ភ្នំពេញ៖ អ្នកជំងឺជាង ៨០០ នាក់ដែលបានសម្រាកព្យាបាលជំងឺកូវីដ១៩ នៅមណ្ឌលព្យាបាលកោះពេជ្របានជាសះស្បើយ និងត្រូវបានអនុញ្ញាតឱ្យចេញ និងត្រលប់ទៅគេហដ្ឋានវិញ ប៉ុន្តែពួកគាត់ត្រូវធ្វើចត្តាឡីស័កនៅផ្ទះចំនួន ១៤ ថ្ងៃបន្តទៀត។
លោកស្រី ពេជ ច័ន្ទមុនី អនុប្រធានក្រុមប្រឹក្សាភិបាលនៃគ្រូពេទ្យស្ម័គ្រចិត្តយុវជន «សម្តេចតេជោ» (TYDA) បានសរសេរលើបណ្តាញហ្វេសប៊ុកនៅយប់ថ្ងៃអង្គារថា អ្នកជំងឺដែលកំពុងព្យាបាល នៅមណ្ឌលព្យាបាលកូវីដកោះពេជ្រចំនួន ៨៣៤ នាក់ បានជាសះស្បើយ និងត្រូវធ្វើចត្តាឡីស័កបន្ត នៅផ្ទះចំនួន ១៤ ថ្ងៃបន្តទៀត។
លោកស្រីបានលើកឡើងថា៖ «ថ្ងៃនេះ ព្រះច័ន្ទរះពេញវង់ល្អណាស់ ហើយក៏ជាថ្ងៃដែលល្អដែរ ពីព្រោះមានអ្នកជំងឺកូវីដជាច្រើនបានជាសះស្បើយពីជំងឺ»។
លោកស្រី ពេជ ច័ន្ទមុនី បានថ្លែងអំណរគុណដល់ក្រុមគ្រូពេទ្យស្ម័គ្រចិត្តសម្តេចតេជោប្រឆាំងកូវីដ១៩ និងក្រុមសេវាជួរមុខទាំងអស់ ដែលបានយកចិត្តទុកដាក់ ថែទាំព្យាបាលអ្នកជំងឺទាំងអស់ ដោយយកចិត្តទុកដាក់ ព្រមទាំងក្រុមកងកម្លាំងដែលបានខិតខំប្រឹងប្រែងការពារ រៀបចំ និងសម្រួលសណ្តាប់ធ្នាប់នៅមណ្ឌលព្យាបាលកោះពេជ្រនេះ។
លោកស្រី ពេជ ច័ន្ទមុនី បានថ្លែងទៀតថា៖ «ខ្ញុំសូមផ្តាំដល់បងប្អូនដែលបានជាសះស្បើយហើយត្រលប់ទៅផ្ទះវិញនោះ សុំមេត្តាបន្តធ្វើចត្តាឡីស័កនៅផ្ទះបន្ត និងបន្តអនុវត្តន៍នូវដំបូន្មានរបស់គ្រូពេទ្យ និងត្រូវត្រលប់មកយកសំណាកវិញនៅថ្ងៃទី ១៣ (ឧសភា)»។
គួរបញ្ជាក់ថា អ្នកជំងឺទាំង ៨៣៤ នាក់ដែលបានជាសះស្បើយនេះ ជាអ្នកដែលឆ្លងវីរុសកូវីដ១៩ក្នុងព្រឹត្តិការណ៍សហគមន៍ ២០ កុម្ភៈ។
នៅថ្ងៃម្សិលមិញនេះលោក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោកបានលើកឡើងថា មានមន្ទីរពេទ្យ និងមណ្ឌលដែលក្រុមការងារបានរៀបចំសម្រាប់ព្យាបាលជំងឺកូវីដ១៩ កម្រិតស្រាលចំនួន ៥ នោះមាន the Great Duke, មន្ទីរពេទ្យហ្លួងម៉ែ, មណ្ឌលព្យាបាលកូវីដ១៩ កោះពេជ្រ ទី ១ និងទី ២, និងមណ្ឌលព្យាបាលកូវីដ១៩ ទួលពង្រ ដែលក្រុមការងារបានរៀបចំរួចរាល់ សម្រាប់ព្យាបាលអ្នកជំងឺកូវីដ១៩ កម្រិតស្រាលក្នុងរយៈពេល ៥១ ថ្ងៃ។
យោងតាមក្រសួងសុខាភិបាលមកដល់ត្រឹមថ្ងៃទី ២៥ ខែមេសា មានមន្ទីរពេទ្យ និងមណ្ឌលថែទាំព្យាបាលអ្នកជំងឺកូវីដ១៩កម្រិតស្រាលនៅទូទាំងប្រទេសមានចំនួន ៣៥ កន្លែង។
គិតត្រឹមថ្ងៃទី ២៦ ខែមេសា អ្នកជំងឺដែលបានឆ្លងវីរុសកូវីដ១៩ក្នុងព្រឹត្តិការណ៍សហគមន៍ ២០ កុម្ភៈសរុបទាំងអស់មានចំនួន ១០ ៥១៣ នាក់ក្នុងនោះបានព្យាបាលជាសះស្បើយចំនួន ៣ ១៧១ នាក់ និងមានអ្នកស្លាប់ចំនួន ៨២ នាក់៕