The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​ជាប់​និទ្ទេស A ជួប​នាយក​រដ្ឋ​មន្ត្រី ឯ​អ្នក​ធ្លាក់​ខ្លះ​តវ៉ា

អ្នក​ជាប់​និទ្ទេស A ជួប​នាយក​រដ្ឋ​មន្ត្រី ឯ​អ្នក​ធ្លាក់​ខ្លះ​តវ៉ា

Content image - Phnom Penh Post
សិស្ស​ប្រឡង​ជាប់​និទ្ទេស A ក្នុង​ពិធីនៅ​ AUPP ​កាល​ពី​ម្សិល​មិញ​។ រូបថត សហ​ការី

អ្នក​ជាប់​និទ្ទេស A ជួប​នាយក​រដ្ឋ​មន្ត្រី ឯ​អ្នក​ធ្លាក់​ខ្លះ​តវ៉ា

ភ្នំពេញៈ បេក្ខជន​ជាប់​បាក់​ឌុប ឆ្នាំ​ ២០១៥ និទ្ទេសA សរុប ១០៨ ​នាក់​នៅ​ព្រឹក​ថ្ងៃ​នេះ នឹង​ត្រូវ​ជួប​​សំណេះ​សំណាល​ ដើម្បី​ទទួល​ការ​លើក​ទឹក​ចិត្ត​ពី​លោក​នាយក​រដ្ឋមន្ត្រី ហ៊ុន សែន ខណៈ​​បេក្ខជន​ធ្លាក់​បាក់​ឌុប​មួយ​ចំនួន​ កាល​ពី​ម្សិលមិញ បាន​ដាក់​ពាក្យ​ស្នើ​សុំ​ពិនិត្យ​​កំណែ​ឡើង​វិញ​ដោយ​សង្ស័យ​ពី​ភាព​មិន​ប្រក្រតី​នៃ​កំណែ​វិញ្ញាសា​របស់​ខ្លួន។

ក្នុង​ចំណោម​បេក្ខជន​ទទួល​បាន​និទ្ទេស A ចំនួន​ ១០៨ ​នាក់ ដែល​ក្រសួង​អប់រំ ​បាន​​ប្រកាស​ផ្សាយ​មាន​មក​ពី​រាជធានី​ភ្នំពេញ ៤៨ នាក់ សៀមរាប​ ១៨ នាក់ បាត់ដំបង ១៧ នាក់ ត្បូង​ឃ្មុំ ៦នាក់ តាកែវ ៦ នាក់ កណ្តាល ៥ នាក់ កំពង់ចាម ៥ នាក់ កំពត ៥ នាក់ ព្រះវិហារ ២ នាក់ កំពង់ធំ ២ នាក់ បន្ទាយ​​មាន​ជ័យ ២ នាក់ ក្រចេះ ២ នាក់ ព្រះ​សីហនុ ២ នាក់ កំពង់ស្ពឺ ១នាក់ ស្វាយ​រៀង ១ នាក់ និង​នៅ​ប៉ៃលិន ១ នាក់។

មិន​ខុស​ពី​ឆ្នាំមុន រដ្ឋ​មន្ត្រី​ក្រសួង​អប់រំ លោក ហង់ ជួនណារ៉ុន បាន​ឲ្យ​ដឹងថា នៅ​ឆ្នាំ ២០១៥ នេះ ​បេក្ខជន​និទ្ទេស A ទាំង ១០៨ រូបនឹង​ចូល​ជួប​​ជាមួយ​លោក​នាយក​រដ្ឋ​មន្ត្រី ហ៊ុន សែន តាម​ការ​រៀបចំ​ម៉ោង ៩ ព្រឹក​នៅ​វិមាន​សន្តិភាព។

លោក​ថា៖ «សម្រាប់​ការ​លើក​ទឹកចិត្ត​របស់​សម្តេច​នាយក​រដ្ឋមន្ត្រី (ហ៊ុន សែន) ថា​នឹង​ឲ្យ​អ្វី​ខ្លះ​នោះ​គឺ​យើង​​អត់​​ទាន់​ដឹង​នោះ​ទេ ទាល់​តែ​ជួប​​សំណេះ​សំណាល​សិន»។

កាលពី​ឆ្នាំ ២០១៤ ខណៈដែល​ សិស្ស​និទ្ទេស A មាន​​ត្រឹម​តែ​ចំនួន ១១ នាក់ លោក​នាយក​រដ្ឋ​មន្ត្រី ហ៊ុន សែន ផ្តល់​ការ​លើក​​ទឹក​ចិត្ត​ដោយ​ក្នុង​ម្នាក់ៗ ទទួល​បាន​កុំព្យូទ័រ​យួរ​ដៃ​​មួយ​​គ្រឿង IPAD មួយ​គ្រឿង ម៉ូតូ​មួយ​គ្រឿង និង​ប្រាក់ ១ ២៥០ ​ដុល្លារ ព្រម​ទាំង​ការ​ផ្តល់​​អាហារូបករណ៍​ថ្នាក់​បរិញ្ញាបត្រ​ផងដែរ។

ទន្ទឹម​នឹង​ការ​រង់ចាំ​​ជួប​សំណេះ​សំណាល​ជាមួយ​លោកនាយករដ្ឋ​មន្ត្រី នៅ​ថ្ងៃ​អង្គារ​នេះ កាល​ពី​ម្សិល​មិញ ​ក្រុម​សិស្ស​និទ្ទេស A ទាំង ១០៨​ នាក់ ក៏​បាន​ជួប​ប្រជុំ​គ្នា​ជា​លើក​ដំបូង តាម​ការ​រៀប​ចំ​របស់​សាកល​វិទ្យាល័យ​អាមេរិ​កាំង​ភ្នំពេញ (AUPP) ក្នុង​គោល​ដៅ​បង្ហាញ​មុខ ស្គាល់​គ្នា​ទៅ​វិញ​ទៅ​មក និង​ដើម្បី​អនុញ្ញាត​ឲ្យ​ពួក​គេ​បាន​​ស្វែង​​យល់​ពី​អាហា​រូបករណ៍​ចំនួន ១២០ កន្លែង ដែល​សាកល​វិទ្យាល័យ​ស្តង់ដារ​អាមេរិក​មួយ​នេះ​មាន ​សម្រាប់​ផ្ដល់​ឲ្យ​សិស្ស​ប្រឡង​ជាប់​ឆ្នាំ ២០១៥។ នេះ​បើ​តាម​ទីប្រឹក្សា​​សាកល​វិទ្យាល័យ AUPP លោក ពុ​យ គា។

លោក ពុយ គា ​ថា៖ «តាម​លទ្ធផល​នៃ​កំណែ​ទម្រង់​ប្រឡង​បាក់​ឌុប​ឆ្នាំ ២០១៥ ដែល​មាន​សិស្ស​ជាប់​និទ្ទេស ​A និង B ច្រើន​ខុស​ពី​​ឆ្នាំ​​មុន ​អ៊ី​ចឹ​ង​សាកល​វិទ្យាល័យ​នេះ បាន​សម្រេច​ប្រកាស​​ផ្តល់​អាហា​រូបករណ៍​ចំនួន ១២០ កន្លែង ប៉ុន្តែ​មិន​មែន​មាន​ន័យ​ថា ពួកគេ​សុទ្ធតែ​បាន​ទេ ព្រោះ​រៀន​ត្រូវការ​ភាសា អ៊ីចឹង​ហើយ​គឺ​ពួកគេ​ត្រូវ​​ប្រឡង​ភាសា ដើម្បី​អាច​ចូល​រៀន​បាន ហើយ​កត្តា​​ជីវភាព​ក៏​នឹង​ត្រូវ​ពិចារណា​ដែរ»។

ជាការ​កត់​សម្គាល់ ក្រោយ​ក្រសួង ប្រកាស​ឲ្យ​មាន​ការ​ដាក់​ពាក្យ​ប្តឹង​ស្នើ​សុំ​ពិនិត្យ​វិញ្ញាសា​ឡើង​វិញ កាលពី​ម្សិលមិញ បេក្ខ​ជន​ប្រឡង​ធ្លាក់​ខ្លះ ក៏​បាន​យក​ពាក្យ​ទៅ​ស្នើ​សុំ​ដល់​ក្រសួង និង​ខ្លះ​ទៀត​ទៅ​សួរនាំ​ពី​នីតិវិធី​នៃ​​ការ​ដាក់​ពាក្យ​សុំ។

ម្នាក់​ក្នុង​ចំណោម​​អ្នក​ដែល​បាន​ដាក់​ពាក្យ​ស្នើ​សុំ​ការ​ពិនិត្យ​សំណេរ​កិច្ចការ​ប្រឡង​ឡើងវិញ បេក្ខជន លី ម៉ាឡា សិស្ស​​វិទ្យា​ល័យ​ព្រះ​សីហនុ មកពី​ខេត្ត​​កំពង់​ចាម បាន​ឲ្យ​ដឹង​ថា រូបគេ បាន​ខិត​ខំរៀន និង ​បំពេញ​ចម្លើយ​បាន​​ច្រើន​ក្នុង​សន្លឹក​​កិច្ចការ​ ហើយ​ក្រោយ​​ពេល​ប្រឡង​ក៏​បាន​ផ្ទៀងផ្ទាត់​ចម្លើយ​ជាមួយ​មិត្តភក្តិ​របស់​ខ្លួន​ដែល​ប្រហាក់​ប្រហែលគ្នា ប៉ុន្តែ​មិត្ត​ភក្តិ​​របស់​គេ បាន​ជាប់​ទទួល​និទ្ទេស B​ ចំណែក​ម៉ា​ឡា បែរ​ជា​ធ្លាក់​ទៅ​វិញ។

ម៉ា​ឡា​ថា​៖​​«កា​រផ្ទៀង​ផ្ទាត់​ក្រោយ​ពេល​ប្រឡង​ក្នុង​​ម៉ោង​​នីមួយៗ គឺ​ចម្លើយ​​យើង​ដូចគ្នា​ខ្លះ ប្រហាក់​ប្រហែល​គ្នា​ខ្លះ ខ្ញុំគិតថា​ មិនអាច​​គម្លាត​ឆ្ងាយ​​​ដល់​​ថ្នាក់​​គេ​បាន​ B ខ្ញុំ​​ធ្លាក់​​នោះទេ ខ្ញុំ​សង្ឃឹម​ថា ក្រសួង​នឹង​ពិនិត្យ​មើល​ឡើង​វិញ»។

ក្នុង​ពាក្យ​ស្នើសុំ​របស់ ម៉ាឡា ចុះ​ថ្ងៃទី ១៤ ខែ កញ្ញា បាន​សុំ​តវ៉ា​ពិនិត្យ​ឡើងវិញ​នូវ​​កិច្ចការ​មុខ​វិជ្ជា គណិត​វិទ្យា រូបវិទ្យា និង​​ប្រវត្តិ​វិទ្យា ដោយ​អះអាង​ថា ខ្លួន​បាន​ធ្វើ​ត្រូវ តែ​បែរជា​ធ្លាក់។

ម៉ាឡា បាន​ឲ្យ​ដឹង​ដែរ​​ថា ស្រប ពេល​ដែល​គេ​ចូល​ដាក់​ពាក្យ​សុំ​នោះ ក៏មាន​បេក្ខជន​ពី ៤ ទៅ ៥ នាក់​ផ្សេង​ទៀត បាន​ដាក់​ដូច​គេ​ដែរ។

បេក្ខជន​ម្នាក់ទៀត មួង សុមិនា សិស្ស​វិទ្យា​ល័យ​ជាស៊ីម សាមគ្គី បាន​រៀប​រាប់​ពី​ផលវិបាក​ក្នុង​ការ​ដាក់​ពាក្យ​ស្នើសុំ ដោយ​សារ​​ក្រសួង​មិន​បាន​ប្រកាស​​ជាក់​លាក់​ពី​នីតិវិធី និង​ទីតាំង​នៃ​ការ​ដាក់​ពាក្យ​ស្នើ​សុំ​ឡើយ​។

សុមិនា​ ថា៖ «ខ្ញុំ​មិន​ជឿ​ថា មុខ​វិជ្ជា​​ភាសា​ខ្មែរ និង​អង់គ្លេស​ខ្ញុំ​ធ្លាក់​បែប​នេះ​ទេ ខ្ញុំ​គិតថា ​អាច​កែច្រឡំ ឬ​ខុស តែ​ពេល​ខ្ញុំ​ទៅ​សួរនាំ​គេ​នៅ​ក្រសួង​អប់រំ បែរ​​ជា​​គេ​ដេញ​ពីនេះ​ ទៅ​នោះ មិន​មាន​ណែ​នាំ​ច្បាស់​លាស់​នោះទេ»។

តប​នឹង​រឿង​នេះ លោក ហង់ ជួនណារ៉ុន បាន​អះអាង​ថា ការ​ស្នើ​សុំ​ពិនិត្យ​កំណែ​វិញ្ញាសា បេក្ខជន​ត្រូវ​មាន​ភ័ស្តុតាង​ជាក់​លាក់ ដូចជា លិខិត បញ្ជាក់​​ពី​​គ្រូ​ទទួល​បន្ទុក​ថា្នក់​ជុំវិញ​ការ​សិក្សា​របស់​​បេក្ខ​ជន​នោះ ការ​ភ្ជាប់​មក​នូវ​ពិន្ទុ​ប្រឡង​ប្រចាំ​ឆមាស ដើម្បី​ជា​មូលដ្ឋាន​ក្នុងការ​ពិនិត្យ​ឡើង​វិញ។

លោក​ថា៖ «យើង​ជឿថា ការ​កែ​របស់​គ្រូ​កំណែ​គឺ​មាន​ភាព​សុក្រឹត ហើយ​​កុំព្យូទ័រ​ជា​អ្នក​​ចាត់​ថ្នាក់ គឺ​មិន​ខុស​ឡើយ តែ​យើង​នៅតែ​ស្វាគមន៍​សម្រាប់​អ្នក​មិន​សុខ​ចិត្ត​ឲ្យ​ដាក់​ពាក្យ​ប្តឹង ដើម្បី​ឲ្យ​​​បាន​​​អស់​ចិត្ត ហើយ​ទីតាំង​គឺ​នៅ​ក្រសួង ឬ​​មក​ជួប​ខ្ញុំ​តែម្តង»៕

អត្ថបទគួរចាប់អារម្មណ៍