.jpg)
លោក កឹម សុខា និងម្តាយរបស់លោកនៅក្នុងផ្ទះក្នុងខណ្ឌទួលគោក។ រូបថត ហ្វេសប៊ុក Chantha Muth
ភ្នំពេញៈ ក្រុមអ្នកច្បាប់យល់ឃើញខុសគ្នាអំពីរយៈពេលដែលលោក កឹម សុខា ត្រូវស្ថិតក្នុងការឃុំខ្លួននៅក្នុងផ្ទះរបស់លោក ខណៈដែលសភាអឺរ៉ុបមិនទាន់ឈានដល់ដំណាក់កាលបន្ទាប់ក្រោយពេលអនុម័តញត្តិរួមមួយកាលពីសប្តាហ៍មុនដែលទាមទារឲ្យទម្លាក់ចោលបទចោទទាំងស្រុងលើលោក កឹម សុខា។
គិតមកដល់ពេលនេះលោក កឹម សុខា ត្រូវចាប់ឃុំខ្លួនជាង ១ ឆ្នាំហើយរាប់ចាប់ពីថ្ងៃទី ៣ ខែកញ្ញា ឆ្នាំ ២០១៧ ដោយលោកត្រូវបានចោទប្រកាន់ពីបទឧក្រិដ្ឋ «សន្ទិដ្ឋិភាពជាមួយបរទេស» ជាបទចោទដែលបណ្តាប្រទេសលោកសេរីចាត់ទុកថាជារឿងនយោបាយ។
ក្រុមអ្នកច្បាប់បានពន្យល់ថា ករណីបទឧក្រិដ្ឋបែបនេះការឃុំខ្លួនបណ្ដោះអាសន្ន ដើម្បីស៊ើបអង្កេតមិនត្រូវលើសពីរយៈពេល ១៨ ខែទេដោយចៅក្រមត្រូវបិទការស៊ើបអង្កេតក្នុងរយៈពេលនេះ និងបញ្ជូនរឿងទៅស៊ើបសួរ ឬក៏ត្រូវទម្លាក់បទចោទ។
ក៏ប៉ុន្តែមុនការឃុំខ្លួនបណ្ដោះអាសន្នគ្រប់កាលកំណត់ ចៅក្រមស៊ើបសួរបានសម្រេចដោះលែងលោកឲ្យនៅក្រៅឃុំបណ្ដោះអាសន្នដោយភ្ជាប់មកជាមួយនូវលក្ខខណ្ឌតឹងរ៉ឹងរហូតដល់មេធាវីយល់ថាជាការឃុំខ្លួនក្នុងផ្ទះ។ លោកចៅក្រម គី ឫទ្ធី បានកំណត់ថា៖ «ក្រៅពីលំនៅឋានដែលមានទីតាំងស្ថិតនៅលើផ្លូវលេខ ៣១៣ មិនត្រូវចេញពីព្រំប្រទល់នៃដែនដីដែលខណ្ឌដោយផ្លូវលេខ ៣១៣ ផ្លូវ ៣១១ និងផ្លូវ ៦០៨»។
អ្នកជំនាញផ្នែកច្បាប់លោកមេធាវី សុក សំអឿន យល់ថាការសម្រេចឲ្យនៅក្នុងដែនកំណត់ក្នុងផ្ទះបែបនេះគឺជាការឃុំខ្លួនក្នុងផ្ទះ ហើយតាមនីតិវិធីការឃុំខ្លួនមិនត្រូវលើសពី ១៨ ខែទេ។
លោកបានថ្លែងថា៖ «បើក្នុងករណីអ៊ីចឹងដូចតែការឃុំខ្លួនដដែល ដូច្នេះរយៈពេលតុលាការត្រូវកំណត់ដូចការឃុំខ្លួនដែរហ្នឹង គឺ ១៨ ខែដដែល»។
លោកស្រី ម៉េង សុភារី មេធាវី ១ រូបដែលការពារក្តីឲ្យលោក កឹម សុខា ក៏យល់ឃើញថាការដាក់លក្ខខណ្ឌតឹងរ៉ឹងលើលោក កឹម សុខា ស្មើនឹងការដាក់ឃុំខ្លួនក្នុងផ្ទះដែរដោយលោកស្រីបានថ្លែងថា៖ «ក្នុងដីកាសម្រេចរបស់ចៅក្រមស៊ើបសួរគឺដោះលែងគាត់ឲ្យនៅក្រៅឃុំ ប៉ុន្តែដាក់គាត់ឲ្យនៅក្រោមការត្រួតពិនិត្យតាមផ្លូវតុលាការដោយភ្ជាប់កាតព្វកិច្ចមួយចំនួន ហើយកាតព្វកិច្ចនោះទៀតសោត យើងឃើញវាហាក់បីដូចជាតឹងរ៉ឹងខ្លាំង។ អ៊ីចឹងនៅក្នុងច្បាប់របស់យើងគឺអត់មានចែងអំពីការឃុំខ្លួនទេ ប៉ុន្តែដោយសារតែកាតព្វកិច្ចដែលតុលាការបានកំណត់មកតឹងតែងខ្លាំងដូចជាការកំណត់ព្រំដែននៃការដើរហើររបស់គាត់ហ្នឹងវារួមតូចពេកទៅ អ៊ីចឹងវាហាក់បីដូចមិនខុសអីពីការឃុំខ្លួននៅក្នុងផ្ទះដែរ»។
លោកស្រីនិយាយថាការបាននៅក្រៅឃុំនេះមានចំណុចល្អតិចតួចគឺលោក កឹម សុខា គ្រាន់តែត្រូវបានផ្ទេរពីការឃុំក្នុងពន្ធនាគារមកផ្ទះ ហើយលោកបានជួបជុំភរិយា និងម្តាយ និងមេធាវីប៉ុណ្ណោះ។
ក៏ប៉ុន្តែលោកមេធាវី ចាន់ ចេន ដែលការពារក្តីលោក កឹម សុខា ម្នាក់ទៀតបានយោងទៅលើភាសាច្បាប់ដោយលោកនិយាយថា កូនក្តីរបស់លោកមិនមែនកំពុងស្ថិតនៅក្នុងការឃុំខ្លួននៅក្នុងផ្ទះទេគឺនៅក្រៅឃុំបណ្ដោះអាសន្នក្រោមការត្រួតពិនិត្យតាមផ្លូវតុលាការ និងមានលក្ខខណ្ឌ។
លោកនិយាយថា៖ «បើយើងពិនិត្យមើលលើដីកាសម្រេចហ្នឹងមិនមែនជាដីកាសម្រេចឃុំខ្លួនក្នុងផ្ទះទេ គឺជាដីកាសម្រេចឲ្យនៅក្រៅឃុំបណ្ដោះអាសន្ន ប៉ុន្តែស្ថិតក្រោមការត្រួតពិនិត្យដោយភ្ជាប់លក្ខខណ្ឌមួយចំនួន។ អ៊ីចឹងអាហ្នឹងគេមិនហៅថាការឃុំខ្លួនក្នុងផ្ទះទេ»។
ក្នុងករណីដូច្នេះលោក សុក សំអឿន យល់ថាមេធាវីការពារក្តីគួរតែតវ៉ាសុំសិទ្ធិសម្រាប់លោក កឹម សុខា នៅពេលកំណត់ ១៨ ខែមកដល់ដើម្បីកុំឲ្យលោក សុខា ស្ថិតនៅក្រោមលក្ខខណ្ឌតឹងរ៉ឹងបែបនេះ។
លោកនិយាយថា៖ «ច្បាប់សរសេរអត់ច្បាស់ដែរ ប៉ុន្តែមេធាវីអាចបកស្រាយថា អាហ្នឹងជាការឃុំខ្លួនមិនអ៊ីចឹង? គ្រាន់តែឃុំខ្លួនមិននៅក្នុងពន្ធនាគារមកនៅក្នុងផ្ទះ ហើយដូច្នេះយើងយោងតាមគោលការណ៍ហ្នឹងទៅលើស ១៨ ខែ តវ៉ាសុំសិទ្ធិធំជាងហ្នឹង។ ក្រោយ ១៨ ខែ យើងសុំទៅថាអ្នកឯងអស់សិទ្ធិកំណត់ទៀតហើយព្រោះរយៈពេលកំណត់តាមច្បាប់អស់ហើយ»។
លោកស្រី ម៉េង សុភារី បានស្នើថាតុលាការគួរតែបញ្ចប់ការស៊ើបអង្កេតលើករណីកូនក្តីលោកស្រី ហើយទម្លាក់បទចោទពីកូនក្តី និងដោះលែងឲ្យមានសេរីភាព។
លោកបណ្ឌិត ឡៅ ម៉ុងហៃ អ្នកវិភាគនយោបាយបាយយល់ថាគ្មានដែនកំណត់អំពីការស៊ើបអង្កេតលើករណីលោក កឹម សុខា ទេ ដោយដីកាតុលាការចែងថាលោកត្រូវបានដោះលែងឲ្យនៅក្រៅឃុំហើយ។
លោកនិយាយថា៖ «លោក កឹម សុខា គឺច្បាស់ណាស់នឹងបន្តនៅក្នុងការឃុំខ្លួននៅក្នុងផ្ទះដោយគ្មានការជម្រះទោស។ ភាពស្មុគស្មាញនៃសំណុំរឿងដែលមានពាក់ព័ន្ធនឹងបរទេស និងទាមទារឲ្យមានការស៊ើបអង្កេតរយៈពេលវែង ដែលអាចយកមកអះអាងដើម្បីការពន្យារដែលគ្មានដែនកំណត់នៃការឃុំក្នុងផ្ទះ ហើយគេចពីសិទ្ធិក្នុងការទទួលបានការជំនុំជម្រះដោយគ្មានការពន្យារពេលដែលសិទ្ធិក្នុងការទទួលបានការជំនុំជម្រះនេះមានចែងក្នុងមាត្រា ១៤.៣ នៃកតិការសញ្ញាអន្តរជាតិស្តីពីសិទ្ធិស៊ីវិល និងសិទ្ធិនយោបាយ ដែលកម្ពុជាទទួលស្គាល់»។
ពាក់ព័ន្ធនឹងករណីលោក កឹម សុខា នេះដែរសភាអឺរ៉ុបមិនទាន់មានវិធានការបន្ទាប់ទេ ក្រោយពេលបានអនុម័តលើញត្តិរួមមួយកាលពីថ្ងៃទី ១៣ ខែកញ្ញា ដោយទាមទារឲ្យទម្លាក់ចោលបទចោទពីលោក កឹម សុខា និងលក្ខខណ្ឌជាច្រើនទៀត។
លោក Viktor Almqvist អគ្គនាយកផ្នែកព័ត៌មានរបស់សភាអឺរ៉ុបបានថ្លែងប្រាប់ភ្នំពេញ-ប៉ុស្តិ៍តាមសារអេឡិចត្រូនិកកាលពីម្សិលមិញថា ញត្តិដែលបានសម្រេចនោះមិនមែនជាការតម្រូវនោះទេ ប៉ុន្តែគឺជាការស្នើលើកដំបូងឲ្យមានការចាត់វិធានការ។
លោកថ្លែងថា៖ «ឥឡូវនេះវាអាស្រ័យលើភាគីពាក់ព័ន្ធ ឧទាហរណ៍ ដូចជាគណៈកម្មការអឺរ៉ុបក្នុងការវាយតម្លៃភាពចាំបាច់នៃជំហានបន្ទាប់។ ញត្តិនេះមិនមានពេលវេលាកំណត់ជាក់លាក់ទេដែលមានន័យថា វាគឺជាការបន្តការអំពាវនាវពីសំណាក់សភាអឺរ៉ុបរហូតដល់មានញត្តិថ្មីមួយទៀត ត្រូវបានអនុម័ត»៕
