The Phnom Penh Post Search

Search form




Logo of Phnom Penh Post newspaper Phnom Penh Post - អ្នក​ជំនាញ UN រិះគន់​ច្បាប់​ស្តី​ពី​អង្គការ

អ្នក​ជំនាញ UN រិះគន់​ច្បាប់​ស្តី​ពី​អង្គការ

ក្រុម​មន្ត្រី​អង្គការ​សង្គម​ស៊ីវិល​ក្នុង​ជំនួប​មួយ​នៅ​រដ្ឋសភា​នា​ពេល​កន្លង​មក​។
ក្រុម​មន្ត្រី​អង្គការ​សង្គម​ស៊ីវិល​ក្នុង​ជំនួប​មួយ​នៅ​រដ្ឋសភា​នា​ពេល​កន្លង​មក​។ ហេង ជីវ័ន

អ្នក​ជំនាញ UN រិះគន់​ច្បាប់​ស្តី​ពី​អង្គការ

ភ្នំពេញៈ ខណៈ​ដែល​សេចក្តី​ព្រាង​ច្បាប់​ស្តីពី​អង្គការ​ក្រៅ​រដ្ឋាភិបាល​ដ៏​ចម្រូងចម្រាស​ខ្លាំង ទីបំផុត​បាន​ទៅ​ដល់​រដ្ឋសភា​​កាលពី​ថ្ងៃ​អង្គារ​អ្នក​ជំនាញ​សិទ្ធិ​មនុស្ស​អង្គការ​សហប្រជាជាតិ​បាន​ក្លាយ​ជា​សំឡេង​ចុងក្រោយ​បំផុត​ដែល​រិះគន់​លើ​ច្បាប់​ចម្លង​នៃ​ច្បាប់​នេះ​ដែល​បាន​លេច​ធ្លាយ​​ចេញ​ដោយ​អ្នក​ជំនាញ​រូប​នេះ​ថា​សេចក្តី​ព្រាង​ច្បាប់​បាន​បង្ហាញ​ឲ្យ​ឃើញ​ថា​វា​ «មិនមែន​ដើម្បី​បម្រើ​វិស័យ​នេះ​ទេ» ប៉ុន្តែ «​ដើម្បី​គ្រប់គ្រង​វិស័យ​នេះ​​»។

លោក ឈាង វុន អ្នក​តំណាងរាស្រ្ត​គណបក្ស​ប្រជាជន​បាន​ឲ្យ​ដឹង​ថា​សេចក្តី​ព្រាង​ច្បាប់​ស្តីពី​សមាគម​ និង​អង្គការ​មិនមែន​រដ្ឋាភិបាល​ត្រូវ​បាន​ទទួល​ដោយ​គណៈកម្មការ​អចិន្រៃ្តយ៍​រដ្ឋសភា​រួច​ហើយ។

លោក​ថ្លែង​ថា បន្ទាប់ពី​កិច្ចប្រជុំ​របស់​សមាជិក​គណៈកម្មការ​ សេចក្តី​ព្រាង​ច្បាប់​នេះ​នឹង​ត្រូវ​​ផ្ញើ​ទៅ​ «គណៈកម្មការ​ជំនាញ​» របស់​រដ្ឋសភា​ដើម្បី​ពិនិត្យ​។ នៅពេល​ពិនិត្យ​ចប់​គណៈកម្មាធិការ​អចិន្រៃ្តយ៍​នឹង​សម្រេច​ថា​តើ​អនុម័ត​សេចក្តី​ព្រាង​ច្បាប់​នេះ​ ឬ​យ៉ាង​ណា? ហើយ​កំណត់​កាលបរិច្ឆេទ​សម្រាប់​រដ្ឋសភា​បោះឆ្នោត​ជា​ផ្លូវការ​។ លោក​ថា៖ «វា​កំពុង​ដំណើរការ​ក្នុង​រដ្ឋសភា​មុន​ពេល​យើង​ផ្ដល់​​ការ​អនុម័ត»។

ច្បាប់​ស្តីពី​អង្គការ​ក្រៅ​រដ្ឋាភិបាល​ដែល​សេចក្តី​ព្រាង​ច្បាប់​នេះ​ភ្នំពេញ​ប៉ុស្តិ៍​ទទួល​បាន​កាលពី​សប្តាហ៍​មុន​បាន​ធ្វើឲ្យ​មាន​ការ​ព្រួយបារម្ភ​ជាយូរ​មក​ហើយ​ក្នុង​ចំណោម​សង្គម​ស៊ីវិល​ដែល​ភ័យខ្លាច​ថា ច្បាប់​នេះ នឹង​ធ្វើឲ្យ​រាំង​ស្ទះ​មិនមែន​ជួយ​ដល់​​អង្គការ​ក្រៅ​រដ្ឋាភិបាល​ទេ។ ច្បាប់​នេះ​​ត្រូវ​បាន​អនុម័ត​ដោយ​ទីស្តី​ការ​គណៈរដ្ឋមន្រ្តី​កាលពី​ថ្ងៃ​ទី​ ៥ ខែ​មិថុនា​បន្ទាប់ពី​លោក​នាយករដ្ឋមន្រ្តី​ ហ៊ុន សែន បាន​ស្នើឲ្យ​លុប​ចោល​នូវ​មាត្រា ២ ដើម្បី​កាត់បន្ថយ​ការិយា​ធិបតេយ្យ។ សេចក្តី​ព្រាង​ច្បាប់​នេះ​មាន​បញ្ញតិ្ត​​​​​ជាច្រើន​ហើយ​មាន​ភាព​ស្រពេចស្រពិល និង​មាន​ការ​រឹតត្បឹត​ខ្លាំង។

បន្ទាប់ពី​ពិនិត្យ​​លើ​សេចក្តី​ព្រាង​ច្បាប់​ លោកស្រី Maina Kiai អ្នក​រាយការណ៍​ពិសេស​របស់​អង្គការ​សហប្រជា​ជាតិ​ស្តី​ពី​សិទ្ធិ​សេរីភាព​នៃ​ការ​ប្រមូល​ផ្តុំ​ដោយ​សន្តិ​វិធី​ និង​បង្កើត​សមាគម​បាន​ថ្លែង​ពី​សេចក្តី​ព្រាង​បច្ចុប្បន្ន​ថា «ហាក់បី​ដូចជា​អាក្រក់​ជាង​សេចក្តី​ព្រាង​ឆ្នាំ ២០១១ ដែល​រង​ការ​រិះគន់​ខ្លាំង​ទៅ​ទៀត​»។

លោកស្រី​ថ្លែង​ថា៖ «បញ្ហា​សំខាន់​បំផុត​ទាក់ទង​នឹង​សេចក្តី​ព្រាង​ច្បាប់​គឺ​ថា ច្បាប់​តម្រូវ​ឲ្យ​សមាគម​ទាំងអស់​ចុះ​​បញ្ជី និង​កំណត់​ថា​ជា​សមាគម​ជនល្មើស​ចំពោះ​សមាគម​ទាំងឡាយ​​ណា​ដែល​មិន​បាន​ចុះ​បញ្ជី»។

លោកស្រី​បញ្ជាក់​ថា៖ «ក្រុម​ណា​ដែល​ប្រមូល​ផ្តុំ​គ្នា​​ដើម្បី​បុព្វហេតុ​​រួម​មិន​ថា​ជា​បញ្ហា​សិទ្ធិ​មនុស្ស​ ឬ​ការ​សម្អាត​សង្កាត់​របស់​ពួកគេ​​ទេ​ គឺជា​សមាគម​ហើយ​តាម​សេចក្តី​ព្រាង​ច្បាប់​នេះ​រាល់​ក្រុម​ទាំងនោះ​​គឺជា​អង្គការ​ឧក្រិដ្ឋកម្ម​ ប្រសិន​បើ​ពួកគេ​មិន​បាន​ចុះ​បញ្ជី»។

លោកស្រី Kiai ​ឲ្យ​ដឹង​ថា​បញ្ញតិ្ត​​នៃ​សេចក្តី​ព្រាង​ច្បាប់​នេះ​គឺជា «ការ​រំលោភ​យ៉ាង​ច្បាស់​លើ​ច្បាប់​អន្តរជាតិ​» ហើយ​ «ខ្វះ​សុភវិនិច្ឆ័យ»។ លោកស្រី​​បន្ត​ថា៖ «​វា​មិនមែន​ជា​កិច្ចការ​របស់​រដ្ឋាភិបាល​​ទេ»។

លោកស្រី​បន្ថែម​ទៀត​ថា បញ្ហា​បន្ថែម​ទៀត​រួមមាន ការ​តម្រូវ​ឲ្យ​អង្គការ​ «​មាន​អព្យាក្រឹត​ភាព​ចំពោះ​​គណបក្ស​នយោបាយ​ទាំងអស់​»។

លោកស្រី​បាន​បញ្ជាក់​ថា៖ «ចំពោះ​ខ្ញុំ​ វា​ហាក់បី​ដូចជា​ថា​វា​អាច​​យក​មក​បកស្រាយ​យ៉ាង​ទូលាយ​ថា​ ការ​រិះគន់​លើ​​រដ្ឋាភិបាល​អាច​ត្រូវ​បាន​ហាមឃាត់​»។

លោក យឹម សុវណ្ណ អ្នក​នាំពាក្យ​គណបក្ស​ប្រឆាំង​បាន​និយាយ​ថា​គណបក្ស​សង្គ្រោះ​ជាតិ​​កំពុង​រង់ចាំ​មើល​សំណៅ​ផ្លូវការ​នៃ​សេចក្តី​ព្រាង​មុន​ពេល​ផ្ដល់​មតិ​យោបល់​​អំពី​ច្បាប់។ ប៉ុន្តែ លោក​បាន​ថ្លែង​ថា​ការ​ពិនិត្យ​លើ​សេចក្តី​ព្រាង ​«មិន​ផ្លូវ​ការ» ​បង្ហាញ​ថា «​សិទិ្ធ​របស់​សង្គម​ស៊ីវិល​ត្រូវ​បាន​កម្រិត​ច្រើន ដូច្នេះ​វា​ជា​​ការ​មិន​អាច​ទទួល​យក​បាន​ទេ» ។

ប៉ុន្តែ លោក ផៃ ស៊ីផាន អ្នក​នាំពាក្យ​ទីស្តីការ​គណៈរដ្ឋមន្រ្តី​បាន​អះអាង​ថា​បើ​ប្រៀបធៀប​ទៅ​នឹង​​ច្បាប់​​ក្នុង​ប្រទេស​ផ្សេង​ទៀត ​ច្បាប់​នេះ​នៅ​មាន​​កម្រិត​ស្រាល​ណាស់​ ។

លោក​បញ្ជាក់​ថា៖ «ប្រសិន​បើ​ពួកគេ​មិន​យល់​វា​សូម​ហៅ​រដ្ឋាភិបាល​យើង​ទៅ​ពន្យល់»។

យ៉ាង​ណា​ក៏ដោយ​លោកស្រី Kiai ​បាន​ថ្លែង​ថា​សេចក្តី​ព្រាង​ច្បាប់​ស្តី​ពី​អង្គការ​ក្រៅ​រដ្ឋាភិបាល​នេះ​ត្រូវ​​តែ​ផ្លាស់ប្តូរ​ជា​បន្ទាន់​ហើយ​ជំរុញ​ឲ្យ​រដ្ឋសភា​​ «ចូលរួម​ប្រឹក្សា​យោបល់​ប្រកប​ដោយ​អត្ថន័យ​ជាមួយ​ភាគី​ពាក់ព័ន្ធ​ទាំងអស់​ក្នុង​ដំណើរការ​ដែល​មាន​លក្ខណៈ​​ប្រជាធិបតេយ្យ​ពិតៗ»៕ TK

អត្ថបទគួរចាប់អារម្មណ៍