កំពង់ចាមៈ ក្រសួងសុខាភិបាលបានប្រកាសនៅថ្ងៃម្សិលមិញថា អ្នកដំណើរទាំងអស់ចំនួន ៦៤ នាក់នៅលើនាវាទេសចរណ៍ Viking Cruise Journey គឺមានចំនួនកើនឡើងរហូតដល់ ៣ នាក់ហើយដែលត្រូវបានធ្វើតេស្ដវិជ្ជមានជាមួយវីរុសកូវីដ ១៩ ខណៈចំនួន ៦១ ទៀតបន្តដាក់ឱ្យនៅដាច់ដោយឡែកដើម្បីតាមដានសុខភាព។
សេចក្ដីជូនដំណឹងរបស់ក្រសួងសុខាភិបាលកាលពីថ្ងៃម្សិលមិញបញ្ជាក់ថា ប្ដីប្រពន្ធជនជាតិអង់គ្លេសចំនួន ២ នាក់ដែលប្ដីមានអាយុ ៧៣ ឆ្នាំ និងប្រពន្ធអាយុ ៦៩ ឆ្នាំត្រូវបានរកឃើញវិជ្ជមាន កូវីដ ១៩ កាលពីយប់ថ្ងៃទី ១១ ខែមីនា នៅក្នុងចំណោមអ្នកដំណើរចំនួន ៥៩ នាក់ដែលត្រូវបានយកសំណាកមកធ្វើតេស្ដនៅវិទ្យាស្ថានប៉ាស្ទ័រកម្ពុជា។
ប្ដីប្រពន្ធ ១ គូនេះកំពុងត្រូវបានដាក់ឱ្យនៅដាច់ដោយឡែកដើម្បីព្យាបាលនៅមន្ទីរពេទ្យខេត្តកំពង់ចាម ខណៈស្ដ្រីជនជាតិអង់គ្លេសដំបូងគេនៅក្នុងនាវាទេសចរណ៍ Viking Cruise Journey ដែលអាយុ ៦៥ ឆ្នាំត្រូវបានតេស្ដវិជ្ជមានកាលពីថ្ងៃទី ១០ មីនាត្រូវបានគេបញ្ជូនមកសម្រាកព្យាបាលនៅរាជធានីភ្នំពេញ តាមការស្នើសុំរបស់ស្ថានទូតអង់គ្លេស។
សេចក្ដីជូនដំណឹងនេះបានសរសេរថា៖ «ជាសរុបអ្នកដំណើរជនជាតិអង់គ្លេស វិជ្ជមានវីរុសកូវីដ ១៩ គឺចំនួន ៣ នាក់ក្នុងចំណោមអ្នកដំណើរ និងអ្នកបម្រើការនៅលើនាវាទាំងអស់ចំនួន ៦៤ នាក់»។
នាវាទេសចរណ៍ Viking Cruise Journey ដែលបានធ្វើដំណើរចេញពីទីក្រុងហូជីមិញកាលពីថ្ងៃទី ៥ ខែមីនា និងមកដល់ទីក្រុងភ្នំពេញនៅថ្ងៃទី ៧ មីនា និងបន្តដំណើរទៅកាន់ទីក្រុងកំពង់ចាមនៅថ្ងៃទី ១០ មីនាគឺមានអ្នកដំណើរ ៣៤ នាក់ និងអ្នកបម្រើការ ៣៤ នាក់ និងមានចំនួន ៧ សញ្ជាតិ រួមមាន អាមេរិកាំង ១៤ នាក់ចក្រភពអង់គ្លេស ១១ នាក់កាណាដា ៤ នាក់ ហូឡង់ ១ នាក់ ភូមា ១ នាក់ វៀតណាម ៧ នាក់ និងកម្ពុជាចំនួន ២៤ នាក់។
ក្រសួងសុខាភិបាលបន្តស្រាវជ្រាវអ្នកដែលប៉ះពាល់ផ្ទាល់ និងប្រយោលជាមួយអ្នកដំណើរលើនាវានេះបន្ថែមទៀតទាំងនៅរាជធានីភ្នំពេញ និងទីក្រុងកំពង់ចាម បន្ទាប់ពីបានរកឃើញស្ដ្រីជាអ្នកបកប្រែម្នាក់រួមទាំងកូន និងបុរសបើករ៉ឺម៉កម៉ូតូចំនួន ២ នាក់។ ប៉ុន្តែអ្នកប៉ះពាល់ទាំងនោះបានធ្វើតេស្ដអវិជ្ជមាន និងបានអនុញ្ញាតឱ្យត្រឡប់ទៅផ្ទះដោយត្រូវស្ថិតក្រោមការតាមដានសុខភាពផ្ទាល់ខ្លួនរយៈពេល ១៤ ថ្ងៃ។ គិតចាប់តាំងពីខែកុម្ភៈមកកម្ពុជាបានរកឃើញអ្នកឆ្លងវីរុសកូវីដ ១៩ មានចំនួន ៥ នាក់គឺជនជាតិចិនម្នាក់នៅខេត្តព្រះសីហនុ និងបុរសជនជាតិខ្មែរម្នាក់នៅក្រុងសៀមរាប។
កាលពីថ្ងៃម្សិលមិញ ភ្នំពេញ-ប៉ុស្ដិ៍មិនទាន់ទទួលបានការឆ្លើយតបពីលោកស្រី ឱ វណ្ណឌីន មន្ត្រីនាំពាក្យក្រសួងសុខាភិបាលនៅឡើយទេ៕