.jpg)
អ្នកញៀនគ្រឿងញៀន អង្គុយមុខបន្ទប់ព្យាបាលនាពេលកន្លងមក។
ភ្នំពេញៈ អ្នកញៀនគ្រឿងញៀនដែលបានមកទទួលសេវាព្យាបាលនៅតាមមណ្ឌលសុខភាពនានាមានសម្ទុះកើនឡើងទ្វេដងរហូតដល់ ១២០ ភាគរយ និងមណ្ឌលផ្តល់សេវាសុខភាពផ្លូវចិត្ត ហើយព្យាបាលគ្រឿងញៀនក៏មានសម្ទុះកើនឡើងយ៉ាងខ្លាំងដែរ ខណៈយុទ្ធនាការប្រឆាំងគ្រឿងញៀនរបស់រាជរដ្ឋាភិបាលបាននិងកំពុងតែអនុវត្តខ្លាំងឡើងៗ។
លោកស្រីវេជ្ជបណ្ឌិត ឱ វណ្ណឌីន អគ្គនាយកបច្ចេកទេសសុខាភិបាលនៃក្រសួងសុខាភិបាលប្រាប់អ្នកសារព័ត៌មានកាលពីថ្ងៃទី ២១ វិច្ឆិកា ថាអ្នកញៀនគ្រឿងញៀនដែលបានមកទទួលសេវាព្យាបាលក្នុងរយៈពេល ១០ ខែក្នុងឆ្នាំ ២០១៨ នេះមានរហូតទៅដល់ជាង ៣០០០ នាក់ហើយបើធៀបជាមួយឆ្នាំកន្លងទៅមានប្រហែល ១០០០ នាក់តែប៉ុណ្ណោះដែលធ្វើឲ្យអ្នកមកទទួលសេវាព្យាបាល ដើម្បីបន្សាបគ្រឿងញៀនមានការកើនឡើងរហូតដល់ទៅ ១២០ ភាគរយ។
បើយោងតាមរបាយការណ៍ប្រចាំឆមាសទី ១ ឆ្នាំ ២០១៨ របស់ក្រសួងសុខាភិបាលស្តីពីការព្យាបាលអ្នកញៀនគ្រឿងញៀនទូទាំងប្រទេសបានឲ្យដឹងថាចំនួនអ្នកញៀនគ្រឿងញៀនដែលមកទទួលការព្យាបាលនៅតាមសេវាសុខាភិបាលមានចំនួន ៣២៣១ នាក់ដែលក្នុងនោះមានប្រុស ៣០១៩ នាក់ស្រី ២១២ នាក់អ្នកញៀនប្រភេទអំហ្វេតាមីន ៣១០៨ នាក់ និងអ្នកញៀនប្រភេទហេរ៉ូអ៊ីន ១២៣ នាក់ ប៉ុន្តែកាលពីឆ្នាំ ២០១៧ ក្នុងឆមាសទី ១ មានអ្នកញៀនគ្រឿងញៀនដែលមកទទួលការព្យាបាលនៅតាមសេវាសុខាភិបាលមានចំនួនត្រឹមតែ ១៥៩៦ នាក់ប៉ុណ្ណោះ។
ក្នុងឱកាសចុះត្រួតពិនិត្យតង់ផ្សព្វផ្សាយអប់រំពីផលប៉ះពាល់ និងគ្រោះថ្នាក់នៃគ្រឿងញៀនក្រោមប្រធានបទ «ទាំងអស់គ្នា ដើម្បីការព្យាបាលអ្នកញៀនគ្រឿងញៀនដោយផ្អែកលើសហគមន៍» ដែលរៀបចំឡើងចំនួន ៣ ថ្ងៃក្នុងអំឡុងព្រះរាជពិធីបុណ្យអុំទូកនៅទីតាំងវត្តភ្នំលោកស្រី ឱ វណ្ណឌីន បានបញ្ជាក់ថា៖ «ចំនួននេះមានការកើនឡើងក្រោយពីយើងបានពង្រីកសេវា។ រហូតដល់ឥឡូវនេះបានកើនឡើង ៣០០០ ជាងហើយដែលបានមកទទួលសេវារបស់យើង បើយើងធៀបជាមួយនឹងឆ្នាំកន្លងទៅនេះមានតែជាង ១០០០ នាក់ប៉ុណ្ណោះ ដូច្នេះចំនួនតួលេខមានសម្ទុះកើនខ្លាំងរហូតទៅដល់ ១២០ ភាគរយ»។
លោកស្រីបន្ថែមថាការព្យាបាលអ្នកញៀនគ្រឿងញៀនមានភាពស្មុគស្មាញ ដែលទាមទារឱ្យមានការចូលរួមពហុវិស័យរួមមានអាជ្ញាធរជាតិប្រយុទ្ធប្រឆាំងគ្រឿងញៀន ក្រសួងសុខាភិបាល ស្ថាប័នអនុវត្តច្បាប់ និងអង្គការមិនមែនរដ្ឋាភិបាល គ្រួសារ និងសហគមន៍ក្នុងការធានាឱ្យការព្យាបាលមានប្រសិទ្ធភាព។ លោកស្រីអះអាងថាសម្រាប់អ្នកញៀនគ្រឿងញៀនចង់បន្សាបនោះគាត់ត្រូវមកទទួលការព្យាបាលជាមួយគ្រូពេទ្យ ២០ ដងក្នុង ១ ឆ្នាំ និងអនុវត្តតាមមិនអាក់ខាននឹងអាចបន្សាបភាពញៀននោះបានហើយ។
លោកស្រីបញ្ជាក់ថា៖ «វាជាការលំបាកណាស់ព្យាបាលអ្នកញៀនគ្រឿងញៀនពីព្រោះភាគច្រើនគាត់ឥតសូវយកចិត្តទុកដាក់ទេ។ គាត់មកម្តង ២ ដងអ៊ីចឹង គាត់អាក់ខាន គាត់លែងមកទៀត ដូច្នេះភាពលាប់របស់គាត់ធ្វើឲ្យគាត់ កាន់តែទៅប្រព្រឹត្តគ្រឿងញៀន ដូច្នេះអ៊ីចឹងចង់មិនចង់ បើគាត់មិនព្រមមកពិនិត្យថ្ងៃណាមួយគាត់នឹងចូលទៅក្នុងបទឧក្រិដ្ឋ ព្រោះគ្រឿងញៀននេះគឺជាបញ្ហាមួយដែលពាក់ព័ន្ធទៅនឹងបញ្ហាខួរក្បាល និងផ្លូវចិត្ដនៅពេលដែលគាត់ញៀនហើយ គឺគាត់នឹងលែងដឹងខុសត្រូវហើយរហូតទៅដល់ហ៊ានលើកដៃវាយ ហ៊ានសម្លាប់មាតាបិតាដែលជាអ្នកមានគុណរបស់គាត់ ឬក្រុមគ្រួសាររបស់គាត់ ដើម្បីទាររកលុយទិញគ្រឿងញៀន»។
លោក មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនប្រាប់ភ្នំពេញប៉ុស្តិ៍ពីម្សិលមិញថាមានការរៀបចំចាត់ចែងឲ្យមានគណៈកម្មការនៅតាមសហគមន៍នៅតាមឃុំនីមួយៗដោយមានអ្នកពាក់ព័ន្ធមួយចំនួនទៀត ដើម្បីស្វែងរកអ្នកញៀនគ្រឿងញៀនឲ្យមកទទួលសេវាព្យាបាល។
លោកថា៖ «មណ្ឌលសុខភាពតាមសហគមន៍បានដាក់ដំណើរការដែលធ្វើឲ្យមានអ្នកស្ម័គ្រចិត្តខ្លះទៅទទួលយកសេវាព្យាបាល។ ឥឡូវយើងបង្កើតឲ្យមានយន្តការនៅតាមឃុំ ឬសង្កាត់ដែលជាយន្តការមូលដ្ឋានក្នុងការពិនិត្យរកមើលអ្នកញៀនគ្រឿងញៀន និងប្រាប់អាណាព្យាបាល ឬមាតាបិតា ឬក៏បងប្អូនរបស់ពួកគេ ឬឲ្យខ្លួនគេផ្ទាល់ឲ្យមានភាពក្លាហានទៅទទួលការព្យាបាល»៕
