The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​ឃ្លាំមើល​ មើល​ពុំ​ឃើញ​ពី​ចំណុច​ខុស​ច្បាប់​នៃ​សមាជ​របស់​សង្គ្រោះជាតិ




អ្នក​ឃ្លាំមើល​ មើល​ពុំ​ឃើញ​ពី​ចំណុច​ខុស​ច្បាប់​នៃ​សមាជ​របស់​សង្គ្រោះជាតិ

Content image - Phnom Penh Post
សមាជ​វិសាមញ្ញ​របស់​គណបក្ស​សង្គ្រោះ​ជាតិ​ដែល​ធ្វើ​ឡើង​កាលពី​ថ្ងៃ​ទី ២ ខែ​មីនា។ ផា លីណា

អ្នក​ឃ្លាំមើល​ មើល​ពុំ​ឃើញ​ពី​ចំណុច​ខុស​ច្បាប់​នៃ​សមាជ​របស់​សង្គ្រោះជាតិ

ភ្នំពេញៈ អ្នក​ឃ្លាំ​មើល​ការ​បោះឆ្នោត និង​អ្នក​វិភាគ​នយោបាយ​មើល​មិន​ឃើញ​ពី​ចំណុច​ខុស​ច្បាប់​នៃ​សមាជ​វិសាមញ្ញ​របស់​គណបក្ស​សង្គ្រោះ​ជាតិ​ដែល​ធ្វើ​ឡើង​កាលពី​ថ្ងៃ​ទី ២ ខែ​មីនា​នោះ​ទេ​នៅ​ពេល​ដែល​​ក្រសួង​មហាផ្ទៃ​អនុញ្ញាត​ឲ្យ​គណបក្ស​ប្រឆាំង​ជួប​ពិភាក្សា​ពី​បញ្ហា​​នេះ​នៅ​ថ្ងៃ​ពុធ​ក្នុង​សប្តាហ៍​នេះ ខណៈ​ដែល​មជ្ឈដ្ឋាន​ជាច្រើន​យល់​ថា​គណបក្ស​ប្រជាជន​កម្ពុជា​កំពុង​តែ​ប្រើ​គ្រប់​វិធី​ដើម្បី​រំលាយ​គណបក្ស​សង្គ្រោះ​ជាតិ​ដែល​ជា​គូ​ប្រកួត​ប្រជែង​ដ៏ស្រួច​ស្រាល់​របស់​ខ្លួន​។

លោក សំ គន្ធាមី នាយក​ប្រតិបត្តិ​​នៃ​អង្គការ​ NIFEC ​ដែល​ជា​អង្គការ​ឃ្លាំ​មើល​​ការ​បោះឆ្នោត​បាន​ថ្លែង​កាលពី​ម្សិលមិញ​ថា​គណបក្ស​សង្គ្រោះ​ជាតិ​អាច​ធ្វើ​វិសោធនកម្ម​លក្ខន្តិកៈ​​របស់​ខ្លួន​​​ឲ្យ​​រួច​​ជា​មុន​ហើយ​ដាក់​ទៅ​ក្រសួង​មហាផ្ទៃ​តាម​ក្រោយ ​ឬ​​ធ្វើ​វិសោធនកម្ម​​លក្ខន្តិកៈ​​នៅ​ពេល​ជាមួយ​គ្នា​​ក្នុង​សមាជ​វិសាមញ្ញ​​នឹង​ការ​អនុម័ត​ការ​​ផ្លាស់ប្តូរ​ដទៃៗ​ទៀត​វា​ក៏​ត្រូវ​ដែរ​ព្រោះ​គ្មាន​ច្បាប់​ណា​ហាមឃាត់​​ទេ​។

ប៉ុន្តែ​លោក​បញ្ជាក់​​ថា​៖ «​​គណបក្ស​សង្គ្រោះជាតិ​គួរ​​​ដាក់​ [​លក្ខន្តិកៈ​​ទៅ​ក្រសួង​មហាផ្ទៃ​] ឲ្យ​បាន​មុន​បន្តិច​។ ​នេះ​ជា​អ្វី​ដែល​ក្រសួង​មហាផ្ទៃ​ចាប់​ថ្នាក់​»។ ប៉ុន្តែ​លោក​​​​​បន្ថែម​ថា​ជាទូទៅ​​គណបក្ស​សង្គ្រោះ​ជាតិ​​ក៏​អាច​ផ្ញើ​​លក្ខន្តិកៈ​​ទៅ​ក្រសួង​មហាផ្ទៃ​បន្ទាប់ពី​សមាជ​វិសាមញ្ញ​​​​​បាន​ដែរ​គឺ​គ្មាន​បញ្ហា​ ឬ​​អាច​ផ្ញើ​​លក្ខន្តិកៈ​​មុន​សមាជ​វិសាមញ្ញ​​ក៏​គ្មាន​បញ្ហា​ដែរ​»។

អ្នក​វិភាគ​នយោបាយ​លោក អ៊ូ វីរៈ ប្រធាន​អង្គការ​វេទិកា​អនាគត​បាន​ថ្លែង​ថា​លោក​ក៏​មិន​បាន​ឃើញ​មាន​ច្បាប់​​ណា​មួយ​ហាម​​សមាជ​របស់​គណបក្ស​ណា​មួយ​​មិន​ឲ្យ​ធ្វើ​​វិសោធនកម្ម​​​លក្ខន្តិកៈ​​ ឬ​អនុម័ត​​​ការ​ផ្លាស់ប្តូរ​ដទៃៗ​ទៀត​​ក្នុង​ពេល​ជាមួយ​​គ្នា​នោះ​ដែរ។

លោក​បញ្ជាក់​​ថា​ប្រទេស​ប្រជាធិបតេយ្យ​ប្រសិន​បើ​មិន​មាន​ច្បាប់​ណា​ហាម​ទេ គណបក្ស​​សង្គ្រោះ​ជាតិ​​អាច​ធ្វើ​សមាជ​​វិសាមញ្ញ​​ដើម្បី​អនុម័ត​​ការ​ផ្លាស់ប្តូរ​ដទៃៗ​ទៀត​បាន​​។ ​

លោក​ អ៊ូ វីរៈ ​បញ្ជាក់​ថា​៖ «​​ប្រសិន​​បើ​ច្បាប់​មិន​ហាមឃាត់​ [យើង​] អាច​ធ្វើ...លុះត្រា​តែ​ច្បាប់​ហាមឃាត់​»។

លោក ប្រាក់ សំអឿន អគ្គនាយក​នៃ​អគ្គនាយកដ្ឋាន​​រដ្ឋបាល​ក្រសួង​មហាផ្ទៃ​ ​​និង​សហការី​ពីរ​នាក់​ទៀត​របស់​លោក​ត្រូវ​បាន​ចាត់​តាំង​​ឲ្យ​ជួប​ជាមួយ​​គណបក្ស​សង្គ្រោះ​ជាតិ​​នៅ​ថ្ងៃ​​ពុធ​ក្នុង​សប្តាហ៍​នេះ​ដើម្បី​​​ជជែក​ពិភាក្សា​​អំពី​សមាជ​វិសាមញ្ញ​​របស់​គណបក្ស​ប្រឆាំង​ដែល​​បាន​ប្រារព្ធ​ធ្វើ​ឡើង​កាលពី​ថ្ងៃ​ទី​ ២ មីនា ​ដើម្បី​ជ្រើសរើស​​លោក កឹម សុខា ឲ្យ​ធ្វើ​ជា​ប្រធាន​គណបក្ស​នេះ​ ​និង​ជ្រើសរើស​​អនុប្រធាន​បី​រូប​ទៀត​គឺ​​លោក ប៉ុល ហំម លោកស្រី មូរ សុខហួរ ​និង​លោក អេង ឆៃអ៊ាង បន្ទាប់ពី​លោក សម រង្ស៊ី បាន​លាលែង។ ប៉ុន្តែ​ក្រសួង​​មហាផ្ទៃ​​បាន​ចាត់​ទុក​សមាជ​វិសាមញ្ញ​នេះ​ថា​ជា​សមាជ​ខុស​ច្បាប់​​ដែល​ផ្ទុយ​នឹង​លក្ខន្តិកៈ​​របស់​គណបក្ស​​​ដែល​ដាក់​តម្កល់​នៅ​ក្រសួង​មហាផ្ទៃ​ក្នុង​ឆ្នាំ​ ២០១៣​។

លោក ប្រាក់ សំអឿន ​បាន​បញ្ជាក់​ថា​លោក​នឹង​ដឹក​នាំ​សហការី​ពីរ​រូប​​ទៀត​ដើម្បី​ជួប​ជាមួយ​​គណបក្ស​សង្គ្រោះ​ជាតិ​​ជជែក​ពិភាក្សា​​អំពី​​​​សមាជ​​​​របស់​គណបក្ស​សង្គ្រោះ​ជាតិ​។

លោក​​​ថ្លែង​ថា ក្រុម​របស់​លោក​តំណាង​ឲ្យ​ក្រសួង​​មហាផ្ទៃ​​ជួប​ជាមួយ​គណបក្ស​សង្គ្រោះ​ជាតិ​គឺ​គ្រាន់​តែ​ដើម្បី​ជជែក​ពាក់ព័ន្ធ​នឹង​បច្ចេកទេស​ដូច្នេះ​​លោក​មិន​អាច​និយាយ​បាន​​ថា ​តើ​​កិច្ចប្រជុំ​នេះ​នឹង​មាន​​លទ្ធផល​ល្អ​ឬ​អត់​នោះ​ទេ​។

ប៉ុន្តែ​លោក ប្រាក់ សំអឿន មិន​បាន​ថ្លែង​បញ្ជាក់​ច្បាស់​អំពី​​ចំណុច​ខុស​​នៃ​សមាជ​​វិសាមញ្ញ​​របស់​គណបក្ស​​សង្គ្រោះជាតិ​នោះ​ទេ​ដោយ​គ្រាន់​តែ​​​​បង្ហើប​ថា​គណបក្ស​សង្គ្រោះ​ជាតិ​​មាន​​ចំណុច​​ខុស​នៅ​ក្នុង​សមាជ​របស់​ខ្លួន​គឺ​ថា​គណបក្ស​នេះ​មិន​បាន​ដាក់​លក្ខន្តិកៈ​ថ្មី​​ដែល​ធ្វើ​វិសោធនកម្ម​​នោះ​ទៅ​​ក្រសួង​មហាផ្ទៃ​ឲ្យ​បាន​មុន​ថ្ងៃ​ធ្វើ​សមាជ​​វិសាមញ្ញ​ប៉ុន្តែ គណបក្ស​សង្គ្រោះជាតិ​បាន​ដាក់​លក្ខន្តិកៈ​​​ និង​លទ្ធផល​​នៃ​សមាជ​វិសាមញ្ញ​​ទៅ​ក្រសួង​មហាផ្ទៃ​​នៅ​ពេល​តែ​មួយ​បន្ទាប់ពី​​សមាជ​វិសាមញ្ញ​​​ដោយ​​មាន​ចំណុច​អនុម័ត​បី​នៅក្នុង​សមាជ​​​​ដូចជា​វិសោធនកម្ម​លក្ខន្តិកៈ​ការ​ជ្រើសរើស​​មេដឹកនាំ​​គណបក្ស​ និង​កម្មវិធី​នយោបាយ​​របស់​បក្ស។

លោក សំអឿន ​​បាន​បន្ត​ថា​៖ «​​មាត្រា​ ២៦​ គណបក្ស​នយោបាយ​ដែល​បាន​ចុះ​បញ្ជី​រួច​ហើយ​​អាច​​ប្តូរ​ឈ្មោះ​ឡូហ្គោ​ទីស្នាក់ការ​កម្មវិធី​នយោបាយ​ ឬ​​វិសោធនកម្ម​លក្ខន្តិកៈ​​​ទៅ​តាម​លក្ខន្តិកៈ​របស់​ខ្លួន​។ ​ក្នុង​ករណី​នេះ​គណបក្ស​នយោបាយ​ត្រូវ​ជម្រាប​​ជា​លាយលក្ខណ៍​អក្សរ​​ទៅ​ក្រសួង​មហាផ្ទៃ​​ដោយ​ភ្ជាប់​​​នូវ​ឯកសារ​ថ្មី​​ដែល​បាន​​ផ្លាស់ប្តូរ​​រួច​ហើយ​​»​។

ប៉ុន្តែ​នៅ​ពេល​ភ្នំពេញ​ប៉ុស្តិ៍​​លើក​នូវ​​សំណួរ​ថា​តើ​​វា​ខុស​ច្បាប់​ឬ​អត់​​សម្រាប់​​គណបក្ស​សង្គ្រោះ​ជាតិ​​ដែល​បាន​​ផ្ញើ​រួច​ហើយ​នូវ​រាល់​ឯកសារ​ពាក់ព័ន្ធ​​ទៅ​ក្រសួង​មហាផ្ទៃ​​ បន្ទាប់ពី​ការ​ធ្វើ​សមាជ​វិសាមញ្ញ​លោក សំអឿន មិន​បាន​ថ្លែង​លម្អិត​​​ទេ​ដោយ​ទុក​ឲ្យ​​អ្នក​កាសែត​វិភាគ​។

អ្នក​នាំពាក្យ​ និង​មេដឹកនាំ​គណបក្ស​សង្គ្រោះ​ជាតិ​មិន​អាច​ទាក់ទង​សុំ​អត្ថាធិប្បាយ​​បាន​​​ទេ​កាលពី​ម្សិលមិញ​ប៉ុន្តែ​​​លោក អេង ឆៃអ៊ាង ត្រូវ​បាន​វិទ្យុ​អាស៊ី​សេរី​ស្រង់​សម្តី​យក​ទៅ​ចុះ​ផ្សាយ​កាលពី​ថ្ងៃ​សុក្រ​ថា គណបក្ស​សង្គ្រោះ​ជាតិ​មិន​បាន​ស្នើសុំ​ឲ្យ​ក្រសួង​មហាផ្ទៃ​ផ្តល់​សុពលភាព​ដល់​គណបក្ស​នោះ​ទេ​ពីព្រោះ​ក្រសួង​មហាផ្ទៃ​បាន​ផ្តល់​សុពលភាព​ដល់​គណបក្ស​សង្គ្រោះ​ជាតិ​រួច​ហើយ​កាលពី​មុន​ការ​បោះឆ្នោត​ឆ្នាំ ២០១៣​៕ PS

អត្ថបទគួរចាប់អារម្មណ៍