.jpg)
លោក ឃួង ស្រេង អភិបាលរាជធានីភ្នំពេញថ្លែងក្នុងសន្និសីទកាសែតកាលពីម្សិលមិញ។ ហ៊ាន រង្សី
ភ្នំពេញៈ ក្រុមអ្នកជំនាញកំពុងសិក្សាដើម្បីស្វែងរកដំណោះស្រាយពីបញ្ហាទឹកជន់លិចក្នុងតំបន់មួយចំនួននៃរាជធានីភ្នំពេញ អំឡុងពេលមានភ្លៀងធ្លាក់ ខណៈអ្នកជំនាញខាងបរិស្ថាន មើលឃើញថា មូលហេតុដែលធ្វើឲ្យមានទឹកជន់លិចតំបន់មួយចំនួន ដោយសារការចាក់ដីលុបអាងស្តុកទឹកធម្មជាតិនានា ក្នុងរយៈពេលជាច្រើនឆ្នាំកន្លងមក។
លោក ឃួង ស្រេង អភិបាលរាជធានីភ្នំពេញថ្លែងកាលពីថ្ងៃអង្គារនាទីស្តីការគណៈរដ្ឋមន្ត្រីក្នុងអំឡុងពេលលោកដឹកនាំក្រុមការងារ និងអភិបាលខណ្ឌ ព្រមទាំងប្រធានមន្ទីរប្រមាណ ៤០ នាក់ ចូលរួមក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់រដ្ឋបាលរាជធានីភ្នំពេញ» ដែលរៀបចំដោយអង្គភាពអ្នកនាំពាក្យរាជរដ្ឋាភិបាលថា៖ «សូមឲ្យ (អ្នកជំនាញ) សិក្សាឲ្យបានច្បាស់ថា លូ ប្រឡាយនីមួយៗនៅក្នុងទីក្រុងគឺអាចទប់បានទឹកភ្លៀងបានតែក្រោម ៥០ មិល្លីម៉ែត្រក្នុង ១ វិនាទីទេ។ នេះចំណុចសំខាន់ណាស់ សូមឲ្យប្រជាពលរដ្ឋស្វែងយល់ចំណុចនេះឲ្យបានច្បាស់ក្រោម ៥០ មិល្លីម៉ែត្រ យើងអាចធានាបាន ប៉ុន្តែបើទឹកភ្លៀងលើសពី ៥០ មិល្លីម៉ែត្រ គឺយើងធានាអត់បានទេ។ សូម្បីតែទីក្រុងបាងកកក៏លិចដែរឲ្យតែភ្លៀងធំ»។
ជាមួយគ្នានេះលោកបានឲ្យដឹងថា រដ្ឋបាលរាជធានីភ្នំពេញកំពុងឲ្យក្រុមអ្នកជំនាញ សិក្សាជុំវិញបញ្ហាទឹកលិចនៅភាគខាងលិចនៃរាជធានីភ្នំពេញបើទោះជាគ្មានទឹកភ្លៀង ក៏តំបន់នេះប្រឈមនឹងទឹកជន់លិចដែរ ដែលអាចបង្កើតប្រឡាយមេ ១ ថ្មីទៀត ដើម្បីរំដោះទឹក។
លោកបានបញ្ជាក់ថា៖ «យើងកំពុងតែជំរុញឲ្យអ្នកជំនាញខ្មែររបស់យើង សិក្សាបន្តពីបញ្ហាទឹកលិចនៅភាគខាងលិច។ យើងក៏បានផ្តល់ភារកិច្ចនេះជូនប្រធានមន្ទីរធនធានទឹក និងមន្ទីរសាធារណការរួមទាំងសាលាខណ្ឌកំបូល និងសាលាខណ្ឌពោធិ៍សែនជ័យ ដើម្បីធ្វើការសិក្សាបង្វៀងទឹកនេះចេញពី (ស្រុក) អង្គស្នួលមកចូលទៅស្ទឹងព្រែកត្នោត ហើយត្រូវមានប្រឡាយមួយចូលមកបឹងតាមោក ដើម្បីកាត់បន្ថយចរន្តទឹកកុំឲ្យបុកខ្លាំងមកលើរាជធានីរបស់យើង»។
លោក ហែម ឧត្តម អ្នកជំនាញផ្នែកបរិស្ថានបានប្រាប់ភ្នំពេញ-ប៉ុស្តិ៍ពីម្សិលមិញថា បញ្ហាទឹកជន់លិចរាជធានីភ្នំពេញ មិនមែនជារឿងថ្មីនោះទេ គឺចាប់តាំងពីមានការប្រែប្រួលទាំងបញ្ហាអាកាសធាតុ ហើយអាងស្តុកទឹកធម្មជាតិ បឹងបួនានានៅជុំវិញរាជធានីភ្នំពេញត្រូវបានគេចាក់ដីលុបក្នុងរយៈពេលជាច្រើនឆ្នាំកន្លងមកនេះដែលជាមូលហេតុសូម្បីតែមានភ្លៀងធ្លាក់តែបន្តិចបន្តួចក៏ធ្វើឲ្យមានការជន់លិចរាជធានីភ្នំពេញដែរ។
លោកបារម្ភថា ការដោះស្រាយរបស់សាលារាជធានីភ្នំពេញអាចនឹងជួបប្រទះនូវបញ្ហាប្រឈម បើទោះបីជាសាលារាជធានីមានអភ័យឯកសិទ្ធិក្នុងការរៀបចំទីក្រុងក៏ដោយ ប៉ុន្តែស្ថាប័ននេះត្រូវការការសហការជាមួយស្ថាប័នពាក់ព័ន្ធផ្សេងទៀត ជាពិសេសក្រសួងធនធានទឹក និងក្រសួងបរិស្ថាន។
លោក ឧត្តម បន្តថាអ្វីដែលពិបាកទៀតនោះគឺទាក់ទងជាមួយនឹងឆន្ទៈបុគ្គល ដែលជាអ្នកមានផលប្រយោជន៍ទាក់ទង និងលាភសក្ការៈផ្សេងៗ ព្រោះថា ការរំដោះទឹកលិច គឺមានជាប់ពាក់ព័ន្ធប្រទាក់ក្រឡាគ្នាច្រើនដែលទាមទារឲ្យមានការចូលរួម និងអនុវត្តទាំងអស់គ្នា។
លោកបញ្ជាក់ថា៖ «ការដែលបន្តលុបអាងស្តុកទឹក និងការប្រែប្រួលអាកាសធាតុគឺជាមូលហេតុគួបផ្សំគ្នា ហើយកត្តានេះនឹងធ្វើឲ្យបញ្ហាជំនន់ទឹកភ្លៀងដែលមិនមែនជារឿងថ្មី ប៉ុន្តែបរិមាណអាចនឹងច្រើនជាងមុន ដោយមិនអាចព្យាករទុកមុន»។ លោកលើកឡើងថាម្យ៉ាងទៀត បញ្ហាទឹកលិចក៏អាចទាក់ទងនឹងការគ្រប់គ្រងទីក្រុងដែរ «ថាយើងបានធ្វើបានល្អប៉ុនណាមកដល់ពេលនេះដោយការរក្សាទុកអាងស្តុកទឹកធម្មជាតិ!»។
លោក ហែម ឧត្តម បានថ្លែងថា លោកជឿជាក់ថា តាមរយៈការគ្រប់គ្រង និងការរៀបចំទីក្រុងដោយឆ្លាតវៃ ថ្នាក់ដឹកនាំនឹងអនុវត្តទៅតាមប្លង់មេរបស់រាជធានីភ្នំពេញ ដែលបានផ្តល់ការប្រឹក្សាកន្លងមក ខណៈដែលលោកមើលឃើញថា កន្លងមកការអភិវឌ្ឍនៅរាជធានីភ្នំពេញគឺបានដើរប្រាសចាកពីប្លង់មេដែលបានកំណត់៕
វីដេអូ៖
