.jpg)
ភ្នំពេញៈ នៅថ្ងៃម្សិលមិញក្រសួងសុខាភិបាលបានប្រកាសថា អ្នកជំងឺកូវីដ ១៩ ម្នាក់ទៀតបានជាសះស្បើយ និងត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត ដែលធ្វើឱ្យកម្ពុជានៅសល់តែអ្នកជំងឺម្នាក់ទៀតប៉ុណ្ណោះ។
អ្នកជំងឺដែលជាសះស្បើយនេះ គឺទទួលលទ្ធផលធ្វើតេស្ដឡើងវិញអវិជ្ជមានចំនួន ២ លើក។ គាត់ជាបុរសជនជាតិអង់គ្លេសអាយុ ៥៤ ឆ្នាំស្នាក់នៅក្នុងផ្ទះ Apartment មួយកន្លែងនៅក្នុងសង្កាត់បឹងកក់ ២ ដែលបានធ្វើដំណើរពីប្រទេសអង់គ្លេស តជើងហោះហើរនៅប្រទេសហូឡង់ និងប្រទេសកូរ៉េខាងត្បូង ហើយបានមកដល់កម្ពុជាកាលពីថ្ងៃទី ១១ កញ្ញា។
នេះគឺជាអ្នកជំងឺទី ២៧៥ ហើយដែលបានជាសះស្បើយនៅក្នុងចំណោមអ្នកជំងឺសរុបទាំងអស់ចំនួន ២៧៦ នាក់ ដែលបានរកឃើញនៅក្នុងប្រទេសកម្ពុជា។ អ្នកជំងឺទី ២៧៦ គឺជាជនជាតិហុងគ្រីស្នាក់នៅក្នុងទីក្រុងសៀមរាបខេត្តសៀមរាបដែលបានធ្វើតេស្ដវិជ្ជមានកាលពីថ្ងៃទី ២៦ ខែកញ្ញា បន្ទាប់ពីបុរសរូបនេះបានធ្វើចត្តាឡីស័ក ១៣ ថ្ងៃ បន្ទាប់ពីមកដល់កម្ពុជាកាលពីថ្ងៃទី ១៣ កញ្ញា។
កម្ពុជាបានរកឃើញករណីជំងឺកូវីដ ១៩ លើកដំបូងនៅថ្ងៃទី ២៧ ខែមករា ហើយមកដល់ពេលនេះមានមនុស្សចំនួន ១៣៤ ៣២១ នាក់ ត្រូវបានធ្វើតេស្ដរកជំងឺកូវីដ ១៩។
នាយកដ្ឋានប្រយុទ្ធនឹងជំងឺឆ្លងរបស់ក្រសួងសុខាភិបាលបានរំឭកឱ្យពលរដ្ឋទាំងអស់បន្តប្រុងប្រយ័ត្នជានិច្ចតាមរយៈការអនុវត្តគន្លាតសុវត្ថិភាពសង្គម ដូចជាពន្យារពេលរៀបអាពាហ៍ពិពាហ៍ ពិធីជប់លៀង ការចាក់ធុងបាស់រាំជាដើម និងត្រូវពាក់ម៉ាស់នៅពេលចាំបាច់ រួមទាំងឧស្សាហ៍លាងសម្អាតដៃជាមួយសាប៊ូ អាល់កុល និងជែល។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានលើកឡើងកាលពីថ្ងៃទី ២៣ កញ្ញា ប្រាប់ទៅកាន់ក្រុមប្រឹក្សាធុរកិច្ចសហរដ្ឋអាមេរិក និងអាស៊ានថា កម្ពុជាស្ថិតក្រោមការដឹកនាំរបស់លោកនាយករដ្ឋមន្ត្រី ហ៊ុន សែន បានគ្រប់គ្រង និងឆ្លើយតបទៅនឹងជំងឺកូវីដ ១៩ ប្រកបដោយប្រសិទ្ធភាពគួរជាទីមោទនភាព៕
