ភ្នំពេញៈ ក្រុមអ្នកជំនាញនៃគណៈកម្មាធិការជាតិសុវត្ថិភាពចរាចរណ៍ផ្លូវគោក កំពុងធ្វើសេចក្តីព្រាងអនុក្រឹត្យថ្មីមួយ ដើម្បីបង្កើនការដាក់ទោសទណ្ឌ និងការផាកពិន័យទៅលើជនដែលបើកបរល្មើសច្បាប់ចរាចរណ៍បន្ទាប់ពីគណៈកម្មាធិការនេះបានប្រកាសកំណត់យកឆ្នាំ ២០២០ ជាឆ្នាំនៃការរឹតបន្តឹងការអនុវត្តច្បាប់ចរាចរណ៍ដើម្បីកាត់បន្ថយការស្លាប់ និងរងរបួសដោយសារគ្រោះថ្នាក់ចរាចរណ៍ដែលកំពុងកើនឡើងខ្ពស់។
បើតាមរបាយការណ៍របស់នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈគ្រាន់តែនៅក្នុងខែមករា ឆ្នាំ ២០២០ មានគ្រោះថ្នាក់ចរាចរណ៍កើតឡើងចំនួន ៣៥៨ ករណីដោយបានបណ្ដាលឱ្យមនុស្សស្លាប់ចំនួន ២០៦ នាក់ និងរងរបួសចំនួន ៥៥៩ នាក់។
លោក ឈួន វ៉ុន អ្នកនាំពាក្យគណៈកម្មាធិការជាតិសុវត្ថិភាពចរាចរណ៍ផ្លូវគោក បានប្រាប់ភ្នំពេញ ប៉ុស្តិ៍ថា បច្ចុប្បន្នចំនួនអ្នកស្លាប់ និងអ្នករងរបួស ដោយសារគ្រោះថ្នាក់ចរាចរណ៍នៅលើដងផ្លូវនៅតែបន្តកើតមានគួរឲ្យកត់សម្គាល់ ហើយមូលហេតុដែលនាំឲ្យមានគ្រោះថ្នាក់ចរាចរណ៍កើតឡើងនោះភាគច្រើនគឺបណ្ដាលមកពីកត្តាមនុស្សមិនគោរពច្បាប់ចរាចរណ៍ដដែលជាដដែល។
លោកបានថ្លែងថា ៧០ ភាគរយ នៃចំនួនអ្នកស្លាប់ និងរងរបួសដោយគ្រោះថ្នាក់ចរាចរណ៍គឺជាអ្នកបើកបរម៉ូតូដែលមិនពាក់មួកសុវត្ថិភាព និងបើកបរលើសល្បឿនកំណត់ បើកបរក្នុងស្ថានភាពស្រវឹង និងមិនគោរពភ្លើងសញ្ញា គំនូស និងស្លាកសញ្ញាចរាចរណ៍ ខណៈ ៣០ ភាគរយទៀត បណ្ដាលមកពីកត្តាយានយន្ត និងកត្តាផ្លូវ។
ដោយពិនិត្យឃើញអ្នកបើកបរមិនមានការផ្លាស់ប្ដូរឥរិយាបថអវិជ្ជមានទាំងនេះហើយទើបនៅពេលនេះក្រុមជំនាញការបច្ចេកទេសនៃគណៈកម្មាធិការជាតិ សុវត្ថិភាពចរាចរណ៍ផ្លូវគោកបាននិងកំពុងពន្លឿនកិច្ចពិភាក្សាលើសេចក្ដីព្រាងអនុក្រឹត្យស្ដីពីការកែសម្រួលមាត្រាមួយចំនួនពាក់ព័ន្ធការដាក់ទោសទណ្ឌ និងផាកពិន័យចំពោះអ្នកប្រព្រឹត្តផ្ទុយពីច្បាប់ចរាចរណ៍ផ្លូវគោក។
លោក វ៉ុន បញ្ជាក់ថា៖ «សេចក្ដីព្រាងនៃអនុក្រឹត្យថ្មីនោះនឹងមានការបង្កើនការដាក់ទោសទណ្ឌ និងផាកពិន័យធ្ងន់ធ្ងរជាងមុន ចំពោះជនទាំងឡាយណាដែលបើកបរបំពានច្បាប់ចរាចរណ៍ដូចជាការបើកបរមិនពាក់មួកសុវត្ថិភាព លើសល្បឿនកំណត់ក្នុងស្ថានភាពស្រវឹង មិនគោរពភ្លើងសញ្ញា គំនូស និងស្លាកសញ្ញាចរាចរណ៍ និងជាពិសេសអ្នកដែលបង្កឲ្យមានគ្រោះថ្នាក់ចរាចរណ៍ដល់អ្នកដទៃ»។
លោកបន្ថែមថា៖ «ការបង្កើនការដាក់ទោសទណ្ឌ និងផាកពិន័យនេះគឺក្នុងគោលបំណងចង់ឲ្យបងប្អូនប្រជាពលរដ្ឋចូលរួមការគោរព និងអនុវត្តច្បាប់ទាំងអស់គ្នាឲ្យបានពេញលេញជាជាងការខ្លាចរអាចំពោះសមត្ថកិច្ចនគរបាលចរាចរណ៍»។
ជុំវិញករណីនេះលោក គង់ រតនៈ នាយកវិទ្យាស្ថានសុវត្ថិភាពចរាចរណ៍ផ្លូវគោកបាននិយាយថា ការពង្រឹងការអនុវត្តច្បាប់ និងការអប់រំផ្សព្វផ្សាយច្បាប់ចរាចរណ៍ប្រកបដោយប្រសិទ្ធភាពនៅតែជាកត្តាចម្បងក្នុងការធ្វើឲ្យប្រសើរឡើងនូវស្ថានភាពចរាចរណ៍នៅកម្ពុជា។
លោកថ្លែងថា កាលពី ១០ ឆ្នាំ មុនវិទ្យាស្ថានរបស់លោកបានផ្ដល់ចក្ខុវិស័យមួយចំនួនទៅឲ្យរដ្ឋាភិបាល ដើម្បីបង្កើតយន្តការនៃការអនុវត្តច្បាប់ឲ្យមានគុណភាពដែលក្នុងនោះត្រូវបង្កើនការចុះអប់រំផ្សព្វផ្សាយច្បាប់ចរាចរណ៍ដល់មូលដ្ឋានប្រជាពលរដ្ឋ និងបន្តរឹតបន្តឹងការអនុវត្តច្បាប់ឲ្យបានជាប្រចាំ និងដោយគ្មានភាពលម្អៀង។
លោក រតនៈ បញ្ជាក់ថា៖ «យើងចង់បានគុណភាពនៃការអនុវត្តច្បាប់ដោយឈរលើគោលការណ៍ស្មើភាពគ្នាចំពោះមុខច្បាប់ និងដោយមិនប្រកាន់បក្ខពួក ឬនិន្នាការនយោបាយអ្វីទាំងអស់។ ប្រសិនបើការអនុវត្តច្បាប់នៅតែមានភាពខ្វះចន្លោះ ឬលម្អៀងដោយប្រការណាមួយនោះការខំប្រឹងធ្វើវិសោធនកម្មច្បាប់របស់យើង ទោះបីធ្វើប៉ុន្មានដងទៀតក៏ដោយ ក៏នៅតែឥតប្រយោជន៍ដែរ»។
លោកបានឲ្យដឹងទៀតថាកាលពី ១០ ឆ្នាំមុន វិទ្យាស្ថានរបស់លោកបានធ្វើការព្យាករថាអត្រាស្លាប់ដោយគ្រោះថ្នាក់ចរាចរណ៍នៅកម្ពុជាក្នុងឆ្នាំ ២០២០ នេះអាចនឹងកើនដល់ ៣ ២០០ នាក់ ប្រសិនបើគ្មានការចុះពង្រឹងការអនុវត្តច្បាប់ឲ្យបានជាប្រចាំហើយការអប់រំផ្សព្វផ្សាយច្បាប់ចរាចរណ៍មិនមានភាពទូលំទូលាយដល់ប្រជាពលរដ្ឋទេនោះ។
លោកបានបន្តថា ថ្វីបើនៅក្នុងឆ្នាំ ២០១៩ កន្លងមកនេះអត្រាស្លាប់ដោយគ្រោះថ្នាក់ចរាចរណ៍មានចំនួន ១ ៩៨១ នាក់ គឺមានការកើនឡើង ២២០ នាក់ បើធៀបទៅនឹងអត្រាស្លាប់ដោយគ្រោះថ្នាក់ចរាចរណ៍ក្នុងឆ្នាំ ២០១៨៕