.jpg)
គ្រូពេទ្យ នៅមន្ទីរពេទ្យកម្ពុជា-ជប៉ុន មង្គលបូរីនៅខេត្តបន្ទាយមានជ័យ រៀបចំបាញ់ថ្នាំសម្លាប់មេរោគនៅបន្ទប់អ្នកជំងឺកូវីដ ១៩ កាលពីថ្ងៃទី ៣ ខែមិថុនា។ រូបថត មន្ទីរពេទ្យកម្ពុជា-ជប៉ុន មង្គលបូរី
ភ្នំពេញ៖ក្រសួងសុខាភិបាល នៅថ្ងៃទី ៨ ខែមិថុនា ឆ្នាំ ២០២០ បានប្រកាសពីការជាសះស្បើយ ពីជំងឺកូវីដ ១៩ ម្នាក់ទៀត ដែលធ្វើឱ្យចំនួនអ្នកជាសះស្បើយកើនដល់ ១២៤ នាក់ ក្នុងចំណោមអ្នកជំងឺទាំងអស់ចំនួន ១២៦ នាក់។ អ្នកជាសះស្បើយនេះ គឺជាបុរសជនជាតិខ្មែរអាយុ២៦ឆ្នាំ ដែលបានរកឃើញឆ្លងជំងឺកូវីដ ១៩ កាលពីថ្ងៃទី ២៩ ខែឧសភា បន្ទាប់ពីវិលត្រឡប់មកពីប្រទេសថៃ។
បុរសដែលជាសះស្បើយនេះ គឺត្រូវបានអនុញ្ញាតឱ្យចាកចេញពីមន្ទីរពេទ្យកម្ពុជា-ជប៉ុន មង្គលបូរីនៅខេត្តបន្ទាយមានជ័យ បន្ទាប់ពីត្រូវបានធ្វើតេស្ដចំនួន ២ លើក ទទួលបានលទ្ធផលអវិជ្ជមានវីរុសកូវីដ ១៩។
ក្រសួងសុខាភិបាលបានបញ្ជាក់ថា៖ «ចំពោះអ្នកជំងឺដែលនៅសេសសល់ ២នាក់ទៀត គឺកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ដែលជាបុរសជនជាតិខ្មែរ ដែលបានឆ្លងជំងឺកូវីដ ១៩ បន្ទាប់ពីវិលត្រឡប់ពីប្រទេសហ្វីលីពីន និងបុរសជនជាតិខ្មែរ-បារាំង ដែលទើបវិលត្រឡប់ពីប្រទេសបារាំង»។
អ្នកជំងឺជាសះស្បើយលើកទី ១២៤ នេះ គឺមានទីលំនៅនៅភូមិរកាពរ ៥ ឃុំរកាពរ ៥ ស្រុកត្បូងឃ្មុំ ខេត្តត្បូងឃ្មុំ ហើយត្រូវបានក្រសួងសុខាភិបាល ប្រកាសថា ឆ្លងជំងឺកូវីដ ១៩ នៅថ្ងៃទី ២៩ ឧសភា គឺបន្ទាប់ពីគាត់បានទៅចូលរួមនៅក្នុងកម្មវិធីសិក្សាតាមបែបសាសនាមួយ នៅក្នុងប្រទេសថៃ ហើយបានវិលត្រឡប់មកដល់កម្ពុជាវិញ នៅថ្ងៃទី ២៨ ខែឧសភា។
បុរសរូបនេះ គឺបានធ្វើដំណើរតាមរថយន្តទេសចរណ៍មួយគ្រឿង ចេញពីប្រទេសថៃ ជាមួយបុរសជនជាតិខ្មែរចំនួន ៩ នាក់ទៀត ហើយបន្ទាប់ពីមកដល់ចំណុចព្រំដែនច្រកអូរបីជាន់ ត្រូវបានអាជ្ញាធរឃាត់ដើម្បីយកសំណាកមកធ្វើតេស្ដ នៅវិទ្យាស្ថានប៉ាស្ទ័រ ដោយម្នាក់ទទួលលទ្ធផលវិជ្ជមាន និង ៩ នាក់ទៀតអវិជ្ជមានត្រូវបញ្ជូនទៅធ្វើចត្តាឡីស័កនៅមណ្ឌលធ្វើចត្តាឡីស័ក នៅខេត្តបន្ទាយមានជ័យ។
នៅថ្ងៃទី ៨ ខែមិថុនា ភ្នំពេញ ប៉ុស្ដិ៍ មិនអាចសុំការបញ្ជាក់បន្ថែមពីលោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានទេ។
ក្រសួងសុខាភិបាលបញ្ជាក់ថា ករណីជំងឺកូវីដ ១៩ ភាគច្រើនលើសលុប គឺជាករណីនាំចូលពីក្រៅប្រទេស។
កាលពីចុងខែឧសភា អង្គការសុខភាពពិភពលោកបានបញ្ជាក់ថា ក្នុងរយៈពេលកន្លងមកនេះ កម្ពុជាបានទទួលជោគជ័យក្នុងការទប់ស្កាត់មិនឱ្យមានការឆ្លងនៅក្នុងសហគមន៍ ប៉ុន្តែប្រទេសនេះបានរាយការណ៍នូវការឆ្លងជាចង្កោមធំៗចំនួន ៥។
ចង្កោមទី១ អ្នកឆ្លង ៧ នាក់ នៅលើនាវាទេសចរណ៍ឈ្មោះ Viking Mekong ដែលធ្វើដំណើរចេញពីប្រទេសវៀតណាម និងជាករណីឆ្លងជាចង្កោមលើកដំបូងនៅកម្ពុជា។ ចង្កោមទី២ គឺមនុស្ស ៣៤ នាក់ បានឆ្លងជំងឺកូវីដ ១៩ បន្ទាប់ពីធ្វើដំណើរទៅចូលរួមកម្មវិធីសាសនាមួយនៅក្នុងប្រទេសម៉ាឡេស៊ី និងបន្ទាប់មក អ្នកទាំងនោះ បានចម្លងទៅដល់អ្នកដែលប៉ះពាល់ផ្ទាល់ចំនួន ៩ នាក់ទៀត។ ចង្កោមទី៣ គឺមនុស្សចំនួន ៣១ នាក់ បានឆ្លងស្ថិតក្នុងចំណោមក្រុមទេសចរជនជាតិបារាំងមួយ ទៅកាន់ខេត្តព្រះសីហនុ ហើយបានធ្វើឱ្យឆ្លងទៅដល់អ្នកប៉ះពាល់ផ្ទាល់ចំនួន ៨ នាក់ថែមទៀត។
ចំណែកចង្កោមទី៤ គឺមួយករណីនាំចូលពីប្រទេសថៃ ហើយបានចម្លងទៅដល់មនុស្សដែលមានទំនាក់ទំនងជាប្រពៃណីចំនួន ៤ នាក់ទៀត ហើយចង្កោម ទី៥ គឺអ្នកដំណើរជនជាតិចិនមកពីទីក្រុង Guangzhou ដែលបានចម្លងទៅដល់អ្នកប៉ះពាល់ផ្ទាល់ចំនួន ៤ នាក់ទៀត។
កាលពីថ្ងៃទី ៧ ខែមិថុនា ក្រសួងសុខាភិបាល បានលើកឡើងពីការព្រួយបារម្ភ អំពីការឆ្លងនៅក្នុងចំណោមនៃក្រុមមនុស្ស ដែលនាំឱ្យមានរលកទីពីរ នៃការឆ្លងនៅកម្ពុជា បន្ទាប់ពីសង្កេតឃើញថា មានពលរដ្ឋមួយចំនួន ដែលបានធ្វើដំណើរកម្សាន្តទៅកន្លែងទេសចរណ៍ផ្សេងៗនៅក្នុងប្រទេស មានការធ្វេសប្រហែស មិនអនុវត្តនូវវិធានការការពារខ្លួនពីជំងឺកូវីដ ១៩។
ក្រសួងសុខាភិបាល បានអំពាវនាវឱ្យពលរដ្ឋបន្តប្រុងប្រយ័ត្នឱ្យបានខ្ពស់ គឺត្រូវបន្តសម្អាតដៃជាមួយសាប៊ូ អាល់កុល ឬជែលឱ្យបានញឹកញាប់ ពាក់ម៉ាស់ឬក្រមានៅពេលកណ្ដាស់ឬក្អក ត្រូវរក្សាគន្លាតសុវត្ថិភាពសង្គម និងបុគ្គល ត្រូវផ្អាករៀបចំកម្មវិធីជួបជុំដូចជាពិធីរៀបការ និងពិធីសាសនា រួមទាំងការមិនធ្វើដំណើរចេញក្រៅ ក្នុងករណីមិនចាំបាច់ជាដើម៕
