The Phnom Penh Post Search

Search form




Logo of Phnom Penh Post newspaper Phnom Penh Post - អ្នកជំងឺ​ប្តឹង​គ្រូពេទ្យ​ស្រុក​ថា​ព្យាបាល​ខុស​បច្ចេកទេស

អ្នកជំងឺ​ប្តឹង​គ្រូពេទ្យ​ស្រុក​ថា​ព្យាបាល​ខុស​បច្ចេកទេស

ជនរងគ្រោះ​ដែល​ឈឺ​ធ្ងន់​ដោយសារ​គ្រូពេទ្យ​ដាក់​ថ្នាំ​ខុស​។
ជនរងគ្រោះ​ដែល​ឈឺ​ធ្ងន់​ដោយសារ​គ្រូពេទ្យ​ដាក់​ថ្នាំ​ខុស​។ រូបថត សហការី

អ្នកជំងឺ​ប្តឹង​គ្រូពេទ្យ​ស្រុក​ថា​ព្យាបាល​ខុស​បច្ចេកទេស

បន្ទាយមានជ័យៈ ក្រុម​ការងារ​​ចាត់តាំង​របស់​មន្ទីរ​សុខាភិបាល​ខេត្ត លើ​ករណី​បណ្តឹង​របស់​គ្រួសារ​បុរស​ ជា​អ្នកជំងឺ​ម្នាក់​ដែល​​ចោទ​គ្រូពេទ្យ​មណ្ឌល​សុខភាព​ស្រុក​ម៉ាឡៃ ថា​បាន​ព្យាបាល​ខុស​បច្ចេកទេស​បណ្តាលឲ្យ​អ្នកជំងឺ​ប្រតិកម្ម​ថ្នាំ រហូត ធ្លាក់​ខ្លួន​ឈឺធ្ងន់ និង​ពិការ​មិន​អាច​ដើរ​បាន​នោះ បាន​រកឃើញ​ថា កំហុស​ឆ្គង​នេះ កើតឡើង​ដោយ​ភាគី​ទាំង​សងខាង។

កាលពី​ថ្ងៃ​ទី​ ២៧ ខែ​មេសា ប្រពន្ធ និង​​បងប្រុស​របស់​លោក សេក សារឹទ្ធ ជា​អ្នកជំងឺ ក្នុង​នាម​ជាដើម​បណ្តឹង​ជនរងគ្រោះ​បាន​ដាក់​បណ្ដឹង​ទៅកាន់​អង្គភាព​សុខាភិបាល​ខេត្ត​ស្នើសុំ​មន្ត្រី​ជំនាញ​ចុះពិនិត្យ និង​រកយុត្តិធម៌​ដល់​ពួកគេ ដោយ​បាន​អះអាង​ថា លោក​វេជ្ជបណ្ឌិត ប្រាក់ ប៊ុនហៃ ជា​គ្រូពេទ្យ​មណ្ឌល​សុខភាព​ស្រុក និង​ជា​ម្ចាស់​គ្លីនិក​ពិគ្រោះ​យោបល់​ឯកជន​ឈ្មោះ «សួស្តី» បាន​ព្យាបាល និង​ផ្សំ​ថ្នាំ​ខុសបង្ក​ឲ្យ​ជនរងគ្រោះ បែរ​ជា​ឈឺ​ធ្ងន់ និង​ហើម​ជើង​មិន​អាច​ដើរ​បាន ហើយ​ជនរងគ្រោះ បាន​ស្នើ​ទាមទារ​សំណង​ជំងឺ​ចិត្ត ៣ ម៉ឺន​បាត (ជាង ៩០០ ដុល្លារ​សហរដ្ឋអាមេរិក)។ តាមរយៈ​បណ្តឹង​​នេះ មន្ទីរ​សុខាភិបាល​ខេត្ត​ក៏​បាន​ចាត់​តាំង​ក្រុម​ការងារ​ចុះ​អង្កេត​ករណី​នេះ នៅ​រសៀល​ថ្ងៃ​ដដែល​។

ក្នុង​បណ្តឹង​នោះ បងប្រុស​របស់​អ្នក​ជំងឺ គឺ​លោក សេក សុផាត រស់នៅ​ភូមិ​ស្នួល ឃុំ​ពង្រ ស្រុក​ម៉ាឡៃ ខេត្ត​បន្ទាយមានជ័យ​បាន​ឲ្យ​ដឹង​ថា កាលពី​ថ្ងៃ​ទី​ ១០ ខែ មេសា ប្អូនប្រុស​របស់​លោក គឺ​លោក សេក សារិទ្ធ អាយុ ៥៨ ឆ្នាំ ក្នុង​អាការ​វិលមុខ​ក្អួតចង្អោរ​បន្តិចបន្តួច ក៏​បាន​ទៅ​ជួប​លោក​វេជ្ជបណ្ឌិត ប្រាក់ ប៊ុនថៃ ដែល​ត្រូវ​បាន​គេ​ស្គាល់​ថា ជា​ពេទ្យ​ប្រចាំ​មណ្ឌល​សុខភាព​ស្រុក​ម៉ាឡៃ និង​ប្រចាំ​គ្លីនិក​ឯកជន​​ឈ្មោះ សួស្តី ដើម្បី​ព្យាបាល​​ជំងឺ​របស់​ខ្លួន។ លោក​បន្ត​ថា៖ «គ្រូពេទ្យ បាន​ចាក់ថ្នាំ ព្យួរសេរ៉ូម និង​ចេញ​លិខិត​ទិញ​ថ្នាំ ដោយ​ប្អូន​ខ្ញុំ​បាន​ចំណាយ​ប្រាក់​​អស់​ជាង ៣ ពាន់​បាត និង​បាន​​​ថ្នាំ​លេប​ចំនួន ១០ ថ្ងៃ ប៉ុន្តែ​ស្ថានភាព​បែរ​ជា​កាន់តែ​ធ្ងន់ធ្ងរ​ទៅ​វិញ ទើប​ជនរងគ្រោះ ត្រូវ​បាន​​បញ្ជូន​ទៅកាន់​មន្ទីរពេទ្យ​បង្អែក​​ក្រុង​សិរី​ សោភ័ណ ហើយ​ពេទ្យ​នៅ​ទី​នោះ បាន​និយាយ​ថា ប្អូន​ខ្ញុំ​លេប​ថ្នាំ​ខុស​ពី​ជំងឺ និង​ត្រូវ​បាន​ព្យាបាល​ភ្លាមៗ សំណាង​​មិន​បាត់បង់​ជីវិត តែ​ឥឡូវ​ជើង​ទាំង​ពីរ​ដើរ​មិន​បាន»។

លោក ទេស សាម៉ុន អនុប្រធាន​មន្ទីរ​សុខាភិបាល និង​ជា​ប្រធាន​ក្រុម​ការងារ​អង្កេត​បាន​ឲ្យ​ដឹង​ថា ខណៈ​កំពុង​រៀបចំ​របាយការណ៍​សរុប​លទ្ធផល បាន​បញ្ជាក់​ថា បន្ទាប់ពី​ការសាកសួរ​លើ​ភាគី​ពាក់ព័ន្ធ និង​ការពិនិត្យ​ លើ​ថ្នាំ​ដែល​ប្រើប្រាស់​នោះ តាម​ការសន្មត​បឋម​គឺ​ភាគី​ទាំង​ពីរ​សុទ្ធតែ​​មាន​កំហុស​រៀងៗ​គ្នា​បន្តិច​ម្នាក់។ ជនរងគ្រោះ មាន​ជំងឺ​​ប្រចាំ​កាយ ថ្លើម​ប្រភេទ​បេ និង​ជំងឺ​សម្ពាធ​ឈាម​ឡើង ដែល​ងាយ​ប្រតិកម្ម​ទៅ​នឹង​​ថ្នាំ​ព្យាបាល។ លោក​បញ្ជាក់​ថា​៖ «លោកគ្រូ​ពេទ្យ ប្រាក់ ប៊ុនហៃ បាន​អះអាង​ថា ដោយ​ឃើញ​អ្នក​ជំងឺ​មាន​ជំងឺ​ថ្លើម​​អ៊ីចឹង​ហើយ ទើប​បាន​ជា​​ផ្សំ​ថ្នាំ​កុំ​ឲ្យ​ប៉ះពាល់​ថ្លើម តែ​ដោយសារ​អ្នកជំងឺ​ប្រតិកម្ម​នឹង​ថ្នាំ​ដែល​ផ្សំ​នោះ ក៏​បណ្តាល​ឲ្យ​កាន់តែ​ធ្ងន់ធ្ងរ​។ មាន​ការខុស​ឆ្គង​តិចតួច​ម្នាក់ ខ្ញុំ​ក៏​អាណិត​ជនរងគ្រោះ​ដែរ អ៊ីចឹង​រឿង​នេះ មាន​តែ​ការសម្របសម្រួល​គ្នា​ទេ»។

លោក ប្រាក់ ប៊ុនហៃ អាយុ ៦០ ឆ្នាំ ជា​គ្រូពេទ្យ​មណ្ឌល​សុខភាព​ស្រុក​ម៉ាឡៃ និង​​ជា​ម្ចាស់​គ្លីនិក​ឯកជន សួស្តី បាន​ឲ្យ​ដឹង​ថា លោក បាន​ចាក់​ថ្នាំ​ដាក់​សេរ៉ូម និង​ចេញ​ថ្នាំ​ព្យាបាល​​ឲ្យ​ឈ្មោះ សេក សារិទ្ធ ដែល​មាន​តម្លៃ​សរុប​តែ​ជាង ១៤០០ បាត​តែ​ប៉ុណ្ណោះ នៅ​គ្រា​ដែល​អ្នក​ជំងឺ​មាន​អាការ​វិលមុខ និង​ក្អួត​នោះ​។ លោក​ថា៖ «ខ្ញុំ​បាន​ចេញ​ថ្នាំ​វីតាមីន​ឲ្យ​គាត់ ដោយសារ​តែ​គាត់​ស្លេកស្លាំង និង​សន្លប់ ព្រោះ​​អស់​កម្លាំង​ពេក មិន​មាន​អី​ផ្សេង​ពី​នោះ​ទេ ហើយ​គាត់​បាត់​ដល់​ទៅ​កន្លះ​ខែ ទើប​មក​ជួប​ខ្ញុំ​ម្តង​ទៀត ពេល​នោះ គាត់​មាន​អាការ​ធ្ងន់ធ្ងរ ហើយ​ខ្ញុំ​បាន​ដឹង​ថា គាត់​មាន​ជំងឺ​ថ្លើម​ប្រភេទ​បេ ជាតិ​ស្ករ​ឡើង និង​សម្ពាធ​ឈាម​ឡើង​​ផង ទើប​មិន​ហ៊ាន​ព្យាបាល និង​ជួយ​ជូន​គាត់​ទៅ​មន្ទីរពេទ្យ​បង្អែក​​ក្រុង​សិរី​សោភ័ណ ព្រោះ​ខាង​នោះ មាន​ឧបករណ៍​ព្យាបាល​ទំនើប»។

លោក​បន្ត​ថា៖ «អ្នកជំងឺ​នោះ ឈឺ​សន្លាក់​ជើង ខ្ញុំ​ដឹង​ថា គាត់​ខ្វះខាត អ៊ីចឹង​ហើយ​រឿង​នេះ ខ្ញុំ​អាច​ត្រឹម​ឲ្យ ៣ ពាន់​បាត តែ​បើ​ដល់ ៣ ម៉ឺន គឺ​ខ្ញុំ​គ្មាន​លទ្ធភាព​ទេ ខ្ញុំ​ជួយ​គាត់ តែ​គាត់​បែរ​ជា​ប្តឹង​ខ្ញុំ​វិញ»៕

អត្ថបទគួរចាប់អារម្មណ៍