ភ្នំពេញៈ អ្នកជំនាញរបស់អង្គការសហប្រជាជាតិដើម្បីអភិវឌ្ឍន៍ឧស្សាហកម្ម ហៅកាត់ថា UNIDO បានលើកឡើងថា ការប្រើប្រាស់ និងការផលិតអាហារដែលមានសុវត្ថិភាពគឺមានអត្ថប្រយោជន៍សម្រាប់រយៈពេលខ្លី និងរយៈពេលវែងដល់ប្រជាជននៅលើភពផែនដី និងសេដ្ឋកិច្ច។
ការអះអាងយ៉ាងដូច្នេះបានធ្វើឡើងក្នុងសិក្ខាសាលាអំពីសុវត្ថិភាពចំណីអាហារសម្រាប់អ្នកសារព័ត៌មានដែលបានប្រព្រឹត្តឡើងកាលពីថ្ងៃទី ២៤ ឧសភា តាមរយៈ ហ្ស៊ូម ដើម្បីចូលរួមអបអរទិវាសុវត្ថិភាពអាហារពិភពលោកដែលជាព្រឹត្តិការណ៍ប្រចាំឆ្នាំមួយត្រូវធ្វើឡើងនៅថ្ងៃទី ៧ ខែមិថុនា។
កាលពីឆ្នាំ ២០១៨ មហាសន្និបាតអង្គការសហប្រជាជាតិបានអនុម័តសេចក្ដីសម្រេចមួយដោយបានប្រកាសយកថ្ងៃទី ៧ មិថុនា ជាទិវាសុវត្ថិភាពអាហារពិភពលោកដែលជាព្រឹត្តិការណ៍ប្រចាំឆ្នាំមួយមានការសម្របសម្រួលពីអង្គការស្បៀងអាហារពិភពលោក (FAO) និងអង្គការសុខភាពពិភពលោក (WHO)។
សេចក្ដីសម្រេចនេះបានសង្កត់ធ្ងន់ថា សុវត្ថិភាពអាហារ គឺជាធាតុចាំបាច់មួយសម្រាប់ការសម្រេចបាននូវសន្តិសុខស្បៀង ហើយសុវត្ថិភាពអាហារគឺជារឿងរបស់មនុស្សគ្រប់រូប។ លើសពីនេះទៀតការអនុលោមតាមសុវត្ថិភាពអាហារគឺជាកត្តាសំខាន់ដែលរួមចំណែកដល់ការអភិវឌ្ឍពាណិជ្ជកម្ម ការបង្កើតការងារ និងការកាត់បន្ថយភាពក្រីក្រ។ នេះបើតាមសេចក្តីប្រកាសរបស់អង្គការ UNIDO។
លោក Setty Seetharama ប្រធានទីប្រឹក្សាបច្ចេកទេសគម្រោងនៃអង្គការ UNIDO បានថ្លែងក្នុងឱកាសនោះថា បើទោះជាការប្រើប្រាស់ និងការផលិតអាហារដែលមានសុវត្ថិភាពមានអត្ថប្រយោជន៍ ប៉ុន្តែសុវត្ថិភាពអាហារនៅតែជាឧបសគ្គមួយសម្រាប់ប្រទេសទាំងអស់ ជាពិសេសប្រទេសកំពុងអភិវឌ្ឍន៍។
តាមការប៉ាន់ប្រមាណរបស់អង្គការសុខភាពពិភពលោក ការបរិភោគអាហារដែលមិនមានសុវត្ថិភាព បណ្តាលឱ្យមនុស្សធ្លាក់ខ្លួនឈឺប្រមាណ ៦០០ លានករណី នៅទូទាំងពិភពលោក ដែលក្នុងនោះឈានរហូតដល់មានការបាត់បង់ជីវិតមានប្រមាណ ៤២០ ០០០ នាក់ ជារៀងរាល់ឆ្នាំ។
សម្រាប់ប្រទេសកម្ពុជា លោក Setty បានបញ្ជាក់ថា អ្នកស្លាប់ប្រមាណ ៨ ភាគរយ ដែលមានអាយុក្រោម ៥ ឆ្នាំ ត្រូវបានស្លាប់ដោយជំងឺរាករូស។ ក្នុងនោះគ្រោះថ្នាក់នៃជំងឺរាករូសនៅកម្ពុជាត្រូវបានចាត់ទុកថាជាតួលេខមួយខ្ពស់ ហើយវាបានកើតឡើងចំពោះពលរដ្ឋដោយមិនសំដៅលើអ្នកមាន ឬអ្នកក្រនោះទេ។
លោក Setty បានបង្ហាញការយល់ឃើញថា សិក្ខាសាលាក្នុងពេលនេះនឹងនាំឱ្យផ្តល់ចំណេះដឹងដល់អ្នកសារព័ត៌មាន ដើម្បីឱ្យពួកគេបន្តផ្សព្វផ្សាយទៅកាន់សាធារណជនអំពីអត្ថប្រយោជន៍សម្រាប់រយៈពេលខ្លី និងរយៈពេលវែង ចំពោះការប្រើប្រាស់ និងការផលិតអាហារដែលមានសុវត្ថិភាព។
លោកបានបញ្ជាក់ថា៖ «គ្រប់គ្នាអាចបង្កើតការផ្លាស់ប្តូរជាវិជ្ជមានមួយនៅក្នុងប្រទេសកម្ពុជាដោយផ្តល់នូវរបាយការណ៍ដែលអាចយល់បានត្រឹមត្រូវ និងទាន់ពេលវេលាចំពោះបញ្ហាសុវត្ថិភាពចំណីអាហារសំខាន់។ ឧទាហរណ៍ប្រព័ន្ធផ្សព្វផ្សាយអាចអប់រំអំពីរបៀបផ្លាស់ប្តូរការអនុវត្តរបស់យើង ដូចជា របៀបផលិតអាហារ និងដំណាក់កាលនៃការផលិត និងទទួលបានការបញ្ជាក់ច្បាស់លាស់នូវអាហារដែលមានសុវត្ថិភាព ជាពិសេសសារប្រយោជន៍របស់វា»៕