The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​គំរាម​សម្លាប់​លោក សុខ ទូច ត្រូវ​ចោទប្រកាន់

អ្នក​គំរាម​សម្លាប់​លោក សុខ ទូច ត្រូវ​ចោទប្រកាន់

ផង់ សីហា នៅ​សាលា​ដំបូង​ភ្នំពេញ​ពី​ម្សិលមិញ។
ផង់ សីហា នៅ​សាលា​ដំបូង​ភ្នំពេញ​ពី​ម្សិលមិញ។ ផា លីណា

អ្នក​គំរាម​សម្លាប់​លោក សុខ ទូច ត្រូវ​ចោទប្រកាន់

ភ្នំពេញៈ ភ្លាមៗ​បន្ទាប់ពី​ត្រូវ​បាន​ចាប់​ខ្លួន​នៅ​ព្រំដែន​បញ្ជូន​មក​ថ្មីៗ​បុរស​ម្នាក់​ត្រូវ​បាន​សាលា​ដំបូង​រាជធានី​ភ្នំពេញ​កាល​ម្សិលមិញ​ចោទប្រកាន់​ពាក់ព័ន្ធ​នឹង​ការ​បង្ហោះ​សារ​គំរាម​សម្លាប់​នៅលើ​ហ្វេសប៊ុក​របស់​ខ្លួន​សំដៅ​ទៅ​លោក សុខ ទូច​។

ព្រះរាជអាជ្ញារង​នៃ​សាលា​ដំបូង​រាជធានី​ភ្នំពេញ​លោក សៀង សុខ បាន​ថ្លែង​ថា​លោក ផង់ សីហា អាយុ​ ២៧ ​ឆ្នាំ​ដែល​ជា​​កម្មករ​សំណង់​​មកពី​ឃុំ​ស្តៅកោង ស្រុក​បាភ្នំ ខេត្ត​ព្រៃវែង​ត្រូវ​បាន​ចោទប្រកាន់​ពី​បទ​ «​គំរាម​សម្លាប់​» ដោយ​ផ្អែក​តាម​មាត្រា​ ២៣៣ ​នៃ​ក្រម​ព្រហ្មទណ្ឌ​ហើយ​ត្រូវ​បាន​បញ្ជូន​ទៅ​​ពន្ធនាគារ​ព្រៃស​។

លោក​បាន​និយាយ​ថា៖ «​ក្នុង​សំណុំ​រឿង​នេះ​ប្រសិន​បើ​រកឃើញ​ថា​មាន​ទោស​គាត់​នឹង​ត្រូវ​ផ្តន្ទាទោស​ដាក់​ពន្ធនាគារ​ពី​ ៦ ​ខែ​ទៅ​ ២ ​ឆ្នាំ​»​​។

បើ​តាម​លោក ស៊ុន សុខលី មន្រ្តី​នគរបាល​សន្តិសុខ​ផ្ទៃក្នុង​នៃ​នគរបាល​រាជធានី​ភ្នំពេញ​បាន​ឲ្យ​ដឹង​ថា​លោក ផង់ សីហា បាន​គំរាម​សម្លាប់​​​លោក សុខ ទូច ប្រធាន​ក្រុម​​ស្រាវជ្រាវ​ព្រំដែន​​នៃ​​រាជបណ្ឌិត្យ​សភា​កាលពី​ខែ​សីហា។

លោក សុខ ទូច ដែល​ធ្វើ​ការងារ​ស៊ើបអង្កេត​លើ​ការ​បោះបង្គោល​ព្រំដែន​ជាមួយ​វៀតណាម​បាន​ទទួល​រង​ការ​គំរាម​សម្លាប់​ជាច្រើន​ដង​ពាក់ព័ន្ធ​នឹង​ការងារ​របស់​លោក​។

លោក សុខលី បាន​ថ្លែង​ថា​លោក សីហា ត្រូវ​បាន​​ចាប់​ខ្លួន​បញ្ជូន​មក​កាន់​រាជធានី​ភ្នំពេញ​បន្ទាប់ពី​ត្រូវ​បាន​ចាប់​ខ្លួន​​នៅ​ថ្ងៃ​ទី​ ៥ ខែ​កញ្ញា ដោយ​នគរបាល​ខេត្ត​បន្ទាយមានជ័យ​ខណៈ​បុរស​រូប​នោះ​កំពុង​ឆ្លង​​ដែន​ពី​ប្រទេស​ថៃ​មក​កម្ពុជា​នៅ​ច្រក​ព្រំដែន​ប៉ោយប៉ែត​។

កាល​ម្សិលមិញ​អ្នក​នាំពាក្យ​គណបក្ស​ប្រឆាំង លោក យឹម សុវណ្ណ បាន​កត់សម្គាល់​ភាព​ខុស​គ្នា​​រវាង​​ការ​ចាប់​ខ្លួន​ភ្លាមៗ​ទៅលើ​លោក ផង់ សីហា ​និង​​ករណី​គំរាម​សម្លាប់​លោក កឹមសុខា អនុប្រធាន​គណបក្ស​សង្គ្រោះ​ជាតិ​កាល​ឆ្នាំ​ ២០១៣ ​ដែល​ករណី​គំរាម​ដូចគ្នា​នេះ​មិន​ទាន់​ត្រូវ​បាន​ដោះស្រាយ​នៅ​ឡើយ​រហូត​មក​ទល់​ពេល​នេះ។

នៅក្នុង​ករណី​នោះ​មាន​មន្រ្តី​នគរបាល​ជាតិ​មួយ​រូប​គឺ​លោក ផែង វណ្ណៈ ត្រូវ​បាន​ហៅ​សាកសួរ​ប៉ុន្តែ​ដូចជា​មិន​មាន​ចាត់​ការ​បន្ត​ទៀត​ទេ។

ទោះបី​ជា​យ៉ាង​ណា​អ្នក​នាំ​ពាក្យ​ក្រសួង​មហាផ្ទៃ​លោក ខៀវ សុភ័គ ​បាន​ថ្លែង​ថា​លោក វណ្ណៈ បាន​ប្រាប់​មន្រ្តី​ថា​គណនី​ហ្វេសប៊ុក​ដែល​ប្រើ​ឈ្មោះ​របស់​គាត់​នោះ​គឺ​ក្លែងក្លាយ​ទេ​។

ខណៈ​ទទួល​ស្គាល់​ការ​យឺតយ៉ាវ​យ៉ាង​យូរ​នៃ​ការ​មិន​ទាន់​ដោះស្រាយ​លើក​រណី​គំរាម​រក​សម្លាប់​លោក កឹម សុខា លោក ខៀវ សុភ័គ បាន​ថ្លែង​ថា​ការ​ស៊ើបអង្កេត​​កំពុង​បន្ត​ធ្វើ​នៅ​ឡើយ៕ PS

អត្ថបទគួរចាប់អារម្មណ៍