ភ្នំពេញៈ ភរិយារបស់លោក រ៉ាត់ រ័ត្នមុនី ប្រធានសហព័ន្ធសហជីពកម្មករសំណង់កម្ពុជា ដែលពាក់ព័ន្ធនឹងភាពយន្តខ្លី «ម្ដាយខ្ញុំលក់ខ្ញុំ» អ្នកស្រី ឡុង គឹមហ៊ាង និងមនុស្សប្រមាណជិត ១០ នាក់ទៀតបានប្រមូលផ្តុំគ្នាតវ៉ានៅមុខស្ថានទូតរុស្ស៊ីជាលើកទី ៤ ពីម្សិលមិញ ដើម្បីតវ៉ាសុំអន្តរាគមន៍ឲ្យដោះលែងលោករ័ត្នមុនី ក្រោយពីសាលាឧទ្ធរណ៍បដិសេធការសុំនៅក្រៅឃុំ ខណៈបណ្តឹងសារទុក្ខក៏ត្រូវបានដាក់ទៅដល់តុលាការកំពូលរួចហើយ។
សាលាឧទ្ធរណ៍បានប្រកាសសាលដីកាសម្រេចមិនអនុញ្ញាតឲ្យជនត្រូវចោទលោករ៉ាត់ រ័ត្នមុនី នៅក្រៅឃុំ ដោយតម្កល់សាលក្រមរបស់សាលាដំបូងរាជធានីភ្នំពេញឲ្យនៅដដែល កាលពីថ្ងៃទី ៣១ មករា ក្រោយពីជំនុំជម្រះកាលពីថ្ងៃទី ៣០ មករា ដោយមានសមាសភាពលោកចៅក្រម សួស សំអាត ជាប្រធានក្រុមប្រឹក្សាជំនុំជម្រះ និងលោកព្រះរាជអាជ្ញា តាន់ សេណារ៉ុង តំណាងមហាអយ្យការ។
អ្នកស្រី ឡុង គឹមហ៊ាង បានថ្លែងថា ការប្រមូលផ្តុំគ្នាតវ៉ាលើកនេះ ដើម្បីតាមដានថា តើស្ថានទូតរុស្ស៊ីមានវិធានការហើយ ឬនៅទាក់ទងនឹងការអន្តរាគមន៍ជួយឲ្យប្តីអ្នកស្រីឲ្យមានសេរីភាពឡើងវិញ ព្រោះខណៈនេះស្ថានភាពសុខភាពរបស់គាត់ដែលកំពុងឃុំខ្លួននៅពន្ធនាគារ គឺកំពុងមានបញ្ហាដោយមានសភាពស្គមស្គាំង និងដកដង្ហើមថប់។
អ្នកស្រីបញ្ជាក់ថា៖ «ខ្ញុំមកតាមដានញត្តិរបស់ខ្ញុំដែលបានផ្ញើតាមអ៊ីមែល ពីព្រោះលើកមុនគាត់ក៏អត់បានចេញមកទទួលញត្តិពីពួកយើងដែរ ហើយយើងបានដឹងថាខាងស្ថានីយទូរទស្សន៍រុស្ស៊ីក៏បានផ្ញើលិខិតសុំឲ្យអន្តរាគមន៍ពីស្ថានទូតផងដែរ អ៊ីចឹងយើងចង់ដឹងថា គាត់បានធ្វើអ្វីខ្លះហើយ ដើម្បីជួយប្តីរបស់ខ្ញុំ?»។
ការសម្រេចរបស់សាលាឧទ្ធរណ៍ អ្នកស្រី គឹមហ៊ាង បានសម្តែងនូវការសោកស្តាយខ្លាំង ដែលតុលាការបានបន្តឲ្យគាត់នៅជាប់ឃុំតទៅទៀត។
អ្នកស្រីអះអាងថា៖ «ខ្ញុំនឹងបន្តស្វែងរកយុត្តិធម៌បន្តទៀត ហើយខ្ញុំបានជួបពិភាក្សាជាមួយមេធាវីខ្ញុំរួចហើយ ហើយមេធាវីខ្ញុំបានដាក់ពាក្យបណ្ដឹងប្តឹងសារទុក្ខទៅតុលាការកំពូលរួចហើយកាលពីម្សិលមិញ ប៉ុន្ដែពេលនេះយើងកំពុងរង់ចាំការឆ្លើយតបពីតុលាការកំពូល»។
លោក សំ ទិត្យសីហា មេធាវីការពារក្តីលោក រ៉ាត់ រ័ត្នមុនី ប្រាប់ភ្នំពេញប៉ុសិ៍្ត ថា លោកបានយកពាក្យបណ្ដឹងជំទាស់ទៅដាក់នៅតុលាការកំពូលរួចហើយ ពីម្សិលមិញនេះ ដោយកំពុងរង់ចាំការឆ្លើយតបពីតុលាការ។ លោកបន្តថា ការប្ដឹងជំទាស់នេះ គឺជាការសម្រេចចិត្តរបស់លោក រ៉ាត់ រ័ត្នមុនី ដែលមិនពេញចិត្តនឹងសេចក្ដីសម្រេចរបស់សាលាឧទ្ធរណ៍។ ម្យ៉ាងទៀត ជនត្រូវចោទមានសិទ្ធិស្នើសុំស្ថិតនៅក្រៅឃុំ ហើយសិទ្ធិនេះត្រូវបានកំណត់ដោយច្បាប់ដែលមានចែងនៅក្នុងក្រមរដ្ឋប្បវេណី។
លោកទិត្យសីហា បញ្ជាក់ថា៖ «បទល្មើសគាត់ហ្នឹងវាមិនមានព្យសនកម្មធ្ងន់ធ្ងរអ្វីដល់សណ្ដាប់ធ្នាប់ខ្លាំងទេ ហើយក៏មិនមានការគំរាមកំហែងដល់ជនណាម្នាក់ដែរ។ អ្វីដែលសំខាន់មួយទៀតនោះ គឺរឿងនីតិវិធីរបស់តុលាការនោះ គឺមិនចាំបាច់ទៅឃុំខ្លួនជនត្រូវចោទនោះទេ ដោយទុកគាត់ឲ្យនៅក្រៅឃុំ ហើយបន្តការស៊ើបអង្កេតតាមក្រោយទៀតទៅ»។
លោកនៅ មុនីជោត អ្នកនាំពាក្យតុលាការ និងមហាអយ្យការអមតុលាការកំពូល ពីម្សិលមិញមិនទាន់អាចទាក់ទងសុំការបញ្ជាក់ជុំវិញ លោកមេធាវី សំ ទិត្យសីហា យកពាក្យបណ្ដឹងប្ដឹងជំទាស់ទៅដាក់នោះទេ។
ចំណែកភាគី តំណាងស្ថានទូតរុស្ស៊ីប្រចាំនៅប្រទេសកម្ពុជា ក៏មិនទាន់បានឆ្លើយតបតាមសារអេឡិចត្រូនិក ហើយក៏មិនបានចេញមកជួបក្រុមអ្នកតវ៉ានៅខាងមុខស្ថានទូតខ្លួនដែរ។
គួររំឭកថា លោក រ៉ាត់ រ័ត្នមុនី ត្រូវបានអាជ្ញាធរថៃចាប់ខ្លួនកាលពីថ្ងៃទី ៧ ខែធ្នូ ឆ្នាំ ២០១៨ តាមការស្នើសុំពីអាជ្ញាធរកម្ពុជា ហើយបានបញ្ជូនមកកម្ពុជាវិញ ពាក់ព័ន្ធករណីផលិតភាពយន្តឯកសារដែលនិយាយអំពីការលក់ព្រហ្មចារីយ៍។ ភាពយន្តឯកសារនេះត្រូវបានផលិតដោយទូរទស្សន៍រុស្ស៊ី RT ហើយបានចេញផ្សព្វផ្សាយកាលពីថ្ងៃ ១៤ ខែតុលា ឆ្នាំ ២០១៨ កន្លងទៅនេះ។
នៅមុនពេលបញ្ជូនខ្លួនពីថៃ លោក ឆាយ គឹមខឿន អគ្គស្នងការរងនគរបាលជាតិថ្លែងថា វីដេអូឯកសារនោះជាការប្រឌិតធ្វើឲ្យប៉ះពាល់ប្រពៃណីកម្ពុជា ហើយបើតាមម្តាយ និងកូនស្រីឈ្មោះ កែវ ម៉ាឡៃ និងឈ្មោះ ឃៀង ស្រីម៉ិច បានប្រាប់សមត្ថកិច្ចថា ឈ្មោះ រ៉ាត់ រ័ត្នមុនី បានប្រាប់ពួកគេទាំង ២ ថា ការថតនោះគឺរឿង «ប្រទេសខ្មែរក្រោយរបបប៉ុលពត» ហើយការល្បួងឲ្យពួកគេថតរឿងនោះក៏មានជនបរទេស ៤ រូបជួយថត និងរៀបចំឈុតឆាកផងដែរ។ ប៉ុន្តែពេលឃើញឃ្លីបវីដេអូបែរទៅជារឿង «ម្តាយខ្ញុំ លក់ខ្ញុំ» ធ្វើឲ្យពួកគាត់ខកចិត្ត ហើយបានប្តឹងមកសមត្ថកិច្ច។
នាង កែវ ម៉ាឡៃ ម្តាយក្មេងស្រី និងជាតួសម្ដែងជាម្ដាយមិនអាចទាក់ទងសុំការបកស្រាយបានទេម្សិលមិញ៕