រគណបក្សប្រជាជននៅមិនទាន់មានផែនការច្បាស់លាស់ថាតើពួកគេនឹងត្រូវធ្វើបាតុកម្មប្រឆាំងគណបក្សសង្គ្រោះជាតិនៅភ្នំពេញឬយ៉ាងណានៅឡើយទេ ដោយត្រូវរង់ចាំមើលថាតើ មានសមាជិកគណបក្សសង្គ្រោះជាតិចូលរួមធ្វើបាតុកម្មនៅសហរដ្ឋអាមេរិកប្រឆាំងនឹងការទៅដល់របស់លោកនាយករដ្ឋមន្ត្រី ហ៊ុន សែន នៅថ្ងៃនេះដែរឬយ៉ាងណា?
តំណាងក្រុមសម្ព័ន្ធយុវជនគាំទ្រគណបក្សប្រជាជនលោក សាំង សុង បានប្រាប់ភ្នំពេញប៉ុស្តិ៍ថាក្រុមរបស់លោកនៅតែរក្សាជំហរធ្វើបាតុកម្មប្រឆាំងគណបក្សសង្គ្រោះជាតិដដែលបើការធ្វើបាតុកម្មនៅសហរដ្ឋអាមេរិកនោះមានសភាពធ្ងន់ធ្ងរ ឬមានការចូលរួមពីសមាជិកបក្សសង្គ្រោះជាតិ។ តែលោកបញ្ជាក់ថា ការធ្វើបាតុកម្មនេះមិនមែនជាគោលការណ៍ ឬជាសមាជិករបស់បក្សប្រជាជនកម្ពុជាទេតែគ្រាន់តែជាអ្នកគាំទ្រគណបក្សកាន់អំណាចប៉ុណ្ណោះ។
លោកថា៖ «គម្រោងនៃការធ្វើនេះគឺខ្ញុំមិនទាន់បានរំសាយនៅឡើយទេគឺនៅតែស្ថិតក្នុងគម្រោងធ្វើបាតុកម្មតបដដែលប៉ុន្តែពេលនេះខ្ញុំមិនអាចអត្ថាធិប្បាយបានទេថាតើត្រូវធ្វើនៅពេលណា ម៉ោងណា? ហេតុអ្វីខ្ញុំមិនអាចប្រកាសពេលវេលាច្បាស់លាស់បានគឺដោយសារតែគេនឹងធ្វើនៅថ្ងៃចន្ទអ៊ីចឹងចាំមើលសិនហើយខ្ញុំនឹងបើកកិច្ចប្រជុំដើម្បីពិភាក្សាថាធ្វើ ឬមិនធ្វើហើយដាក់កាលបរិច្ឆេទពេលណា»។
លោកបន្ថែមថា៖ «វាអាចប្រែប្រួលតាមហ្នឹងដែរបើគ្រាន់តែជាសំឡេងស្រែកអឺងកង រំពងសំឡេងដោយមនុស្សប៉ុន្មាននាក់ហើយមិនបានចាត់ទុកជាសាច់ការហើយមិនមានភាពខ្លាំងក្លាដាក់គំនាបទៅលើរដ្ឋាភិបាលទេគឺយើងពិចារណាតាមហ្នឹង»។
លោកថា តាមគម្រោងអ្នកគាំទ្រគណបក្សប្រជាជនដែលនឹងចូលរួមធ្វើបាតុកម្មនោះមិនក្រោមពី ៣ ពាន់ ទៅ ៥ ពាន់នាក់នោះទេ។ លោកថា លើសពីនេះទៀតលោកនឹងដាក់ញត្តិទៅរដ្ឋសភា និងក្រសួងយុត្តិធម៌ដើម្បីឱ្យពិនិត្យសកម្មភាពរបស់គណបក្សសង្គ្រោះជាតិឡើងវិញដោយលោកចោទថាក្រោយឆ្នាំ ២០១៣ កន្លងមកបក្សសង្គ្រោះជាតិបានបង្កឲ្យមានភាពចលាចលក្នុងសង្គម។
លោកបញ្ជាក់ថា បាតុកម្មនេះនឹងធ្វើឡើងក្រោមរូបភាពអហិង្សាហើយធ្វើឡើងនៅមុខទីស្នាក់ការបក្សសង្គ្រោះជាតិស្ថិតនៅចក្រអង្រែមិនមែនធ្វើនៅមុខផ្ទះលោក កឹម សុខា នោះទេ។
អ្នកគាំទ្របក្សកាន់អំណាចម្នាក់ទៀតលោក ខាន់ ចាន់សុផល ថ្លែងថាតាមអ្វីដែលលោកបានតាមដាននាពេលកន្លងមកប្រសិនបើបាតុកម្មនៅសហរដ្ឋអាមេរិកមិនមានការចូលរួមពីសកម្មជន ឬសមាជិកបក្សសង្គ្រោះជាតិទេនោះបាតុកម្មនៅក្នុងស្រុកក៏អាចនឹងមិនមានដែរ។
លោកបញ្ជាក់ថា៖ «ខ្ញុំជឿជាក់ថាមិនអាចមានបាតុកម្មនៅភ្នំពេញទេព្រោះយើងឃើញថាលិខិតបង្ហោះជាផ្លូវការរបស់បក្សសង្គ្រោះជាតិនៅសហរដ្ឋអាមេរិកពីការមិនទទួលស្គាល់សមាជិករបស់ខ្លួនដែលចូលរួមធ្វើបាតុកម្មនោះទេចឹងទេសកម្មជនរបស់គាត់ជាច្រើនប្រហែលជាយល់ហើយមិនធ្វើឱ្យមេបក្សរបស់គាត់ជួបផលវិបាកទេ»។
កាលពីថ្ងៃទី ១២ ខែកុម្ភៈប្រធានស្តីទីគណបក្សសង្គ្រោះជាតិលោក កឹម សុខា បានផ្ញើលិខិតសុំអន្តរាគមន៍ទៅរដ្ឋមន្ត្រីក្រសួងមហាផ្ទៃលោក ស ខេង ឱ្យចាត់វិធានការ ការពារសន្តិសុខសុវត្ថិភាពជូនអ្នកតំណាងរាស្ត្រថ្នាក់ដឹកនាំ និងសមាជិកសមាជិកាគណបក្សសង្គ្រោះជាតិខ្លាចក្រែងកើតមានអំពើហិង្សាណាមួយដូចកាលពីមានវ៉ៃអ្នកតំណាងរាស្ត្រគណបក្សសង្គ្រោះជាតិពីរនាក់ឲ្យរងរបួសធ្ងន់កាលពីពេលកន្លងមក។
លិខិតបន្តថា ការស្នើនេះធ្វើឡើងបន្ទាប់ពីមានអ្នកគាំទ្ររបស់បក្សកាន់អំណាចប្រកាសធ្វើបាតុកម្មប្រឆាំងគណបក្សសង្គ្រោះជាតិ។
ក្នុងលិខិតបន្តថា បើពុំមានវិធានការពីអាជ្ញាធរមានសមត្ថកិច្ចទេថ្នាក់ដឹកនាំ និងសមាជិកបក្សសង្គ្រោះជាតិអាចនឹងប្រឈមចំពោះការរំលោភបំពានដល់រាងកាយដោយប្រការណាមួយជាមិនខានប្រសិនបាតុកម្មកើតពិតមែន។ ភ្នំពេញប៉ុស្តិ៍មិនអាចទាក់ទងមន្ត្រីគណបក្សសង្គ្រោះជាតិដើម្បីសុំការអត្ថាធិប្បាយបានទេកាលពីម្សិលមិញ។
ភ្នំពេញប៉ុស្តិ៍ក៏មិនអាចសុំការអត្ថាធិប្បាយដោយផ្ទាល់ពីអ្នកនាំពាក្យក្រសួងមហាផ្ទៃលោក ខៀវ សុភ័គ បានដែរ។ ចំណែកអ្នកនាំពាក្យអគ្គស្នងការដ្ឋាននគរបាលជាតិលោក គៀត ច័ន្ទថារិទ្ធិ បានថ្លែងថាលោកមិនទាន់បានពិនិត្យទៅលើការស្នើសុំនោះទេ។
លោកថា៖ «ខ្ញុំដឹងរឿងហ្នឹងគ្រាន់តែអត់ទាន់បានពិនិត្យមើលថាត្រូវចាត់ចែងយ៉ាងម៉េចទេព្រោះជាប់រវល់រហូត»។
លោកនាយករដ្ឋមន្ត្រី ហ៊ុន សែន បានចេញដំណើរឆ្ពោះទៅសហរដ្ឋអាមេរិកកាលពីថ្ងៃសៅរ៍ដើម្បីចូលរួមក្នុងកិច្ចប្រជុំពិសេសអាស៊ានសហរដ្ឋអាមេរិកជាទីដែលប្រជាពលរដ្ឋខ្មែរនៅទីនោះបានប្រកាសថាពួកគេនឹងធ្វើបាតុកម្មប្រឆាំងនឹងរូបលោក៕
