.jpg)
មន្ត្រីនគរបាលចូលរួមវគ្គបណ្ដុះបណ្ដាលស៊ើបអង្កេតម្សិលមិញ។ ហុង មិនា
ភ្នំពេញៈ អ្នកជំនាញឯកទេសអន្តរជាតិប្រមាណជិត ១០០ នាក់ បានចូលរួមចែករំលែកបទពិសោធ និងបណ្តុះបណ្តាលដល់មន្ត្រីកងរាជអាវុធហត្ថ ព្រះរាជអាជ្ញា និងមន្ត្រីនគរបាលកម្ពុជា រយៈពេល ៦ ថ្ងៃ ជុំវិញនីតិវិធីនៃការស៊ើបអង្កេតបទល្មើសឃាតកម្មនៅកម្ពុជា ខណៈមន្ត្រីជំនាញអះអាងថា ការបណ្តុះបណ្តាលនេះ ជាធាតុចូលបន្ថែមទៀតក្នុងការពង្រឹងសមត្ថភាពរបស់មន្ត្រី ស្របពេលបទល្មើសឃាតកម្មលើកុមារហាក់កើនឡើង។
សិក្ខាសាលាស្តីពីបទល្មើសមនុស្សឃាត ការផ្តួចផ្តើមគំនិតជាមូលដ្ឋានគ្រឹះសំខាន់ៗ ត្រូវបានរៀបចំឡើងដោយអង្គការការពារកុមារ CPU សហការជាមួយអង្គការ Cambodia Childrens Fund បានធ្វើឡើងជាលើកដំបូង ដោយមានសិក្ខាកាមជិត ២០០ នាក់ មកពីស្ថាប័នជំនាញរបស់កម្ពុជាចូលរួមចាប់ពីថ្ងៃទី ១០ ដល់ថ្ងៃទី ១៥ ខែ មិថុនា ២០១៩។
លោក James McCabe នាយកប្រតិបត្តិនៃអង្គការការពារកុមារ បានឲ្យដឹងក្នុងឱកាសនោះថា ព្រឹត្តិការណ៍នេះ នឹងត្រូវបានបើកចំហដល់មន្ត្រីកងកម្លាំងនគរបាលជាតិកម្ពុជា កងរាជអាវុធហត្ថ និងព្រះរាជអាជ្ញាមួយចំនួន ដែលមានភារកិច្ចខាងស៊ើបអង្កេតទៅលើបទល្មើសដ៏សំខាន់មួយក្នុងចំណោមបទល្មើសសំខាន់ផ្សេងៗទៀត ដូចជាមរណភាពរបស់មនុស្សដទៃផ្សេងទៀត។
លោកបន្តថា ជាមួយគ្នានេះ មន្ត្រីជំនាញឯកទេសបរទេសទាំងនោះ ធ្វើបទបង្ហាញផ្សេងៗ និងធ្វើការពិភាក្សាអំពីបច្ចេកទេសស៊ើបអង្កេត និងបច្ចេកទេសកោសល្យវិច័យនាសម័យទំនើប ដើម្បីជាវិធីសាស្ត្រឈានទៅរកការបំបែករឿងក្តីនៃអំពើឃាតកម្ម ជាពិសេសបទល្មើសឃាតកម្មលើកុមារជាដើម។
លោក McCabe ថ្លែងថា៖ «អ្នកចូលរួមទាំងអស់ នឹងទទួលបានចំណេះដឹងគ្រប់ទាំងអស់ មិនត្រឹមតែឆ្លើយតបទៅនឹងបទល្មើសប្រឆាំងជាមួយកុមារទេ គឺអាចអនុវត្តបានគ្រប់បទល្មើសទាំងអស់ ដែលកើតឡើង។ ប្រទេស កម្ពុជាកំពុងអភិវឌ្ឍលឿនរហ័ស ដូច្នេះដើម្បីឲ្យមន្ត្រីកម្ពុជា គិតពីវិធីសាស្ត្របច្ចេកវិទ្យាដែលមិនទាន់បានប្រើប្រាស់នៅក្នុងប្រទេស ដូចជាការគ្រប់គ្រងកន្លែងកើតហេតុ ការប្រើប្រាស់អង្គធាតុប្រតិករទៅនឹងឈាម ការប្រើប្រាស់បច្ចេកទេសចាប់យកសំណាក DNA ដែលវានឹងមកដល់កម្ពុជា»។
លោក Nigel Lee សាស្ត្រាចារ្យផ្នែកកោសល្យវិច័យមកពីប្រទេសអង់គ្លេស បាននិយាយថា មន្ត្រីប៉ូលិសនៅទូទាំងពិភពលោក សុទ្ធតែមានបទពិសោធខុសៗគ្នាទៅតាមតំបន់ និងបទល្មើសដែលកើតឡើង។ ដូច្នេះ ដើម្បីឲ្យប្រាកដថា មន្ត្រីប៉ូលិស ជាពិសេសមន្ត្រីមានសមត្ថកិច្ចរបស់កម្ពុជា បានអនុវត្តទៅតាមបច្ចេកទេសដ៏ត្រឹមត្រូវនោះ ការបណ្តុះបណ្តាលគឺជារឿងសំខាន់។
លោកបញ្ជាក់៖ «វាដូចមានការកើតឡើងចំពោះមន្ត្រីប៉ូលិសនៅទូទាំងពិភពលោកដែរ ពេលខ្លះ ពួកគាត់មានជំនាញហើយ ប៉ុន្តែមានបទពិសោធខ្លះ ពួកគាត់បានអនុវត្តទៅវាខុស។ អ៊ីចឹងការរៀននូវជំនាញទាំងនេះ គឺត្រូវតែរៀនឡើងវិញ និងដដែលៗ ដើម្បីឲ្យប្រាកដថា ការអនុវត្តរបស់ពួកគាត់ គឺលែងមានកំហុស»។
លោក អុិន បូរ៉ា អគ្គស្នងការរងនគរបាលជាតិ ថ្លែងថាបទល្មើសឃាតកម្ម ជាពិសេសបទល្មើសលើកុមារនេះ មិនមែនជាបញ្ហារបស់កម្ពុជាតែម្នាក់ឯងនោះទេ វាគឺជាបញ្ហារបស់ពិភពលោកទាំងមូល ដែលចាំបាច់ត្រូវពិភាក្សាគ្នា ដើម្បីឈានទៅរកវិធានការទប់ស្កាត់ក្នុងការអនុវត្តជាក់ស្តែងឲ្យស្របទៅតាមការអភិវឌ្ឍរបស់សង្គម។
ប្រទេស កម្ពុជា បានខិតខំយ៉ាងខ្លាំងក្នុងការទប់ស្កាត់បទឧក្រិដ្ឋធំៗ ដោយធ្វើយ៉ាងណាឲ្យបទល្មើសទាំងនោះមានការថយចុះ ស្របពេលស្ថានការណ៍ចុងក្រោយនេះ បទល្មើសធំៗ ដូចជាប្លន់ប្រដាប់អាវុធជាដើមនោះ ពិតជាមានការថយចុះ ប៉ុន្តែបែរជាបទល្មើសឃាតកម្មរំលោភសម្លាប់មានការកើនឡើងទៅវិញ។
លោកថ្លែងថា៖ «យើងនឹងបន្តខិតខំការងារទាំងនេះ ព្រោះបទល្មើសតែងមានការវិវត្ត អ៊ីចឹងទាមទារឲ្យមន្ត្រីនគរបាលរបស់យើង មានមុខជំនាញច្បាស់លាស់ ដើម្បីធ្វើការពាក់ព័ន្ធនឹងការងារស៊ើបអង្កេតនេះ ដែលនៅពេលនេះ មានស្ថាប័នច្រើនណាស់ ដែល CPU បាននាំ (ជំនាញ) ពាក់ព័ន្ធនឹងការងារច្បាប់ទម្លាប់។ ហើយក្នុងពេលខាងមុខនេះ CPU នឹងបន្តធ្វើការបណ្តុះបណ្តាលទៅលើមន្ត្រីរបស់យើង នៅខេត្តមួយចំនួនទៀត ដែលយើងកំពុងតែឯកភាពគ្នា ដែលនឹងបន្តពីខេត្តមួយទៅខេត្តមួយទៀត»។
យោងតាមអង្គការ CPU ចាប់តាំងពីឆ្នាំ ២០១៣ មក បានសហការជាមួយអាជ្ញាធរកម្ពុជា ដោយធ្វើការលើបទល្មើសឃាតកម្មប្រមាណ ១ ៤៤៣ ករណី ដោយក្នុងនោះ ៨៣ % បានឈានទៅរកការចាប់ខ្លួនជនល្មើស ដាក់ទោសទណ្ឌយ៉ាងតឹងរឹុង ដែលបង្ហាញពីកិច្ចខិតខំប្រឹងប្រែងរបស់អាជ្ញាធរកម្ពុជា ក្នុងការចូលរួមទប់ស្កាត់បទល្មើសឃាតកម្ម ជាពិសេសកើតឡើងលើកុមារ៕
