ភ្នំពេញៈ អ្នកចូលរួមក្នុងវេទិកាថ្នាក់តំបន់នៃគណៈកម្មការទន្លេមេគង្គប្រមាណ ២០០ នាក់ បានស្នើសុំឱ្យរដ្ឋាភិបាលឡាវ និងក្រុមហ៊ុនអភិវឌ្ឍន៍គម្រោងទំនប់វារីអគ្គិសនី Sanakham ធ្វើការវាយតម្លៃឱ្យបានទូលំទូលាយអំពីគម្រោងអភិវឌ្ឍន៍នេះ និងដាក់ចេញវិធានការបន្ថែមទៀត ដើម្បីកាត់បន្ថយផលប៉ះពាល់អវិជ្ជមានចម្បងៗនៃទំនប់ Sanakham ដែលគេរំពឹងថា នឹងបង្កើតថាមពល ៦៨៤ មេហ្គាវ៉ាត់។
វេទិកាថ្នាក់តំបន់នេះរៀបចំឡើងដោយគណៈកម្មការទនេ្លមេគង្គកាលពីថ្ងៃទី ២៤ ខែវិច្ឆិកា ដែលធ្វើឡើងនៅទីក្រុងប៉ាក់សេ ទីក្រុងសៀមរាប ទីក្រុងបាងកក និងទីក្រុងហាណូយ តាមអនឡាញ។ ក្រុមអ្នកចូលរួមប្រមាណ ២០០ នាក់ បានបង្ហាញពីក្ដីបារម្ភអំពីគម្រោងនេះ និងស្នើថា គម្រោងនេះគួរតែមានការពិភាក្សាគ្នាជាមុនដើម្បីយល់ដឹងពីសារៈសំខាន់ និងធានាបានថា ផលប៉ះពាល់អវិជ្ជមានត្រូវបានដោះស្រាយ។ នេះបើយោងតាមសេចក្ដីប្រកាសព័ត៌មានរបស់គណៈកម្មការទន្លេមេគង្គ។
បើតាមគណៈកម្មការទន្លេមេគង្គតំបន់ Sanakham ត្រូវគេប៉ាន់ប្រមាណថា មានតម្លៃជាង ២ ពាន់លានដុល្លារ ហើយវាជាគម្រោងទី៦ ដែលនឹងត្រូវដាក់ស្នើសុំទៅគណៈកម្មការទនេ្លមេគង្គក្នុងដំណើរការពិភាក្សាពិគ្រោះយោបល់។ ទំនប់នេះស្ថិតនៅចន្លោះខេត្ត Xayaburi និងខេត្តវៀងច័ន្ទន៍នៃប្រទេសឡាវ ប្រមាណ ១៥៥ គីឡូម៉ែត្រពីទីក្រុងវៀងច័ន្ទន៍ និងប្រមាណ ២ គីឡូម៉ែត្រពីតំបន់ផ្ទៃទឹកទន្លេមេគង្គនៅព្រំដែនថៃ និងឡាវក្នុងខេត្ត Loei ប្រទេសថៃ។
ក្រុមអ្នកចូលរួមក្នុងវេទិកានិយាយថា រដ្ឋាភិបាលឡាវ និងក្រុមហ៊ុនអភិវឌ្ឍន៍ឈ្មោះ Datang (Lao) Sanakham Hydropower Co. Ltd គួរតែពង្រីកការធ្វើការវាយតម្លៃពីផលប៉ះពាល់ទៅលើផ្នែកបរិស្ថាន និងសង្គមបន្ថែមទៀត។ ពួកគេក៏គួរតែបង្ហាញនូវទិដ្ឋភាពរួមនៃផលប៉ះពាល់ដែលអាចកើតមានពីទំនប់ផ្សេងទៀតផងដែរ។
គណៈកម្មការទន្លេមេគង្គថ្លែងថា៖ «ពួកគេ (អ្នកចូលរួមវេទិកា) អះអាងថា វិធានការបន្ថយផលប៉ះពាល់ដែលក្រុមហ៊ុនអភិវឌ្ឍន៍បានស្នើឡើងនោះមិនទាន់គ្រប់គ្រាន់ទេ ហើយពួកគេបានស្នើថា វិធានការបន្ថែមដែលរួមមានយន្តការផ្ដល់សំណងដើម្បីឆ្លើយតបនឹងការប្រែប្រួលជីវភាព គួរតែត្រូវបានផ្ដល់ឱ្យអ្នករងគ្រោះដោយប្រើប្រាស់ទិន្នន័យបច្ចុប្បន្នភាព និងការសិក្សាថ្មីៗបំផុត»។
គ្រោះរាំងស្ងួតនៅឆ្នាំ ២០១៩ និងឆ្នាំ ២០២០ បានពង្រីករយៈពេលនៃរដូវប្រាំង ហើយប៉ះពាល់ដល់លំហូរបញ្ច្រាស់នៃទឹកទន្លេសាបរបស់ប្រទេសកម្ពុជា និងប៉ះពាល់ដល់ផលិតផលត្រី។ ក្រុមអ្នកចូលរួមក្នុងវេទិកាស្នើឱ្យប្រទេសសមាជិកគណៈកម្មការទន្លេមេគង្គបញ្ចេញទឹកពីកន្លែងស្តុកទុកសម្រាប់បង្កើតថាមពលវារីអគ្គិសនីចូលទៅដៃទន្លេនានានៅឆ្នាំខាងមុខ។ ការបញ្ចេញទឹកនេះនឹងធ្វើឱ្យមានលំហូរកាកសំណល់ជួយដល់ការបំផ្លាស់ទីរបស់ត្រីនៅផ្ទៃទឹកខាងក្រោម និងរក្សាបាននូវលំនឹងអេកូឡូស៊ីនៅតំបន់ខាងក្រោម។ នេះបើតាមគណៈកម្មការទន្លេមេគង្គ។
លោក អាន ពេជ្រហត្ថដា មន្ត្រីទទួលបន្ទុក និងនាយកផ្នែកផែនការរបស់គណៈកម្មការទន្លេមេគង្គបានថ្លែងថា៖ «វិធានការរឹងមាំសម្រាប់កាត់បន្ថយផលប៉ះពាល់ពីគម្រោង Sanakham គឺជារឿងដែលកាន់តែចាំបាច់»។
លោកថា សកម្មភាពសាងសង់ និងផលប៉ះពាល់នានាដែលជាធម្មតាមាននៅតែក្នុងស្រុកនោះអាចមានផលប៉ះពាល់ដល់តំបន់ឆ្លងព្រំដែន។
លោកថ្លែងថា ប្រទេសសមាជិកគណៈកម្មការទន្លេមេគង្គកាលពីពេលថ្មីៗនេះ បានស្វែងរកនូវយន្តការប្រមូលមូលនិធិក្នុងតំបន់ ដើម្បីគម្រោងគាំទ្រដល់ជីវភាព និងការស្ដារប្រព័ន្ធអេកូឡូស៊ីនៅក្នុងអាងទន្លេមេគង្គក្រោម។
លោកស្រី Bounkham Vorachit អនុរដ្ឋមន្ត្រីក្រសួងធនធានធម្មជាតិ និងបរិស្ថាននៃប្រទេសឡាវ និយាយក្នុងពេលបើកវេទិកាកាលពីថ្ងៃទី ២៤ វិច្ឆិកា ថា រដ្ឋាភិបាលរបស់លោកស្រីស្វាគមន៍មតិយោបល់ និងសំណើទាំងនេះ។
លោកស្រីថ្លែងដូច្នេះថា៖ «យើងខិតខំដើម្បីធានាថាបញ្ហាធ្ងន់ធ្ងរនានាត្រូវបានដោះស្រាយមុនពេលយើងបន្តគម្រោងទៅមុខទៀត»៕