សៀមរាបៈ ក្រុមអ្នកជំនាញការចំពោះកិច្ចនៃគណៈកម្មាធិការអន្តរជាតិដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ (ICC-Angkor) សាទរចំពោះគំនិតផ្តួចផ្តើមរបស់អាជ្ញាធរជាតិអប្សរាក្នុងការកសាងផ្លូវកង់ក្នុងរមណីយដ្ឋានអង្គរដែលបានគិតគូរដល់សុវត្ថិភាពរបស់អ្នកធ្វើដំណើរ បញ្ហាបរិស្ថាន តម្លៃវប្បធម៌ តម្លៃបេតិកភណ្ឌបែបជនបទមិនប៉ះពាល់ដល់ស្រទាប់ដី និងមានភាពបត់បែនទៅតាមដើមឈើតូចធំ។ នេះបើតាមអាជ្ញាធរជាតិអប្សរា។
ហ្វេសប៊ុករបស់អាជ្ញាធរជាតិអប្សរាកាលពីថ្ងៃអាទិត្យបញ្ជាក់ថា៖ «ក្រុមអ្នកជំនាញការបានសាទរចំពោះគំនិតផ្តួចផ្តើមរបស់អាជ្ញាធរជាតិអប្សរាក្នុងការរៀបចំផ្លូវកង់នេះ និងថែមទាំងបានគិតគូរខ្ពស់ចំពោះសុវត្ថិភាពក្នុងការធ្វើដំណើរទៅមកប្រកបដោយសុវត្ថិភាពរបស់ប្រជាជន សិស្សានុសិស្ស ភ្ញៀវទេសចរក៏ដូចជាយកចិត្តទុកដាក់ខ្ពស់លើបញ្ហាបរិស្ថាន»។
លោក ឡុង កុសល ប្រធាននាយកដ្ឋានផ្សព្វផ្សាយនៃអាជ្ញាធរជាតិអប្សរាបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា អ្វីដែល ICC-Angkor បានសាទរនោះ គឺជាការផ្តួចផ្តើមថ្មីរបស់អាជ្ញាធរជាតិអប្សរាក្នុងការបង្កើតផ្លូវកង់ដើម្បីជាផលប្រយោជន៍ដល់ប្រជាពលរដ្ឋរស់នៅក្នុងតំបន់នេះក៏ដូចជាសុវត្ថិភាពរស់នៅសិស្សានុសិស្សដែលត្រូវការធ្វើដំណើរទៅមកជាប្រចាំរៀងរាល់ថ្ងៃ។ មួយវិញទៀតការស្ថាបនាផ្លូវក៏ដើម្បីបង្កើតផលិតផលថ្មីមួយទៀត ដើម្បីឱ្យភ្ញៀវទេសចរអាចធ្វើដំណើរទៅកម្សាន្តតាមប្រាសាទផង និងតាមផ្ទះរបស់ប្រជាពលរដ្ឋតាមសហគមន៍ផង។
លោក ឡុង កុសល ថ្លែងថា៖ «(ភ្ញៀវទេសចរ) គាត់អាចមើលឃើញផ្ទះ និងរបៀបរបបរស់នៅរបស់បងប្អូនប្រជាពលរដ្ឋផងដែរ។ ទី ៣ គឺផលប្រយោជន៍ទៅដល់ផ្នែកបរិស្ថានគឺថាយើងធ្វើយ៉ាងណារៀបចំទីកន្លែងហ្នឹងឱ្យបានល្អប្រសើរ។ ទាំងនេះគឺជាចំណុច ៣ យ៉ាងដែលសំខាន់ដែលពាក់ព័ន្ធជាមួយនឹងផ្លូវកង់ហ្នឹង»។ បើតាមលោក ឡុង កុសល កាលពីមុនចំណុចនេះគឺជាដីព្រៃធម្មតាមិនមានផ្លូវនោះទេ។
ហ្វេសប៊ុកដដែលបញ្ជាក់ថា អាជ្ញាធរជាតិអប្សរាស្ថាបនាផ្លូវនេះឡើងដើម្បីសម្រួលចរាចរណ៍ដល់ប្រជាពលរដ្ឋសិស្សានុសិស្ស ក៏ដូចជាភ្ញៀវទេសចរក្នុងការជិះកង់ កាត់បន្ថយការកកស្ទះ និងគ្រោះថ្នាក់ចរាចរណ៍លើផ្លូវធំផងដែរ។ ផ្លូវនេះកសាងក្នុងទិសដៅស្របនឹងផ្លូវកៅស៊ូដែលមានស្រាប់ និងឃ្លាតពីផ្លូវកៅស៊ូចម្ងាយប្រមាណ ២៥ ម៉ែត្រដោយអាស្រ័យទៅតាមទីតាំង និងស្ថានភាពដី។
លោក យិត ចាន់ដារដ្ឋ អគ្គនាយករង អាជ្ញាធរជាតិអប្សរាត្រូវបានស្រង់សម្ដីនៅក្នុងហ្វេសប៊ុកនេះថា៖ «អាជ្ញាធរជាតិអប្សរាបានគិតគូរច្បាស់ពីការលើកតម្លៃបរិស្ថាន តម្លៃវប្បធម៌ ក៏ដូចជាតម្លៃបេតិកភណ្ឌបែបជនបទពិសេសផ្លូវកង់នេះ កសាងជាប្រភេទផ្លូវស្រាលមិនប៉ះពាល់ដល់ស្រទាប់ដី និងមានភាពបត់បែនទៅតាមដើមឈើតូចធំជាច្រើន»។
បើតាមលោក យិត ចាន់ដារដ្ឋ ផ្លូវកង់នេះមានទទឹង ២ ម បណ្ដោយ ២៣ គ.ម ចេញពីកន្លែងឆែកសំបុត្រចាស់ កាត់ក្រោយអង្គរវត្តបន្តទៅប្រាសាទក្រវាន់កាត់ខាងត្បូងប្រាសាទបន្ទាយក្ដីបត់ទៅខាងជើងប្រាសាទតាព្រហ្មឆ្ពោះទៅស្ពានប្រាសាទតាកែវ។ ចំណែកតំបន់ផ្លូវវង់ធំ គឺចេញដំណើរពីស្រះស្រង់រហូតដល់ដីឆ្នាំង។
បើតាមហ្វេសប៊ុកដដែល បច្ចុប្បន្នផ្លូវកង់ដែលកំពុងស្ថិតក្នុងគម្រោងសាកល្បងបានស្ថាបនារួចរាល់ប្រវែង ៣០០ ម៉ែត្រ ហើយនឹងបន្តធ្វើទៀត ក្រោយពីកិច្ចប្រជុំពេញអង្គនៃ ICC Angkor នៅពាក់កណ្ដាលខែធ្នូ។
យោងតាមសេចក្តីប្រកាសព័ត៌មានរបស់អាជ្ញាធរជាតិអប្សរាកាលពីថ្ងៃសុក្របានឱ្យដឹងថា កិច្ចប្រជុំពេញអង្គនេះនឹងមានវត្តមានលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិអប្សរា សហប្រធាន ICC-Angkor ទាំង ២ គឺបារាំង និងជប៉ុន និងតំណាងអង្គការយូណេស្កូប្រចាំកម្ពុជា។ កិច្ចប្រជុំនេះនឹងតាមដានគ្រប់អនុសាសន៍ បច្ចេកទេសជួសជុល ពិនិត្យមើលផលប៉ះពាល់ចំណុចវិជ្ជមាន អវិជ្ជមាន ដើម្បីគាំពារអភិរក្ស និងអភិវឌ្ឍប្រកបដោយចីរភាព នៅក្នុងតំបន់រមណីយដ្ឋានវប្បធម៌ និងប្រវត្តិសាស្ត្រសម្រាប់មនុស្សជាតិ។
យោងតាមសេចក្តីប្រកាសព័ត៌មានរបស់ ICC-Angkor ដែលភ្នំពេញប៉ុស្ដិ៍ទទួលបានពីថ្ងៃអាទិត្យឱ្យដឹងថា អ្នកជំនាញចំពោះកិច្ចរបស់ ICC-Angkor ចុះពិនិត្យទីតាំងគម្រោងមួយចំនួននៅឧទ្យានអង្គរ និងតំបន់សំបូរព្រៃគុកចាប់ពីថ្ងៃទី ៣ ដល់ថ្ងៃទី ៩ ខែធ្នូ។ នៅក្នុងអំឡុងពេលនេះអ្នកជំនាញចំពោះកិច្ចសម្រាប់ការអភិវឌ្ឍប្រកបដោយចីរភាព និងក្រុមការងារក្រសួងទេសចរណ៍ក៏ធ្វើទស្សនកិច្ចបឹងទន្លេសាប ដើម្បីរៀបចំសេចក្តីព្រាងប្លង់មេ (Master plan) សម្រាប់ការអភិវឌ្ឍទេសចរណ៍នៅខេត្តសៀមរាប៕