.jpg)
គ្រូពេទ្យ និងពលរដ្ឋដែលជាពីជំងឺកូវីដ ថតសែលហ្វ៊ីនៅមណ្ឌលព្យាបាលជំងឺកូវីដកម្រិតស្រាលកោះពេជ្រ កាលពីថ្ងៃ ១៧ ឧសភា។ រូបថត TYDA
ភ្នំពេញៈ សំឡេងហ៊ោកញ្ជ្រៀវយ៉ាងកងរំពងដោយក្តីរំភើបសប្បាយលាន់ឮទ្រហឹងអឺងកងលាយឡំនឹងអារម្មណ៍ក្តុកក្តួល ជាមួយក្តីរីករាយដែលបង្ហាញឡើងដោយអ្នកជំងឺកូវីដ ១៩ រាប់រយនាក់នៅមណ្ឌលព្យាបាលទួលពង្រ រាជធានីភ្នំពេញ នៅពេលពួកគេត្រូវបានប្រាប់ថា បានជាសះស្បើយពីជំងឺដ៏កាចសាហាវនេះ។
អ្នកជំងឺ ១ រូបដែលអ្នកនិពន្ធសុំដាក់ឈ្មោះឱ្យថា សំណាង នៅថ្ងៃទី ១៨ ឧសភា បានបង្ហាញពីអារម្មណ៍ពិតដោយចិត្តអំណរសប្បាយនៅពេលលោកជាសះស្បើយ និងអនុញ្ញាតឱ្យចេញពីមណ្ឌលព្យាបាលជំងឺកូវីដកាលពីថ្ងៃទី ១២ ខែឧសភា។
លោកនិយាយថា៖ «ជំងឺនេះពិតជាកាចសាហាវណាស់ ប៉ុន្តែអ្វីដែលធ្វើឱ្យ ខ្ញុំក៏ដូចជាអ្នកជំងឺផ្សេងទៀតជាច្រើនឆាប់ជាសះស្បើយគឺដោយផ្គួបផ្សំនឹងការពិនិត្យ ព្យាបាល និងការយកចិត្តទុកដាក់យ៉ាងខ្លាំងគ្រប់ពេលវេលាពីក្រុមគ្រូពេទ្យដែលនៅតាមដានសុខភាពរបស់ខ្ញុំ»។
លោក សំណាង បាននិយាយថា លោក ហ៊ុន ម៉ាណែត និងលោកស្រី ពេជ ចន្ទមុន្នី តែងតែយកចិត្តទុកដាក់ទាំងការផ្តល់ទីកន្លែងសម្រាប់ព្យាបាល អាហារ ល្អៗ ថ្នាំពេទ្យ រួមនឹងការលើកទឹកចិត្ត និងការផ្តល់នូវកម្លាំងចិត្តមកដល់រូបលោក និងអ្នកជំងឺផ្សេងៗទៀត។
អ្នកស្រី បុប្ផា ដែលជាឈ្មោះត្រូវបានដាក់ឱ្យដែរនោះ ជាកម្មការិនីរោងចក្រមួយ ស្ថិតក្នុងខណ្ឌពោធិ៍សែនជ័យបានឆ្លងវីរុសកូវីដ១៩កាលពីដើមខែមេសា ត្រូវបានបញ្ជូនទៅព្យាបាលនៅមណ្ឌលសម្រាកព្យាបាលជំងឺកូវីដ១៩កម្រិតស្រាលនៅសណ្ឋាគារក្រេនឌុកអស់រយៈពេល ១៦ ថ្ងៃ ទើបអ្នកស្រីបានជាសះស្បើយជាធម្មតាវិញ។ អ្នកស្រីក៏បានត្រឡប់ចូលបំពេញការងារជាធម្មតាបាន ២ ថ្ងៃកន្លងមកដែរ។
អ្នកស្រី បុប្ផា ប្រាប់ ភ្នំពេញ ប៉ុស្តិ៍ នៅថ្ងៃទី ១៩ ឧសភា ថា៖ «ខ្ញុំមិននឹកស្មានថាក្រុមគ្រូពេទ្យព្យាបាល ជំងឺកូវីដមានការយកចិត្តទុកដាក់ ខ្លាំងមកលើអ្នកជំងឺដូចនេះទេ។ ខ្ញុំបានជួប គឺខ្ញុំដឹងច្បាស់។ ពួកគាត់តែងតែសួរនាំពីសុខភាពរបស់ខ្ញុំរហូតបានផ្តល់អាហារល្អៗឆ្ងាញ់ៗរួមនឹងថ្នាំពេទ្យផងដែរ»។
អ្នកជំងឺកូវីដ ១៩ បានជាសះស្បើយដើរចេញពីមណ្ឌលព្យាបាលវិទ្យាល័យជា ស៊ីម សាមគ្គី នៅខណ្ឌទួលគោក ពីថ្ងៃទី ៩ ឧសភា។ហេង ជីវ័ន
អ្នកស្រីបន្តថា គ្រូពេទ្យទាំងនេះមិនត្រឹមតែផ្តល់ការថែទាំលើសុខភាពជំងឺទេប៉ុន្តែពួកគាត់បានលើកទឹកចិត្ត និងនាំអ្នកជំងឺហាត់ប្រាណ ដើម្បីឱ្យមានសុខភាពរឹងមាំ និងឆាប់ជាសះស្បើយផងដែរ។
អ្នកជំងឺរូបនេះបន្តថា៖ «ពួកគាត់ មិនដែលប្រើសម្តីខ្លាំងៗ ឬស្រែកបន្ទោសមកខ្ញុំ ឬអ្នកជំងឺផ្សេងទេ ហើយក៏មិនមានកាយវិការរើសអើង ឬមើលងាយមកលើពួកយើងដែរ។ ប៉ុន្តែនៅពេលដែលពួកគាត់ យកថ្នាំ ឬអាហារមកឱ្យយើង ពួកគាត់មិនឈរនៅក្បែរអ្នកជំងឺទេ ដោយសារបង្ការពីការឆ្លង»។
កម្មការិនីរូបនេះបន្តថា៖ «ដំបូងឡើយខ្ញុំភ័យហើយបារម្ភថា នៅពេលព្យាបាលនឹងមិនល្អ គ្មានការយកចិត្តទុកដាក់ទេ ប៉ុន្តែអ្វីដែល ខ្ញុំបារម្ភ គឺខុសគ្នាស្រឡះតែម្តង»។
បើតាមការរៀបរាប់របស់អ្នកស្រី បុប្ផា ក្រុមគ្រូពេទ្យទាំងអស់មិន ត្រឹមតែមើលថែអ្នកជំងឺនៅកន្លែងព្យាបាលទេ ប៉ុន្តែនៅពេលអ្នកជំងឺដែលជាសះស្បើយហើយក៏នៅតែ ធ្វើការផ្តាំផ្ញើឱ្យយកចិត្តទុកដាក់ និងថែទាំសុខភាពទៀតដែរ។
រីឯអ្នកជំងឺ ១ រូបទៀត អ្នកស្រី ចន្ធូ បាននិយាយដោយក្តីរំភើបលាយឡំនឹងទឹកភ្នែកថា៖ «ខ្ញុំសូមអរគុណដល់លោកគ្រូពេទ្យដែលបានមើលថែរក្សាខ្ញុំ ឱ្យខ្ញុំជាសះស្បើយពីជំងឺនេះ។ ក្រុមការងារនៅក្នុងមណ្ឌលព្យាបាលជំងឺកូវីដនេះ ពិតជាល្អខ្លាំងណាស់ដែលពួកគាត់ខិតខំក្នុងការជួយសង្គ្រោះជីវិតរបស់ខ្ញុំឱ្យរួចពីសេចក្តីស្លាប់ ដោយសារជំងឺនេះ»។
កម្មការិនីម្នាក់ ដែលស្នាក់នៅក្នុងខណ្ឌពោធិ៍សែនជ័យបានឆ្លងវីរុសកូវីដ ១៩ ទាំងនាងមានផ្ទៃពោះជិតគ្រប់ខែ ត្រូវបានព្យាបាលជាសះស្បើយកាលពីថ្ងៃទី ១៧ ខែឧសភា កន្លងទៅថ្មីៗនេះ។ កម្មការិនីរូបនេះក៏បានបង្ហាញនូវក្តីរំភើបលាយឡំនឹងទឹកភ្នែកបង្ហាញពីការដឹងគុណដល់ក្រុមគ្រូពេទ្យស្ម័គ្រចិត្តយុវជនសម្តេចតេជោដែលបានយកចិត្តទុកដាក់មើលថែ និងព្យាបាលរូបនាងរហូតជាសះស្បើយ។
នាងនិយាយថា៖ «ទាំងកន្លែងស្នាក់នៅទាំងការហូបចុក និងការមើលថែព្យាបាលគឺល្អទាំងអស់ដែលគ្រប់យ៉ាងគឺខុសពីការគិតរបស់ខ្ញុំទាំងអស់មុនពេលដែលខ្ញុំបានមកព្យាបាលនៅទីនេះ។ ទាំងបងប្អូន ឪពុកម្តាយរបស់ខ្ញុំភ័យបារម្ភថា មិនមានការយកចិត្តទុកដាក់ ខ្លាចពិបាក ប៉ុន្តែការគិត ការបារម្ភ គឺផ្ទុយស្រឡះតែម្តង»។
អ្នកជំងឺរូបនេះបន្ថែមថា ការស្នាក់នៅក្នុងមណ្ឌលព្យាបាលជំងឺកូវីដ ១៩ កម្រិតស្រាលនេះមានការរៀបចំកន្លែងស្នាក់នៅស្អាតមានអាហារ ៣ ពេលហូបគ្រប់គ្រាន់ និងអ្វីសំខាន់គឺក្រុមគ្រូពេទ្យល្អ យកចិត្តទុកដាក់ដល់អ្នកជំងឺទាំងអស់ដោយមិនប្រកាន់អ្វីឡើយ។
លោកគ្រូពេទ្យម្នាក់នៃក្រុមគ្រូពេទ្យស្ម័គ្រចិត្តយុវជនសម្តេចតេជោបានថ្លែងទៅកាន់អ្នកជំងឺដែលបានជាសះស្បើយ និងបានរៀបចំចេញពីមណ្ឌលព្យាបាលជំងឺកូវីដ ១៩ កម្រិតស្រាលទួលពង្រ ទៅកាន់គេហដ្ឋានកាលពីថ្ងៃទី ១៧ ខែឧសភាថា ដើម្បីកុំឱ្យមានវត្តមាននៅក្នុងមណ្ឌលនេះទៀតគឺត្រូវប្រកាន់នូវវិធានការ «៣កុំ ៣ការពារ»។
លោកមានប្រសាសន៍ថា៖ «សូមបងប្អូន កុំទន្ទេញចាំមាត់ ហើយមិនបានអនុវត្តនោះគឺត្រូវតែអនុវត្តឱ្យបានត្រឹមត្រូវផងដែរ ដើម្បីកុំឱ្យមានឆ្លងនូវវីរុសកូវីដ ១៩ នេះឡើងវិញទៀត។ បងប្អូនជាសះស្បើយថ្ងៃនេះហើយ មិនមែនមានន័យថាលែងឆ្លងជំងឺនេះរហូតទេ។ ជំងឺនេះបានបំប្លែងខ្លួនវាទៅជាច្រើនប្រភេទ រហូតមកដល់ពេលនេះមានប្រមាណជា ៧០ ប្រភេទហើយ»។
នៅក្នុងវីដេអូឃ្លីបមួយរបស់ក្រុមគ្រូពេទ្យស្ម័គ្រចិត្តយុវជនសម្តេចតេជោ ក្រុមគ្រូពេទ្យបានធ្វើការស្ម័គ្រចិត្តក្នុងការប្រយុទ្ធប្រឆាំងនឹងជំងឺកូវីដ ១៩ នៅកម្ពុជា ទោះបីជាពួកគាត់ជួបនូវការលំបាកក៏ដោយ។
អ្នកគ្រូពេទ្យស្ម័គ្រចិត្ត ១ រូបនិយាយថា៖ «ពួកខ្ញុំជាគ្រូពេទ្យ ពួកខ្ញុំត្រូវតែយកឈ្នះនូវជំងឺនេះ។ គ្រួសារមានការបារម្ភ តែមិនបានហាមឃាត់ទេ ដោយសារខ្ញុំមកជួយសង្គមឱ្យចៀសផុតពីជំងឺដ៏កាចសាហាវនេះ»។
គិតត្រឹមថ្ងៃទី ១៨ ខែឧសភា កម្ពុជាបានព្យាបាលអ្នកជំងឺកូវីដ១៩នៅទូទាំងប្រទេសជាសះស្បើយបានចំនួន ១៤ ៣៤៣ នាក់ហើយ ក្នុងចំណោមអ្នកឆ្លងជំងឺកូវីដសរុបចំនួន ២២ ៨៨៩ នាក់។
លោក សំណាង ដែលបានដើរចេញពីមណ្ឌលព្យាបាលជំងឺកូវីដ ១៩ កម្រិតស្រាល កោះពេជ្រ បាននិយាយដោយលើកដៃសំពះថា៖ «កាយវិការ និងទឹកចិត្តរបស់ពួកបងប្រុស ហ៊ុន ម៉ាណែត និងបងស្រី ពេជ ចន្ទមុន្នី រួមនឹងក្រុមគ្រូពេទ្យទាំងអស់ គឺជាកម្លាំងចិត្តដ៏ខ្លាំងក្លាដែលធ្វើឱ្យយើងតស៊ូ ជម្នះនូវការលំបាកក្នុងការព្យាបាលឈ្នះនូវជំងឺមួយនេះ រហូតបានជាសះស្បើយ។ ខ្ញុំមិនមានអ្វីក្រៅពីម្រាមដៃ ១០ សំពះសុំអរគុណអស់ពីទឹកចិត្តរបស់ខ្ញុំទៅដល់ក្រុមគ្រូពេទ្យដែលបានជួយជីវិតខ្ញុំ និងអ្នកជំងឺផ្សេងទៀត»៕
