.jpg)
ការបង្កបង្កើនផលស្រូវប្រាំងក្នុងខេត្តព្រៃវែង នាពេលកន្លងមក។ រូបថត ភ្នំពេញ ប៉ុស្តិ៍
ភ្នំពេញ៖ ឥទ្ធិពលជ្រលងសម្ពាធទាបឥណ្ឌា និងខ្យល់មូសុងនិរតី កំពុងបង្កឲ្យមានភ្លៀងធា្លក់កាន់តែច្រើនឡើង និងរាយប៉ាយគ្របដណ្ដប់លើប្រទេសកម្ពុជា ខណៈអ្នកជំនាញផ្នែកកសិកម្ម ជំរុញឲ្យកសិករផ្ដោតលើចំណុចសំខាន់ ៣ ដើម្បីជោគជ័យក្នុងការដាំដុះស្រូវនៅដើមរដូវវស្សាឆ្នាំនេះ។
ក្រសួងធនធានទឹក និងឧតុនិយមបានចេញផ្សាយនៅថ្ងៃទី ២៧ ខែមេសានេះ ដោយបានព្យាករថា៖ «រដូវវស្សាឆ្នាំនេះ នឹងចូលមកដល់នៅដើមសប្ដាហ៍ទី១ នៃខែឧសភាខាងមុខនេះ។ បណ្ដាខេត្តនៃតំបន់វាលទំនាបកណ្ដាលភាគខាងត្បូង និងភាគពាយព្យនៃប្រទេសកម្ពុជា នឹងមានបរិមាណទឹកភ្លៀងធ្លាក់ច្រើនជាងបណ្ដាខេត្តមួយចំនួនទៀត ដែលស្ថិតនៅជាប់ជួរភ្នំដងរ៉ែក និងខ្ពង់រាបឦសាន រួមទាំងបណ្ដាខេត្តជាប់តំបន់មាត់សមុទ្រផងដែរ»។
ជាមួយការមកដល់លឿននៃរដូវវស្សាឆ្នាំនេះ អ្នកជំនាញការផ្នែកកសិកម្មបានអំពាវនាវ និងជំរុញដល់ប្រជាកសិករនៅទូទាំងប្រទេសរៀបចំខ្លួនឲ្យបានល្អ ក្នុងការបង្កបង្កើនផលស្រូវដើមរដូវវស្សានេះ ដោយផ្ដោតការយកចិត្តទុកដាក់ជាសំខាន់ ទៅលើការត្រួតពិនិត្យស្រូវពូជដែលមានគុណភាព និងដែលមានតម្រូវការច្រើននៅលើទីផ្សារ ព្រមទាំងមធ្យោបាយនានា ដែលបម្រើដល់ការងារបង្កបង្កើនផលនាដើមរដូវវស្សានេះ។
លោក ងិន ឆាយ អគ្គនាយកនៃអគ្គនាយកដ្ឋានកសិកម្មបានប្រាប់ ភ្នំពេញ ប៉ុស្តិ៍ នៅថ្ងៃទី ២៧ ខែមេសាថា នៅពេលនេះ របាយទឹកភ្លៀងបានធ្លាក់ជោកជាំ និងមានទឹកដក់នៅក្នុងដីស្រែមួយចំនួនហើយ។ នេះជាសញ្ញាមួយប្រាប់ដល់ប្រជាកសិករថា វាជាពេលវេលាដែលត្រូវចាប់ផ្ដើមបង្កបង្កើនផលស្រូវដើមរដូវវស្សាហើយ។ ជាពិសេសប្រជាកសិករដែលរស់នៅក្នុងតំបន់វាលទំនាបកណ្ដាលភាគខាងត្បូង និងភាគពាយព្យនៃប្រទេសកម្ពុជា។
លោកថ្លែងថា៖ «អ្វីដែលសំខាន់ក្នុងពេលនេះ ប្រជាកសិករត្រូវត្រួតពិនិត្យទៅលើចំណុចសំខាន់ ៣ រួមមានការជ្រើសរើសស្រូវពូជដែលមានគុណភាព និងមានតម្រូវការចាំបាច់ខ្លាំងនៅក្នុងផ្សារស្រូវអង្ករ ការត្រួតពិនិត្យទៅលើមធ្យោបាយនានា ដែលបម្រើដល់ការងារបង្កបង្កើនផលស្រូវ ធ្វើយ៉ាងណាកុំឲ្យមានការរាំងស្ទះដល់ដំណើរការបង្កបង្កើនផល និងការត្រួតពិនិត្យប្រភពទឹកឲ្យបានច្បាស់លាស់ ចៀសវាងមានការខ្វះខាត ដែលនាំឲ្យខូចខាតដំណាំស្រូវ ក្រោយការដាំដុះរួច»។
យោងតាមការព្យាករអាកាសធាតុលើកទី២ សម្រាប់ឆ្នាំ ២០២១ របស់ក្រសួងធនធានទឹក និងឧតុនិយម ដែលបានចេញផ្សាយកាលពីថ្ងៃទី ២១ ខែមេសា បានបញ្ជាក់ថា រដូវវស្សាឆ្នាំនេះ នឹងគ្មានកូនរដូវប្រាំងកើតឡើងនោះទេ។ ប៉ុន្តែមានព្យុះប្រមាណពី ៨ ទៅ ៣០ ព្យុះ កើតឡើងនៅក្នុងសមុទ្រប៉ាស៊ីហ្វិក និងសមុទ្រចិនខាងត្បូង ដែលឥទ្ធិពលនៃព្យុះទាំងនោះ នឹងបង្កឲ្យមានភ្លៀងធ្លាក់ច្រើនក្នុងប្រទេសកម្ពុជា។ ជាមួយគ្នានេះ បាតុភូតគ្រោះធម្មជាតិ ខ្យល់កន្ត្រាក់ និងរន្ទះបាញ់ ក៏នឹងកើតមានច្រើនផងដែរ។
ចាប់តាំងពីមានភ្លៀងធ្លាក់ច្រើនកាលពីសប្ដាហ៍ទី៣ នៃខែមេសា ឆ្នាំ ២០២១ មកទល់ពេលនេះ ការងារភ្ជួររាស់ដីស្រែរបស់ប្រជាកសិករនៅទូទាំងប្រទេសបានសម្រេចចំនួនជាង ៨៥ ០០០ ហិកតា និង បានដាំដុះស្រូវដើមរដូវវស្សា [ប្រភេទស្រូវស្រាល] បានចំនួនជាង ២៤ ០០០ ហិកតា។ នេះបើតាមលោក ងិន ឆាយ។
លោកបន្តថា ចំណែកការងារប្រមូលផលស្រូវប្រាំងនៅទូទាំងប្រទេសបានសម្រេចរួចរាល់ទាំងស្រុងហើយ ជាមួយបរិមាណផលសរុប ២,៩៣ លានតោន លើផ្ទៃដីដាំដុះសរុប ៦៤៦ ៥៣០ ហិកតា៕
