The Phnom Penh Post Search

Search form

Logo of Phnom Penh Post newspaper Phnom Penh Post - អ្នក​គាំទ្រ​ហ្វេសប៊ុក​នាយក​រដ្ឋមន្ត្រី​ ត្រូវ​បាន​គេ​រកឃើញ​ថា​ ជាង​ពាក់​កណ្ដាល​មាន​ប្រភព​មកពី​បរទេស




អ្នក​គាំទ្រ​ហ្វេសប៊ុក​នាយក​រដ្ឋមន្ត្រី​ ត្រូវ​បាន​គេ​រកឃើញ​ថា​ ជាង​ពាក់​កណ្ដាល​មាន​ប្រភព​មកពី​បរទេស

Content image - Phnom Penh Post

អ្នក​គាំទ្រ​ហ្វេសប៊ុក​នាយក​រដ្ឋមន្ត្រី​ ត្រូវ​បាន​គេ​រកឃើញ​ថា​ ជាង​ពាក់​កណ្ដាល​មាន​ប្រភព​មកពី​បរទេស

ភ្នំពេញៈ ប៉ុន្មាន​ថ្ងៃ​បន្ទាប់ពី​លោក​នាយក​រដ្ឋមន្រ្តី ហ៊ុន សែន មាន​អ្នក​គាំទ្រ​លើស​បី​លាន​នាក់​នៅ​លើ​ហ្វេសប៊ុក​ភាព​ត្រឹមត្រូវ​អំពី​ការ​កើនឡើង​យ៉ាង​លឿន​នេះ​ត្រូវ​បាន​​ចោទ​ជា​សំណួរ​​ដោយ​ទិន្នន័យ​​​ដែល​បង្ហាញ​​ថា​ជាង​ពាក់​កណ្តាល​នៃ​ចំនួន​ «likes» ដែល​មាន​នៅ​លើ​ទំព័រ​ហ្វេសប៊ុក​របស់​លោក​​​ក្នុង​រយៈពេល​មួយ​ខែ​នេះ​បាន​មកពី​បរទេស​រួម​ទាំង​ចំនួន​​យ៉ាង​ច្រើន​ពី​ឥណ្ឌា​ និង​ហ្វីលីពីន​។

ទិន្នន័យ​ដែល​ប្រមូល​ដោយ​គេហទំព័រ​វិភាគ​មួយ​ឈ្មោះ socialbakers.com បាន​បង្ហាញ​​អំពី​ចំនួន​អ្នក​គាំទ្រ​លោក​នាយក​រដ្ឋមន្រ្តី ហ៊ុន សែន ចំនួន​ ៧៧៩ ០០០ បន្ថែម​នៅក្នុង​ ១ ​ខែ​កន្លង​ទៅ​ក្នុង​នោះ​មាន​តែ​ ១៥៧​ ៣៣១ ប៉ុណ្ណោះ​មក​ពី​ប្រទេស​កម្ពុជា​។

ចំនួន​ចូល​យ៉ាង​ច្រើន​នេះ​គឺ​ ២៥៥៦៩២ មកពី​ប្រទេស​ឥណ្ឌា​ហើយ​សរុប​ទៅក្នុង​ប្រទេស​ឥណ្ឌា​អ្នក​ «like» លោក​នាយក​រដ្ឋមន្រ្តី ហ៊ុន សែន មាន​ចំនួន​ ៣៣២៤៧៥​។

ជាង​នេះ​ទៀត​ក្នុង​រយៈកាល​ ៣០ ​ថ្ងៃ​កន្លង​ទៅ​គណនី​ចំនួន​ ៩៨២៥៦ ​ពី​ប្រទេស​ហ្វីលីពីន​ចុច​ like លោក​នាយក​រដ្ឋមន្រ្តី​ហើយ​ពី​ប្រទេស​មីយ៉ាន់ម៉ា​មាន​ចំនួន​​ ៥៤៩៧២ ពី​ប្រទេស​ឥណ្ឌូនេស៊ី​មាន​ចំនួន​​ ៤៦៣៦៨ និង​ពី​ប្រទេស​ប្រេស៊ីល​មាន​ចំនួន​ ២៦៥២៧ ខណៈ​ដែល​មកពី​ប្រទេស​ម៉ិកស៊ិក​មាន​ចំនួន​ ១២៩៨០ ពី​ប្រទេស​តួកគី​មាន​ចំនួន​ ៤៧៨៣ និង​ពី​អេមីរ៉េត​អារ៉ាប់​រួម​មាន​ចំនួន​​ ៣៩៥២​។

សរុប​ទៅ ៥៩១៧១៧ នៃ​ចំនួន​អ្នក follower អន្តរជាតិ​ ១,២ ​លាន​របស់​លោក​នាយក​រដ្ឋមន្រ្តី​ត្រូវ​បាន​បន្ថែម​នៅក្នុង​មួយ​ខែ​កន្លង​ទៅ​នេះ​។

បន្ទាប់ពី​មាន​អ្នក follower ឈាន​ដល់​ចំនួន​បី​លាន​ហ្វេសប៊ុក​លោក​នាយក​រដ្ឋមន្រ្តី ហ៊ុន សែន​ បាន​សរសេរ​ថា៖ «​​ខ្ញុំ​សូម​ថ្លែង​អំណរគុណ​ជន​រួមជាតិ​​ និង​យុវជន​ក្នុង​ប្រទេស​ និង​ក្រៅ​ប្រទេស​​ដែល​បាន​គាំទ្រ​ទំព័រ​ហ្វេសប៊ុក​របស់​ខ្ញុំ​ដែល​ទទួល​បាន like ចំនួន​ ៣ លាន​គិត​មក​ត្រឹម​ម៉ោង​ ៦:០៨ ​នាទី​ល្ងាច​ (ថ្ងៃ​ទី​ ៦ មីនា)។ «​ហ្វេសប៊ុក​បាន​នាំ​ឲ្យ​ខ្ញុំ​​មាន​ភាព​ជិតស្និទ្ធ​ជាង​មុន​ជាមួយ​ប្រជាជន និង​ធ្វើ​ឲ្យ​ខ្ញុំ​បាន​ស្តាប់​ និង​ទទួល​​​សំណើ​ច្រើន​ជាង​មុន​ដោយ​ផ្ទាល់​ពី​ពួកគេ​»។ «​តាមរយៈ​ហ្វេសប៊ុក​ខ្ញុំ​បាន​ដោះស្រាយ​បញ្ហា​មួយ​ចំនួន​បាន​យ៉ាង​លឿន​ និង​មាន​ប្រសិទ្ធភាព​»។

អ្នក​ជំនាញ​ផ្នែក​ឌីជីថល​ម្នាក់​មាន​មូលដ្ឋាន​នៅ​​ប្រទេស​កម្ពុជា​ដែល​សុំ​មិន​បញ្ចេញ​ឈ្មោះ​បាន​ថ្លែង​ថា​ចំនួន​អ្នក​ like នៅ​លើ​ហ្វេសប៊ុក​របស់​លោក​នាយករដ្ឋមន្រ្តី​បាន​ចោទ​ជា​សំណួរ​អំពី​ភាព​ត្រឹមត្រូវ​នៃ​ការ like។ លោក​បាន​ថ្លែង​ថា​ចំនួន​ like អាច​ត្រូវ​បាន​ទិញ​ប្រសិន​បើ​ម្ចាស់​ហ្វេសប៊ុក​ចង់​មាន​ប្រជាប្រិយភាព​ជាង​ចំនួន​ដែល​ខ្លួន​មាន​ពិតប្រាកដ​។

ចំនួន​ like ក្លែងក្លាយ​ត្រូវ​បាន​​លក់​ដោយ​ក្រុមហ៊ុន​មួយ​ចំនួន​ដែល​ប្រើប្រាស់​ការ​ចុច​​ «​like» ​នៅ​បរទេស​ដែល​កម្មករ​ប្រាក់​ខែ​តិចតួច​បង្កើត​​គណនី​ហ្វេសប៊ុក​ក្លែងក្លាយ​ដើម្បី​ជួយ​ចុច​ like ចុច follow នៅលើ​ហ្វេសប៊ុក​លោក​នាយក​រដ្ឋមន្រ្តី។

នៅក្នុង​ការ​ស៊ើប​អង្កេត​នេះ​បាន​បង្ហាញ​ថា​ការ​កើនឡើង​ច្រើន​ជាង​គេ​គឺ​នៅក្នុង​ប្រទេស​​ឥណ្ឌា ឥណ្ឌូនេស៊ី បង់ក្លាដែស និង​ហ្វីលីពីន​។

នាពេល​ប៉ុន្មាន​ខែ​ថ្មីៗ​នេះ​លោក ហ៊ុន សែន និង​លោក សម រង្ស៊ី បាន​ប្រកួត​ប្រជែង​គ្នា​លើ​​ចំនួន​អ្នក​គាំទ្រ​លើ​ហ្វេសប៊ុក​ដោយ​ក្នុង​នោះ​លោក​នាយក​រដ្ឋមន្រ្តី ហ៊ុន សែន បាន​ឈ្នះ​ដោយ​មាន​ចំនួន​ like ច្រើន​ជាង​។

ប៉ុន្តែ​តាមពិត​ទៅ​ទិន្នន័យ​​បាន​បង្ហាញ​ថា​ការ​រាប់​សរុប​នៃ​ចំនួន​ជនជាតិ​កម្ពុជា​អ្នក​គាំទ្រ​លោក សម រង្ស៊ី គឺ​មាន​ចំនួន​លើស​ជនជាតិ​កម្ពុជា​ដែល​គាំទ្រ​លោក​នាយក​រដ្ឋមន្រ្តី ហ៊ុន សែន គឺ​ចំនួន ១,៨៣ ​លាន​ទល់​នឹង​ចំនួន​ ១,៧៣ ​លាន​របស់​លោក​នាយក​រដ្ឋមន្រ្តី​។

ទន្ទឹម​នេះ​ទិន្នន័យ​ទំព័រ​របស់​លោក សម រង្ស៊ី បង្ហាញ​ថា​មិន​មាន​សញ្ញា​នៃ​ការ​​ក្លែងបន្លំ​។

គណនី​ហ្វេសប៊ុក​ក្នុង​ប្រទេស​គឺ​មាន​ ៨២ ​ភាគរយ​រីឯ​ចំនួន​ដទៃ​ទៀត​គឺ​មកពី​ប្រទេស​ថៃ​ មីយ៉ាន់ម៉ា កូរ៉េ​ខាង​ត្បូង អាមេរិក និង​វៀតណាម​។

សារ​សុំ​អត្ថាធិប្បាយ​ទៅ​ហ្វេសប៊ុក​ និង​គេហទំព័រ​លោក​នាយក​រដ្ឋមន្ត្រី​មិន​ទទួល​បាន​ការ​ឆ្លើយតប​ទេ​កាលពី​ម្សិលមិញ។

អ្នក​នាំពាក្យ​រដ្ឋាភិបាល​លោក​ ផៃ ស៊ីផាន បាន​ថ្លែង​ថា​លោក​មិន​បាន​ដឹង​អំពី​ករណី​ like ក្លែងក្លាយ​នេះ​ទេ​។

លោក ផៃ ស៊ីផាន បញ្ជាក់​ថា៖ «​គោលបំណង​នៃ​ការ​ប្រើ​ហ្វេសប៊ុក​នេះ​គឺ​ដើម្បី​អភិបាលកិច្ច​ល្អ និង​ការ​​ប្រាស្រ័យ​ទាក់ទង​ផ្លូវ​ពីរ​រវាង​ប្រជាជន​របស់​លោក​ និង​រដ្ឋបាល​របស់​លោក វា​មិនមែន​អំពី​​ប្រជាប្រិយភាព​នោះ​ទេ​វា​គឺ​អំពី​អភិបាលកិច្ច​ល្អ​... ​លោក​ទទួល​បាន​​ប្រជាប្រិយភាព​រួច​ហើយ​នោះ​ហើយ​ជា​មូលហេតុ​ដែល​លោក​ត្រូវ​បាន​បោះឆ្នោត​ដោយ​ប្រជាជន​របស់​លោក ​និង​ដោយ​រដ្ឋសភា​»។

នេះ​តាមពិត​ទៅ​គឺ​​បង្ហាញ​នៅក្នុង​ទិន្នន័យ​ពី Socialbakers ដែល​ត្រូវ​បាន​ប្រើ​ដោយ​ក្រុមហ៊ុន​ដូចជា​ Toyota, Nestle និង ING Bank។

អត្រា​នៅ​លើ​ទំព័រ​របស់​លោក​នាយក​រដ្ឋមន្រ្តី​គឺ​ខ្ពស់​ខ្លាំង​បើ​និយាយ​ពី​​ការ​ចូលរួម​​ដោយ​អ្នក​ប្រើប្រាស់​ហ្វេសប៊ុក​ដែល​ជា​មធ្យម​គឺ​មាន​​អន្តរកម្ម​ចំនួន​ ១៨០០ ​ក្នុង​ចំណោម​អ្នក​គាំទ្រ​ ១០០០ ​​​ក្នុង​រយៈកាល​ ១ ខែ​កន្លង​ទៅ។

ក្នុង​រយៈកាល​ដូច​គ្នា​នេះ​ការ​ post នៅ​លើ​​ទំព័រ​​ហ្វេសប៊ុក​គឺ​​មាន​អ្នក​ like កើនឡើង​ចំនួន​ ៤,១ ​លាន​អ្នក​ comment ចំនួន​ ១០៦០០០ អ្នក​ share ចំនួន ៥៣៣ ០០០​។

បើ​ប្រៀបធៀប​គ្នា​លោក សម រង្ស៊ី ​មាន​អន្តរកម្ម​​មធ្យម​ចំនួន​ ៥៥៨,៤ ​ក្នុង​ចំនួន​អ្នក​គាំទ្រ​ ១០០០ អ្នក​ like ចំនួន​ ១,១ លាន​ និង​អ្នក coment ចំនួន​ ១៥១​០០ និង​ អ្នក​ share ចំនួន​ ១៣៣ ០០០​។

តាមរយៈ​អ៊ីមែល​ពី​ប្រទេស​បារាំង​ប្រធាន​គណបក្ស​សង្គ្រោះ​ជាតិ​បាន​ថ្លែង​ថា​ការ​ទិញ​ likes ក្លែងក្លាយ​គឺ​ជា​ការ​មិន​យល់​អំពី​សារៈសំខាន់​បំផុត​នៃ​ប្រព័ន្ធ​ផ្សព្វផ្សាយ​សង្គម​។

លោក សម រង្ស៊ី បាន​ថ្លែង​ថា៖ «​ការ​ប្រកួត​ណា​ក៏ដោយ​ដែល​ប្រមូល​បាន​ចំនួន likes ​យ៉ាង​ខ្ពស់​បំផុត​គឺ​វា​មិន​ពាក់ព័ន្ធ​បើ​និយាយ​ពី​​ការ​កំណត់​ឥទ្ធិពល​ការពិត​ និង​ផល​នៃ​​សារ​របស់​អ្នក​នៅលើ​ហ្វេសប៊ុក​​»។

«​ដោយសារ​ការ​មាន​ធនធាន​ហិរញ្ញ​វត្ថុ​គ្មាន​កំណត់​ និង​ការ​ប្រើប្រាស់​បរិក្ខារ​រដ្ឋ​រួម​បញ្ចូល​ជាមួយ​នឹង​​ការ​ប្រើប្រាស់​ល្បិច​បច្ចេកទេស​ក្លែងក្លាយ​អ្នក​អាច​ផ្សព្វផ្សាយ​ទំព័រ​របស់​អ្នក​ជាមួយ​នឹង​លទ្ធផល​បោកប្រាស់ ប៉ុន្តែ​តើ​ចំនួន​ likesក្លែងក្លាយ​ទាំងនោះ​អាច​មាន​ន័យ​ដូចម្តេច​បើ​និយាយ​ពី​​ផល​​នយោបាយ​​ និង​សង្គម​?»៕ PS

Daniel Nass និង Shaun Turton

អត្ថបទគួរចាប់អារម្មណ៍