The Phnom Penh Post Search

Search form




Logo of Phnom Penh Post newspaper Phnom Penh Post - អ្នកឆ្លង​​អេដស៍​នៅ​ឃុំ​រកា​​សុខភាព​ធ្លាក់​ដុន​ដាប

អ្នកឆ្លង​​អេដស៍​នៅ​ឃុំ​រកា​​សុខភាព​ធ្លាក់​ដុន​ដាប

ស្ត្រី​អ្នក​ភូមិ​ ក្នុង​ឃុំ​រកា​ អង្គុយ​រង់​ចាំ​លទ្ធផល​ពិនិត្យ​រក​មេរោគ​អេដស៍​ កាល​ពី​អំឡុង​ខែ​ធ្នូ​។ រូបថត ហេង ជីវ័ន
ស្ត្រី​អ្នក​ភូមិ​ ក្នុង​ឃុំ​រកា​ អង្គុយ​រង់​ចាំ​លទ្ធផល​ពិនិត្យ​រក​មេរោគ​អេដស៍​ កាល​ពី​អំឡុង​ខែ​ធ្នូ​។ ហេង ជីវ័ន

អ្នកឆ្លង​​អេដស៍​នៅ​ឃុំ​រកា​​សុខភាព​ធ្លាក់​ដុន​ដាប

បាត់ដំបងៈ យោង​តាម​អ្នក​ជំនាញ​សុខាភិបាល បាន​ឲ្យ​ដឹង​ថា ខណៈដែល​ការ​ឆ្លង​មេរោគ​អេដស៍ ដល់​ប្រជាជន​​ច្រើន​នាក់​នៅ​ក្នុង​ឃុំរកា​បន្ត​កើន​ឡើង​ មនុស្ស​ជា​ច្រើន​នាក់​ដែល​ឆ្លង​មេរោគ​នេះ កំពុង​មាន​សុខ​ភាព​ធ្លាក់​ដុន​ដាប​​យ៉ាង​ឆាប់​រហ័ស ​ចាប់​តាំង​ពី​គេ​រក​ឃើញ​មាន​ការ​ឆ្លង​មេរោគ​នេះ​ដំបូង នៅ​ដើម​ខែ​ធ្នូ។

លោក​វេជ្ជ​បណ្ឌិត លី ពេញ​ស៊ុន អនុប្រធាន NCHADS បានថ្លែង​ថា៖ «ស្ថានភាព​នេះ​កំពុង​តែ​ដុន​ដាប​ជាង​មុន។ មាន​អ្នក​ជំងឺ​មួយ​ចំនួន​ដែល​ពិតជា​មាន​ប្រព័ន្ធ​ស៊ាំ​ចុះ​ខ្សោយ ហើយ​កាន់​តែ​ងាយ​រង​នឹង​ជំងឺ»។

ដោយសារ​តែ​មួយ​ភាគ ស្ថាន​ភាព​សុខ​ភាព​របស់​អ្នក​ភូមិ​កាន់​តែ​យ៉ាប់​យ៉ឺន និង​មាន​ចំនួន​ឆ្លង​ជំងឺ​ផ្សេង​ទៀត WHO និង NCHADS ជឿជាក់​ថា ការឆ្លង​ជំងឺ​នេះ ​ដោយសារ​តែ​ការ​ចាក់​ថ្នាំ​ដោយ​គ្រូ​ពេទ្យ​ដែល​គ្មាន​អាជ្ញា​ប័ណ្ណ បាន​ចាប់​ផ្តើម​យូរ​មុន​ពេល​រក​ឃើញ​ទៅ​ទៀត។

លោក វេជ្ជ​បណ្ឌិត Masami Fujita មេ​ដឹក​នាំ​ក្រុម​ការ​ងារ​អង្គការ​សុខ​ភាព​ពិភព​លោក ផ្នែក​មេរោគ​អេដស៍ បាន​ថ្លែង​ថា៖ «ដោយ​សារ​ប្រព័ន្ធ​ស៊ាំ​មាន​កម្រិត​ផ្សេងៗ ក្នុង​ចំណោម​អ្នក​ផ្ទុក​មេរោគ​អេដស៍​អ្វី​ដែល​យើង​ទទួល​បាន​គឺ​ថា ការ​ឆ្លង​មេរោគ​នេះ​បាន​រីក​រាល​ដាល តាំង​ពី​មុន​​ដើម​ខែធ្នូ​ទៅ​ទៀត»។

បច្ចុប្បន្ន​នេះ អង្គការ​សុខភាព​ពិភព​លោក​ បាន​ធ្វើ​ការ​ពិនិត្យ​កាន់​តែ​ទំនើប​បន្ថែម​ទៀត ដើម្បី​កំណត់​​នូវ​ពេល​វេលា​ដែល​មេរោគ​នេះ​ចាប់​ផ្តើម​រីក​រាល​ដាល។

រយៈ​ពេល​ពីរ​សប្តាហ៍​ចុង​ក្រោយ​នេះ​ អ្នក​ភូមិ​ផ្ទុក​មេរោគ​អេដស៍​ចំនួន​ពីរ​នាក់ ពី​ឃុំរ​កា ក្នុង​នោះ​គឺ​កូន​ង៉ែត​​ស្រី​ម្នាក់ និង​ស្ត្រី​វ័យ​ចំណាស់​ម្នាក់​បាន​ស្លាប់​នៅ​ក្នុង​មន្ទីរ​ពេទ្យ។ នេះ​បើ​យោង​តាម​សាច់​ញាតិ​និង​មន្រ្តី។

ស្ត្រី​អាយុ​ ៧៣ ឆ្នាំ​ត្រូវ​បាន​រក​ឃើញ​មាន​ជំងឺ​របេង ដែល​ជា​មូល​ហេតុ​ នាំ​មុខ​នៃ​ការ​ស្លាប់​នៅ​ទូទាំង​ពិភព​លោក ចំពោះ​មនុស្ស​ផ្ទុក​មេរោគ​អេដស៍។

ទារក​អាយុ​ ៦ ខែ​ម្នាក់​ត្រូវ​បាន​គេ​ធ្វើ​រោគ​វិនិច្ឆ័យ​ថា​ មាន​ជំងឺ​ផ្លូវ​ដង្ហើម​ធ្ងន់​ធ្ងរ​ បើ​យោង​តាម​ម្តាយ​របស់​នាង ដែល​មាន​ផ្ទុក​មេរោគ​អេដស៍​ផង​ដែរ។

ម្តាយ​ឈ្មោះ ​ចាន់ ចឿប​ ​បាន​ថ្លែង​ថា៖ «យើង​បាន​ចាប់​ផ្តើម​ប្រើ​ថ្នាំ​ពន្យារ​ជីវិត ប៉ុន្តែ​កូន​ស្រី​របស់​ខ្ញុំ​ មិន​អាច​ទ្រាំទ្រ​​នឹង​ការ​ព្យាបាល ដូច្នេះ​នាង​ត្រូវ​សម្រាក​ នៅ​ក្នុង​មន្ទីរ​ពេទ្យ​ខេត្ត​រយៈពេល​មួយ​សប្តាហ៍ បន្ទាប់​មក​ត្រូវ​បាន​ផ្ទេរ​ទៅ​មន្ទីរ​ពេទ្យ​គន្ធ​បុប្ផា​នៅ​សៀមរាប... ហើយ​​បី​ថ្ងៃ​ក្រោយ មក​នាង​បាន​ស្លាប់»។

លោក Fujita បាន​បញ្ជាក់​ថា៖ «អ្នក​ផ្ទុក​មេរោគអេដស៍​មាន​ប្រព័ន្ធ​ស៊ាំ​ចុះ​ខ្សោយ​ដែល​ពួកគេ​ងាយ​រង​នឹង​ជំងឺ​ផ្សេង​ទៀត»។

ជំទប់​ទី១ ឃុំ​រកា លោក សឿម ឆោម បាន​ប៉ាន់​ប្រមាណ​ថា ជិត​មួយ​ភាគ​បី​នៃ​អ្នក​ដែល​ត្រូវ​បាន​គេ​ធ្វើ​រោគ​វិនិច្ឆ័យ​ថា មាន​ផ្ទុក​មេរោគ​អេដស៍ ឥឡូវ​នេះ​ស្ថិត​ក្នុង​ស្ថាន​ភាព​ធ្ងន់ធ្ងរ ជា​តួលេខ​ដែល​ជំទាស់​ដោយ​អាជ្ញាធរ​សុខភាព​របស់​រដ្ឋាភិបាល។

លោក សឿម ឆោម ដែល​ រួម​ទាំង​ប្រពន្ធ​របស់​​លោក​ត្រូវ​រក​ឃើញ​មាន​មេរោគ​អេដស៍​នោះ បាន​ថ្លែង​ថា៖ «ប្រជា​ជន​ទាំង​នេះ​មាន​ជំងឺ​រាង​កាយ​ដទៃ​ទៀត​ដូច​ជា របេង ​សួត ថ្លើម និងជំងឺ​​បេះ​ដូង​»។

បើ​ទោះ​បីជា​មា​ន​ករណី​កាន់​តែ​ធ្ងន់ធ្ងរ​ក៏​ដោយ ក៏​ប៉ុន្តែ​រដ្ឋាភិ​បាល​កំពុង​ផ្តល់​ការ​ព្យាបាល ប្រឆាំង​មេរោគ​ដោយ​ឥត​គិត​ថ្លៃ​តែ​ចំពោះ​អ្នក​ដែល​មេរោគ​អេដស៍​បានរីក​ចម្រើន​​ទៅ​សម្លាប់​កោសិកា​ឈាម​ស CD4 ច្រើន​ប៉ុណ្ណោះ ។ អ្នក​សុខ​ភាព​ល្អ​មាន​​កោសិកា CD4 ពី ៦០០ ទៅ ១២០០ ។

លោក​វេជ្ជ​បណ្ឌិត ពេញ​ស៊ុន​នៃ​អង្គ​ការ​ NCHADS បាន​ថ្លែង​ថា៖​«នៅ​ពេល​ដែល​ពួក​គេ​មាន​ចំនួន CD4 ​ត្រឹម​៣៥០ ឬទាប​ជាង​នេះ ពួកគេ​មាន​សិទ្ធិ​ទទួល​បាន​ការ​ព្យា​បាល»។

យោង​តាម​អង្គការ​សុខ​ភាព​ពិភព​លោក​បាន​ឲ្យ​ដឹង​ថា ស្ដង់ដារ​អន្ដរ​ជាតិ​សម្រាប់​ការ​ព្យាបាល​គឺ​កោសិកា CD4 ចំនួន ៥០០ ដើម្បី​បញ្ឈប់​មេរោគ​នេះ​កុំ​ឲ្យ​ឈាន​ដល់​ដំណាក់​កាល​សម្លាប់​ជីវិត។

លោកវេជ្ជ​បណ្ឌិត ពេញ​ស៊ុន បញ្ជាក់​ថា៖ «នេះ​គឺជា​ស្តង់​ដារ​ជាតិ​របស់​យើង។ ​ប្រសិន​បើ​​ពួកគេ​មាន​កោសិកា​ចំនួន CD4 ខ្ពស់​ជាង​នេះ ពួក​គេ​នៅ​តែ​មាន​សុខ​ភាព​ល្អ និង​​មិន​​ត្រូវ​ការ​ ការ​ព្យា​បាល​ទេ​»។

NCHAD បាន​ឲ្យ​ដឹង​ថា គិត​មក​ដល់​ថ្ងៃទី ៣១ ខែ​មករា​ មនុស្ស​ចំនួន ២៣៤ នាក់ ត្រូវ​បាន​ប្រកាស​ថា ​មាន​ផ្ទុក​មេរោគ​អេដស៍នៅ​ក្នុង​ឃុំ​រកា​ ប៉ុន្តែ​មា​ន​​មនុស្ស​តែ១៧៩ នាក់ ក្នុង​នោះ​កុមារ ២៨ នាក់​បាន​ទទួល​​ថ្នាំ​ព្យាបាល​ពន្យារ​​ជីវិត​។ NCHA​D​S បាន​បន្ថែម​ថា ​មនុស្ស​​ប្រហែល ៤០ ភាគ​រយ​ នៃ​អ្នក​ផ្ទុក​មេរោគ​អេដស៍បច្ចុប្បន្ន​មិន​មាន​សិទិ្ធ​ទទួល​បាន​ការ​ព្យាបាល​ទេ។

កម្មវិធី​ជាតិ​ ក៏បាន​បញ្ឈប់ការ​ព្យាបាល​អ្នក​ជំងឺ​វ័យ​ចំណា​ស់​ដែល​មិន​អាច​ទ្រាំទ្រ​នឹង​ផល​រំខាន​​នៃ​ការ​ព្យា​បាល។

លោក Fujita បានថ្លែងថា៖ «នេះ​ជា​រឿង​ចម្លែក ព្រោះ​ពិធី​សារ​ធម្មតា​កំណត់​ថា មនុស្ស​វ័យ​ចំណាស់​ ត្រូវ​ការ​ការ​យក​ចិត្ត​ទុក​ដាក់​បន្ថែម​ទៀត​ក្នុង​អំឡុង​ពេល​ព្យា​បាល​ពន្យារ​អាយុ​ជីវិត លើក​លែង​តែ​ពួក​គេ​មាន​ជំងឺ​ផ្សេង​ទៀត​ធ្ងន់ធ្ងរ»។

អង្គការ​​ក្រៅ​រដ្ឋាភិបាល​​ដែល​ធ្វើ​សកម្មភាព​នៅ​ភូមិ​រកា បាន​ឲ្យ​ដឹង​ថា ទោះ​ជា​យ៉ាង​ណា កាន់​​តែ​បន្ទាន់​ជាង​ថ្នាំ​ទៅ​ទៀត​នោះ គឺ​អ្នកភូមិ​ត្រូវការ​ម្ហូប​អាហារ និង​ជំនួយ​ហិរញ្ញ​វត្ថុ។

លោក ពេញស៊ុន បាន​ថ្លែង​ថា បច្ចុប្បន្ន​គ្មាន​ផែន​ការ​ផ្តល់​ជំនួយ​ហិរញ្ញ​វត្ថុ​ដល់​អ្នក​ភូមិ​ក្នុង​ឃុំរកា​ទេ​ក្រៅ​ពី​ការ​បង់​ចំណា​យ​ដឹក​ជញ្ជូន​ទៅ​មន្ទីរ​ពេទ្យ។

លោក អ៊ុំ សុភាព ប្រធាន​អង្គការ​ខាណា បាន​ថ្លែង​ថា៖ «ទិដ្ឋភាព​មិន​មែន​ជា​បញ្ហា​សុខភាព​តែ​មួយ​មុខ​ដោយ​សារ​ជំងឺ​នេះ​ទេ គឺ​បញ្ហា​សេដ្ឋកិច្ច នៃ​សេចក្តី​ត្រូវ​ការ​ប្រចាំ​ថ្ងៃមិន​ត្រូវ​បាន​ដោះ​ស្រាយ​ទេ»។

លោក​បាន​បន្ត​ថា ​មនុស្ស​ជាង​ពាក់​កណ្តាល​ដែល​រស់​នៅក្នុ​ងឃុំ​នេះ រក​បាន​ប្រាក់​ក្រោម ១ ដុល្លារ​ក្នុង​មួយថ្ងៃ​មុន​ពេល​កើត​មាន​ករណី​ឆ្លង​ជំងឺ​នេះ។

លោកសុភាព បាន​ចោទ​សួរ​ថា៖ «គ្រួសារ​ទាំង​មូល មាន​ជំងឺ​នេះ​ ហើយ​គ្មាន​លទ្ធភាព​រក​ប្រាក់​ចំណូល​ទេ ឥឡូវ​នេះ។ តើ​គេ​អាច​ចិញ្ចឹម​គ្រួសារ​បាន​ដោយ​របៀប​ណា?»៕ TK

អត្ថបទគួរចាប់អារម្មណ៍