The Phnom Penh Post Search

Search form

Logo of Phnom Penh Post newspaper Phnom Penh Post - អ្នក​ឆ្លង​អេដស៍​នៅ​ឃុំ​រកា​អំពាវនាវ​ឲ្យ​ព្យាបាល​ជំងឺ​ដោយ​មិន​គិត​ថ្លៃ




អ្នក​ឆ្លង​អេដស៍​នៅ​ឃុំ​រកា​អំពាវនាវ​ឲ្យ​ព្យាបាល​ជំងឺ​ដោយ​មិន​គិត​ថ្លៃ

អ្នក​ឃុំ​រកា​ក្នុង​ខេត្ត​បាត់ដំបង​ដែល​ឆ្លង​មេរោគ​អេដស៍​កាលពី​ចុង​ឆ្នាំ​មុន​។
អ្នក​ឃុំ​រកា​ក្នុង​ខេត្ត​បាត់ដំបង​ដែល​ឆ្លង​មេរោគ​អេដស៍​កាលពី​ចុង​ឆ្នាំ​មុន​។ ហេង ជីវ័ន

អ្នក​ឆ្លង​អេដស៍​នៅ​ឃុំ​រកា​អំពាវនាវ​ឲ្យ​ព្យាបាល​ជំងឺ​ដោយ​មិន​គិត​ថ្លៃ

បាត់ដំបងៈ អ្នក​​ឆ្លង​​មេរោគ​អេដសន៍​នៅ​ឃុំ​រកា ស្រុក​សង្កែ បាន​អំពាវនាវ​​ឲ្យ​អាជ្ញាធរ​ពាក់ព័ន្ធ ផ្តល់​ប័ណ្ណ​ពិនិត្យ​ជំងឺ​ទូទៅ​​ឥត​គិត​ថ្លៃ​ដល់​គ្រួសារ​ពួកគេ​​ឲ្យ​បាន​គ្រប់ៗ​គ្នា​ដើម្បី​​ជា​ការ​លើក​ទឹកចិត្ត​​ និង​ជួយ​សម្រាល​ជីវភាព​ដល់​ពួកគេ​​ដែល​ក្រីក្រ​។

នេះ​ជា​កង្វល់​មួយ​ក្នុង​ចំណោម​កង្វល់​ជាច្រើន​ទៀត​ដែល​អ្នក​ឆ្លង​​មេរោគ​អេដស៍​ជិត ៣០០ ​នាក់​នៅក្នុង​ឃុំ​រកា បាន​លើក​ឡើង នៅក្នុង​វេទិកា​សាធារណៈ​នៅក្នុង​ឃុំ​នេះ ជាមួយ​មន្ត្រី​សុខាភិបាល និង​អាជ្ញាធរ កាលពី​ម្សិលមិញ​។

អ្នកស្រី ឆុញ ភើយ អាយុ​ ៣៩​ ឆ្នាំ​ជា​​អ្នក​​ឆ្លង​មេរោគ​អេដស៍​​ម្នាក់​បាន​​ឲ្យ​ដឹង​ថា អ្នកស្រី បាន​លើក​ឡើង​ពី​បញ្ហា​នៃ​ប័ណ្ណ​ពិនិត្យ​ជំងឺ​ទូទៅ​របស់​ប្រជាពលរដ្ឋ​ក្រីក្រ​សម្រាប់​ទទួល​សេវា​សុខភាព​ពី​ពេទ្យ​រដ្ឋ ដោយ​មិន​គិត​ថ្លៃ​ចំពោះ​មន្ត្រី​ពាក់ព័ន្ធ​ដែល​មកពី​អាជ្ញាធរ​ជាតិ​ប្រយុទ្ធ​​ជំងឺ​អេដស៍ មន្ទីរ​សុខាភិបាល​ខេត្ត និង​អាជ្ញាធរ​ស្រុក។

កាលពី​ខែ​មករា​អ្នកស្រី ភើយ បាន​យក​កូន​អាយុ ៦ ខែ​របស់​អ្នកស្រី ដែល​មាន​ផ្ទុក​មេរោគ​អេដស៍ ទៅ​មន្ទីរពេទ្យ​បង្អែក​ខេត្ត​បាត់ដំបង​ដោយសារ​កូន​ចេញ​រោគ​កញ្ជ្រិល​លើ​ខ្លួន ហើយ​បាន​ដេក​នៅ​ពេទ្យ​អស់​បី​ថ្ងៃ ដោយ​ត្រូវ​បង់​ថ្លៃ​ព្យាបាល​ចំនួន ៨ ​ម៉ឺន​រៀល តែ​អ្នកស្រី​គ្មាន​លទ្ធភាព​បង់​ឡើយ ខណៈ​អ្នកស្រី​គ្មាន​ប័ណ្ណ​ក្រីក្រ​បញ្ជាក់​។

បញ្ហា​នេះ​បាន​កើត​លើ​អ្នកភូមិ​ដទៃ​ទៀត​រហូត​ដល់​មាន​​ការ​​ជួយ​ដោះស្រាយ​ពី​ក្រសួង​សុខាភិបាល​សម្រេច​លើកលែង​ការ​បង់​ប្រាក់​​ថ្លៃ​ព្យាបាល​ទូទៅ​​ដល់​អ្នក​ឃុំ​រកា​ប៉ុន្តែ​ត្រូវ​ចេញ​ប័ណ្ណ​បណ្តោះអាសន្ន​ឲ្យ​។

មក​ទល់​ពេល​នេះ អ្នកស្រី ភើយ បាន​ទទួល​ប័ណ្ណ​ក្រីក្រ ជា​ប័ណ្ណ​បណ្តោះអាសន្ន មាន​សុពលភាព​មួយ​ឆ្នាំ ប៉ុន្តែ​អ្នកស្រី​ថា​ អ្នក​ផ្ទុក​មេរោគ​អេដស៍​ជាច្រើន​ទៀត មិន​ទាន់​ទទួល​បាន​ប័ណ្ណ​នេះ​នៅ​ឡើយ​ទេ​។

អ្នកស្រី​បាន​ថ្លែង​ថា​៖ «យើង​​​មាន​ជីវភាព​ក្រីក្រ​លំបាក​ណា​មួយ​មាន​រោគ​អេដស៍​ក្នុង​ខ្លួន ជំងឺ​ផ្សេងៗ​ងាយ​នឹង​កើត​មាន​ដែល​ត្រូវ​ព្យាបាល»​។

ក្រៅពី​នេះ អ្នកស្រី ភើយ ដែល​មាន​កូន ៤ នាក់​នៅក្នុង​បន្ទុក​ក៏​បាន​រអ៊ូរទាំ​ពី​ការ​រើសអើង​របស់​គ្រូពេទ្យ​រដ្ឋ ដែល​មិន​មាន​សីលធម៌​ក្នុង​ខ្លួន ធ្វើការ​ស្តីបន្ទោស​ដល់​អ្នក​​ផ្ទុក​មេរោគ​អេដស៍​ផង​ដែរ​។

អ្នកស្រី​ថា៖ «នៅ​ពេទ្យ​បង្អែក​ខេត្ត​បាត់ដំបង គ្រូពេទ្យ​ម្នាក់​ស្តី​ឲ្យ​ថា មកពី​ខ្ញុំ​ចូលចិត្ត​ចាក់​ថ្នាំ​ពេទ្យ​ឯកជន​ហ្នឹង​ទើប​ខ្ញុំ​និង​កូន​កើត​អេដស៍។ គាត់​ថា​ខ្ញុំ​ភ្លើ។ខ្ញុំ​មាន​ការ​បាក់​ទឹកចិត្ត​ដោយសារ​សម្តី​ពេទ្យ​ហ្នឹង តែ​ខ្ញុំ​ត្រូវ​តែ​រឹងមាំ​​ដើម្បី​កូន​ខ្ញុំ​បួន​នាក់​នេះ»។

លោក ស៊ូ សានិត អនុប្រធាន​មន្ទីរ​សុខាភិបាល​ខេត្ត​បាត់ដំបង​ថ្លែង​ថា អ្នក​ឃុំ​រកា ជា​ករណី​លើកលែង​ដែល​រដ្ឋ​ត្រូវ​ផ្តល់​ប័ណ្ណ​ក្រីក្រ​ឲ្យ ទោះ​មិន​ចាត់​ចូល​ក្នុង​លក្ខខណ្ឌ​ក្រីក្រ​ក៏ដោយ ព្រោះ​កាលពី​អំឡុង​ខែ​មេសា​រដ្ឋមន្ត្រី​សុខាភិបាល លោក ម៉ម ប៊ុនហេង បាន​សន្យា​ថា នឹង​ផ្តល់​​ប័ណ្ណ​ក្រីក្រ​ដល់​ពលរដ្ឋ​ទាំងនេះ​ដើម្បី​ឲ្យ​មាន​ភាព​ងាយស្រួល​នៅពេល​ទៅ​ព្យាបាល​ជំងឺ​នៅ​មន្ទីរពេទ្យ​រដ្ឋ​។ ​មក​ទល់​ពេល​នេះ មាន​​ពលរដ្ឋ​ក្នុង​ភូមិ​រកា​ប្រមាណ ៥០ ភាគរយ​ប៉ុណ្ណោះ​មាន​ប័ណ្ណ​ក្រីក្រ​។

ប័ណ្ណ​ក្រីក្រ​ដែល​ចេញ​ដោយ​រដ្ឋ​មាន​សុពលភាព​ពី ២ ឆ្នាំ​ទៅ ៤ ឆ្នាំ​។ លោក​ថ្លែង​ថា៖ «យើង​ប្រជុំ​សម្រេច​ហើយ​ឲ្យ​មន្ទីរ​ផែនការ​ជា​អ្នក​ចាត់ចែង ព្រោះ​ការងារ​ចេញ​ប័ណ្ណ​ជា​ការងារ​របស់​មន្ទីរ​ផែនការ​។ តែ​វា​ត្រូវការ​ស៊ី​ពេល​។ ទោះ​យ៉ាង​ណា​យើង​ឲ្យ​ដៃគូ​អភិវឌ្ឍន៍​ជួយ​ចេញ​ប័ណ្ណ​អាទិភាព​រយៈពេល​ ១ ​ឆ្នាំ​បណ្តោះអាសន្ន​សិន​»។

មក​ទល់​ពេល​នេះ អ្នក​ឃុំ​រកា ដែល​ឆ្លង​​មេរោគ​អេដស៍​ មាន​ចំនួន ២៨១ នាក់ ចាប់​តាំងពី​មាន​ការ​រក​ឃើញ​ការ​រីករាល​ដាល​នៃ​ការ​ឆ្លង​មេរោគ​អេដស៍​នេះ នៅក្នុង​អំឡុង​ខែ​ធ្នូ ឆ្នាំ ២០១៤ ដែល​​ឆ្លង​តាមរយៈ​ការ​ចាក់ថ្នាំ​ពី​ពេទ្យ​ភូមិ​ម្នាក់​ដែល​នៅពេល​នេះ​កំពុង​ជាប់​ឃុំ​នៅក្នុង​ពន្ធនាគារ​។ មនុស្ស​ ៨ នាក់ បាន​ស្លាប់​ជា​បន្តបន្ទាប់ បន្ទាប់ពី​ឆ្លង​ជំងឺ​នេះ។

អ្នកស្រី សាន សុខាត់ អ្នក​សម្របសម្រួល​បណ្តាញ​អ្នក​រស់នៅ​ជាមួយ​មេរោគ​​អេដស៍​ខេត្ត​បាត់ដំបង បាន​ថ្លែង​ថា ការ​មិន​យក​ថ្លៃ​ព្យាបាល​ជំងឺ​ផ្សេងៗ​ពី​អ្នក​ភូមិ​រកា​ ដែល​ឆ្លង​មេរោគ​​អេដស៍​ត្រូវ​បាន​អាជ្ញាធរ​ពាក់ព័ន្ធ​សម្រេច​ចាប់​តាំងពី​ខែ​មេសា​មក ប៉ុន្តែ​អ្នក​ភូមិ​មិន​ត្រូវ​បាន​គេ​ផ្សព្វផ្សាយ​ឲ្យ​ដឹង​ជា​ទូទៅ​ទេ​ដែល​ទាមទារ​ឲ្យ​មាន​ការ​ផ្សព្វផ្សាយ​បន្ថែម​ពី​បណ្តាញ​របស់​អ្នកស្រី​និង​អ្នក​ពាក់ព័ន្ធ​៕

អត្ថបទគួរចាប់អារម្មណ៍